ନୂଆଦିଲ୍ଲୀ,୧୬ା୧୧(ପି.ଟି.): ଦିଲ୍ଲୀ- ଜାତୀୟ ରାଜଧାନୀ ଅଞ୍ଚଳ (ଏନ୍ସିଆର୍)ରେ ବାୟୁ ପ୍ରଦୂଷଣ ହ୍ରାସ କରିବା ଦିଗରେ କ’ଣ ପଦକ୍ଷେପ ନିଆଯାଇଛି, ଜଣାଇବା ପାଇଁ ସୁପ୍ରିମକୋର୍ଟ ଶୁକ୍ରବାର ପଞ୍ଜାବ, ହରିୟାଣା, ଉତ୍ତରପ୍ରଦେଶ ଓ ଦିଲ୍ଲୀର ମୁଖ୍ୟ ସଚିବମାନଙ୍କୁ ସମନ କରିଛନ୍ତି। ପ୍ରଦୂଷଣ ରୋକିବାକୁ ହେଲେ ପ୍ରଭାବଶାଳୀ ପଦକ୍ଷେପ ଜରୁରୀ। ଦିଲ୍ଲୀର ୧୩ଟି ପ୍ରଦୂଷଣ ମୁଖ୍ୟସ୍ଥଳକୁ ପରିଷ୍କାର କରିବାକୁ ହେବ ବୋଲି ଜଷ୍ଟିସ୍ ଅରୁଣ ମିଶ୍ର ଏବଂ ଦୀପକ ଗୁପ୍ତାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି। ଦିଲ୍ଲୀ ସରକାର ଗାଡ଼ି ଚାଳନା ହ୍ରାସ କରିବାକୁ ଯାଇ ଯୁଗ୍ମ-ଅଯୁଗ୍ମ ସୂତ୍ର ଲାଗୁ କରିଥିଲାବେଳେ ସେଥିରୁ ଦୁଇ ଓ ତିନି ଚକିଆ ଯାନକୁ ବାଦ୍ ଦେଇଥିବାରୁ ଏହା ଉପରେ ସର୍ବୋଚ୍ଚ ଅଦାଲତ ପ୍ରଶ୍ନ ଉଠାଇଛନ୍ତି। ଏହି ନିୟମ ଲାଗୁ କରିବା ସତ୍ତ୍ୱେ ଦିଲ୍ଲୀର ପ୍ରଦୂଷଣ ମାତ୍ରା ବଢ଼ୁଥିବାରୁ ଏହା ସମାଧାନର ସୂତ୍ର ନୁହେଁ ବୋଲି ଖଣ୍ଡପୀଠ କହିଛନ୍ତି। ନଡ଼ା ପୋଡି ହ୍ରାସ ପାଇବା ସତ୍ତ୍ୱେ ଦିଲ୍ଲୀରେ ପ୍ରଦୂଷଣ ସ୍ତର ଅଧିକ ଖରାପ ହେଉଥିବାରୁ ଅଦାଲତ ଉଦ୍ବେଗ ପ୍ରକାଶ କରିଛନ୍ତି। ଯୁଗ୍ମ-ଅଯୁଗ୍ମ ସୂତ୍ର ଲାଗୁ ହେବାଦ୍ୱାରା ପ୍ରଦୂଷଣ ହ୍ରାସ ପାଇଛି। ନଡ଼ା ପୋଡି ଯୋଗୁ ପ୍ରଦୂଷଣ ବଢ଼ୁଥିବା ଦିଲ୍ଲୀ ସରକାର ସର୍ବୋଚ୍ଚ ଅଦାଲତଙ୍କୁ କହିଥିଲେ।
‘ମିଳିତ ଉଦ୍ୟମ ଲୋଡ଼ା’
ଦିଲ୍ଲୀ ବାୟୁ ଦିନକୁ ଦିନ ଅଧିକ ଖରାପ ହେଉଥିବାରୁ ଏହାକୁ ରୋକିବା ଦିଗରେ ସବୁ ସଂସ୍ଥାର ମିଳିତ ଉଦ୍ୟମ ଆବଶ୍ୟକ ବୋଲି ଜଙ୍ଗଲ ଓ ପରିବେଶ ମନ୍ତ୍ରୀ ପ୍ରକାଶ ଜାଭଡେକର କହିଛନ୍ତି। କ୍ରମାଗତ ୪ ଦିନ ହେଲା ଦିଲ୍ଲୀ ବାୟୁର ମାନ ଅତ୍ୟନ୍ତ ଗୁରୁତର ବର୍ଗରେ ରହିଛି। ବିଷାକ୍ତ ସ୍ମୋଗ୍ର ବହଳ ଆସ୍ତରଣ ମହାନଗରୀକୁ ଆଚ୍ଛାଦିତ କରି ରଖିଛି। ଏପରି ସ୍ଥଳେ ସଂସ୍ଥାଗୁଡିକ ପରସ୍ପରକୁ ଦୋଷ ନ ଦେଇ ଏକାଠି କାମ କରିବା ଆବଶ୍ୟକ ବୋଲି ପରିବେଶ ମନ୍ତ୍ରୀ ଏକ ଖବରଦାତା ସମ୍ମିଳନୀରେ କହିଛନ୍ତି।
