ନୂଆଦିଲ୍ଲୀ,୨୪।୮: ପୂର୍ବତନ ଅର୍ଥମନ୍ତ୍ରୀ ତଥା ଭାଜପାର ବରିଷ୍ଠ ନେତା ଅରୁଣ ଜେଟଲୀ ଆଉ ଆମ ଗହଣରେ ନାହାଁନ୍ତି ସତ। ହେଲେ ତାଙ୍କର କିଛି କାର୍ଯ୍ୟ ଏବେବି ଅନେକଙ୍କ ମନରେ ଅଭୁଲା ହୋଇ ରହିଯାଇଛି। ୬୬ ବର୍ଷ ବୟସରେ ଶନିବାର ଜେଟଲୀଙ୍କର ପରଲୋକ ହୋଇଛି। ତେବେ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିଓ୍ବାଲ ଅତିତରେ ଜେଟଲୀଙ୍କ ନାଁରେ ଆଣିଥିବା ଭ୍ରଷ୍ଟାଚାର ମାମଲାକୁ ନେଇ ଶେଷରେ କେଜରିଓ୍ବାଲ ତାଙ୍କୁ କ୍ଷମା ମାଗିବା ସହ ସମସ୍ତ ଅଭିଯୋଗକୁ ଫେରାଇ ନେଇଥିବା ଘଟଣା ଆଜିବି ଅଭୁଲା ହୋଇ ରହିଛି। ଜେଟଲୀ ଯେତେବେଳେ ଡିଡିସିଏର ଅଧ୍ୟକ୍ଷ ଥିଲେ ସେତେବେଳେ ସେ ୧୩ ବର୍ଷ ମଧ୍ୟରେ ଭଷ୍ଟ୍ରାଚାର କରିଥିଲେ ବୋଲି କେଜରିଓ୍ବାଲଙ୍କ ସମେତ ତାଙ୍କ ଦଳର ନେତାମାନେ ଅଭିଯୋଗ କରିଥିଲେ। ଏହାପରେ ଜେଟଲୀ କେଜରିଓ୍ବାଲଙ୍କ ସମେତ କୁମାର ବିଶ୍ୱାସ, ଆଶୁତୋଷ, ସଞ୍ଜୟ ସିଂ, ରାଘବ ଚଡ୍ଡା ଓ ଦୀପକ ବାଜପେୟୀଙ୍କ ନାଁରେ ମାନହାନୀ ମାମଲା କରିବା ସହ ୧୦ କୋଟି ଟଙ୍କା କ୍ଷତି ପୂରଣ ରାଶି ଦାବି କରିଥିଲେ। ଏହାପରେ ଦିଲ୍ଲୀ ହାଇକୋର୍ଟ ଦୌଡି ଦୌଡି ଶେଷରେ କେଜରିଓ୍ବାଲ ଜେଟଲୀ ଓ ତାଙ୍କ ପରିବାରକୁ କ୍ଷମା ମାଗିବା ସହ ସମସ୍ତ ଅଭିଯୋଗକୁ ଫେରାଇ ନେଇଥିଲେ ବୋଲି ଘୋଷଣା କରିଥିଲେ।
