ମୁମ୍ବାଇ,୮-୧୧: ମାନ୍ଦାବସ୍ଥାର ପ୍ରଭାବ ଚଳିତ ବର୍ଷ ଇଣ୍ଡିଆନ୍ ଇନଷ୍ଟିଚ୍ୟୁଟ୍ ଅଫ୍ ଟେକ୍ନୋଲୋଜି(ଆଇଆଇଟି) ଛାତ୍ରୀଛାତ୍ରଙ୍କ ନିଯୁକ୍ତି ଉପରେ ପଡିଥିବା ଦେଖାଯାଇଛି। ଡିସେମ୍ବରରୁ ଦେଶର ବିଭିନ୍ନ ଆଇଆଇଟିରେ ସାଧାରଣତଃ ନିଯୁକ୍ତି ସିଜନ୍ ଚାଲିଥାଏ। ହେଲେ ଚଳିତ ବର୍ଷ ପ୍ରମୁଖ ଫାର୍ମଗୁଡିକ ପୂର୍ବବର୍ଷଗୁଡିକ ଭଳି ଛାତ୍ରୀଛାତ୍ରଙ୍କୁ ନିଯୁକ୍ତି ଦେବା ଲାଗି ଆଗେଇ ଆସିବା ଦେଖାଯାଉନାହିଁ। ପ୍ରଥମ ଦିନ ଆସୁଥିବା(ଡଓ୍ବୋନ) ଫାର୍ମଗୁଡିକ ସାଧାରଣତଃ ଛାତ୍ରୀଛାତ୍ରଙ୍କୁ ଭଲ ପ୍ୟାକେଜରେ ନିଯୁକ୍ତି ଦେଇଥାନ୍ତି। ମାତ୍ର ଚଳିତ ବର୍ଷ ପ୍ଲେସ୍ମେଣ୍ଟ ସେଲ୍ ପକ୍ଷରୁ ବିଭିନ୍ନ କମ୍ପାନୀଙ୍କୁ ସମ୍ପର୍କ କରାଯାଇଥିବା ବେଳେ ସେମାନେ ଏତେଟା ରେସ୍ପନ୍ସ ଦେଖାଇନାହାନ୍ତି। ଅପରପକ୍ଷରେ କ୍ୟାମ୍ପସ ଚୟନ ଲାଗି ଆସିବାକୁ ଆଉ କିଛି ଫାର୍ମ ଅଗ୍ରାହ୍ୟ କରି ଦେଇଛନ୍ତି। ଅଧିକ ସଂଖ୍ୟକ ନିଯୁକ୍ତିଦାତା ଏବଂ ନୂଆ ଫାର୍ମଙ୍କୁ ଆଣିବା ଲାଗି ଆଇଆଇଟିର ପ୍ଲେସ୍ମେଣ୍ଟ ସେଲ୍ ପକ୍ଷରୁ ଦୁଇଗୁଣ ଚେଷ୍ଟା କରାଯାଇଥିବା ଜଣାପଡିଛି।
କ୍ୱାଣ୍ଟିଟେଟିଭ ଇନ୍ଭେଷ୍ଟମେଣ୍ଟ ମ୍ୟାନେଜମେଣ୍ଟ ଫାର୍ମ ଓ୍ବାର୍ଲଡ କ୍ୱାଣ୍ଟ ବମ୍ବେ ଆଇଆଇଟି ଆସିବା ସହ ୪୦ ଲକ୍ଷରୁ ଉର୍ଦ୍ଧ୍ୱ ପ୍ୟାକେଜ ଦେଇଥାଏ। ବର୍ତ୍ତମାନ ସୁଦ୍ଧା ଏହା ଆସିବା ନେଇ କୌଣସି ସ୍ପଷ୍ଟ ସୂଚନା ନାହିଁ। ଅନ୍ୟ ଆଇଆଇଟିଗୁଡିକର ସ୍ଥିତି ମଧ୍ୟ ସମାନ ଥିବା ଏକ ଗଣମାଧ୍ୟମ ସଂସ୍ଥା ପକ୍ଷରୁ ଅନୁଧ୍ୟାନ କଲା ପରେ ରିପୋର୍ଟ ପ୍ରକାଶ ପାଇଛି। ଟାଓ୍ବାର ରିସର୍ଚ୍ଚ ଏବଂ ଗ୍ରାଭିଟନ ରିସର୍ଚ୍ଚ ଭଳି ପ୍ରମୁଖ ନିଯୁକ୍ତିଦାତା ଫାର୍ମଗୁଡିକର ସ୍ଥିତି ମଧ୍ୟ ସମାନ ରହିଛି। ଏମାନେ କ୍ୟାମ୍ପସ କରିବା ନେଇ କୌଣସି ସୂଚନା ଦେଇନାହାନ୍ତି। ଏହାବାଦ ଆମେରିକାର କ୍ଲାଉଡ୍ ଡାଟା ପରିଚାଳନା କମ୍ପାନୀ ରୁବରିକ୍ ମଧ୍ୟ କିଛି ସ୍ପଷ୍ଟ ସୂଚନା ଦେଇ ନାହିଁ।
ନିୟମିତ ଆସୁଥିବା କମ୍ପାନୀ ଚଳିତ ବର୍ଷ କମ୍ ରହିଛନ୍ତି ଫଳରେ ନୂଆ ଅନ୍ୟଠାରେ ନୂଆ ସୁଯୋଗ ଛାତ୍ରୀଛାତ୍ର ସନ୍ଧାନ କରୁଥିବା ଆଇଆଇଟି ଖଡଗପୁରର ଜଣେ ଛାତ୍ର ପ୍ରତିନିଧି କହିଛନ୍ତି। ମାନ୍ଦାବସ୍ଥା ଚାଲିଥିବାରୁ ଏହାର ପ୍ରଭାବ ନିଯୁକ୍ତି ଉପରେ ଯେଭଳି ନ ପଡେ ଅଧିକରୁ ଅଧିକ ଫାର୍ମଙ୍କୁ ଚଳିତ ବର୍ଷ ଆଣିବାକୁ କର୍ତ୍ତୃପକ୍ଷ ଯୋଜନା କରିଥିବା ସେ କହିଛନ୍ତି। ପ୍ରଥମ ପର୍ଯ୍ୟାୟ ପ୍ଲେସମେଣ୍ଟ ଡିସେମ୍ବର ୧ରୁ ଆରମ୍ଭ ହୋଇ ପ୍ରାୟ ୩ ସପ୍ତାହ ଚାଲିବ। ଅଟୋମୋବାଇଲ ଶିଳ୍ପ କ୍ଷତି ଗ୍ରସ୍ତ ହୋଇଥିବା ବେଳେ କୋର ସେକ୍ଟରର ପ୍ରଭାବିତ ହୋଇଛି। ଏଭଳି କ୍ଷେତ୍ରଗୁଡିକରେ ନିଯୁକ୍ତି କମିବ ବୋଲି ଅନୁଷ୍ଠାନଗୁଡିକ ପକ୍ଷରୁ କୁହାଯାଇଛି। ସେହିଭଳି କୋର୍ ସେକ୍ଟରରେ ନିଯୁକ୍ତି ପ୍ରଦାନ କରିବା ଲାଗି ଗତ ବର୍ଷ ଇଛୁକ ଥିବା କିଛି ଫାର୍ମ ଚଳିତ ବର୍ଷ ଅଗ୍ରାହ୍ୟ କରି ଦେଉଥିବା ଆଇଆଇଟି ଦିଲ୍ଲୀର ଜଣେ ଛାତ୍ର ପ୍ରତିନିଧି କହିଛନ୍ତି।
