ଭୁବନେଶ୍ୱର, ୨୪।୧୧(ବ୍ୟୁରୋ): ଭୁବନେଶ୍ୱରରେ ଶନିବାରଠାରୁ ଇ-ବସ୍ର ଡେମୋ ରନ୍ ଆରମ୍ଭ ହୋଇଛି। କ୍ୟାପିଟାଲ ରିଜିଅନ୍ ଅର୍ବାନ ଟ୍ରାନ୍ସପୋର୍ଟ ଲିମିଟେଡ୍ (କ୍ରୁଟ) ଏହି ବସ୍ ସେବା ଯୋଗାଇବାକୁ ଥିବାବେଳେ ଏହା ପୂର୍ବରୁ ହାଇଦ୍ରାବାଦର ଜଣେ ବିଡ଼ର ଦ୍ୱାରା ପ୍ରଥମେ ଆସିଥିବା ଇ-ବସ୍ ଡେମୋ ମଡେଲକୁ ରାଜଧାନୀ ରାସ୍ତାରେ ଚଲାଯାଇଛି। ଅପରାହ୍ନ ୨ଟାରେ ମାଷ୍ଟର କ୍ୟାଣ୍ଟିନ୍ରୁ ଇ-ବସ୍ର ଡେମୋ ରନ୍ ଆରମ୍ଭ ହୋଇଥିବାବେଳେ ରୁଟ ନଂ.୨୦ରେ ବାଣୀବିହାର ଦେଇ ଏହା ଖୋର୍ଦ୍ଧା ଅଭିମୁଖେ ଯାଇଥିଲା। ଅନୁରୂପ ଭାବେ ରବିବାର ଉକ୍ତ ବସ୍ଟି ମାଷ୍ଟର କ୍ୟାଣ୍ଟିନ୍ରୁ ବାହାରି ରୁଟ୍ ନଂ. ୧୨ରେ ଜୟଦେବ ବିହାର ଦେଇ ନନ୍ଦନକାନନ ଯିବ। ଉକ୍ତ ବିଡର ଏହି ବସ୍କୁ ୧୦ ଦିନ ପାଇଁ ଡେମୋ ରନ୍ କରାଇବେ ବୋଲି କ୍ରୁଟ ପକ୍ଷରୁ ଜଣାପଡ଼ିଛି।
କ୍ରୁଟ ଜେନେରାଲ ମ୍ୟାନେଜର ଦୀପ୍ତି ମହାପାତ୍ର କହିଛନ୍ତି, ଇ-ବସ୍ଟି ସମ୍ପୂର୍ଣ୍ଣ ଭାବେ ପ୍ରଦୂଷଣ ମୁକ୍ତ। ଚାର୍ଜ ପାଇଁ ସେସୁ ସହ ଆଲୋଚନା ସରିଛି। ସିସିଟିଭି ବ୍ୟବସ୍ଥା ସହ ସମସ୍ତ ସିଟ୍ ନିକଟରେ ଚାର୍ଜିଂ ପଏଣ୍ଟ ରହିଛି। ବସ୍ରେ ଷ୍ଟପ୍ ବଟନ୍ ଦିଆଯାଇଛି। ବସ୍ଟି ଶୀତତାପ ନିୟନ୍ତ୍ରିତ ବୋଲି ସେ କହିଛନ୍ତି।
ଅନ୍ୟପକ୍ଷରେ ମୋ’ ବସ୍ ପରିଚାଳନା କରୁଥିବା କ୍ରୁଟ ଦେଶର ନଂ .୧ ପବ୍ଲିକ୍ ଟ୍ରାନ୍ସପୋର୍ଟ ଭାବେ ପୁରସ୍କୃତ ହୋଇଛି। ତେଣୁ କେନ୍ଦ୍ର ସରକାରଙ୍କ ଦ୍ୱାରା ମିଳିବାକୁ ଥିବା ଇ-ବସ୍ର ଦାୟିତ୍ୱ ମଧ୍ୟ କ୍ରୁଟକୁ ଦିଆଯାଇଛି। ଏହି ବସ୍ ଚଳାଚଳ ପାଇଁ ଏବେ ବିଡିଂ ପ୍ରକ୍ରିୟା ଆରମ୍ଭ ହୋଇଛି। ଦେଶରୁ ବହୁ ଉଦ୍ୟୋଗୀ ଓ ସଂସ୍ଥା ନିଜର ଇ-ବସ୍ ମଡେଲକୁ ଡେମୋ ରନ୍ ଦ୍ୱାରା ଦେଖାଇବେ। ପ୍ରତିଦିନ ଉକ୍ତ ବସ୍ରେ କେବଳ ବାଲି ବସ୍ତା ରଖାଯାଇ ସହରରେ ବୁଲାଯିବ। ଆଗକୁ ଅନ୍ୟ ବିଡରମାନେ ସେମାନଙ୍କ ଇ-ବସ୍ ମଡ଼େଲକୁ ରାଜଧାନୀ ରାସ୍ତାରେ ଡେମୋ ରନ୍ କରାଇବେ। ଏହାପରେ ସବୁଠୁ ଭଲ ପ୍ରଦର୍ଶନ କରିଥିବା ବିଡର ୫୦ ଇ-ବସ୍ ଯୋଗାଇବ ବୋଲି ଜଣାପଡ଼ିଛି।
