ନୂଆଦିଲ୍ଲୀ,୭-୯: ପଞ୍ଜାବ ନ୍ୟାଶନାଲ ବ୍ୟାଙ୍କ(ପିଏନ୍ବି)ର ପ୍ରାୟ ସାଢ଼େ ୧୩ ହଜାର କୋଟି ଟଙ୍କାର ଋଣ ଦୁର୍ନୀତିରେ ସାମିଲ ଥିବା ହୀରା ବ୍ୟବସାୟୀ ନୀରବ ମୋଦି ଏବଂ ମେହୁଲ ଚୋକ୍ସି ଓରିଏଣ୍ଟାଲ ବ୍ୟାଙ୍କ ଅଫ୍ କମର୍ସ(ଓବିସି)ରୁ ବଡ଼ ଧରଣର ଋଣ ଠକେଇ କରିଛନ୍ତି ବୋଲି ବ୍ୟାଙ୍କ ପକ୍ଷରୁ ବିଳମ୍ବରେ ସ୍ବୀକାର କରାଯାଇଛି। ନୀରବ ଓ ମେହୁଲ ଏବଂ ତାଙ୍କ କମ୍ପାନୀ ୨୮୯ କୋଟି ଟଙ୍କାର ଋଣ ନେଇ ଆଉ ପରିଶୋଧ କରିନାହାନ୍ତି ବୋଲି ଓରିଏଣ୍ଟାଲ ବ୍ୟାଙ୍କ ଅଫ୍ କମର୍ସ (ଓବିସି) ଶୁକ୍ରବାର ପ୍ରକାଶ କରିଛି। ବ୍ୟାଙ୍କ ପକ୍ଷରୁ କୁହାଯାଇଛି ଯେ, ନୀରବ ମୋଦିଙ୍କ କମ୍ପାନୀ ଫାୟାରଷ୍ଟାର ଇଣ୍ଟରନ୍ୟାଶନାଲ ପ୍ରାଇଭେଟ ଲିମିଟେଡ ୬୦.୪୧ କୋଟି ଟଙ୍କାର ଋଣ ନେଇ ଆଉ ଫେରସ୍ତ କରିନାହିଁ। ସେହିପରି ମୋଦିଙ୍କ ଆଉ ଏକ କମ୍ପାନୀ ଫାୟାରଷ୍ଟାର ଡାଇମଣ୍ଡ ଇଣ୍ଟରନ୍ୟାଶନାଲ ପ୍ରାଇଭେଟ ଲିମିଟେଡ ୩୨.୨୫ କୋଟି ଟଙ୍କାର ଋଣ ନେଇଥିଲା। ଅନୁରୂପ ଭାବେ ମେହୁଲ ଚୋକ୍ସିଙ୍କ କମ୍ପାନୀ ଗୀତାଞ୍ଜଳି ଜେମ୍ସ ଲିମିଟେଡ ଓବିସିରୁ ୧୩୬.୪୫ କୋଟି ଟଙ୍କା ଋଣ ନେଇ ଆଉ ଫେରସ୍ତ କରିନାହିଁ। ଏଥିସହିତ ଚୋକ୍ସିଙ୍କ ଆଉ ଏକ କମ୍ପାନୀ ନକ୍ଷତ୍ର ଓା୍ବଲର୍ଡ ଲିମିଟେଡ ମଧ୍ୟ ଓବିସିରୁ ୫୯.୫୩ କୋଟି ଟଙ୍କାର ଋଣ ନେଇଥିଲା। ଗତବର୍ଷ ଫେବୃୟାରୀରେ ପିଏନ୍ବି ମହାଦୁର୍ନୀତି ଧରାପଡିବା ପରେ ସେହିବର୍ଷ ମାର୍ଚ୍ଚ ୨୧ରେ ଓବିସି ଉକ୍ତ ଆକାଉଣ୍ଟଗୁଡ଼ିକୁ ଅନାଦାୟ ଋଣ(ଏନ୍ପିଏ) ଭାବେ ଘୋଷଣା କରିଥିଲା। ମେହୁଲ ଚୋକ୍ସି ଓ ତାଙ୍କ ପରିବାର ଏସ୍ବିଆଇରୁ ୪୦୫ କୋଟି ଟଙ୍କା ଋଣ ନେଇଥିବା ସାମ୍ନାକୁ ଆସିଥିଲା। ଉଲ୍ଲେଖଥାଉ କି, ବ୍ରିଟେନ ଜେଲ୍ରେ ନୀରବ ମୋଦି ବନ୍ଦି ଥିବା ବେଳେ ମେହୁଲ ଚୋକ୍ସି ଏବେ ଆଣ୍ଟିଗୁଆରେ ବସବାସ କରୁଛନ୍ତି। ତାଙ୍କୁ ଭାରତ ପ୍ରତ୍ୟର୍ପଣ ଲାଗି ଯଥାସାଧ୍ୟ ପ୍ରୟାସ ଚାଲିଛି।
