ଗୁଆହାଟୀ/ନୂଆଦିଲ୍ଲୀ/କୋଲକାତା, ୧୪ା୧୨(ପି.ଟି./ଆଇଏଏନ୍ଏସ୍): ନୂଆ ନାଗରିକତ୍ୱ ଆଇନକୁ ନେଇ ଉତ୍ତର-ପୂର୍ବାଞ୍ଚଳରେ ଚାଲିଥିବା ଆନ୍ଦୋଳନର ନିଆଁ ଶୁକ୍ରବାର ପଶ୍ଚିମବଙ୍ଗକୁ ବ୍ୟାପିଛି। ଆସାମ, ତ୍ରିପୁରା, ମଣିପୁର, ସିକିମ, ମେଘାଳୟ ଓ ତ୍ରିପୁରାରେ ସ୍ଥିତି ସାମାନ୍ୟ ସୁଧୁରିଥିବାବେଳେ ପଡ଼ୋଶୀ ପଶ୍ଚିମବଙ୍ଗରେ ବ୍ୟାପକ ହିଂସା ଏବଂ ପୋଡ଼ାଜଳା ଦେଖିବାକୁ ମିଳିଛି। ବିକ୍ଷୋଭକାରୀମାନେ କେତେକ ରେଳଷ୍ଟେଶନରେ ଭଙ୍ଗାରୁଜା କରିଛନ୍ତି। ସେପଟେ ଏହି ଆଇନକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟରେ ବିଭିନ୍ନ ରାଜନୈତିକ ଦଳ ଓ ସଙ୍ଗଠନ ପକ୍ଷରୁ ଦାଏର ପିଟିଶନ ସଂଖ୍ୟା ବଢ଼ିବାରେ ଲାଗିଛି। ବିକ୍ଷୋଭକୁ ଦୃଷ୍ଟିରେ ରଖି ସ୍ବରାଷ୍ଟ୍ରମନ୍ତ୍ରୀ ଅମିତ୍ ଶାହା ମେଘାଳୟ ଓ ଅରୁଣାଚଳ ପ୍ରଦେଶ ଗସ୍ତକୁ ବାତିଲ କରିଦେଇଛନ୍ତି।
ରାଷ୍ଟ୍ରପତି ରାମନାଥ କୋବିନ୍ଦ ନାଗରିକତ୍ୱ ସଂଶୋଧନ ବିଲ୍ରେ ସ୍ବାକ୍ଷର କରିବା ପରେ ଏହା ଆଇନରେ ପରିଣତ ହୋଇଛି। ଉତ୍ତର-ପୂର୍ବାଞ୍ଚଳ ରାଜ୍ୟଗୁଡ଼ିକ ଜଳୁଥିବାବେଳେ ରାଷ୍ଟ୍ରପତି ଉକ୍ତ ବିଲ୍କୁ ଅନୁମୋଦନ ଦେବା ଦୁର୍ଭାଗ୍ୟଜନକ ବୋଲି ଆସାମ ରାଜଧାନୀ ଗୁଆହାଟୀରେ ଗଣବିକ୍ଷୋଭ କରାଯାଇଛି। ଅଲ୍ ଆସାମ ଷ୍ଟୁଡେଣ୍ଟ ୟୁନିୟନ୍ (ଏଏଏସ୍ୟୁ) ପକ୍ଷରୁ ଦିଆଯାଇଥିବା ଅନଶନ ଡାକରାରେ ଛାତ୍ରୀଛାତ୍ର, ବରିଷ୍ଠ ନାଗରିକ, କଳାକାର ଓ ଶିକ୍ଷକମାନେ କର୍ଫ୍ୟୁକୁ ଅମାନ୍ୟ କରି ସାମିଲ ହୋଇଛନ୍ତି। ସେମାନେ ନୂଆ ଆଇନକୁ ଗ୍ରହଣ କରିବେ ନାହିଁ ବୋଲି କହିଛନ୍ତି। ଆସାମ ମୁଖ୍ୟମନ୍ତ୍ରୀ ସର୍ବାନନ୍ଦ ସୋନୋଓ୍ବାଲ କହିଛନ୍ତି, ଭାଜପା ନେତୃତ୍ୱାଧୀନ ସରକାର ବିରୋଧରେ ଷଡ଼ଯନ୍ତ୍ର ଚାଲିଛି। ଏଥିରେ କଂଗ୍ରେସ, ବାମପନ୍ଥୀ ଓ କେତେକ ସାମ୍ପ୍ରଦାୟିକ ଶକ୍ତି ସାମିଲ ଅଛନ୍ତି। ହିଂସାରେ ସମ୍ପୃକ୍ତ ବ୍ୟକ୍ତିମାନଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନିଆଯିବ ବୋଲି ସେ ଚେତାବନୀ ଦେଇଛନ୍ତି। ସିବିଏ ବିରୋଧୀ ଆନ୍ଦୋଳନ ପଶ୍ଚିମବଙ୍ଗରେ ପହଞ୍ଚତ୍ଛି। ସଂଖ୍ୟାଲଘୁ ସମ୍ପ୍ରଦାୟର ଆନ୍ଦୋଳନକାରୀମାନେ ଅପରାହ୍ନ ୩ଟା ୨୨ରେ ରେଳପଥ ଅବରୋଧ କରିଥିଲେ। ଫଳରେ ଟ୍ରେନ୍ ଚଳାଚଳ ବାଧାପ୍ରାପ୍ତ ହୋଇଥିଲା। ହାଓଡା ଜିଲାର ଉଲୁବେରିଆ ଷ୍ଟେଶନରେ ସେମାନେ ବ୍ୟାପକ ଭଙ୍ଗାରୁଜା କରିଥିଲେ। ସେମାନଙ୍କ ଆକ୍ରମଣରେ ଜଣେ ଟ୍ରେନ୍ ଡ୍ରାଇଭର ଆହତ ହୋଇଛନ୍ତି। ସେହିପରି ମୁର୍ଶିଦାବାଦ ଜିଲାର ଏକ ଷ୍ଟେଶନ କମ୍ପ୍ଲେକ୍ସରେ ବିକ୍ଷୋଭକାରୀମାନେ ନିଆଁ ଲଗାଇ ଦେଇଛନ୍ତି। ହମ୍ସଫର ଏକ୍ସପ୍ରେସ୍କୁ ମଧ୍ୟ ଆନ୍ଦୋଳନକାରୀ ଟାର୍ଗେଟ କରିଥିବା ସାଉଥ୍ ଇଷ୍ଟର୍ନ ରେଲଓ୍ବେ ମୁଖପାତ୍ର ସଞ୍ଜୟ ଘୋଷ ସୂଚନା ଦେଇଛନ୍ତି।
