ବର୍ମିଂହାମ,୩।୮(ପି.ଟି.)- ସ୍ଥାନୀୟ ଏଜ୍ବାଷ୍ଟନ ଗ୍ରାଉଣ୍ଡରେ ଚାଲିଥିବା ଅଷ୍ଟ୍ରେଲିଆ ବିପକ୍ଷ ପ୍ରଥମ ଆଶେସ୍ ଟେଷ୍ଟରେ ଘରୋଇ ଇଂଲଣ୍ଡ ପ୍ରାରମ୍ଭିକ ଝଟ୍କା ଖାଇବା ସତ୍ତ୍ୱେ ଭଲ ପ୍ରଦର୍ଶନ କରିଛି। ଟସ୍ ଜିତି ଅଷ୍ଟ୍ରେଲିଆ ପ୍ରଥମେ ଇନିଂସରେ ଅଭିଜ୍ଞ ଷ୍ଟିଭ୍ ସ୍ମିଥ୍ଙ୍କ ୧୪୪ ରନର ଶତକୀୟ ପାଳି ବଳରେ ୮୦.୪ ଓଭରରେ ୨୮୪ ରନ କରି ଅଲଆଉଟ ହୋଇଥିଲା। ଜବାବରେ ଇଂଲଣ୍ଡ ପ୍ରଥମ ଇନିଂସ ଆରମ୍ଭ କରି ଓପନର ରୋରି ବନର୍ସଙ୍କ ଅପରାଜିତ ଶତକ ସହାୟତାରେ ଦ୍ୱିତୀୟ ଦିବସ ଖେଳ ଶେଷ ସୁଦ୍ଧା ୯୦ ଓଭରରେ ୪ ଉଇକେଟ ହରାଇ ୨୬୭ ରନ ସଂଗ୍ରହ କରିଛି। ଫଳରେ ୬ ଉଇକେଟ ହାତରେ ରଖି ଇଂଲଣ୍ଡ ଏବେ ମାତ୍ର ୧୭ ରନ ପଛରେ ପଡିଛି। ଇଂଲଣ୍ଡ ଏବେ ବୃହତ୍ ଅଗ୍ରଣୀ ହାସଲ କରିବାର ସମ୍ଭାବନା ସୃଷ୍ଟି କରିଛି। ଷ୍ଟମ୍ପ ଅପସାରଣ ବେଳକୁ ରୋରି ୧୨୫ (୨୮୨ ବଲ, ୧୬ ଚୌକା) ରନର ଶତକୀୟ ପାଳି ଖେଳି ଅପରାଜିତ ରହିଛନ୍ତି। ସେହିପରି ବେନ୍ ଷ୍ଟୋକ୍ସ ୩୮ ରନ କରି ଅପରାଜିତ ରହିଛନ୍ତି।
ପ୍ରଥମ ଦିନର ଅସମାପ୍ତ ପ୍ରଥମ ଇନିଂସ ସ୍କୋର ୧୦/୦ରୁ ଇଂଲଣ୍ଡ ଶୁକ୍ରବାର ଖେଳ ଆରମ୍ଭ କରିଥିଲା। ରୋରି ୪ ରନରୁ ଇନିଂସ ଆରମ୍ଭ କରି ଶତକ ହାସଲ କରିଛନ୍ତି। ସେହିପରି ଜାସନ ରୟ ୬ ରନରୁ ଖେଳ ଆରମ୍ଭ କରି ଆଉ ମାତ୍ର ୪ ରନ ଅଧିକ କରିବା ସହ ୧୦ ରନ କରି ଜେମ୍ସ ପାଟିନସନଙ୍କ ବଲ୍ରେ ସ୍ମିଥ୍ଙ୍କୁ କ୍ୟାଚ୍ ଦେଇ ପ୍ୟାଭିଲିୟନ ଫେରିଥିଲେ। ଏହାପରେ ଅଧିନାୟକ ଜୋ ରୁଟ ୫୭ ରନର ଅର୍ଦ୍ଧଶତକୀୟ ପାଳି ଖେଳି କ୍ରିଜ୍ରେ ଜମି ଆସୁଥିବା ବେଳେ ପିଟର ସିଡଲଙ୍କ ବଲ୍ରେ କଟ୍ ଆଣ୍ଡ ବୋଲ୍ଡ ହୋଇଥିଲେ। ଏହାପରେ ୧୮ ରନ କରିଥିବା ବେଳେ ମିଡଲ ଅର୍ଡର ବ୍ୟାଟ୍ସମ୍ୟାନ ଜୋ ଡେନ୍ଲି ଜେମ୍ସ ପାଟିନସନଙ୍କ ବଲ୍ରେ ଏଲ୍ବିଡବ୍ଲ୍ୟୁ ହୋଇ ଆଉଟ ହୋଇଥିଲେ। ଏହା ପରେପରେ ବ୍ୟାଟିଂ କରିବାକୁ ଅସିଥିବାର ଜୋ ବଟଲର ମାତ୍ର ୫ ରନ କରିଥିବା ପ୍ୟାଟ୍ କୁମିନ୍ସଙ୍କ ବଲ୍ରେ କାମେରୋନ ବ୍ୟାଙ୍କ୍ରଫ୍ଟଙ୍କୁ କ୍ୟାଚ ଦେଇ ପ୍ୟାଭିଲିୟନ ଫେରିଥିଲେ। ବୋଲିଂରେ ଅଷ୍ଟ୍ରେଲିଆ ତରଫରୁ ପାଟିନସନ ୨, କୁମିନ୍ସ ଓ ସିଡଲ ଗୋଟିଏ ଲେଖାଏ ଉଇକେଟ ହାସଲ କରିଛନ୍ତି।
ପ୍ରଥମ ଇନିଂସରେ ଅଷ୍ଟ୍ରେଲିଆର ୫ଜଣ ବ୍ୟାଟ୍ସମ୍ୟାନଙ୍କୁ ବାଦ୍ ଦେଲେ ବାକି ସମସ୍ତେ ଦୁଇଅଙ୍କ ଛୁଇଁ ପାରି ନ ଥିଲେ। ସ୍ମିଥ୍ ୧୪୪ରନର ଶତକୀୟ ପାଳି ଖେଳିଥିବା ବେଳେ ସିଡଲ ୪୪, ଟ୍ରାଭିସ୍ ହେଡ ୩୫, ଉସ୍ମାନ ଖ୍ବାଜା ୧୩ ରନ କରି ଆଉଟ ହୋଇଥିଲେ। ନାଥନ ଲିୟନ ୧୨ ରନ କରି ଅପରାଜିତ ରହିଥିଲେ। ବୋଲିଂରେ ଇଂଲଣ୍ଡ ତରଫରୁ ଷ୍ଟୁଆର୍ଟ ବ୍ରଡ ସର୍ବାଧିକ ୫, ଓ୍ବକ୍ସ ୩, ଷ୍ଟୋକ୍ସ ଓ ମୋଇନ ଅଲି ଗୋଟିଏ ଲେଖାଏ ଉଇକେଟ ହାସଲ କରିଥିଲେ।
ସଂକ୍ଷିପ୍ତ ସ୍କୋର:
ଅଷ୍ଟ୍ରେଲିଆ ପ୍ରଥମ ଇନିଂସ ୮୦.୪ ଓଭରରେ ୨୮୪ ଅଲଆଉଟ୍।
(ସ୍ମିଥ୍- ୧୪୪, ସିଡଲ- ୪୪, ବ୍ରଡ- ୫/୮୬, ଓ୍ବକ୍ସ- ୩/୫୮)।
ଇଂଲଣ୍ଡ ପ୍ରଥମ ଇନିଂସ- ୯୦ ଓଭରରେ ୨୬୭/୪
(ରୋରି- ୧୨୫*, ଷ୍ଟୋକ୍ସ- ୩୮*, ରୁଟ୍- ୫୭, ପାଟିନସନ- ୨/୫୪)
