ପିଥୋରାଗଡ/ ନୂଆଦିଲ୍ଲୀ,୪ା୭(ପି.ଟି.): ନନ୍ଦାଦେବୀ ପୂର୍ବ ଶିଖର ଆରୋହଣ କରୁଥିବା ୮ ପର୍ବତାରୋହୀଙ୍କ ମୃତଦେହ ଦୀର୍ଘ ୫୦୦ ଘଣ୍ଟାର ଅପରେଶନ୍ ପରେ ଉଦ୍ଧାର କରାଯାଇ ବୁଧବାର ତଳକୁ ଓହ୍ଲାଇ ଅଣାଯାଇଛି। ଏଭଳି ଏକ ଦୁଃସାହସିକ ଏବଂ ଚ୍ୟାଲେଞ୍ଜିଂ କାର୍ଯ୍ୟରେ ନିୟୋଜିତ ଥିଲେ ଆଇଟିବିପି (ଇଣ୍ଡୋ ତିବ୍ବତୀୟ ବର୍ଡର ପୋଲିସ) ଏବଂ ବାୟୁସେନା ହେଲିକପ୍ଟର। ଏଥିପାଇଁ ଆଇଟିବିପି ଟିମ୍କୁ ୧୫ ଦିନ ଲାଗିଥିଲା। ପର୍ବତାରୋହୀଙ୍କ ମୃତଦେହ ଉଦ୍ଧାର କରାଯିବା ପରେ ଏହି ବିପଜ୍ଜନକ ଉଦ୍ଧାର କାର୍ଯ୍ୟର ଅନ୍ତ ଘଟିଛି। ମୃତଦେହଗୁଡ଼ିକୁ ବାୟୁସେନା ହେଲିକପ୍ଟର ଯୋଗେ ପିଥୋରାଗଡର ନୈନୀ ସାଇନି ବିମାନବନ୍ଦରକୁ ନିଆଯାଇଥିଲା। ୮ଜଣଙ୍କ ମଧ୍ୟରେ ୭ ବିଦେଶୀ ହୋଇଥିବାବେଳେ ଜଣେ ଭାରତୀୟ। ମେ ୨୫ରେ ସେମାନେ ନିଖୋଜ ହୋଇଯିବା ରିପୋର୍ଟ ମିଳିବା ପରେ ଭାରତୀୟ ବାୟୁସେନାର ଅନୁସନ୍ଧାନକାରୀ ବିମାନ ଦ୍ୱାରା ମୃତଦେହଗୁଡିକୁ ଠାବ କରାଯାଇଥିଲା।
