ନୂଆଦିଲ୍ଲୀ,୨୮-୯: ଅର୍ଥମନ୍ତ୍ରୀ ନିର୍ମଳା ସୀତାରାମନ୍ ଶୁକ୍ରବାର ସମସ୍ତ ମନ୍ତ୍ରଣାଳୟ ଠାରୁ ଆସନ୍ତା ୪ ତ୍ରୈମାସ ବା ଏକ ବର୍ଷର ପୁଞ୍ଜିଗତ ବ୍ୟୟର ବିସ୍ତୃତ ଯୋଜନା ଉପସ୍ଥାପନ କରିବାକୁ ନିର୍ଦ୍ଦେଶ ଦେଇଛନ୍ତି। ଏହାଦ୍ୱାରା ଖର୍ଚ୍ଚ ବୃଦ୍ଧିକୁ ପ୍ରୋତ୍ସାହିତ କରିହେବ ବୋଲି କୁହାଯାଉଛି। କେତେକ ନିର୍ଦ୍ଦିଷ୍ଟ ମନ୍ତ୍ରଣାଳୟ ସହ ଆଲୋଚନା କରିବା ପରେ ସେ କହିଛନ୍ତି ଯେ, ସରକାରୀ ବିଭାଗ ସମସ୍ତ ବକେୟାକୁ ନିର୍ଦ୍ଧାରିତ ସମୟ ମଧ୍ୟରେ ପ୍ରଦାନ କରିବେ। ଅନ୍ୟପକ୍ଷରେ ସରକାରଙ୍କ ଉପରେ ଏମ୍ଏସ୍ଏମଇଙ୍କର ୬୦ ହଜାର କୋଟି ଟଙ୍କା ବକେୟା ରହିଥିବା ବେଳେ ଇତିମଧ୍ୟରେ ୪୦ ହଜାର କୋଟି ଟଙ୍କା ଦିଆସରିଛି ଓ ଅବଶିଷ୍ଟ ଟଙ୍କା ଅକ୍ଟୋବର ପ୍ରଥମ ସପ୍ତାହ ଭିତରେ ପ୍ରଦାନ କରାଯିବ ବୋଲି ଅର୍ଥମନ୍ତ୍ରୀ ସୀତାରାମନ୍ କହିଛନ୍ତି।
ସୂଚନାଥାଉ କି, ଏମ୍ଏସ୍ଏମ୍ଇଗୁଡ଼ିକ ଏବେ ଘୋର ନଗଦ ସଙ୍କଟର ସମ୍ମୁଖୀନ ହେଉଛନ୍ତି। ବିଭିନ୍ନ ମନ୍ତ୍ରଣାଳୟ ଉପରେ ସେମାନଙ୍କର ବକେୟା ଦୀର୍ଘ ଦିନ ହେବ ପଡି ରହିଛି। ଏହି କାରଣରୁ ସେମାନଙ୍କର ଉତ୍ପାଦନ ବାଧାପ୍ରାପ୍ତ ହେଉଛି ଓ ବ୍ୟୟ ବୃଦ୍ଧି ପାଉନାହିଁ। ଏକ ଖବରଦାତା ସମ୍ମିଳନୀରେ ଯୋଗ ଦେଇ ସୀତାରାମନ୍ କହିଛନ୍ତି ଯେ, ସରକାର ଏମ୍ଏସ୍ଏମ୍ଇଙ୍କ ବକେୟା ଅଟକାଇପାରିବେ ନାହିଁ। ଏଥିରେ ଉପସ୍ଥିତ ଥିବା ବ୍ୟୟ ସଚିବ ଜି.ସି.ମୁର୍ମୁ କହିଛନ୍ତି ଯେ, ଅଗଷ୍ଟ ସୁଦ୍ଧା ସରକାରଙ୍କ ପୁଞ୍ଜି ବ୍ୟୟ ୪୨%ରେ ପହଞ୍ଚତ୍ଛି। ଅର୍ଥ ମନ୍ତ୍ରୀ ଶନିବାର କେନ୍ଦ୍ରୀୟ ରାଷ୍ଟ୍ରାୟତ୍ତ ଉଦ୍ୟୋଗ ମୁଖ୍ୟମାନଙ୍କୁ ଭେଟିବେ ବୋଲି ସେ ସୂଚନା ଦେଇଛନ୍ତି। ଏଥିପୂର୍ବରୁ ବ୍ୟୟ ସଚିବ ମୁର୍ମୁ ଓ ଆର୍ଥିକ ବ୍ୟାପାର ସଚିବ ଅତନୁ ଚକ୍ରବର୍ତ୍ତୀ ସଡ଼କ ପରିବହନ ଓ ରାଜପଥ, ରେଲଓ୍ବେ, ଟେଲିକମ,ହାଉସିଂ ଏବଂ ସହରାଞ୍ଚଳ ବ୍ୟାପାର ମନ୍ତ୍ରଣାଳୟର ବରିଷ୍ଠ ଅଧିକାରୀଙ୍କ ସହ ବୈଠକରେ ବସି ସେମାନଙ୍କର ପୁଞ୍ଜି ବ୍ୟୟର ସମୀକ୍ଷା କରିଥିଲେ।
