ପୁରୁଣା ଭୁବନେଶ୍ୱର, ୧୪ା୯ (ଡି.ଏନ.ଏ.): ମନ୍ଦିର ମାଳିନୀ ଏକାମ୍ରକ୍ଷେତ୍ର ସରକାରୀ ଉଦାସୀନତା ଓ ଜବରଦଖଲକାରୀଙ୍କ ଦୌରାମ୍ୟରୁ ନିଜକୁ ରକ୍ଷା କରିପାରିନାହିଁ। ଏହିକ୍ରମରେ ଶୁକ୍ରବାର ଶିଶୁପାଳଗଡ଼ ରାମପାଟ୍ ହୋଇଯିବ ନିଶ୍ଚିହ୍ନ ଶୀର୍ଷକ ଏକ ଖବର ଧରିତ୍ରୀରେ ପ୍ରକାଶ ପାଇବା ପରେ ବିଭିନ୍ନ ମହଲରେ ତପତ୍ରତା ପ୍ରକାଶ ପାଇଛି। ବିଶେଷକରି ଏଏସ୍ଆଇର କର୍ତ୍ତୃପକ୍ଷ ଏହାକୁ ଗୁରୁତ୍ୱ ଦେଇଛନ୍ତି। ଐତିହ୍ୟ ସ୍ଥଳଗୁଡିକଠାରୁ ୧୦୦ ମିଟର ସୁରକ୍ଷା ବଳୟ ମଧ୍ୟରେ ବେଆଇନ ନିର୍ମାଣ ଏବଂ ଖନନ ହୋଇଥିବାବେଳେ ବିଭିନ୍ନ ମନ୍ଦିର ପରିସର ଖନନ ଏବଂ ମନ୍ଦିରଠାରୁ ମାତ୍ର ୫୦ରୁ ୮୦ ମିଟର ଦୂର ନିଷିଦ୍ଧାଞ୍ଚଳ ଥିବା ବେଳେ ଏହାର ଓଲଟା ଦେଖିବାକୁ ମିଳୁଛି। ଶ୍ରୀଲିଙ୍ଗରାଜ ମନ୍ଦିର ମେଘନାଦ ପାଚେରିକୁ ଲାଗି ରାଜ୍ୟ ପର୍ଯ୍ୟଟନ ବିଭାଗ ପକ୍ଷରୁ ପର୍ଯ୍ୟଟକଙ୍କ ପାଇଁ ଲକ୍ଷାଧିକ ଟଙ୍କାର ଶେଡ ନିର୍ମାଣ କରାଯିବା ଉପରେ ଏଏସ୍ଆଇ ପକ୍ଷରୁ ରୋକ ଲଗାଯାଇଥିଲା। ହେଲେ ସେଠାରେ ନିରବଚ୍ଛିନ୍ନ ଭାବେ କାମ ଚାଲୁଥିବାରୁ ଏହା ବୁଦ୍ଧିଜୀବୀଙ୍କ ସମେତ ଶ୍ରଦ୍ଧାଳୁ ଏବଂ ସେବାୟତଙ୍କୁ ବ୍ୟଥିତ କରିଛି। ବୈତାଳ ମନ୍ଦିର, ସୂକ୍ଷ୍ମେଶ୍ୱର ମନ୍ଦିର, ଶ୍ରୀଅନନ୍ତ ବାସୁଦେବ ମନ୍ଦିରରେ ବେଆଇନ ନିର୍ମାଣ କାମ ଚାଲୁଅଛି। ଏବେ ରାଜାରାଣୀ ମନ୍ଦିରର ୧୦୦ ମିଟର ପରିସରରେ ନିର୍ମାଣ ପାଇଁ କଟକଣା ସତ୍ତ୍ୱେ ସେଠାରେ କାମ ଚାଲିଥିବା ନେଇ ବିଡିଏ ଏବଂ ବିଏମ୍ସିରେ ଅଭିଯୋଗ କରାଯାଇଛି। ଏ ସମସ୍ତ ଘଟଣାକୁ ଗୁରୁତ୍ୱର ଭାବେ ଗ୍ରହଣ କରି ବେଆଇନ ନିର୍ମାଣକୁ ବିରୋଧ କରିବାକୁ ଯାଇ ରାଜାରାଣୀ ମନ୍ଦିର ସମେତ ଅନ୍ୟ ମନ୍ଦିରରେ ସମ୍ପୃକ୍ତ ନିର୍ମାଣକାରୀଙ୍କୁ ନୋଟିସ ଦିଆଯିବା ପାଇଁ ସ୍ଥିର ହୋଇଥିବା ଏଏସ୍ଆଇ ସୁପରିଣ୍ଟେଣ୍ଡେଣ୍ଟ ଅରୁଣ ମଲ୍ଲିକ ସୂଚନା ଦେଇଛନ୍ତି। ସୂଚନାଥାଉକି ସାଧାରଣ ଲୋକଙ୍କ ଗୃହ ନିର୍ମାଣ ନିମନ୍ତେ କାଗଜପତ୍ରରେ ବିଭିନ୍ନ କଟକଣା ରହିଥିଲେ ହେଁ ମନ୍ଦିର ମଧ୍ୟରେ ହେଉଥିବା ନିର୍ମାଣ ନିମନ୍ତେ କୌଣସି ନୀତିନିୟମକୁ ନ ଦେଖି ବିଭାଗୀୟ ଅଧିକାରୀମାନେ ଜନପ୍ରତିନିଧି ପାଣ୍ଠି ଖର୍ଚ୍ଚ ଆଳରେ କାମ କରୁଛନ୍ତି।
