ଭାରତର ସ୍ବାଧୀନତାର ଠିକ୍ ୨୦ ଦିନ ପୂର୍ବରୁ ଅର୍ଥାତ୍ ୧୯୪୭ ମସିହା ଜୁଲାଇ ୨୪ ଏମିତି ଜଣେ ଖେଳାଳି ଜନ୍ମ ନେଇଥିଲେ, ଯେକି ପଡିଆକୁ ଓହ୍ଲାଇବା ମାତ୍ରେ ବିଶ୍ୱସ୍ତରୀୟ ବୋଲରଙ୍କ ହୋଶ୍ ଉଡିଯାଉଥିଲା। ଏଭଳି ଜଣେ ମହାନ ଖେଳାଳି ଥିଲେ ପାକିସ୍ତାନ ବ୍ୟାଟ୍ସମ୍ୟାନ୍ ଜାହିର ଆବାସ୍। ତାଙ୍କୁ କେହି କେହି ଏସିଆର ବ୍ରାଡମ୍ୟାନ୍ ବୋଲି ମଧ୍ୟ ଆଖ୍ୟା ଦେଇଛନ୍ତି। ତାଙ୍କ ଦୃଷ୍ଟିଶକ୍ତି କମ ଥିଲେ ମଧ୍ୟ ସେ ଏସିଆର ପ୍ରଥମ ଖେଳାଳି ଭାବେ ପ୍ରଥମ ଶ୍ରେଣୀ କ୍ରିକେଟରେ ୧୦୦ଟି ଶତକ ହାସଲ କରିଛନ୍ତି। ୧୯୬୯ରେ ଟେଷ୍ଟ ମ୍ୟାଚରେ ପଦାର୍ପଣ କରିଥିବା ଜାହିର ନିଜ କ୍ୟାରିୟରର ଦ୍ୱିତୀୟ ଟେଷ୍ଟରେ ଦ୍ୱିଶତକ ହାସଲ କରିଥିଲେ। ପାକିସ୍ତାନର ପ୍ରଥମ ଖେଳାଳି ଭାବେ ସେ ଟେଷ୍ଟରେ ୪ ଏବଂ ୫ ହଜାର ରନ୍ କରିଥିଲେ। ସେ ୭୮ଟି ଟେଷ୍ଟ ଖେଳି ୪୪.୭୯ ହାରରେ ମୋଟ ୫୦୬୨ ରନ୍ କରିଥିଲେ। ସେହିପରି ୬୨ଟି ଏକଦିବସୀୟ ମ୍ୟାଚ୍ ଖେଳି ୪୭.୬୨ ହାରରେ ୨୫୭୨ ରନ୍ କରିଥିଲେ।
