ନାଗପୁର, ୨୧ା୧୨(ପି.ଟି.): ବହୁକୋଟି ଟଙ୍କାର ଜଳସେଚନ ଦୁର୍ନୀତି ମାମଲାରେ ମହାରାଷ୍ଟ୍ରର ଦୁର୍ନୀତି ବିରୋଧୀ ଶାଖା(ଏସିବି) ପକ୍ଷରୁ ଏନ୍ସିପିର ବରିଷ୍ଠ ନେତା ଅଜିତ ପାଓ୍ବାରଙ୍କୁ କ୍ଲିନଚିଟ୍ ଦିଆଯାଇଛି। ବମ୍ବେ ହାଇକୋର୍ଟର ନାଗପୁର ବେଞ୍ଚ୍ରେ ଦାଖଲ କରାଯାଇଥିବା ସତ୍ୟପାଠରେ ଅଜିତଙ୍କ ବିରୋଧରେ କୌଣସି ଆପରାଧିକ ଅଭିଯୋଗ ନ ଥିବା ଜଣାପଡ଼ିଛି। ଅଜିତଙ୍କୁ କ୍ଲିନଚିଟ୍ ନେଇ ଭାଜପା ପ୍ରଶ୍ନ ଉଠାଇବା ସହ କୋର୍ଟର ଦ୍ୱାରସ୍ଥ ହେବାକୁ ମହାରାଷ୍ଟ୍ରର ପୂର୍ବତନ ମୁଖ୍ୟମନ୍ତ୍ରୀ ଦେବେନ୍ଦୟ ଫଡ୍ନବିସ ଧମକ ଦେଇଛନ୍ତି। ପୂର୍ବରୁ ନାଗପୁର ଏସିବି ଓ ଅମରାବତୀ ଏସିବି ଶାଖା ସତ୍ୟପାଠରେ ଅଜିତଙ୍କୁ କ୍ଲିନଚିଟ୍ ଦିଆଯାଇଥିବାବେଳେ ଏଥିରେ ବଡ଼ ଅଧିକାରୀମାନେ ସାମିଲ ଥିବା ନେଇ କୋର୍ଟରେ ଏକ ଜନସ୍ବାର୍ଥ ମାମଲା ଦାଏର କରାଯାଇଥିଲା। ପ୍ରକାଶଥାଉ କି, ୧୯୯୯-୨୦୦୯ରେ କଂଗ୍ରେସ-ଏନ୍ସିପି ସରକାରରେ ଅଜିତ ଜଳସମ୍ପଦ ମନ୍ତ୍ରୀ ଥିବାବେଳେ ବିଦର୍ଭ ଜଳସେଚନ ବିକାଶ ନିଗମର ୧୨ ପ୍ରକଳ୍ପ ନିର୍ମାଣରେ ବହୁକୋଟି ଟଙ୍କା ଦୁର୍ନୀତି ହୋଇଥିବା ଅଭିଯୋଗ ହୋଇଥିଲା।
