ଚୁମ୍କି ସେ ତ ପାଣିରେ ବୁଡ଼ିବ ନାହିଁ କି-ଥରେ ମନେପକାନ୍ତୁ ନା ଅତୀତର ଏହି ଲୋକପ୍ରିୟ ଗୀତକୁ। ପ୍ରଶାନ୍ତ ନନ୍ଦ ଏବଂ ମହାଶ୍ୱେତା ରାୟଙ୍କ ଉପରେ ଦୃଶ୍ୟାୟିତ ହୋଇଥିଲା ଏହି ଗୀତ। ଆଉ ସିନେମାଟି ଥିଲା ‘ମା ଓ ମମତା’। ଓଡ଼ିଆ ସିନେମାରେ ଗୀତର ଧାଡ଼ିକୁ ନେଇ ଚଳଚ୍ଚିତ୍ର ନିର୍ମାଣ ଧାରା ବେଶ୍ ପୁରୁଣା। ନିକଟରେ ଏହି ତାଲିକାରେ ନିଜ ନାମକୁ ସାମିଲ କରିଛି ନୂଆ ଓଡ଼ିଆ ସିନେମା ‘ଚୁମ୍କି ସେ ତ ପାଣିରେ ବୁଡ଼ିବ ନାହିଁ କି। ଖାସ୍ କଥା ହେଲା, ଏହି ଫିଲ୍ମରୁ ବଡ଼ ପରଦାରେ ନାୟିକା ଭାବରେ ଡେବ୍ୟୁ କରୁଛନ୍ତି ଉପାସନା। କେବଳ ସେତିକି ନୁହେଁ, ଭଦ୍ର ମୋଶନ ଷ୍ଟୁଡିଓ ବ୍ୟାନରରେ ଆନିଶ ଭଦ୍ରଙ୍କ ସହ ପ୍ରଯୋଜନା କରିଛନ୍ତି ନାୟିକା ଉପାସନା। ଅପରପକ୍ଷରେ ‘ଇସ୍କ ତୁ ହି ତୁ, ତୁ ମୋ ଲଭ୍ ଷ୍ଟୋରି, ହିରୋ ନଂ ଓ୍ବାନ୍, ଓନ୍ଲି ପ୍ୟାର୍, ପ୍ରେମ କୁମାର ଏବଂ ତୁ ମୋ ଲଭ୍ ଷ୍ଟୋରି-୨’ର ସୋଲୋ କୋରିଓଗ୍ରାଫି କରି ଚର୍ଚ୍ଚିତ ହୋଇଥିବା ଅନ୍ୟତମ ଆଗଧାଡିର କୋରିଓଗ୍ରାଫର ଗିରିଶ୍ ମହାନ୍ତି ପ୍ରଥମ ଥର ପାଇଁ ନିର୍ଦ୍ଦେଶନା ଭାର ସମ୍ଭାଳୁଛନ୍ତି। କାହାଣୀ ଅନୁସାରେ ସାଗର ଜଣେ କଣ୍ଠଶିଳ୍ପୀ। ଏକ ଅର୍କେଷ୍ଟ୍ରା କାର୍ଯ୍ୟକ୍ରମ ଶେଷକରି ଫେରୁଥିବା ବେଳେ ଜଣେ ଅଜଣା ଯୁବତୀ ସହ ଭେଟହୁଏ। ତା’ପରେ ସେହି ଫେରିବା ବାଟରେ ଘଟେ ଅନେକ ଘଟଣା। ତେବେ ପ୍ରେମର ଡୋରିରେ ବାନ୍ଧି ହୋଇଥିବା ସାଗର ଏବଂ ଏହି ଯୁବତୀ ଏଥିରେ ସଫଳ ହୁଅନ୍ତି କି ନାହିଁ ତାହା ସିନେମାରେ ଦେଖିବାକୁ ମିଳିବ। ବଡ଼ ପରଦାରେ ବ୍ରେକ୍ ପାଇବା ପୂର୍ବରୁ ଉପାସନା କେତୋଟି ଧାରାବାହିକ ‘ଦେବୀ, ଚାନ୍ଦ ନା ତମେ ତାରା, ମାନିନୀ’ରେ ଅଭିନୟ କରିଥିଲେ। ନୂଆ ସିନେମା ‘ଚୁମ୍କି ସେ ତ ପାଣିରେ ବୁଡ଼ିବ ନାହିଁ କି’ର ବିଭିନ୍ନ ଭୂମିକାରେ ଉପାସନାଙ୍କ ବ୍ୟତୀତ ଶ୍ରେୟାନ, କୌଶିକ ମହାପାତ୍ର, ଜ୍ୟୋତି ମିଶ୍ର, ଚୌଧୁରୀ ବିକାଶ ଦାସ, ପ୍ରଦ୍ୟୁମ୍ନ ଲେଙ୍କା, ପ୍ରଜ୍ଞା, ପୁଷ୍ପା ପଣ୍ଡା, ଶକ୍ତି ବରାଳ, ହାଡୁ ପ୍ରମୁଖ କଳାକାରଙ୍କୁ ଦେଖିବାକୁ ମିଳିବ।
