ଦାରିଙ୍ଗବାଡ଼ି, ୨୭ା୬(ଡି.ଏନ୍.ଏ.) : କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ କାଟିଙ୍ଗିଆ ପଞ୍ଚାୟତରେ ରହିଥିବା ମହର୍ଷି ଦୟାନନ୍ଦ ଉଚ୍ଚ ବିଦ୍ୟାଳୟ ଜମିରେ ଗୋଟିଏ ପରିବାର ଦୀର୍ଘବର୍ଷ ଧରି ଜବରଦଖଲରେ ଘର କରି ରହିଥିଲେ ା ଏନେଇ ପ୍ରଶାସନ ପକ୍ଷରୁ ଗୁରୁବାର ଜମି ଜବରଦଖଲ ଉଚ୍ଛେଦ କରାଯାଇଛି ା ଦାରିଙ୍ଗବାଡ଼ି ତହସିଲଦାର ତଥା କାର୍ଯ୍ୟନିର୍ବାହୀ ଦଣ୍ଡାଧିକାରୀ ନିତିଶ ତ୍ରିପାଠୀଙ୍କ ତତ୍ତ୍ୱାବଧାନରେ ବିଡିଓ ତ୍ରିଲୋଚନ ପାତ୍ର, ଦାରିଙ୍ଗବାଡ଼ି ଆଇଆଇସି ଅଲେଖ ଗରଡ଼ିଆ, ବ୍ରାହ୍ମଣୀଗାଁ ଥାନା ଅଧିକାରୀ ତୃପ୍ତିରଞ୍ଜନ ନାୟକ ପ୍ରମୁଖ ଏହି ଉଚ୍ଛେଦ କାର୍ଯ୍ୟର ତଦାରଖ କରିଥିଲେ ା ମହିଳା ପୋଲିସଙ୍କ ସମେତ ଫୋର୍ସ ମୁତୟନ କରାଯାଇଥିଲା ା ଘଟଣା ଅତି ସମ୍ବେଦନଶୀଳ ହୋଇଥିବାରୁ ସାଦା ପୋଷାକଧାରୀ ପୋଲିସ ମଧ୍ୟ ଘଟଣାର ତଦାରଖ କରିଥିଲା। ପୂର୍ବାହ୍ନରେ ପ୍ରଥମେ ଜମି ମାପ କରାଯାଇ ସରକାରୀ ବିଦ୍ୟାଳୟର ଜମି ଚିହ୍ନଟ ପ୍ରକ୍ରିୟା ହୋଇଥିଲା। ପରେ ସମସ୍ତ ଆସବାବପତ୍ର ବାହାର କରି ଦିଆଯାଇ ଉଚ୍ଛେଦ କରାଯାଇଥିଲା ା ସୂଚନାଯୋଗ୍ୟ ଯେ, ପ୍ରାୟ ୨୦ ଆର୍ ଜମିକୁ ଜବରଦଖଲରେ ରଖି କାଟିଙ୍ଗିଆର ଅଜିତ ବସ୍ତରାୟ ୧୦ ବର୍ଷ ଧରି ଘର କରି ରହିଆସୁଥିଲେ। ଏନେଇ କାଟିଙ୍ଗିଆ ଅଞ୍ଚଳବାସୀ ଏବଂ ଜବରଦଖଲକାରୀଙ୍କ ମଧ୍ୟରେ ତିକ୍ତତା ଦେଖାଦେଇଥିଲା। ଜବରଦଖଲ ଯୋଗୁ ବିଦ୍ୟାଳୟର ବିକାଶ ଅଟକି ରହିଥିଲା। ଶ୍ରେଣୀ ଗୃହ ସମେତ ପାଚେରୀ ନିର୍ମାଣ, ଖେଳ ପଡ଼ିଆ ଆଦି ହୋଇପାରୁନଥିଲା। ପ୍ରଶାସନ ଉକ୍ତ ଜମିକୁ ଉଚ୍ଛେଦ କରିବାକୁ ପ୍ରୟାସ କରିଥିବାବେଳେ ଜବରଦଖଲକାରୀ ଅଜିତ ଆଇନର ଆଶ୍ରୟ ନେଇ ରହିତାଦେଶ ଆଣିଥିଲେ। ଫଳରେ ପ୍ରଶାସନ ଏହାକୁ ଉଚ୍ଛେଦ କରିପାରି ନ ଥିଲା ା ପରେ ଅଞ୍ଚଳବାସୀ ୨୦୧୮ ମସିହାରେ ଏକାଠି ହୋଇ ଅଜିତଙ୍କ ଘରକୁ ଭାଙ୍ଗି ଆଇନକୁ ହାତକୁ ନେଇଥିଲେ। ଶେଷରେ ପ୍ରଶାସନ ଏହି ଜବରଦଖଲ ଉଚ୍ଛେଦ କରିଛି। କାଟିଙ୍ଗିଆ ଗ୍ରାମବାସୀଙ୍କ ଉପସ୍ଥିତିରେ ବିଦ୍ୟାଳୟର ପ୍ରଧାନ ଶିକ୍ଷକ ଅଜୟ ରଣସିଂଙ୍କୁ ତହସିଲଦାର ଉକ୍ତ ଜମି ଉଚ୍ଛେଦ ପରେ ହସ୍ତାନ୍ତର କରିଥିଲେ। ସରପଞ୍ଚ କପିଳାଶ ମଲିକଙ୍କ ନେତୃତ୍ୱରେ ଗ୍ରାମବାସୀ ଅସ୍ଥାୟୀ ପାଚେରୀ ନିର୍ମାଣ କରିଥିଲେ। ଅନ୍ୟପକ୍ଷରେ ଜବରଦଖଲକାରୀଙ୍କ ପରିବାରଙ୍କୁ ରହିବା ପାଇଁ ପଲିଥିନ ସହ ଆବଶ୍ୟକ ସୁବିଧା ଯୋଗାଇ ଦେବାକୁ ତହସିଲଦାର ତ୍ରିପାଠୀ କାଟିଙ୍ଗିଆ ରାଜସ୍ବ ନିରୀକ୍ଷକ ବିପିନ ବିହାରୀ ଭୂୟାଁଙ୍କୁ ନିର୍ଦ୍ଦେଶ ଦେଇଥିବା ଜଣାପଡ଼ିଛି।
