ଲଣ୍ଡନ,୧୧।୫ (ପି.ଟି.): ପୁଣି ଥରେ କ୍ରିକେଟ ଆରମ୍ଭ କରିବାକୁ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି) ଅଣ୍ଟା ଭିଡିଛି। ଏଥିପାଇଁ ୟୁନାଟେଡ କିଙ୍ଗ୍ଡମ୍ (ୟୁକେ) ସରକାରଙ୍କ ସହ ମିଳିତ ଭାବେ କାର୍ଯ୍ୟ ଜାରି ରଖିଛୁ ବୋଲି ଇସିବି କହିଛି। କୋଭିଡ-୧୯ ସଂକ୍ରମଣକୁ ରୋକିବା ପାଇଁ ୟୁକେରେ ଜୁନ୍ ୧ ତାରିଖ ପର୍ଯ୍ୟନ୍ତ ଲକ୍ଡାଉନ୍କୁ ଜାରି ରଖିବା ପାଇଁ ପ୍ରଧାନମନ୍ତ୍ରୀ ବୋରିସ ଜନସନ ରବିବାର ଘୋଷଣା କରିଛନ୍ତି। ଇସିବି ମଧ୍ୟ ସବୁ ପ୍ରକାର ପେସାଦାର କ୍ରିକେଟକୁ ଜୁଲାଇ ୧ ତାରିଖ ପର୍ଯ୍ୟନ୍ତ ସସ୍ପେଣ୍ଡ କରିଥିଲା।
ପୂରା ନିରାପଦରେ କ୍ରିକେଟକୁ ପୁଣି ଆରମ୍ଭ କରିବା ପାଇଁ ସରକାରଙ୍କ ସହ କାର୍ଯ୍ୟ କରୁଛୁ ଓ ଆମ ଯୋଜନା ସମ୍ପର୍କରେ ସରକାରଙ୍କୁ ଅବଗତ କରାଉଛୁ ବୋଲି ଇସିବି ତରଫରୁ ଏକ ପ୍ରେସ୍ ବାର୍ତ୍ତାରେ କୁହାଯାଇଛି। ସରକାରଙ୍କ ନିର୍ଦ୍ଦେଶନାମା ଓ ଘୋଷଣାକୁ ଆମେ ଅନୁସରଣ କରୁଛୁ ବୋଲି ଇସିବି କହିଛି।
ବ୍ରିଟେନରେ ଲକ୍ଡାଉନ୍କୁ ଦୃଷ୍ଟିରେ ରଖି ଓ୍ବେଷ୍ଟଇଣ୍ଡିଜ ବିପକ୍ଷ ୩ ମ୍ୟାଚ୍ ବିଶିଷ୍ଟ ଘରୋଇ ସିରିଜକୁ ଜୁନ୍ ପର୍ଯ୍ୟନ୍ତ ସ୍ଥଗିତ ରଖାଯାଇଥିଲା। ପାକିସ୍ତାନ କ୍ରିକେଟ ଦଳ ମଧ୍ୟ ଏହା ପରେ ଇଂଲଣ୍ଡ ଗସ୍ତ କରିବାର କାର୍ଯ୍ୟକ୍ରମ ଥିଲା। ତେବେ ଏହାକୁ ମଧ୍ୟ ସ୍ଥଗିତ ରଖାଯାଇଛି। ଏହି ସିରିଜ ଅତିକମ୍ରେ ଜୁଲାଇ ୧ ତାରିଖ ପର୍ଯ୍ୟନ୍ତ ସ୍ଥଗିତ ରହିବ। ଇଂଲିଶ୍ କ୍ରିକେଟର ନୂଆ ଫର୍ମାଟ ‘ଦି ହଣ୍ଡ୍ରେଡ୍’(ଇନିଂସ ପିଛା ୧୦୦ ବଲ)ର ପ୍ରାରମ୍ଭିକ ସଂସ୍କରଣକୁ ମଧ୍ୟ ୨୦୨୧ ପର୍ଯ୍ୟନ୍ତ ବିଳମ୍ବିତ କରାଯାଇଛି। ଆଗାମୀ ଗ୍ରୀଷ୍ମରେ ଇଂଲଣ୍ଡ ଓ ଓ୍ବେଲ୍ସରେ ପୁଣି କ୍ରିକେଟ ଆରମ୍ଭ କରାଯିବା ନେଇ ଆଶାବାଦୀ ଅଛୁ ବୋଲି ଇସିବି କହିଛି।
ଏହି ମହାମାରୀ କାରଣରୁ କ୍ରିକେଟ ଏବେ ବନ୍ଦ ରହିଥିବାରୁ ଇସିବି ୩୦୦ ମିଲିୟନ ପାଉଣ୍ଡର କ୍ଷତି ସହିବାକୁ ଯାଉଛି। ୟୁକେରେ ୨ ଲକ୍ଷରୁ ଊର୍ଦ୍ଧ୍ୱ ଲୋକ ଏହି କରୋନା ଭାଇରସ ଦ୍ୱାରା ସଂକ୍ରମିତ ହୋଇଛନ୍ତି ଓ ୩୧,୦୦୦ ଲୋକ ମୃତ୍ୟୁବରଣ କରିଛନ୍ତି।
