ଏକ ରାଷ୍ଟ୍ର, ଏକ ରାଶନ କାର୍ଡ ଲାଗୁ;ରାଜ୍ୟଗୁଡ଼ିକୁ ବର୍ଷେ ମିଳିଲା
8:15 amJune 30, 2019June 30, 2019

ନୂଆଦିଲ୍ଲୀ,୩୦-୬: କେନ୍ଦ୍ର ସରକାର ସାରା ଦେଶରେ ‘ଏକ ରାଷ୍ଟ୍ର, ଏକ ରାଶନ କାର୍ଡ’ ବ୍ୟବସ୍ଥା ଲାଗୁ କରିବାକୁ ଯାଉଛନ୍ତି। ରାଜ୍ୟ ସରକାରଗୁଡ଼ିକୁ ଏଥିପାଇଁ ଆସନ୍ତାବର୍ଷ ଜୁନ୍‌ ୩୦ ଯାଏ ସମୟ ଦିଆଯାଇଛି। ଏହି ବ୍ୟବସ୍ଥା ଦ୍ୱାରା ହିତାଧିକାରୀ ଦେଶର ଯେକୌଣସି ସ୍ଥାନରୁ ଶସ୍ତାରେ ରାଶନ କିଣିପାରିବେ। କେନ୍ଦ୍ର ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରୀ ରାମବିଳାସ ପାଶ୍ୱାନ କହିଛନ୍ତି ଯେ, ଆନ୍ଧ୍ରପ୍ରଦେଶ, ଗୁଜରାଟ, ହରିୟାଣା, ଝାଡ଼ଖଣ୍ଡ, କର୍ନାଟକ, କେରଳ, ମହାରାଷ୍ଟ୍ର, ରାଜସ୍ଥାନ,ତେଲେଙ୍ଗାନା ଏବଂ ତ୍ରିପୁରା ଭଳି ୧୦ ରାଜ୍ୟ ଏଥିପୂର୍ବରୁ (ପିଡିଏସ୍‌)ରେ ପୋର୍ଟେବିଲିଟି ଉପଲବ୍‌ଧ କରାଇଛନ୍ତି। ଆସନ୍ତାବର୍ଷ ଜୁନ୍‌ ୩୦ ସୁଦ୍ଧା ନୂଆ ବ୍ୟବସ୍ଥାକୁ ବିନା ବାଧାରେ ଲାଗୁ କରାଯିବ। କେନ୍ଦ୍ର ପକ୍ଷରୁ ଏ ସମ୍ପର୍କରେ ରାଜ୍ୟ ସରକାରଗୁଡ଼ିକୁ ପତ୍ର ଲେଖାଯାଇଛି। ନୂଆ ବ୍ୟବସ୍ଥା ଦ୍ୱାରା ରାଶନ କାର୍ଡ ଜାଲିଆତି ବନ୍ଦ ହୋଇଯିବ ବୋଲି ପାଶ୍ୱାନ କହିଛନ୍ତି। ତାମିଲନାଡୁ, ପଞ୍ଜାବ, ଓଡ଼ିଶା ଓ ମଧ୍ୟପ୍ରଦେଶ ସମେତ ୧୧ ରାଜ୍ୟରେ ଇତିମଧ୍ୟରେ ରାଶନ ଦୋକାନରେ ପଏଣ୍ଟ ଅଫ୍‌ ସେଲ୍‌(ପିଓଏସ)୍‌ ଲାଗୁ କରାଯାଇଥିବାରୁ ପଡି କାର୍ଡଧାରୀଙ୍କ ଲାଗି ନୂଆ ବ୍ୟବସ୍ଥା ଲାଗୁ କରିବା ସହଜ ହେବ। ମୋଦି ସରକାରଙ୍କ ୧୦୦ ଦିନର ଏଜେଣ୍ଡାରେ ଏହାକୁ ସାମିଲ କରାଯାଇଛି। ସୂଚନାଥାଉ କି, ୨୦୧୬ ନଭେମ୍ବରରେ ଦେଶରେ ଜାତୀୟ ଖାଦ୍ୟ ସୁରକ୍ଷା ଆଇନ ଲାଗୁ କରାଯାଇଥିଲା। ଏହା ଅଧୀନରେ ୮୦ କୋଟି ଲୋକଙ୍କୁ ରାଶନ କାର୍ଡ ଜରିଆରେ ଶସ୍ତା ଦରରେ ଖାଦ୍ୟଶସ୍ୟ ଯୋଗାଇ ଦିଆଯାଉଛି।