ଚେନ୍ନାଇ ୩ ଜଣ ଭାରତୀୟ ଛାତ୍ରୀଛାତ୍ର ଆମେରିକାର ମହାକାଶ ଗବେଷଣା କେନ୍ଦ୍ର (ନାସା) ପରିଦର୍ଶନ କରିବାର ସୁଯୋଗ ପାଇଛନ୍ତି। ସେମାନେ ହେଲେ ତାମିଲନାଡୁର ମଦୁରାଇସ୍ଥିତ ମହାତ୍ମା ମଣ୍ଟେସରି ମାଟ୍ରିକ ହାୟର ସେକେଣ୍ଡାରି ସ୍କୁଲର ୧୦ମ ଶ୍ରେଣୀ ଛାତ୍ରୀ ଜେ. ଧନ୍ୟା ଥାସନେମ୍, ଆନ୍ଧ୍ରପ୍ରଦେଶ ଗୁଣ୍ଟୁରସ୍ଥିତ ଭାଶ୍ୟମ୍ ଗ୍ରୁପ୍ ଅଫ୍ ସ୍କୁଲ୍ର ଛାତ୍ର ସାଇ ପୂଜିଥା ଏବଂ ମହାରାଷ୍ଟ୍ରର ଆଲିବାଗସ୍ଥିତ ଜିନ୍ଦଲ ବିଦ୍ୟା ମନ୍ଦିରର ଅଭିଷେକ ଶର୍ମା। ସେମାନେ ସେଠାରେ ମହାକାଶଚାରୀଙ୍କୁ ମହାକାଶ ଗବେଷଣା ସମ୍ପର୍କିତ ବିଭିନ୍ନ ବିଷୟ ପଚାରି ବୁଝିବେ। ସେମାନେ ଅକ୍ଟୋବର ପ୍ରଥମ ସପ୍ତାହରେ ନାସା ପରିଦର୍ଶନରେ ଯିବେ ବୋଲି ‘ଗୋ ଫର୍ ଗୁରୁ’ ଦ୍ୱାରା ଜାରି ଏକ ବିବୃତିରେ କୁହାଯାଇଛି। ଏହା ହେଉଛି ଆମେରିକାଭିତ୍ତିକ ଏକ ଅନ୍ଲାଇନ୍ ଟ୍ୟୁଟରିଂ ଆଣ୍ଡ ଏଜୁକେଶନାଲ ଟୁର୍ ସର୍ଭିସେସ୍ କମ୍ପାନି। ୨୦୧୯ରେ ଜାତୀୟ ମହାକାଶ ବିଜ୍ଞାନ ପ୍ରତିଯୋଗିତାରେ ଭାରତରୁ ୩ ଛାତ୍ରୀଛାତ୍ର ବିଜୟୀ ହୋଇଥିଲେ। ଏଥିପାଇଁ ଅନଲାଇନ୍ ଯୋଗେ ବିଜ୍ଞାନ ଓ ସାଧାରଣ ଜ୍ଞାନ ଦକ୍ଷତା ପରୀକ୍ଷା କରାଯାଇଥିଲା।
