ନୂଆଦିଲ୍ଲୀ,୩ା୭(ପି.ଟି.) : ଏକ ଗୁରୁତ୍ୱପୂର୍ଣ୍ଣ ଘଟଣାକ୍ରମରେ ‘କାଳିଆ’ ଯୋଜନାକୁ ନେଇ ମଙ୍ଗଳବାର ସୁପ୍ରିମକୋର୍ଟ ଓଡ଼ିଶା ସରକାରଙ୍କୁ ନୋଟିସ କରିଛନ୍ତି। ଏହାସହ ନିର୍ବାଚନ ପୂର୍ବରୁ କ୍ଷୁଦ୍ର ଓ ନାମମାତ୍ର ଚାଷୀଙ୍କ ଲାଗି କାହିଁକି ପ୍ରତ୍ୟକ୍ଷ ନଗଦ ସୁବିଧା ପ୍ରଦାନ ଯୋଜନା ଘୋଷଣା କରାଯାଇଛି ବୋଲି ସର୍ବୋଚ୍ଚ ଅଦାଲତ ପ୍ରଶ୍ନ ଉଠାଇବା ସହ କେନ୍ଦ୍ର ସରକାର ଓ ନିର୍ବାଚନ କମିଶନ(ଇସି)ଙ୍କୁ ଜବାବ ତଲବ କରିଛନ୍ତି। କେନ୍ଦ୍ର ତଥା ଓଡ଼ିଶା ସମେତ କେତେକ ରାଜ୍ୟ ସରକାରଙ୍କ ପକ୍ଷରୁ ଘୋଷଣା କରାଯାଇଥିବା ଯୋଜନାଗୁଡ଼ିକୁ ଅସାମ୍ବିଧାନିକ। କ୍ଷମତାସୀନ ଦଳ ନିର୍ବାଚନ ପୂର୍ବରୁ ଏଭଳି ଯୋଜନା ଘୋଷଣା କରିବାର ଅର୍ଥ ଭୋଟରଙ୍କୁ ପ୍ରଲୋଭନ ଦେଖାଇ ନିଜ ସପକ୍ଷକୁ ଆଣିବା ପାଇଁ ଉଦ୍ୟମ। ଏହା ସମ୍ବିଧାନର ଅନୁଚ୍ଛେଦ ୧୪, ୨୧, ୧୧୨ ଓ ୨୦୨ ବିରୋଧୀ। ତେଣୁ ଏଭଳି ଯୋଜନାଗୁଡ଼ିକୁ ଅବୈଧ ଘୋଷଣା କରିବା ଲାଗି ଅର୍ଥନୀତିଜ୍ଞ ଡକ୍ଟର ପେଣ୍ଟାପତି ପୁଲ୍ଲାରାଓଙ୍କ ପକ୍ଷରୁ ଦାଏର ପିଟିଶନର ଶୁଣାଣି କରି ସୁପ୍ରିମକୋର୍ଟ ଏହି ନିଷ୍ପତ୍ତି ନେଇଛନ୍ତି।
ନିକଟରେ ଅନୁଷ୍ଠିତ ସାଧାରଣ ନିର୍ବାଚନରେ ପବନ କଲ୍ୟାଣଙ୍କ ନେତୃତ୍ୱାଧୀନ ଜନସେନା ପାର୍ଟିରୁ ଆନ୍ଧ୍ରପ୍ରଦେଶର ଇଲ୍ଲୁରୁ ଲୋକ ସଭା ଆସନରେ ପ୍ରତିଦ୍ୱନ୍ଦ୍ୱିତା କରିଥିବା ପେଣ୍ଟାପତି ପୁଲ୍ଲାରାଓ ସୁପ୍ରିମକୋର୍ଟରେ ଏକ ପିଟିଶନ ଦାଏର କରିଥିଲେ। ଏଥିରେ ସେ କେନ୍ଦ୍ରର ପ୍ରଧାନମନ୍ତ୍ରୀ କିଷାନ ସମ୍ମାନ ନିଧି ସମେତ ଓଡ଼ିଶା, ପଶ୍ଚିମବଙ୍ଗ, ଆନ୍ଧ୍ର, ତେଲେଙ୍ଗାନା ଓ ଝାଡ଼ଖଣ୍ଡ ସରକାରଙ୍କ ପକ୍ଷରୁ ଘୋଷଣା କରାଯାଇଥିବା କେତେକ ଯୋଜନାକୁ ଚ୍ୟାଲେଞ୍ଜ କରିଛନ୍ତିି। କେନ୍ଦ୍ର ଓ ଏହି ରାଜ୍ୟଗୁଡ଼ିକରେ କ୍ଷମତାସୀନ ଦଳଗୁଡ଼ିକ ରାଜନୈତିକ ଫାଇଦା ହାସଲ ପାଇଁ ସାଧାରଣ ନିର୍ବାଚନ ପୂର୍ବରୁ କେତେକ ଯୋଜନା ଏବଂ କାର୍ଯ୍ୟକ୍ରମ ଘେଷଣା କରିଥିଲେ। ତେଣୁ ସର୍ବୋଚ୍ଚ ଅଦାଲତ ଏଥିରେ ହସ୍ତକ୍ଷେପ କରନ୍ତୁ ବୋଲି ପେଣ୍ଟାପତି ଦାବି କରିଥିଲେ। ସାଧାରଣ ନିର୍ବାଚନ ପୂର୍ବରୁ ସମ୍ପୃକ୍ତ ସରକାରଙ୍କ ଏଭଳି ମାଗଣା ଯୋଜନାଗୁଡ଼ିକର ଘୋଷଣା ନିର୍ବାଚନୀ କୁକର୍ମ ବୋଲି ପେଣ୍ଟାପତିଙ୍କ ଓକିଲ ସନ୍ତୋଷ ପାଲ୍ ଓ ସର୍ବଣ କୁମାର ଯୁକ୍ତି ବାଢ଼ିଥିଲେ। ପ୍ରତ୍ୟକ୍ଷ ନଗଦ ହସ୍ତାନ୍ତରଣ ଏବଂ ଜନମଙ୍ଗଳକାରୀ ଯୋଜନାଗୁଡ଼ିକ ମୁକ୍ତ ଓ ନିରପେକ୍ଷ ନିର୍ବାଚନକୁ ପ୍ରଭାବିତ କରିବାର ଆଶଙ୍କା ରହିଛି। ତେଣୁ କ୍ଷମତାରେ ଥିବା ଦଳଗୁଡ଼ିକ ନିର୍ବାଚନର ଅନୂ୍ୟନ ୬ ମାସ ପୂର୍ବରୁ ଏଭଳି ଯୋଜନା ଘୋଷଣା ପାଇଁ ଧାର୍ଯ୍ୟ କରିବା ଲାଗି ଇସିଙ୍କୁ ନିର୍ଦ୍ଦେଶ ଦେବାକୁ ଆବେଦନକାରୀ ଅନୁରୋଧ କରିଥିଲେ। ଏଥିରେ ସେ କେନ୍ଦ୍ର ସରକାରଙ୍କ ପିଏମ୍ କିଷାନ ସମ୍ମାନ ନିଧି ଯୋଜନା ସମ୍ପର୍କରେ ମଧ୍ୟ ଉଲ୍ଲେଖ କରିଛନ୍ତି। ଏହି ଯୋଜନା ସାଧାରଣ ନିର୍ବାଚନ ପାଇଁ କାର୍ଯ୍ୟସୂଚୀ ଘୋଷଣାର ୩ ମାସ ପୂର୍ବରୁ ଅର୍ଥାତ୍ ୨୦୧୮ ଡିସେମ୍ବରରୁ କାର୍ଯ୍ୟକାରୀ ହେଉଛି। ଏଥିରେ ଦେଶର ୧୨.୫୦ କୋଟି ଚାଷୀଙ୍କୁ ବାର୍ଷିକ ୬,୦୦୦ ଟଙ୍କା ଲେଖାଏ ଆର୍ଥିକ ସହାୟତା ଦେବା ପାଇଁ ଲକ୍ଷ୍ୟ ରଖାଯାଇଛି। ସେହିପରି ଆନ୍ଧ୍ରପ୍ରଦେଶର ପାସୁପୁ କୁମ୍କୁମାା ଯୋଜନା, ଏନ୍ଟିଆର୍ ଭରୋସା ଓ ମୁଖ୍ୟମନ୍ତ୍ରୀ ଯୁବ ନେସ୍ତମ୍ ଯୋଜନା ସାଧାରଣ ଲୋକଙ୍କ ଅର୍ଥର ଅପବ୍ୟବହାର କରି ମତଦାତାଙ୍କୁ ଲାଞ୍ଚ ଦେବା ଲାଗି ଉଦ୍ଦିଷ୍ଟ ଥିଲା ବୋଲି ସେ ଏଥିରେ ଅଭିଯୋଗ ଆଣିଛନ୍ତି। ଏହି ଅବସରରେ ପେଣ୍ଟାପତି ସୁପ୍ରିମକୋର୍ଟ ୨୦୧୩ରେ ସୁବ୍ରମଣ୍ୟମ୍ ବନାମ ତାମିଲନାଡ଼ୁ ରାଜ୍ୟ ସରକାର ମାମଲାରେ ଦେଇଥିବା ରାୟର ଅବତାରଣା କରିଛନ୍ତି। ମୁକ୍ତ ଓ ନିରପେକ୍ଷ ନିର୍ବାଚନ ପରିଚାଳନା ପାଇଁ ସରକାରଙ୍କ ମାଗଣା ଯୋଜନାଗୁଡ଼ିକ ପାଇଁ ଅନୁଦାନ ନିୟନ୍ତ୍ରଣ ସକାଶେ ଗାଇଡ୍ଲାଇନ୍ ପ୍ରସ୍ତୁତ କରିବା ପାଇଁ ନିର୍ବାଚନ କମିଶନଙ୍କୁ ଉକ୍ତ ମାମଲାରେ ସର୍ବୋଚ୍ଚ ଅଦାଲତ ନିର୍ଦ୍ଦେଶ ଦେଇଥିଲେ।
ପ୍ରଧାନ ବିଚାରପତି ରଞ୍ଜନ ଗୋଗୋଇଙ୍କ ଅଧ୍ୟକ୍ଷତାରେ ତଥା ଜଷ୍ଟିସ୍ ଦୀପକ ଗୁପ୍ତା ଓ ଅନିରୁଦ୍ଧ ବୋଷଙ୍କୁ ନେଇ ଗଠିତ ଖଣ୍ଡପୀଠ ଏହାର ଶୁଣାଣି କରି ଇସି, କେନ୍ଦ୍ର ସରକାର ଏବଂ ଓଡ଼ିଶା ସମେତ ଉପରୋକ୍ତ ୫ ରାଜ୍ୟକୁ ନୋଟିସ କରିଛନ୍ତି। ଏହାସହ ଖଣ୍ଡପୀଠ ଏହି ପ୍ରତ୍ୟକ୍ଷ ନଗଦ ହସ୍ତାନ୍ତରଣ ଯୋଜନା ଓ ମାଗଣାରେ ସୁବିଧା ପ୍ରଦାନ କରାଯାଉଥିବା ଅନ୍ୟ କେତେକ କାର୍ଯ୍ୟକ୍ରମ ଉପରେ ବିସ୍ତୃତ ନିର୍ଦ୍ଦେଶାବଳୀ (ଗାଇଡ୍ଲାଇନ୍) ପ୍ରସ୍ତୁତି ପାଇଁ ଦାଏର ପିଟିଶନର ଅନୁଧ୍ୟାନ ଲାଗି ନିଷ୍ପତ୍ତି ନେଇଛନ୍ତି।
