ବେଙ୍ଗାଲୁରୁ,୩।୨: କର୍ନାଟକରେ ପୁଣିଥରେ ପୁରୁଣା ରାରଜନୈତିକ ଡ୍ରାମା ଫେରିବା ନେଇ ଚର୍ଚ୍ଚା ହେଉଛି। ମୁଖ୍ୟମନ୍ତ୍ରୀ ବି.ଏସ୍. ୟେଦୁରପ୍ପାଙ୍କୁ ଭାଜପାର ବିଧାୟକ ଧମକ ଦେଇଛନ୍ତି। ସେମାନେ ବିଧାୟକ ପଦରୁ ଇସ୍ତଫା ଦେବା ପାଇଁ କହିଛନ୍ତି। ରାଜ୍ୟ ମନ୍ତ୍ରିମଣ୍ଡଳ ସମ୍ପ୍ରସାରଣ ତାଲିକା ୟେଦୁରପ୍ପା ହାଇକମାଣ୍ଡ୍ଙ୍କ ପାଖକୁ ପଠାଇଛନ୍ତି। ଏଥିରେ ସି.ପି.ଯୋଗେଶ୍ୱରଙ୍କ ନାମ ରହିଛି। ଯୋଗେଶ୍ୱର ବିଧାୟକ ନୁହଁନ୍ତି। ସେ ବିଧାନ ପରିଷଦ ସଦସ୍ୟ ମଧ୍ୟ ନୁହଁନ୍ତି। ତେଣୁ ତାଲିକାରେ ତାଙ୍କ ନାମକୁ ଅନ୍ତର୍ଭୁକ୍ତ କରିବା ନେଇ ବିଧାୟକଙ୍କ ମଧ୍ୟରେ ଅସନ୍ତୋଷ ବୃଦ୍ଧି ହେବାରେ ଲାଗିଛି। ତେବେ ହାଇକମାଣ୍ଡ୍ଙ୍କ ନିଷ୍ପତ୍ତିକୁ ବିଧାୟକମାନେ ଅପେକ୍ଷା କରିଛନ୍ତି। ୟେଦୁରପ୍ପା ଅନ୍ୟ ସଦସ୍ୟଙ୍କ ସହିତ ବିନା ଆଲୋଚନାରେ ଦଳର ସମସ୍ତ ନିଷ୍ପତ୍ତି ନେଉଥିବାରୁ ବିଧାୟକମାନଙ୍କ ମଧ୍ୟରେ ଅସନ୍ତୋଷ ବଢୁଥିବା କୁହାଯାଉଛି।
