ନୂଆଦିଲ୍ଲୀ,୨୫।୪:ଭାରତ ଏବଂ ଇଣ୍ଡୋନେସିଆ ଭଳି ଦେଶଗୁଡିକ ଲାଗି ଲକ୍ଡାଉନ ବିନାଶକାରୀ। ଏହା ଦ୍ୱାରା ଅର୍ଥ ବ୍ୟବସ୍ଥା ଏବଂ ଲୋକଙ୍କର ବିଶେଷ ମଙ୍ଗଳ ସାଧନ କରି ହେବ ନାହିଁ। ଲୋକଙ୍କ ଲାଗି ନିଯୁକ୍ତି କ୍ଷେତ୍ରରେ ବିଶେଷ ସୁବିଧା ସୁଯୋଗ ନ ଥିବାରୁ ଲକ୍ଡାଉନ ଭାରତ ଲାଗି ଏକ ବିନାଶକାରୀ ପଦକ୍ଷେପ ବୋଲି ଜାଫେରୀର ଇକ୍ୱିଟି ଷ୍ଟ୍ରାଟେଜି ବିଭାଗ ଗ୍ଲୋବାଲ ମୁଖ୍ୟ ଖ୍ରୋଷ୍ଟୋଫର ଉଡ୍ ମତବ୍ୟକ୍ତ କରିଛନ୍ତି। ସେ କହିଛନ୍ତି ଯେ, ଆମେରିକା କ୍ଷୁଦ୍ର ବାଣିଜ୍ୟକୁ ବଞ୍ଚାଇବା ଲାଗି ୩୪୯ ବିଲିୟନ ଡଲାରର ଏକ ଯୋଜନା ହାତକୁ ନେଇଛି। ଏଥିରେ କର୍ମଚାରୀଙ୍କୁ ବେତନ ନିରାପତ୍ତା, ଛୋଟ ଛୋଟ କମ୍ପାନୀଗୁଡିକ ଲାଗି ଋଣ ମାଫ ପଦକ୍ଷେପ ମଧ୍ୟ ସାମିଲ ରହିଛି। ଗୁରୁତର ସ୍ବାସ୍ଥ୍ୟ ସମସ୍ୟା ଉପୁଜିବା କ୍ଷେତ୍ରରେ ମଧ୍ୟ କର୍ମଚାରୀଙ୍କ ଲାଗି କମ୍ପାନୀ ବ୍ୟବସ୍ଥା ହାତକୁ ନେଇଛନ୍ତି। ଲକ୍ଡାଉନ ଯୋଗୁ ଭାରତୀୟ ବ୍ୟାଙ୍କଗୁଡିକର ସମସ୍ୟା ଦେଖାଯିବ। କାରଣ କମ୍ପାନୀଗୁଡିକ କାରବାର ହରାଇବା ଯୋଗୁ ଦେବାଳିଆ ସ୍ଥିତିକୁ ଯିବାର ବେଶି ସମ୍ଭାବନା ରହିଛି। ସେହିଭଳି ମଧ୍ୟ ପ୍ରାଚ୍ୟ ତେଲ ଉତ୍ପାଦନକାରୀ କମ୍ପାନୀଗୁଡିକ ଏବେ କ୍ଷତିରେ ଚାଲିଥିବାରୁ ଭାରତକୁ ରେମିଟାନ୍ସରେ ମଧ୍ୟ ସମସ୍ୟା ଉପୁଜିବ ବୋଲି ସେ ମତ ଦେଇଛନ୍ତି।
