ନୂଆଦିଲ୍ଲୀ,୪ା୮(ପି.ଟି.): କର୍ମୀମାନେ ମାଆ ଭଳି ଦଳକୁ ବଢ଼ାଇଛନ୍ତି। ସେମାନଙ୍କ ଅବଦାନକୁ ଭୁଲନାହିଁ। ସେମାନେ କଦାପି ଅନାଦର ଅନୁଭବ କରିବା ଉଚିତ ନୁହେଁ ବୋଲି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭାଜପା ଏମ୍ପିମାନଙ୍କ ଦୁଇଦିନିଆ ପ୍ରଶିକ୍ଷଣ କାର୍ଯ୍ୟକ୍ରମ ଅବସରରେ ପରାମର୍ଶ ଦେଇଛନ୍ତି। କୌଣସି ପରିବାରର ଲିଗାସୀରୁ ନୁହେଁ ଭାଜପାର ନୀତିଆଦର୍ଶ ଓ ଚିନ୍ତାଧାରା ଏହାକୁ ବର୍ତ୍ତମାନର ସ୍ଥିତିରେ ପହଞ୍ଚାଇଥିବା ପ୍ରଧାନମନ୍ତ୍ରୀ କହିଥିଲେ। ଆପଣମାନଙ୍କୁ ଏମ୍ପି ଓ ମନ୍ତ୍ରୀ କରିବାରେ କର୍ମୀମାନଙ୍କ ଅବଦାନକୁ ଭୁଲିଯିବା ଉଚିତ ନୁହେଁ। ସେମାନଙ୍କ ସହ ସମ୍ପର୍କରେ ରହିବା ପାଇଁ ପାର୍ଲାମେଣ୍ଟର ଉଭୟ ସଦନର ୩୮୦ ଏମ୍ପିଙ୍କୁ ପ୍ରଧାନମନ୍ତ୍ରୀ ପରାମର୍ଶ ଦେଇଛନ୍ତି।
ଭାଜପା ଏକ ପରିବାର ଭଳି। ଏହା ରୁଣ୍ଡୀଭୂତ ସତ୍ତା ନୁହେଁ, ଏକ ସାଂଗଠନିକ ସଂସ୍ଥା ବୋଲି ପ୍ରଧାନମନ୍ତ୍ରୀ କହିଥିଲେ। ତ୍ରିପୁରା ପଞ୍ଚାୟତ ନିର୍ବାଚନରେ ଦଳର ବଡ଼ ବିଜୟକୁ ନେଇ ସେ ସାଙ୍ଗଠିନକ ଶକ୍ତିର ଗୁରୁତ୍ୱ ସମ୍ପର୍କରେ ବୁଝାଇଥିଲେ। ପାର୍ଲାମେଣ୍ଟ ଭବନ ପରିସରରେ ପ୍ରଶିକ୍ଷଣ କାର୍ଯ୍ୟକ୍ରମ ‘ଅଭ୍ୟାସ ବର୍ଗ’କୁ ପ୍ରଧାନମନ୍ତ୍ରୀ ଉଦ୍ଘାଟନ କରି ସୂରଯ୍କୁଣ୍ଡ କାର୍ଯ୍ୟକ୍ରମର ଅନୁଭୂତି ସମ୍ପର୍କରେ କହିଥିଲେ। ଶିକ୍ଷାଗ୍ରହଣ ପ୍ରକ୍ରିୟା ଜାରି ରଖିବାକୁ ସେ ପରାମର୍ଶ ଦେଇଥିଲେ। ଭାଜପା ଅଧ୍ୟକ୍ଷ ଅମିତ୍ ଶାହ, କାର୍ଯ୍ୟକାରୀ ଅଧ୍ୟକ୍ଷ ଜେ.ପି. ନଡ୍ଡା ପ୍ରମୁଖ ଉଦ୍ବୋଧନ ଦେଇଥିଲେ। ରବିବାର ଦ୍ୱିତୀୟ ଦିନରେ ପ୍ରଧାନମନ୍ତ୍ରୀ ଓ ଭାଜପା ଅଧ୍ୟକ୍ଷ ଏମ୍ପିମାନଙ୍କୁ ଉଦ୍ବୋଧନ ଦେବାର କାର୍ଯ୍ୟକ୍ରମ ରହିଛି।
