ନୂଆଦିଲ୍ଲୀ,୨୩ା୫: ଟେଲିଭିଜନ ଚ୍ୟାନେଲ ଭଳି କମ୍ୟୁନିଟି ରେଡିଓରେ ବିଜ୍ଞାପନ ପ୍ରସାରଣ ସମୟ ଘଣ୍ଟାପ୍ରତି ୭ ମିନିଟରୁ ୧୨ ମିନିଟକୁ ବଢ଼ାଇବା ପାଇଁ ସରକାର ଆଗ୍ରହୀ ଥିବା କେନ୍ଦ୍ର ସୂଚନା ଓ ପ୍ରସାରଣ ମନ୍ତ୍ରୀ ପ୍ରକାଶ ଜାଭଡେକର ଶୁକ୍ରବାର କହିଛନ୍ତି। ସମସ୍ତ କମ୍ୟୁନିଟି ରେଡିଓ ଷ୍ଟେଶନର ଶ୍ରୋତାଙ୍କୁ ଉଦ୍ବୋଧନ ଦେଇ ଜାଭଡେକର କହିଥିଲେ, ଏଥିପାଇଁ ପାଣ୍ଠିର ଆବଶ୍ୟକ ନାହିଁ। କମ୍ୟୁନିଟି ରେଡିଓଗୁଡ଼ିକ ସ୍ଥାନୀୟ ବିଜ୍ଞାପନକୁ ଅଧିକ ରିଲେ କରିପାରିବେ। ରେଡିଓ ଷ୍ଟେଶନ ସ୍ଥାପନର ୭୫ ପ୍ରତିଶତ ଖର୍ଚ୍ଚ ମନ୍ତ୍ରଣାଳୟ ବହନ କରୁଥିବାବେଳେ ଦୈନନ୍ଦିନ ଖର୍ଚ୍ଚକୁ ସମ୍ପୃକ୍ତ ଷ୍ଟେଶନ ଭରଣା କରିଥାନ୍ତି। କମ୍ୟୁନିଟି ରେଡିଓ ପରିବର୍ତ୍ତନର ଏଜେଣ୍ଟ। ଏହା ପ୍ରତିଦିନ ଲକ୍ଷ ଲକ୍ଷ ଲୋକଙ୍କ ପାଖରେ ପହଞ୍ଚତ୍ଥାଏ। ଖୁବ୍ଶୀଘ୍ର ଏଭଳି ରେଡିଓ ଷ୍ଟେଶନ ସଂଖ୍ୟା ବଢ଼ାଯିବ ବୋଲି ଜାଭଡେକର କହିଥିଲେ।
ଏଫ୍ଏମ୍ ଚ୍ୟାନେଲ ଭଳି କମ୍ୟୁନିଟି ରେଡିଓ ଚ୍ୟାନେଲ ମାଧ୍ୟମରେ ଖବର ପ୍ରସାରଣ ପାଇଁ ହେଉଥିବା ଦାବି ସମ୍ପର୍କରେ ଜାଭଡେକର ଆଲୋଚନା କରିଥିଲେ। ଏଥିପାଇଁ ସରକାର ବିଚାର କରୁଛନ୍ତି। ମିଛ ଖବର ପ୍ରଚାର ବିରୋଧରେ ଏହି ଷ୍ଟେଶନଗୁଡ଼ିକ ଗୁରୁତ୍ୱପୂର୍ଣ୍ଣ ଭୂମିକା ନେବା ଲାଗି ସୂଚନା ପ୍ରସାରଣ ମନ୍ତ୍ରୀ ପ୍ରୋତ୍ସାହିତ କରିଥିଲେ। ଏଥିପାଇଁ ନିର୍ଦ୍ଦିଷ୍ଟ ଖବରକୁ ପ୍ରସାରଣ କରିବା ପୂର୍ବରୁ ଏହାକୁ ଭଲ ଭାବେ ଯାଞ୍ଚ କରାଯିବା ଆବଶ୍ୟକ। ଉକ୍ତ ଖବରଗୁଡ଼ିକୁ ଅଲ୍ ଇଣ୍ଡିଆ ରେଡିଓ ସହ ଶେୟାର କରିବାକୁ ମଧ୍ୟ ସେ ଷ୍ଟେଶନଗୁଡ଼ିକୁ ଆହ୍ବାନ ଦେଇଥିଲେ। ମନ୍ତ୍ରଣାଳୟ ପକ୍ଷରୁ ପିଆଇବି ଅଧୀନରେ ଏକ ଫ୍ୟାକ୍ଟ ଚେକ୍ ସେଲ୍ ଗଠନ କରାଯାଇଛି। କମ୍ୟୁନିଟି ରେଡିଓ ଖବରଗୁଡ଼ିକର ମାନବୃଦ୍ଧିରେ ସହାୟକ ହୋଇପାରିବ ବୋଲି ଜାଭଡେକର ମତ ଦେଇଥିଲେ। କରୋନା ମହାମାରୀ ବିରୋଧରେ ଲଢ଼େଇ ଜାରି ରଖିବା ନିମନ୍ତେ ଆହ୍ବାନ ଦେଇ ସେ କହିଥିଲେ, ଅନ୍ୟ ରୋଗକୁ ପରାସ୍ତ କରିବା ଭଳି ଆମେ ଏହି ରୋଗକୁ ମଧ୍ୟ ହରାଇଦେବା। ଏଥିପାଇଁ ଆମକୁ ୪ଟି ନିୟମ ଯଥା ଘରେ ରହିବା, ସାମାଜିକ ଦୂରତ୍ୱ ରଖିବା, ହାତ ଧୋଇବା ଏବଂ ମାସ୍କ ବ୍ୟବହାର କରିବାକୁ ହେବ ବୋଲି ସେ କହିଥିଲେ।
