ଫ୍ରିଡମ୍ ଟ୍ରଫି ଟେଷ୍ଟ ସିରିଜ ଖେଳିବା ପାଇଁ ଦକ୍ଷିଣ ଆଫ୍ରିକା ଦଳ ଫାଫ ଡୁପ୍ଲେସିସ୍ଙ୍କ ନେତୃତ୍ୱରେ ଭାରତ ଗସ୍ତରେ ଆସୁଛି। ଗତବର୍ଷ ଟିମ୍ ଇଣ୍ଡିଆ ଦକ୍ଷିଣ ଆଫ୍ରିକା ଗସ୍ତ କରିଥିଲା। ଏହି ଗସ୍ତରେ ଯାଇ ବିରାଟ କୋହଲିଙ୍କ ନେତୃତ୍ୱରେ ଭାରତ ୩ଟି ଟେଷ୍ଟ ମ୍ୟାଚ ଖେଳିବା ସହିତ ୩ଟି ଏକଦିବସୀୟ ମ୍ୟାଚ ଏବଂ ୩ଟି ଟି୨୦ ମ୍ୟାଚ ଖେଳିଥିଲା। ଟେଷ୍ଟ ସିରିଜରେ ୨-୧ରେ ବିଜୟୀ ହେବା ପରେ ଦକ୍ଷିଣ ଆଫ୍ରିକା ଫ୍ରିଡମ୍ ଟ୍ରଫିର ଅଧିକାରୀ ହୋଇଥିଲା। ଦିନିକିଆ ବିଶ୍ୱକପରେ ଦୁର୍ବଳ ପ୍ରଦର୍ଶନ କରିବା ପରେ ବେଶ୍ ସମାଲୋଚିତ ହେବାକୁ ପଡିଛି ଦକ୍ଷିଣ ଆଫ୍ରିକା ଦଳକୁ। ପୁନର୍ଗଠନ ପ୍ରକ୍ରିୟା ମାଧ୍ୟମରେ ଦଳକୁ ଶକ୍ତିଶାଳୀ କରିବା ପାଇଁ ଯୁବ ଖେଳାଳିମାନଙ୍କୁ ଅଧିକ ସୁଯୋଗ ଦେଇଛି ଦକ୍ଷିଣ ଆଫ୍ରିକା କ୍ରିକେଟ୍ ବୋର୍ଡ। ହାସିମ ଅମଲା, ଜେପି ଡୁମିନି, ଏବି ଡିଭିଲିର୍ସ, କ୍ରିସ୍ ମୋରିସ୍, ଡେଲ୍ ଷ୍ଟେଇନ, ମର୍ନ ମୋର୍କେଲଙ୍କ ପରି ଅଭିଜ୍ଞ ଖେଳାଳିମାନେ ଅବସର ନେବା କିମ୍ବା ଆହତ ହେବା କାରଣରୁ ଏହି ଗସ୍ତରୁ ଓହରିଯିବା ଫଳରେ ବେଶ୍ ଦୁର୍ବଳ ହୋଇପଡିଛି ଦକ୍ଷିଣ ଆଫ୍ରିକା ଦଳ। ଟେଷ୍ଟ ମ୍ୟାଚ ଆରମ୍ଭ ପୂର୍ବରୁ ଦଳ ୩ଟି ଟି୨୦ ମ୍ୟାଚ୍ ଖେଳିବାର କାର୍ଯ୍ୟସୂଚୀ ପ୍ରକାଶିତ ହୋଇଛି। ପ୍ରଥମ ଟି୨୦ ମ୍ୟାଚ ସେପ୍ଟେମ୍ବର ୧୫ତାରିଖରେ ଧର୍ମଶାଳାଠାରେ, ଦ୍ୱିତୀୟ ଟି୨୦ ମ୍ୟାଚ୍ ସେପ୍ଟେମ୍ବର ୧୮ତାରିଖରେ ମୋହାଲିଠାରେ ଏବଂ ୩ୟ ଟି୨୦ ମ୍ୟାଚ୍ ସେପ୍ଟେମ୍ବର ୨୨ତାରିଖରେ ବେଙ୍ଗାଲୁରୁଠାରେ ଖେଳାଯିବ। ଉଭୟ ଦଳରେ ଯୁବ ଖେଳାଳିମାନଙ୍କୁ ବେଶ୍ ପ୍ରାଧାନ୍ୟ ଦିଆଯାଇଛି। ଦକ୍ଷିଣ ଆଫ୍ରିକା ଦଳରେ ଟେମ୍ବା ବଭୁମା, ଡି ବ୍ରୁଏନ୍, ଡିନ୍ ଏଲଗାର, ଯୁବେର ହାମଜା, ହେନେରିଚ୍ କ୍ଳାସେନ୍, କେଶବ ମହାରାଜ, ଏସ୍. ମୁଥୁସାମି, ଡେନ୍ ପେଟ୍ଙ୍କ ପରି ଯୁବ ଖେଳାଳିରହିଥିବା ବେଳେ ଫାଫ୍ ଡୁପ୍ଲେସି, କ୍ୱିଣ୍ଟନ ଡିକକ୍, ଲୁଙ୍ଗି ଏନ୍ଗିଡି, କାଗିସୋ ରାବାଡା, ଭର୍ନନ ଫିଲାଣ୍ଡରଙ୍କ ପରି ଅଭିଜ୍ଞ ଖେଳାଳି ରହିଛନ୍ତି।
ଖଲିଲ ଅହମ୍ମଦ, ଦୀପକ ଚହର, ରାହୁଲ ଚହର, ଶ୍ରେୟାସ ଆୟାର, ନବଦୀପ ସଇନି ଏବଂ ୱାଶିଂଟନ ସୁନ୍ଦରଙ୍କୁ ଟି୨୦ ପାଇଁ ସୁଯୋଗ ମିଳିବ। ହ୍ବାଇଟ ବଲ୍ ସ୍ପେଶିଆଲିଷ୍ଟ ରୋହିତ ଶର୍ମା, ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟା, ଆଇପିଏଲ୍ ଷ୍ଟାର କ୍ରୁନାଲ ପାଣ୍ଡ୍ୟା ଏବଂ ଷ୍ଟାଇଲିସ୍ ଓପନର ଶିଖର ଧାଓ୍ବନ, ବିଚକ୍ଷଣ ଅଧିନାୟକ ବିରାଟ କୋହଲି ଏବଂ ବିଶ୍ୱର ଶ୍ରେଷ୍ଠ ଉଇକେଟକିପର ଅଧିନାୟକ ମହେନ୍ଦ୍ର ସିଂ ଧୋନୀଙ୍କୁ ପଛରେ ପକାଇଥିବା ଯୁବ ଉଇକେଟକିପର ରିଷଭ ପନ୍ତଙ୍କ ଉପରେ ସିଲେକଶନ୍ କମିଟି ଆସ୍ଥା ପ୍ରକଟ କରିଛି।
ଗତ ଶୃଙ୍ଖଳାରେ ଭାରତ ୨-୧ରେ ଟି୨୦ ସିରିଜରେ ବିଜୟୀ ହୋଇଥିଲା। ପ୍ରଥମ ଟି୨୦ ମ୍ୟାଚରେ ଭାରତ ୨୦୩ ରନ୍ କରିଥିବା ବେଳେ ଶିଖର ଧାୱନ ସର୍ବାଧିକ ୭୩ ରନ୍ କରି ଅପରାଜିତ ରହିଥିଲେ। ଭୁବନେଶ୍ୱର କୁମାର ୨୪ ରନ୍ ଦେଇ ୫ଟି ଉଇକେଟ ନେଇ ଭାରତକୁ ବିଜୟୀ କରାଇଥିଲେ। ସେହି ଦ୍ୱିତୀୟ ଟି୨୦ ମ୍ୟାଚରେ ୧୮୮ରନ୍ର ଟାର୍ଗେଟକୁ ଦକ୍ଷିଣ ଆଫ୍ରିକା ଶେଷ ଓଭରରେ ହାସଲ କରିଥିଲା ଏବଂ ରୋମାଞ୍ଚକର ୩ୟ ଟି୨୦ ମ୍ୟାଚରେ ଭାରତ ୧୭୨ ରନ୍ କରିଥିବା ବେଳେ ଦକ୍ଷିଣ ଆଫ୍ରିକା ୧୬୫ ରନ୍ରେ ସୀମିତ ରହିଥିଲା।
୨୦୦୬ରୁ ୨୦୧୮ ପର୍ଯ୍ୟନ୍ତ ଉଭୟ ଦେଶ ମଧ୍ୟରେ ଖେଳାଯାଇଥିବା ୧୩ଟି ଟି୨୦ ମ୍ୟାଚ ମଧ୍ୟରୁ ୮ଟିରେ ଟିମ୍ ଇଣ୍ଡିଆ ବିଜୟୀ ହୋଇଥିବା ବେଳେ ଦକ୍ଷିଣ ଆଫ୍ରିକା ୫ଟିରେ ବିଜୟୀ ହୋଇ ପଛରେ ରହିଛି। ଫ୍ରିଡମ ଟ୍ରଫି ପାଇଁ ଲଢେଇ ଜୋରଦାର ହେବ। ଘରୋଇ ମାଟିରେ ଖେଳାଯିବାକୁ ଥିବା ଏହି ସିରିଜରେ ଟିମ୍ ଇଣ୍ଡିଆର ପଲା ଭାରି ରହିବ। ଘରୋଇ ମାଟିରେ ଟିମ୍ ଇଣ୍ଡିଆକୁ ହରାଇବା ଏତେ ସହଜ ହେବ ନାହିଁ। କାରିବିୟାନ ଟୁର୍ର ସଫଳତା ଘରୋଇ ଦଳକୁ ବେଶ୍ ଉସତ୍ାହିତ କରିଛି। ଯଦିଓ ଟିମ୍ ଇଣ୍ଡିଆ ବର୍ତ୍ତମାନ ଓପନର ସମସ୍ୟା ମଧ୍ୟ ଦେଇ ଗତି କରୁଛି ତଥାପି ଘରୋଇ କ୍ରିକେଟ୍ରେ ବେଶ୍ ସଫଳତା ପାଇଥିବା ପୃଥୀ ଶ, ମୟଙ୍କ ଅଗ୍ରୱାଲ, ହନୁମା ବିହାରୀ ଏବଂ ବେଙ୍ଗଲର ସଫଳ ଅଧିନାୟକ ଅଭିମନ୍ୟୁ ଈଶ୍ୱରନ୍ଙ୍କ ଉପରେ ନଜର ରହିବ।
ଟେଷ୍ଟ ରେକର୍ଡକୁ ଦେଖିବାକୁ ଗଲେ ଉଭୟ ଦେଶ ମଧ୍ୟରେ ୧୯୯୨ରୁ ୨୦୧୮ ମଧ୍ୟରେ ମୋଟ ୩୬ଟି ଟେଷ୍ଟ ମ୍ୟାଚ୍ ମୋଟ ୧୩ଟି ସିରିଜ ମାଧ୍ୟମରେ ଖେଳାଯାଇଛି। ଏଥି ମଧ୍ୟରୁ ୧୧ଟି ଟେଷ୍ଟ ମ୍ୟାଚ୍ ଟିମ୍ ଇଣ୍ଡିଆ ଜିତିଥିବା ବେଳେ ଦକ୍ଷିଣ ଆଫ୍ରିକା ୧୫ଟି ଟେଷ୍ଟ ମ୍ୟାଚ୍ ଜିତିଛି ଏବଂ ୧୦ଟି ଟେଷ୍ଟ ମ୍ୟାଚ୍ ଡ୍ର’ରେ ସମାପ୍ତ ହୋଇଛି। ଦକ୍ଷିଣ ଆଫ୍ରିକା ୭ଟି ଟେଷ୍ଟ ସିରିଜରେ ବିଜୟୀ ହୋଇଛି ଏବଂ ଭାରତ ୩ଟି ଜିତିଥିବା ବେଳେ ୩ଟି ସିରିଜ ଡ୍ର ରେ ସମାପ୍ତ ହୋଇଛି। ଦକ୍ଷିଣ ଆଫ୍ରିକା ବିପକ୍ଷରେ ଟିମ୍ ଇଣ୍ଡିଆର ସର୍ବାଧିକ ଟେଷ୍ଟ ସ୍କୋର ୬୪୩ ରନ୍ ରହିଥିବା ବେଳେ ଦକ୍ଷିଣ ଆଫ୍ରିକାର ସର୍ବାଧିକ ସ୍କୋର ୬୨୦ ରନ୍ ରହିଛି। ଉଭୟ ଦଳ ୯ଥର ୫ଶହରୁ ଊର୍ଦ୍ଧ୍ୱ ରନ୍ ସଂଗ୍ରହ କରିଥିବା ବେଳେ ଦକ୍ଷିଣ ଆଫ୍ରିକା ୫ଥର ଏବଂ ଭାରତ ୨ଥର ଏହି ଅଙ୍କ ଛୁଇଁଛି। ଦକ୍ଷିଣ ଆଫ୍ରିକା ବିପକ୍ଷରେ ଟିମ୍ ଇଣ୍ଡିଆର ସର୍ବନିମ୍ନ ସ୍କୋର ୬୬ ରନ୍ ୧୯୯୬ରେ ଡର୍ବାନ ଟେଷ୍ଟରେ ରହିଥିବା ବେଳେ ଦକ୍ଷିଣ ଆଫ୍ରିକାର ଭାରତ ବିପକ୍ଷରେ ୨୦୧୫ରେ ନାଗପୁର ଟେଷ୍ଟରେ ୭୯ ରନ୍ ରହିଛି।
ଟିମ୍ ଇଣ୍ଡିଆର ଅଧିନାୟକ ବିରାଟ କୋହଲି ଉଭୟ ଦେଶ ମଧ୍ୟରେ ସର୍ବାଧିକ ରନ୍ ସଂଗ୍ରହ କରିଛନ୍ତି। ସେ ଦକ୍ଷିଣ ଆଫ୍ରିକା ବିପକ୍ଷରେ ୯ଟି ଟେଷ୍ଟ ମ୍ୟାଚ୍ ଖେଳି ୭୫୮ ରନ୍ ସଂଗ୍ରହ କରିଥିବା ବେଳେ ତାଙ୍କର ସର୍ବାଧିକ ସ୍କୋର ୧୫୩ ରହିଛି ଏବଂ ଏଥିମଧ୍ୟରେ ୨ଟି ଶତକ ଏବଂ ୩ଟି ଅର୍ଦ୍ଧଶତକ ରହିଛି। ସେହିପରି ଚେତେଶ୍ୱର ପୂଜାରା ୧୧ଟି ମ୍ୟାଚରୁ ୬୧୩ ରନ୍ (୧ଟି ଶତକ/୩ଟି ଅର୍ଦ୍ଧଶତକ), ଅଜିଙ୍କ୍ୟ ରାହାନେ ୭ଟି ଟେଷ୍ଟ ମ୍ୟାଚରୁ ୫୩୨ ରନ୍ (୨ଟି ଶତକ/୨ଟି ଅର୍ଦ୍ଧଶତକ) ଏବଂ ଦକ୍ଷିଣ ଆଫ୍ରିକାର ଫାଫ୍ ଡୁପ୍ଲେସି ୭ଟି ମ୍ୟାଚରୁ ୩୪୪ ରନ୍ (୨ଟି ଅର୍ଦ୍ଧଶତକ) କରି ସଫଳ ରହିଛନ୍ତି। ବୋଲିଂରେ ଇଶାନ୍ତ ଶର୍ମା ୧୩ଟି ମ୍ୟାଚରେ ୨୯ଟି ଉଇକେଟ୍, ମହମ୍ମଦ ସାମି ୫ଟି ମ୍ୟାଚରୁ ୨୧ଟି, ଯଶପ୍ରୀତ ବୁମରା ୩ଟି ମ୍ୟାଚରୁ ୧୪ଟି, ଭୁବନେଶ୍ୱର କୁମାର ୨ଟି ମ୍ୟାଚରୁ ୧୦ଟି ଉଇକେଟ ଏବଂ ଦକ୍ଷିଣ ଆଫ୍ରିକାର ଦ୍ରୁତ ବୋଲର କେ. ରାବାଡା ୬ଟି ମ୍ୟାଚରୁ ୧୭ଟି ଉଇକେଟ୍ ଭି.ଡି ଫିଲେଣ୍ଡର ୬ଟି ମ୍ୟାଚରୁ ୨୮ଟି ଉଇକେଟ ନେଇଛନ୍ତି। ଏବଂ ଏଲ୍ ଲୁଙ୍ଗିଡ ୨ଟି ମ୍ୟାଚରୁ ୯ଟି ଉଇକେଟ ନେଇଛନ୍ତି।
