ଆଧାର ଲିଙ୍କ୍‌ ସତ୍ତ୍ୱେ ମିଳୁନି ଗ୍ୟାସ୍‌ ସବ୍‌ସିଡି

ଭୁବନେଶ୍ୱର,୧୭-୯(ବ୍ୟୁରୋ):୨୦୧୪ରେ କେନ୍ଦ୍ରରେ ଭାଜପା ନେତୃତ୍ୱାଧୀନ ଏନ୍‌ଡିଏ ସରକାର ଆସିବା ପରେ ପ୍ରତ୍ୟେକ ଘରେ ଗ୍ୟାସ୍‌ ସଂଯୋଗ କରାଇବା ଉପରେ ବିଶେଷ ଗୁରୁତ୍ୱ ଦେଇଥିଲା। ସବୁଘରେ ସ୍ବଚ୍ଛ ଇନ୍ଧନ ପହଞ୍ଚାଇବା ଲକ୍ଷ୍ୟ ରଖି କେନ୍ଦ୍ର ସରକାର ୨୦୧୬ ମେ ୧ରେ ପ୍ରଧାନମନ୍ତ୍ରୀ ଉଜ୍ୱଳା ଯୋଜନା(ପିଏମ୍‌ୟୁଓ୍ବାଇ)ଆରମ୍ଭ କରିଥିଲେ। ଏହା ପରଠାରୁ ୨୦୧୯ ସେପ୍ଟେମ୍ବର ୭ ସୁଦ୍ଧା କେନ୍ଦ୍ର ସରକାର ୮କୋଟି ଉଜ୍ଜ୍ୱଳା ସଂଯୋଗ କରିବାକୁ ରଖିଥିବା ଲକ୍ଷ୍ୟ ପୂରଣ କରିପାରିଥିବା ସୂଚନା ଦିଆଯାଇଛି। ଓଡ଼ିଶାରେ ୮୭ଲକ୍ଷ ୫୭ ହଜାର ଲୋକ ଗ୍ୟାସ୍‌ ସଂଯୋଗ ନେଇଛନ୍ତି। ସେଥିମଧ୍ୟରୁ ଉଜ୍ଜ୍ୱଳା ଯୋଜନାରେ ଓଡ଼ିଶାରେ ବର୍ତ୍ତମାନ ପର୍ଯ୍ୟନ୍ତ ୪୭ଲକ୍ଷ ୪୦ ହଜାର ଲୋକ ଗ୍ୟାସ ସଂଯୋଗ ନେଇଥିବା ଜଣାପଡିଛି। ଉପଭୋକ୍ତାମାନଙ୍କ ପାଇଁ କେନ୍ଦ୍ର ସରକାର ସବ୍‌ସିଡି ବ୍ୟବସ୍ଥା କରିଛନ୍ତି। ଏନେଇ ପ୍ରଚଳିତ ବ୍ୟବସ୍ଥା ଅନୁଯାୟୀ ସମ୍ପୂର୍ଣ୍ଣ ଗ୍ୟାସ୍‌ ମୂଲ୍ୟ ଉପଭୋକ୍ତାଙ୍କ ପାଖରୁ ନିଆଯାଇ ପରବର୍ତ୍ତୀ ସମୟରେ ସେମାନଙ୍କ ଆକାଉଣ୍ଟକୁ ସବ୍‌ସିଡି ବାବଦ ଅର୍ଥ ଫେରସ୍ତ ଦିଆଯାଏ। ହେଲେ ଏହି ବ୍ୟବସ୍ଥା ଆରମ୍ଭ ଦିନଠାରୁ ଅନେକ ଲୋକ ଗୋଟିଏ ଅଭିଯୋଗ କରି ଆସୁଛନ୍ତି ଯେ, ସେମାନଙ୍କ ଆକାଉଣ୍ଟକୁ ସବିସିଡି ଅର୍ଥ ଆସୁନାହିଁ। କେବଳ ସେତିକି ନୁହେଁ, ଅନେକ ଗ୍ରାହକଙ୍କୁ ସବ୍‌ସିଡି ଅର୍ଥ ନିର୍ଦ୍ଦିଷ୍ଟ କୌଣସି ସମୟରେ ଫେରାଯାଉନାହିଁ ବୋଲି ଅଭିଯୋଗ ହେଉଛି।
ଜଣେ ଗ୍ୟାସ୍‌ ଡିଲରଙ୍କ ସୂଚନା ମୁତାବକ, ବର୍ତ୍ତମାନ ଲୋକେ ୬୧୭ଟଙ୍କା ୪୯ ପଇସାରେ ଗ୍ୟାସ୍‌ କିଣୁଛନ୍ତି। ସେଥିରୁ ସବ୍‌ସିଡି ବାବଦକୁ ୭୪ଟଙ୍କା ୮୦ପଇସା ହିତାଧିକାରୀଙ୍କ ଆକାଉଣ୍ଟକୁ ଆସୁଛି। ସୂଚନାଥାଉକି ଗ୍ୟାସ୍‌ ମୂଲ୍ୟ ବିଭିନ୍ନ ସମୟରେ ପରିବର୍ତ୍ତନ ହୋଇଥାଏ।
କୋଣାର୍କ ଅଞ୍ଚଳର ରୋଜାଲିନ ସାହୁଙ୍କ କହିବାନୁଯାୟୀ, ୨ ବର୍ଷ ହୋଇଗଲା ସବ୍‌ସିଡି ଅର୍ଥ ପାଇବା ପାଇଁ ବ୍ୟାଙ୍କ ଏବଂ ଗ୍ୟାସ୍‌ ଡିଲରଙ୍କ ପାଖକୁ ଦୌଡ଼ିବା ପରେ ମଧ୍ୟ କିଛି ଲାଭ ହେଉନାହିଁ। ୨ ବର୍ଷ ମଧ୍ୟରେ ବହୁ ଟଙ୍କା ତାଙ୍କର ସବ୍‌ସିଡି ବାବଦକୁ ରହିଲାଣି। ନିୟମାନୁଯାୟୀ ବ୍ୟାଙ୍କ ଖାତା ସହ ଆଧାର କାର୍ଡ ମଧ୍ୟ ଲିଙ୍କ୍‌ କରାଯାଇଛି। ତା’ପରେ ମଧ୍ୟ ଆମ ଟଙ୍କାକୁ କମ୍ପାନୀ ଚୋରାଇ ନେଇଛି ବୋଲି ରୋଜାଲିନ କହିଛନ୍ତି। ଯାଜପୁର ଜିଲା କୋରେଇ ବ୍ଲକର କବିତା ବାରିକଙ୍କ ମଧ୍ୟ ସମଦଶା। ୨ ବର୍ଷ ହୋଇଗଲା ଗ୍ୟାସ୍‌ ସଂଯୋଗ ନେଇଛନ୍ତି। କିନ୍ତୁ ସବ୍‌ସିଡି ଅର୍ଥ ପାଉନାହାନ୍ତି। ଏଥିପାଇଁ ବାରମ୍ବାର ବ୍ୟାଙ୍କ ଏବଂ ଡିଲର ପାଖକୁ ଦୌଡ଼ିବା ପରେ ସୁଦ୍ଧା ଫଳ ଶୂନ। ଏତେଦିନର ଯେଉଁ ସବ୍‌ସିଡି ଅର୍ଥ ରଖାଯାଇଛି ତା’ର ସୁଧ କିଏ ଦେବ ବୋଲି କବିତା ପ୍ରଶ୍ନ ଉଠାଇଛନ୍ତି। ସେହିପରି ଉତ୍ତରା ଶାସନର ତ୍ରିଲୋଚନ ବାରିକଙ୍କ କହିବା କଥା ହେଉଛି, ଆଧାର କାର୍ଡ ଦେଇ ନ ଥିବାରୁ ଏ ପର୍ଯ୍ୟନ୍ତ ସବ୍‌ସିଡି ଅର୍ଥ ମିଳିନାହିଁ। ଆମକୁ ସବ୍‌ସିଡି ଅର୍ଥ ନ ମିଳିବା ପଛରେ ସମସ୍ତଙ୍କ ଭୁଲ୍‌ ରହିଛି। ଯଦି ବ୍ୟାଙ୍କ ସହିତ ଆଧାର କାର୍ଡ ଲିଙ୍କ୍‌ ହେବା ନିତାନ୍ତ ଆବଶ୍ୟକ, ଏକଥା ଜଣେ ଗ୍ରାହକକୁ କିଏ ଜଣାଇବ। ଦୀର୍ଘଦିନ ଧରି ବ୍ୟାଙ୍କରେ ଖାତା ଆମର ରହିଛି, ଆଧାର ସଂଯୋଗ ସମ୍ପର୍କରେ ବ୍ୟାଙ୍କ ଜାଣିଥିଲେ ମଧ୍ୟ ଜଣାଉନାହିଁ। ଏପରି କି ବ୍ୟାଙ୍କରେ ଆମର ଫୋନ ନମ୍ବର ଥିବା ସତ୍ତ୍ୱେ ଏସ୍‌ଏମ୍‌ଏସ ମିଳୁନାହିଁ। ଯଦି ବ୍ୟାଙ୍କ ନ ଦେଲା ତେବେ ଆମେ ଯେଉଁ ଗ୍ୟାସ୍‌ କମ୍ପାନୀର ଗ୍ରାହକ ହୋଇଛୁ, ସେମାନେ କାହିଁକି ଏସ୍‌ଏମ୍‌ଏସ୍‌ ଦେଉନାହାନ୍ତି ବୋଲି ସେ ପ୍ରଶ୍ନ କରିଛନ୍ତି। ସେ ଆହୁରି କହିଛନ୍ତି, ନିୟମାନୁଯାୟୀ ଆଧାର ଲିଙ୍କ୍‌ କରା ନ ଗଲେ ବ୍ୟାଙ୍କରେ ଆକାଉଣ୍ଟ ଚାଲିବା କଥାନୁହେଁ, ତେବେ ଏହାକୁ କାହିଁକି ଠିକ୍‌ ଭାବେ କାର୍ଯ୍ୟକାରୀ କରାଯାଉନାହିଁ।
ସବ୍‌ସିଡି ଅର୍ଥ ପାଇବା ପାଇଁ କେନ୍ଦ୍ର ସରକାର ଆଧାର କାର୍ଡକୁ ବାଧ୍ୟତାମୂଳକ କରିଛନ୍ତି। ରିହାତି ଅର୍ଥ ପାଇବାକୁ ହେଲେ ଗ୍ରାହକଙ୍କୁ ନିଜ ବ୍ୟାଙ୍କ ଆକାଉଣ୍ଟ ସହ ଆଧାର କାର୍ଡ ସଂଯୋଗ କରିବାକୁ ପଡୁଛି। ମାତ୍ର କେନ୍ଦ୍ର ସରକାରଙ୍କ ଏହି ବାଧ୍ୟତାମୂଳକ ବ୍ୟବସ୍ଥାକୁ ସାଧାରଣ ଲୋକମାନେ ଗ୍ରହଣ କରିବାପରେ ମଧ୍ୟ ନିଜ ଅର୍ଥ ପାଇବାରେ ବହୁ ଗ୍ରାହକ ସକ୍ଷମ ହୋଇପାରୁ ନ ଥିବା ଜଣାପଡିଛି। କେବଳ ସେତିକି ନୁହେଁ ବରଂ ଗ୍ୟାସ୍‌ ଚୋରି ରୋକିବା ଲାଗି ଆଧାର କାର୍ଡ ବ୍ୟବସ୍ଥାକୁ କେନ୍ଦ୍ର ବିଶେଷ ଗୁରୁତ୍ୱ ଦେଇଥିବା କହିଛି। ତେବେ ଉଜ୍ଜ୍ୱଳା ଯୋଜନାରେ କେନ୍ଦ୍ର ସରକାର ସାମାଜିକ, ଅର୍ଥନୈତିକ ଜାତିଭିତ୍ତିକ ଜନଗଣନା (ଏସଇସିସି) ତାଲିକାରେ ଥିବା ଲୋକଙ୍କୁ ପ୍ରଥମେ ସାମିଲ କରାଯାଇଥିଲା। ଏହାପରେ ଏସ୍‌ସି,ଏସ୍‌ଟି ଲୋକଙ୍କୁ ଏହା ମଧ୍ୟକୁ ଅଣାଗଲା। ଏହି ବର୍ଗର ସମସ୍ତ ଲୋକଙ୍କୁ ସରକାରଙ୍କ ପକ୍ଷରୁ ୧୪ଶହ ଟଙ୍କାରେ ଚୁଲା ସହିତ ଗ୍ୟାସ ଟାଙ୍କି ଯୋଗାଇ ଦିଆଯାଉଛି। ଅର୍ଥାତ୍‌ ଉଜ୍ଜ୍ୱଳା ଯୋଜନାରେ ଗ୍ୟାସ ସଂଯୋଗ ନେଉଥିବା ଲୋକମାନେ କେଉଁ ବର୍ଗର ତାହା ସ୍ପଷ୍ଟ। ଯଦି ଏମାନଙ୍କୁ ନିଜ ଆକାଉଣ୍ଟ ସହ ଆଧାର ଲିଙ୍କ୍‌ କରିବାକୁ ବାଧ୍ୟ କରାଯାଏ ଏବଂ ନିୟମକାନୁନ ମାନିବା ପରେ ମଧ୍ୟ ସବ୍‌ସିଡି ଅର୍ଥ ନ ଆସେ, ସେମାନେ କ’ଣ କରିବେ ସେନେଇ ପ୍ରଶ୍ନ ଉଠିଲାଣି।
ଏଲ୍‌ପିଜି ଡିଜିଏମ୍‌ ଧର୍ମେନ୍ଦ୍ର ବେହୁରା କହିଛନ୍ତି ଯେ, ଆଧାର ଲିଙ୍କ୍‌ କରୁ ନ ଥିବା କ୍ଷେତ୍ରରେ ସବ୍‌ସିଡି ଆସିପାରୁନାହିଁ। କିଛିଟା ସ୍ଥାନରେ କୌଣସି କାରଣ ଯୋଗୁ ସବ୍‌ସିଡି ଆସିପାରୁ ନାହିଁ। ବହୁ ଲୋକଙ୍କ କ୍ଷେତ୍ରରେ ବ୍ୟାଙ୍କ ଆକାଉଣ୍ଟ ବନ୍ଦ ହେଇଯାଉଛି ମାତ୍ର ସେମାନେ ଜାଣିପାରୁ ନାହାନ୍ତି। କେବଳ ସବ୍‌ସିଡି ଆସୁନାହିଁ ବୋଲି ଅଭିଯୋଗ କରୁଛନ୍ତି। ଏହାପରେ ଆମେମାନେ ଘଟଣାର ଠିକ୍‌ ଅନୁଧ୍ୟାନ କରିବାପରେ କାରଣ ଜଣାପଡୁଛି। ଅଳ୍ପକିଛି ଜାଗାରେ ଆଧାର ଲିଙ୍କ୍‌ କରାଇବା ସତ୍ତ୍ୱେ ଲୋକଙ୍କ ଟଙ୍କା ଆସିପାରୁ ନାହିଁ ବୋଲି ବେହୁରା କହିଛନ୍ତି।


Enter your email to get our daily news in your inbox.

All Right Reserved By Dharitri.Com

ଗଞ୍ଜାମରେ ୧ ଲକ୍ଷ ଟପିଛି କରୋନା ଟେଷ୍ଟ

ବ୍ରହ୍ମପୁର ଅଫିସ,୧୪ା୮-ଗଞ୍ଜାମ ଜିଲାରେ କରୋନା ସ୍ଥିତି ସୁଧୁରୁଛି ା ଦିନକୁ ଦିନ ସଂକ୍ରମିତଙ୍କ ସଂଖ୍ୟା ହ୍ରାସ ପାଉଛି। କରୋନା ଟେଷ୍ଟ ବୃଦ୍ଧି ପାଇଛି ା ଜିଲାରେ...

ନିମ୍ନମାନର ମଧ୍ୟାହ୍ନଭୋଜନ ନେଇ ଉତ୍ତେଜନା

ଖଲ୍ଲିକୋଟ,୩୦ା୮(ଡି.ଏନ.ଏ.)- ଖଲ୍ଲିକୋଟ ବ୍ଲକ ଭିକାପଡ଼ା ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟରେ ନିମ୍ନମାନର ମଧ୍ୟାହ୍ନ ଭୋଜନ ଦିଆଯାଉଥିବା ନେଇ ଗୁରୁବାର ଉତ୍ତେଜନା ଦେଖା ଦେଇଛି। ଖାଦ୍ୟ ଥାଳିରେ...

କୋଭିଡ୍‌ ନିୟମ ଉଲ୍ଲଂଘନ ଅଭିଯୋଗ: ମନ୍ତ୍ରୀ ସମୀର ରଞ୍ଜନ ଦାଶ, ବିଧାୟକ ଉମାକାନ୍ତ ସାମନ୍ତରାୟଙ୍କ ନାଁରେ ଏତଲା

ପୁରୀ ଅଫିସ,୫ା୧୦: ସ୍ବର୍ଗଦ୍ୱାରରେ ରବିବାର ପୂର୍ବତନ ମନ୍ତ୍ରୀ ତଥା ପିପିଲି ବିଧାୟକ ପ୍ରଦୀପ ମହାରଥୀଙ୍କ ଶେଷକୃତ୍ୟ ସମ୍ପନ୍ନ ହୋଇଥିଲା। ଏଥିରେ ମନ୍ତ୍ରୀ ସମୀର ରଞ୍ଜନ ଦାଶ...

ଅଲିମ୍ପିକ୍‌ କ୍ୱାଲିଫାୟର୍ସ ପାଇଁ କଳିଙ୍ଗ ପ୍ରସ୍ତୁତ

ଭୁବନେଶ୍ୱର,  ୧।୧୧(କ୍ରୀଡ଼ା ପ୍ରତିନିଧି):ବିଶ୍ୱକପ୍‌, ଚାମ୍ପିୟନ୍ସ ଟ୍ରଫି, ଓ୍ବାଲର୍‌ଡ ଲିଗ୍‌ ଏବଂ ଏଫ୍‌ଆଇଏଚ୍‌ ସିରିଜ ଫାଇନାଲ୍ସ ପରି ଅନେକ ଅନ୍ତର୍ଜାତୀୟ ହକି ଟୁର୍ନାମେଣ୍ଟର ସଫଳ ଆୟୋଜନ ପାଇଁ...

ଗଞ୍ଜାମରେ କମୁୁଛି, ଖୋର୍ଦ୍ଧାରେ ବଢୁଛି

ଭୁବନେଶ୍ୱର,୯।୮(ବ୍ୟୁରୋ): ଗଞ୍ଜାମ ପରେ ଏବେ ଚିନ୍ତା ବଢ଼ାଇଲାଣି ଖୋର୍ଦ୍ଧା ଜିଲା। କିଛିଦିନ ଧରି ଗଞ୍ଜାମରେ କରୋନା ସଂକ୍ରମିତଙ୍କ ସଂଖ୍ୟା ହୁ ହୁ ହୋଇ ବଢ଼ୁଥିବା ବେଳେ...

ପତିତପାବନ ହେବେ ନାଗାର୍ଜୁନ ବେଶ

ପୁରୀ ଅଫିସ,୧୭।୧୦: ଆସନ୍ତା ନଭେମ୍ବର ୨୭ରେ ନାଗାର୍ଜୁନ ବେଶ। ମାତ୍ର ମହାପ୍ରଭୁଙ୍କ ଏହି ବୀର ବେଶ ଦର୍ଶନରୁ ଭକ୍ତମାନେ ବଞ୍ଚତ୍ତ ହେବା ଏକପ୍ରକାର ନିଶ୍ଚିତ। କାରଣ...

୫ ଜିଲାରେ ବର୍ଷା ସହ ବଜ୍ରପାତ ସମ୍ଭାବନା: ସତର୍କ ରହିବାକୁ ପରାମର୍ଶ

ଭୁବନେଶ୍ୱର,୨୧।୩(ବ୍ୟୁରୋ): ରାଜ୍ୟର ୫ ଜିଲାରେ ଶନିବାର ବର୍ଷା ସହ ବଜ୍ରପାତ ହେବାର ସମ୍ଭାବନା ରହିଛି। ଖୋର୍ଦ୍ଧା, କଟକ, ଯାଜପୁର, ପୁରୀ ଓ ଜଗତ୍‌ସିଂହପୁର ଆଦି ଜିଲାକୁ...

ମୁଖ୍ୟମନ୍ତ୍ରୀଙ୍କ ପଦକ୍ଷେପକୁ ଉପରାଷ୍ଟ୍ରପତିଙ୍କ ପ୍ରଶଂସା

ଭୁବନେଶ୍ୱର,୨୫ା୪(ବ୍ୟୁରୋ): ଜାତୀୟ ପଞ୍ଚାୟତିରାଜ ଦିବସ ଉପଲକ୍ଷେ ଏକ ଜାତୀୟସ୍ତରୀୟ ଇଂଲିଶ ମୁଦ୍ରିତ ଗଣମାଧ୍ୟମରେ ଉପରାଷ୍ଟ୍ରପତି ଏମ୍‌. ଭେଙ୍କାୟା ନାଇଡୁଙ୍କର ଏକ ସ୍ତମ୍ଭ ପ୍ରକାଶ ପାଇଥିଲା। ଏହି...

Advertisement


Archives

Model This Week

Why Dharitri