ଏହି ଜଳବାୟୁ ପରିବର୍ତ୍ତନ ଏକ ସମୟରେ ହୁଏତ ଗୋଟିଏ ଜିଲା, ଦୁଇଟି ରାଜ୍ୟ, ତିନୋଟି ଦେଶ, ଚାରୋଟି ମହାଦେଶରେ ହୋଇପାରେ; ମାତ୍ର ସାରା ପୃଥିବୀରେ ଘଟି ନ ପାରେ। ଜଳବାୟୁ ପରିବର୍ତ୍ତନର ପ୍ରଭାବ ସ୍ଥାନିକ (ସମୀମ/ଅସୀମ) କିମ୍ବା ଲୌକିକ ଘଟିଥିଲା। ପୁନଶ୍ଚ ବ୍ରିଟେନ, ୟୁରୋପ, ଉତ୍ତର ଆମେରିକା ଓ ଜାପାନରେ ୧୮୫୦-୧୯୩୦ ମଧ୍ୟରେ ୨ୟ ଶିଳ୍ପ ବିପ୍ଳବ ହୋଇଥିଲା। ପୁନଶ୍ଚ ବାତଚକ୍ରର ଇତିହାସକୁ ଅନୁଧ୍ୟାନ କଲେ ୧୬୪୩ରୁ ୧୮୫୧ ମଧ୍ୟରେ ଆମେରିକାରେ ବର୍ଷକୁ କଁା ଭଁା ଗୋଟିଏ ଲେଖାଏଁ ଟର୍ଣ୍ଣାଡ଼ୋ (ପ୍ରଳୟ) ଘଟୁଥିଲା, କିନ୍ତୁ ୧୯୨୧-୧୯୩୦ ଏବଂ ୨୦୦୦-୨୦୧୦ ମଧ୍ୟରେ ବର୍ଷକୁ ହାରାହାରି ଭାବରେ ଯଥାକ୍ରମେ ୧.୩ ଏବଂ ୭.୨ ଟର୍ଣ୍ଣାଡ଼ୋ ହୋଇଛି। ଅତୀତରେ ଭାରତରେ ବିଶେଷକରି ଉପକୂଳ ଅଞ୍ଚଳରେ ଝଡ଼ କିମ୍ବା ତୋଫାନ ଦୈବାତ୍ ଘଟୁଥିଲା। ସେତେବେଳେ ଲୋକମାନେ ଏହାକୁ ପ୍ରକୃତିର ମର୍ଜି ବୋଲି କହୁଥିଲେ।
ଜଳବାୟୁ ପରିବର୍ତ୍ତନର ସମ୍ଭାବ୍ୟ ପରିଣାମ
ତାପମାତ୍ରାରେ ବୃଦ୍ଧି ଘଟିବ। ପ୍ରାଣୀ ବିଶେଷକରି ସରୀସୃପମାନଙ୍କର ଲିଙ୍ଗ ଅନୁପାତରେ ବିଷମତା ଘଟି ପ୍ରଜାତି ନିଶ୍ଚିହ୍ନ ହୋଇଯିବେ। ଉଦ୍ଭିଦମାନଙ୍କର ଋତୁକାଳୀନ ଚେହେରାରେ ପରିବର୍ତ୍ତନ ଆସିବ। ଅଙ୍ଗୀୟ ବୃଦ୍ଧି ସମୟରେ ହ୍ରାସ ଘଟି ହଠାତ୍ ପ୍ରଜନନ ପର୍ଯ୍ୟାୟ ଆସିବାରୁ ଉତ୍ପାଦନରେ ହ୍ରାସ ଘଟିବ। ଏହା ଦର୍ଶାଯାଉଅଛି ଯେ ଗ୍ରୀନ୍ଲ୍ୟାଣ୍ଡ୍ର ଗଚ୍ଛିତ ବରଫରାଶି ବାର୍ଷିକ ୨୮୦ ବିଲିୟନ ଟନ୍ ହାରରେ ତରଳୁଅଛି; ଫଳରେ ଆସନ୍ତା ଦଶନ୍ଧିରେ ସମୁଦ୍ର ଜଳ ପତ୍ତନ ୩.୨ ମିଟର ବୃଦ୍ଧି ପାଇବ। ସମୁଦ୍ର ଜଳ ଅଧିକ ଅମ୍ଳ ହେବ। ଅତଏବ ଜଳଚରମାନଙ୍କର ଖାଦ୍ୟ ଏବଂ ବାସସ୍ଥାନ ଆଶଙ୍କିତ ହେବ। ସ୍ଥଳରେ ଏବଂ ନଭଶ୍ଚର ଜୀବମାନଙ୍କର ଖାଦ୍ୟଶୃଙ୍ଖଳ ମଧ୍ୟ ପ୍ରଭାବିତ ହେବ। ଉଭୟ ଜଳମିତ୍ର ଉଦ୍ଭିଦ ଯଥା- ବିଲାତିଦଳ, ବ୍ରାହ୍ମୀ ଇତ୍ୟାଦି ଏବଂ ଜଳଅଇରୀ ଉଦ୍ଭିଦ ଯଥା- ସାରୁ, ପଦ୍ମ ଇତ୍ୟାଦି ଆଶଙ୍କିତ ହେବେ। ପ୍ରକ୍ରିୟାକରଣ ଖାଦ୍ୟ ଖାଉଥିବା ସଜୀବ ଅଧିକ ତିଷ୍ଠି ରହିବେ। ପର୍ବତ ଏବଂ ଉପକୂଳଠାରୁ ମାଳଭୂମି ମନୁଷ୍ୟ ପାଇଁ ନିରାପଦ ହେବ।
ଆମେ ବିବର୍ତ୍ତନତତ୍ତ୍ୱରେ ବିଶ୍ୱାସକରୁ; ସୃଷ୍ଟିତତ୍ତ୍ୱ, ବିଚାର ବାହାରେ ରହୁ। ବିବର୍ତ୍ତନରେ ଅନେକ ଜୀବ ପ୍ରଜାତି କାଳକ୍ରମେ ଧରାପୃଷ୍ଠରୁ ନିଶ୍ଚିହ୍ନ ହୋଇଛନ୍ତି, ହେଉଛନ୍ତି ମଧ୍ୟ (ଡାଏନୋସର, କଟକୀଧାନ ଇତ୍ୟାଦି) ଏବଂ ଅନେକ ବସ୍ତୁ/ପଦ୍ଧତି ଦୀର୍ଘ ସମୟ ଧରି ଅବ୍ୟବହୃତ ହୋଇପଡ଼ିଛନ୍ତି (ପରକଲମ, ଝରକଲମ, ଢିଙ୍କି, ଦାଉଁଶୀ, ବେଙ୍ଗଳା ଇତ୍ୟାଦି)। ଏହି ଧାରା ବହୁତ ମନ୍ଥର ଥିଲା ଏବଂ ସଜୀବ/ନିର୍ଜୀବଙ୍କ ପାଇଁ ଜଳବାୟୁ ପରିବର୍ତ୍ତନ ବୋଲି କହିପାରିବା। ବର୍ତ୍ତମାନ ମନୁଷ୍ୟର ହସ୍ତକ୍ଷେପ ଯୋଗୁ ଏହି ପରିବର୍ତ୍ତନ ଦ୍ରୁତଗତିରେ ଘଟୁଛି ଏବଂ ତାହାର ପରିଣାମକୁ ସମସ୍ତେ ସମ୍ମୁଖୀନ ହେଉଛନ୍ତି। ଏହି ପରିବର୍ତ୍ତନ କିମ୍ବା ବିବର୍ତ୍ତନ କିମ୍ବା ଜୈବ ହସ୍ତକ୍ଷେପଜନିତ ବିବର୍ତ୍ତନ କିମ୍ବା ମନୁଷ୍ୟକୃତ ବିବର୍ତ୍ତନ (କୃତ୍ରିମ ବିବର୍ତ୍ତନ); କ’ଣ କୁହାଯିବ? ଶ୍ରୀକୃଷ୍ଣଙ୍କର ଉନ୍ନତ ଶୌର୍ଜ୍ୟ ଯଦୁବଂଶ କାଦମ୍ବରୀ ପାନ କରି ଧ୍ୱଂସ ହେବା, ନେପୋଲିୟନ୍ଙ୍କର ୫,୮୦,୦୦୦ ସୈନ୍ୟ ରୁଷିଆର ଶୀତରେ ପ୍ରାଣ ହାରିବା, ପୃଥିବୀ ପୃଷ୍ଠରୁ ପ୍ରଗତି ନାମରେ ବନସ୍ପତିକୁ ଧ୍ୱଂସ କରିବା କ’ଣ ସମାନ କଥା? ପ୍ରଥମରେ କର୍ତ୍ତା ଜ୍ଞାତ ଥିଲେ, ୨ୟରେ କର୍ତ୍ତା ଅଜ୍ଞାତ ଥିଲେ, ୩ୟରେ ସାମ୍ୟବାଦ/ ସମାଜବାଦ/ପୁଞ୍ଜିବାଦ/ଏକଚ୍ଛତ୍ରବାଦ ଇତ୍ୟାଦି ଜ୍ଞାତ ହୋଇ ମଧ୍ୟ ଅଜ୍ଞାତ ରହୁଛନ୍ତି। ଉଦ୍ଭିଦ ବାୟୁମଣ୍ଡଳରୁ ବାର୍ଷିକ ୩୬୭ ଗିଗାଟନ୍ (ମତାନ୍ତରରେ ୪୩୯ ଗିଗାଟନ୍) ଅଙ୍ଗାରକାମ୍ଳ ଗ୍ରହଣ କରି, ସମତୁଲ ମାତ୍ରାରେ ଖାଦ୍ୟ, ତନ୍ତୁ ଏବଂ ଅମ୍ଳଜାନ ଦେଇଥାଏ। ଏହା ସତ୍ୟ ଯେ, ଦିନକୁ ଦିନ କଳକାରଖାନା, ମୋଟରଯାନ ଇତ୍ୟାଦିରୁ ଅଙ୍ଗାରକାମ୍ଳ ଗ୍ୟାସ୍ର ନିର୍ଗମନ ବଢ଼ିବଢ଼ି ଚାଲିଛି। ଅନ୍ୟପକ୍ଷରେ ବୃକ୍ଷଲତା ସଂଖ୍ୟା ହ୍ରାସ ପାଉଛି। ଫଳରେ ବାୟୁମଣ୍ଡଳରେ ବୃଦ୍ଧିପାଉଥିବା ଅଙ୍ଗାରକାମ୍ଳ ଗ୍ୟାସ୍ (ଉଦାହରଣ ସ୍ବରୂପ ୦.୦୪୦%ରୁ ୦.୦୪୫% ବୃଦ୍ଧି, ଅର୍ଥାତ୍ ୪୦୦ ପିପିଏମ୍ରୁ ୪୫୦ ପିପିଏମ୍କୁ ବୃଦ୍ଧି) ବିଶ୍ୱ ତାପମାତ୍ରା ତଥା ଜଳବାୟୁ ପରିବର୍ତ୍ତନର ମୁଖ୍ୟ କାରଣ ହୋଇଅଛି। ତେଣୁ ନୀତି ପ୍ରଣୟନକାରୀମାନେ ପରମାଣୁ ଅସ୍ତ୍ର ନିରସ୍ତ୍ରୀକରଣ ସନ୍ଧି ପରି ପ୍ରଥମେ ରାଜିହୋଇ କାର୍ବନ ଛାଡ଼ୁଥିବା ୟୁନିଟ୍ଗୁଡ଼ିକର ସଂଖ୍ୟାରେ କାଟ୍ଛାଣ୍ଟ କରି ବହୁଳମାତ୍ରାରେ ବୃକ୍ଷରୋପଣ ପାଇଁ ନିଷ୍ପତ୍ତି ନେବେ। ଦ୍ରୁତ ବୃଦ୍ଧି (ଗ୍ରୋଥ୍ ରିଙ୍ଗର ମୋଟେଇ ୫-୨୫ ମିମି) ତଥା ବହୁମୁଖୀ ପ୍ରତ୍ୟକ୍ଷ ଉପଯୋଗିତା ସହିତ ଧାର୍ଯ୍ୟ ଅମଳ ସମୟ ବୃକ୍ଷ ପ୍ରଜାତିକୁ ସହଜଗମ୍ୟ ସମସ୍ତ ପତିତ ଜମିରେ ଏବଂ ମନ୍ଥରବୃଦ୍ଧି (ଗ୍ରୋଥ୍ରିଙ୍ଗ୍ର ମୋଟେଇ ପ୍ରାୟ ୧ ମିମି) ତଥା ପରୋକ୍ଷ ଉପକାର ଦେଉଥିବା ସହିତ ଦୀର୍ଘଜାବୀ ବୃକ୍ଷ ପ୍ରଜାତିକୁ ଅଗମ୍ୟ ପତିତ ଜମିରେ ରୋପଣ କରାଯିବ। ଉତ୍ତରଦାୟିତ୍ୱ ଧାର୍ଯ୍ୟ ହେବା ଉଚିତ ମଧ୍ୟ। (ଶେଷ ଭାଗ)
ମନୋରଞ୍ଜନ ମହାନ୍ତି
-ବୈଜ୍ଞାନିକ ,କୃଷିବିଜ୍ଞାନ କେନ୍ଦ୍ର, ଢେଙ୍କାନାଳ (ଓୟୁଏଟି), ମହିଷାପାଟ
ମୋ : ୯୪୩୭୬୭୧୪୦୨
