ନୂଆଦିଲ୍ଲୀ,୨୩।୨: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ଙ୍କ ଭାରତ ଗସ୍ତ ପୂର୍ବରୁ କଂଗ୍ରେସ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଘେରିଛି। ଆମେରିକା ଏବଂ ଆତଙ୍କବାଦୀ ସଂଗଠନ ତାଲିବାନ ମଧ୍ୟରେ ଶାନ୍ତିଚୁକ୍ତି ନେଇ କଂଗ୍ରେସ ଏଭଳି କରିଛି। ମୋଦି କାନ୍ଦାହାର ଘଟଣାକୁ ଭୁଲି ଯାଇଛନ୍ତି କି ବୋଲି କଂଗ୍ରେସ ପ୍ରଶ୍ନ କରିଛି। ଏହାଦ୍ୱାରା ଭାରତ ପକ୍ଷରୁ ହୋଇଥିବା ସାମରିକ କାର୍ଯ୍ୟ କ’ଣ ବେକାର ହେବ ବୋଲି କଂଗ୍ରେସ ପ୍ରଶ୍ନ କରିଛି। ଏହି ଘଟଣାରେ ଆତଙ୍କବାଦୀ ମାସୁଦ୍ ଅଝାରଙ୍କୁ ବାଧ୍ୟ ହୋଇ ମୁକ୍ତ କରାଯାଇଥିଲା। ତେଣୁ ମୋଦି ସରକାର ଏସବୁ ଭୁଲିଯିବା ଉଚିତ ନୁହେଁ ବୋଲି କଂଗ୍ରେସ କହିଛି। ସୂଚନାଯୋଗ୍ୟ, ୧୯୯୯ ଡିସେମ୍ବର ୨୪ରେ ତାଲିବାନ ଆତଙ୍କବାଦୀ ନେପାଳର କାଠମାଣ୍ଡୁର ତ୍ରିଭୁବନ ବିମାନ ବନ୍ଦରରୁ ଇଣ୍ଡିଆନ୍ ଏୟାର ଲାଇନ୍ସ୍ର ଆଇସି-୮୧୪ ବିମାନକୁ ଅପହରଣ କରିନେଇ ଆଫଗାନିସ୍ତାନର କାନ୍ଦାହାରରେ ପହଞ୍ଚି ଥିଲେ। ସେତେବେଳେ କାନ୍ଦାହାର ତାଲିବାନ ସଂଗଠନର ନିୟନ୍ତ୍ରଣରେ ଥିଲା। ପରେ ଆତଙ୍କବାଦୀ ମାସୁଦ୍ଙ୍କୁ ମୁକ୍ତ କରାଯିବା ପରେ ଡିସେମ୍ବର ୩୧ରେ ବିମାନ ଭାରତକୁ ଫେରିଥିଲା।
