ଭୁବନେଶ୍ୱର,୧୭ା୨(ବ୍ୟୁରୋ): ନୂଆ ଜୀବନ ପାଇଥିବା ରମାଦେବୀ ବିଶ୍ୱବିଦ୍ୟାଳୟର ଆଇଟି ଅଧ୍ୟାପିକା ନିବେଦିତା ସାହୁ ନୂଆ ସଂସାର ଗଢିବାକୁ ଯାଉଛନ୍ତି। ରବିବାର ନିବେଦିତାଙ୍କ ଗାଁ ଢେଙ୍କାନାଳ ମେରାମଣ୍ଡଳୀରେ ତାଙ୍କର ନିର୍ବନ୍ଧ ହୋଇଛି। ଶନିବାର ନିବେଦିତା ନିର୍ବନ୍ଧ ପାଇଁ ଘରକୁ ଯିବାକୁ ଭୁବନେଶ୍ୱର ରେଳ ଷ୍ଟେଶନରେ ଟ୍ରେନ୍କୁ ଚଢ଼ୁଥିବାବେଳେ ଖସିପଡ଼ିଥିଲେ। ଟ୍ରେନ୍ ତଳକୁ ଚାଲିଯାଉଥିବାବେଳେ ଦେବଦୂତ ସାଜି ଆର୍ପିଏଫ୍ କନ୍ଷ୍ଟେବଳ ସୁବ୍ରତ ମହାରଣା ତାଙ୍କୁ ଉଦ୍ଧାର କରିଥିଲେ। ନୂଆଜୀବନ ପାଇ ଫେରିଥିବା ନିବେଦିତା ଘରେ ପହଞ୍ଚତ୍ବା ପରେ ପରିବାରରେ ଖୁସିର ଲହରି ଖେଳିଯାଇଥିଲା। ଏପରି କି ତାଙ୍କୁ ବାପା, ମା ଓ ଅନ୍ୟମାନେ ଖୁସିରେ କୋଳେଇ ନେଇଥିଲେ। ରବିବାର ହସଖୁସିରେ ନିବେଦିତାଙ୍କ ନିର୍ବନ୍ଧ ସରିଥିବାବେଳେ ବରଘରେ ମଧ୍ୟ ନିଆରା ଆନନ୍ଦ ଦେଖିବାକୁ ମିଳିଛି।
ଘଟଣାକୁ ମନେ ପକାଇ ନିବେଦିତା କହିଛନ୍ତି, ଏହା ଏକ ବଡ଼ ଦୁର୍ଘଟଣା ଥିଲା। ଭଗବାନଙ୍କ ଦୟା ଓ ବଞ୍ଚାଇଥିବା ଆର୍ପିଏଫ୍ ଯବାନ ଭାଇଙ୍କ ପାଇଁ ମୁଁ ନୂଆ ଜୀବନ ପାଇଛି। ସେ ଭଗବାନଙ୍କ ଦୂତ ହୋଇ ଆସି ମୋତେ ବଞ୍ଚାଇଛନ୍ତି। ଟ୍ରେନରୁ ଗୋଡ଼ ଖସିଯିବା ପରେ କ’ଣ ହେଲା ମୋର ମନ ନାହିଁ। ମରିଗଲି ଭାବିଥିଲି। ପରେ ମୁଁ ବଞ୍ଚତ୍ଥିଲେ ମଧ୍ୟ ନିଜକୁ ବିଶ୍ୱାସ କରିପାରି ନ ଥିଲି। ମୁଁ ଭାବି ପାରିନଥିଲି ଯେ, ମୁଁ ଟ୍ରେନ୍ ତଳୁ ବଞ୍ଚତ୍କି ଆସିଛି। ଘଟଣା ପରେ ମୋର ମାନସିକ ସ୍ଥିତି ଭଲ ନ ଥିଲା। ଆଜି ମୁଁ ଧନ୍ୟବାଦ ଜଣାଉଛି, ପ୍ରଣାମ କରୁଛି ସେହି ପୋଲିସ ଭାଇଙ୍କୁ। ନିର୍ବନ୍ଧ ପାଇଁ ତାଙ୍କୁ ଡାକି ପାରିନି। କିନ୍ତୁ ବିବାହ ପାଇଁ ନିଶ୍ଚିତ ଡାକିବି ବୋଲି ନିବେଦିତା କହିଛନ୍ତି। ଏହାସହ ସେ କହିଛନ୍ତି, ଚଳନ୍ତା ଟ୍ରେନରେ ଚଢନ୍ତୁ ନାହିଁ। ଟ୍ରେନ୍ ଛାଡିବାର ୧୫ ମିନିଟ ଆଗରେ ଷ୍ଟେଶନରେ ପହଞ୍ଚତ୍ ଟ୍ରେନ ଧରନ୍ତୁ ବୋଲି ସେ ସମସ୍ତଙ୍କୁ ନିବେଦନ କରିଛନ୍ତି।
ଅନ୍ୟପକ୍ଷରେ ଜୀବନ ବଞ୍ଚାଇଥିବା ଆର୍ପିଏଫ୍ କନ୍ଷ୍ଟେବଳ ସୁବ୍ରତଙ୍କୁ ପୁରସ୍କୃତ କରାଯିବ। ଏନେଇ ଆରପିଏଫ୍ ଅଧିକାରୀ କେ.ସେଠୀ ରେଲ୍ଓ୍ବେ ଆଇଜିଙ୍କୁ ଘଟଣା ସଂକ୍ରାନ୍ତରେ ଅବଗତ କରାଇବା ପରେ ତାଙ୍କୁ ପୁରସ୍କାର ପାଇଁ ଡିଜି ଓ ଜିଏମ୍ଙ୍କୁ ଚିଠି ଲେଖାଯାଇଥିବା ସୂଚନା ମିଳିଛି। ସେହିଭଳି ସୁବ୍ରତଙ୍କ ଏଭଳି ମହାନ କାର୍ଯ୍ୟ ପାଇଁ ତାଙ୍କ ନିକଟକୁ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟୁଛି।
ବୋହୂ ଆମ ପାଇଁ ଲକ୍ଷ୍ମୀ
ଘଟଣା ସମ୍ପର୍କରେ ନିବେଦିତାଙ୍କ ଶ୍ୱଶୁର କହିଛନ୍ତି,ଆମ ବୋହୂ ଆମ ପାଇଁ ଲକ୍ଷ୍ମୀ। ବୋହୂର କର୍ମଫଳ ଭଲ ଥିଲା ବୋଲି ସେ ନୂଆ ଜୀବନ ପାଇଛନ୍ତି। ଆମ ବୋହୂ ଆମ ପାଇଁ ଲକି, ତେଣୁ ଆମେ ଗର୍ବ ଅନୁଭବ କରୁଛୁ। ଆମ ଘରକୁ ଗଲେ ଆମ ପାଇଁ ଭାଗ୍ୟବତୀ ହେବେ। ତାଙ୍କ ଜୀବନ ବଞ୍ଚାଇଥିବା ଯବାନ ଭାଇଙ୍କୁ ଧନ୍ୟବାଦ ଦେଉଛୁ।
ଜୀବନ ବଞ୍ଚାଇଥିବାରୁ ଖୁସି ଲାଗୁଛି : ସୁବ୍ରତ
ଜୀବନ ବଞ୍ଚାଇଥିବା ଆର୍ପିଏଫ୍ କନ୍ଷ୍ଟେବଳ ସୁବ୍ରତ କୁମାର ମହାରଣା କହିଛନ୍ତି, ଟ୍ରେନ ଛାଡି ଦେଇଥିବାରୁ ଭାଇ,ଭଉଣୀ ଚଳନ୍ତା ଟ୍ରେନରେ ଚଢୁଥିଲେ। ଭାଇ ତଳେ ଥିବାବେଳେ ଭଉଣୀ ଆଗେ ଚଢିଥିଲେ। ହେଲେ ତାଙ୍କ ହାତ ଖସିଯାଇଥିଲା। ତାଙ୍କର ଅଧା ଶରୀର ପ୍ଲାଟଫର୍ମ ଓ ଟ୍ରେନ୍ ଫାଙ୍କରେ ପଶିଯାଉଥିଲା। ମୁଁ ଏହା ଦେଖି ଦୌଡି ଯାଇ ତାଙ୍କୁ ଟାଣି ଉପରକୁ ନେଇଆସିଥିଲି। ଏହା ଆମର କର୍ତ୍ତବ୍ୟ ଓ ଧର୍ମ। ମୁଁ ଅନ୍ୟର ଜୀବନ ବଞ୍ଚାଇଥିବାରୁ ମୋତେ ଖୁସି ଲାଗୁଛି ବୋଲି ସେ କହିଛନ୍ତି।
