ଭାରତୀୟ ଅର୍ଥନୀତି ସଙ୍କଟ ଦେଇ ଗତି କରୁଥିବା ଆଲୋଚନା ହେଉଛି। ନୀତି ଆୟୋଗ ଉପାଧ୍ୟକ୍ଷ ରାଜୀବ କୁମାର ଏ ନେଇ ନିକଟରେ ମତ ରଖିଛନ୍ତି। ଅଗଷ୍ଟ ୨୩ରେ ଅର୍ଥନୀତି ନିର୍ମଳା ସୀତାରାମନ ଖବରଦାତା ସମ୍ମିଳନୀରେ ଅର୍ଥନୈତିକ ଅଭିବୃଦ୍ଧିକୁ ତ୍ୱରାନ୍ବିତ କରିବା ଲାଗି ବଜେଟରେ ନିଆଯାଇଥିବା କେତେକ ନିଷ୍ପତ୍ତିରେ ପରିବର୍ତ୍ତନ କରିଛନ୍ତି। ଏହା ଦ୍ୱାରା ଭାରତୀୟ ଅର୍ଥନୀତିର ରୂପରେଖ କଣ ରହିବ ସାଧାରଣ ନାଗରିକଙ୍କ ମନରେ ଅନେକ ପ୍ରଶ୍ନ ଉଙ୍କି ମାରୁଛି। ଏଭଳି ସ୍ଥଳେ ମାନ୍ଦାବସ୍ଥାକୁ ନେଇ ବିଶେଷଜ୍ଞ ତଥା ବୁଦ୍ଧିଜୀବୀ ମହଲରେ ବିଭିନ୍ନ ପ୍ରତିକ୍ରିୟା ପ୍ରକାଶ ପାଇଛି।
ସଙ୍କଟ ସମୟ ଦେଇ ଗତି କରୁଛି ଅର୍ଥନୀତି
ଅର୍ଥନୀତି ବର୍ତ୍ତମାନ ଏକ ସଙ୍କଟ ସମୟ ଦେଇ ଗତି କରୁଛି। ଜିଡ଼ିପି ଅଭିବୃଦ୍ଧି କମିବା ସହ ଉଚ୍ଚ ହାରରେ ନିଯୁକ୍ତି ହ୍ରାସ ଚିନ୍ତାର କାରଣ ପାଲଟିଛି। ଏହାକୁ ଗୁରୁତ୍ୱର ସହ ବିଚାର କରିବାକୁ ହେବ। କେନ୍ଦ୍ର ଏବଂ ରାଜ୍ୟ ସରକାର ଠିକ୍ ନୀତି ଦ୍ୱାରା ଏହି ସମସ୍ୟା ସମାଧାନ କରିବାର ଆବଶ୍ୟକତା ରହିଛି।
– ଅମରେନ୍ଦ୍ର ଦାସ, ଅର୍ଥନୀତିଜ୍ଞ
ଋଣ ଯୋଗାଣକୁ ତ୍ୱରାନ୍ବିତ କରାଯାଉ
ବିଶ୍ୱ ବଜାର ମାନ୍ଦାବସ୍ଥାର ପ୍ରଭାବ ଘରୋଇ ବଜାର ଉପରେ ରହିଛି। ବିଗତ ବର୍ଷଗୁଡିକରେ ବ୍ୟାଙ୍କଗୁଡିକ ଠିକ୍ ଭାବେ ଋଣ ପ୍ରଦାନ କରି ନ ଥିବାରୁ ଏହା ଏବେ ଏନ୍ପିଏ ଆକାଉଣ୍ଟରେ ପରିବର୍ତ୍ତିତ ହୋଇଛି। ନଗଦ ଅଭାବରେ ବ୍ୟାଙ୍କଗୁଡିକ ଋଣ ଦେବାକୁ ସକ୍ଷମ ହେଉ ନାହାନ୍ତି। ଅର୍ଥନୀତି ଅଭିବୃଦ୍ଧି ଲାଗି ଆର୍ଥତ୍କ କାର୍ଯ୍ୟକଳାପ ବଢିବାର ଆବଶ୍ୟକତା ଥିଲେ ମଧ୍ୟ ବିଭିନ୍ନ କମ୍ପାନୀ ଋଣ ପାଉ ନ ଥିବାରୁ ସେମାନଙ୍କ ପରିଚାଳାନା ପ୍ରଭାବିତ ହୋଇଛି। ଲୋକମାନେ ସେମାନଙ୍କ କ୍ରୟ ନେଇ ଏବେ ଅଧିକ ସଚେତନ। କ୍ରୟ ନ ବଢିଲେ ଏହାର ପ୍ରଭାବ ଚାହିଦା ଏବଂ ଅର୍ଥନୀତି ଉପରେ ପଡିବ। ଯାହା ଏବେ ଅର୍ଥନୀତିରେ ଦେଖାଯାଇଛି। ବ୍ୟାଙ୍କ ଗୁଡିକର ଏନ୍ପିଏ ସମସ୍ୟା ଯୋଗୁ ନୂଆ ଋଣ ପ୍ରଦାନ ଅସୁବିଧା ହେଉଛି। ଏଭଳି ସ୍ଥିତିରେ ଲୋକମାନେ ଠିକ୍ ଭାବେ ପୁଞ୍ଜି ଲାଭ ନ କଲେ ବାଣିଜ୍ୟ ଅଭିବୃଦ୍ଧି ହେବ ନାହିଁ। ଯାହାର ପ୍ରଭାବ ଅର୍ଥନୀତି ଉପରେ ପଡୁଛି। ଦଶହରା ବେଳକୁ ସ୍ଥିତିରେ ପରିବର୍ତ୍ତନ ଆସିବା ନେଇ ଆଶାବାଦୀ।
-ନୀଶିଥ ନନ୍ଦ, ସଭାପତି, ଆଫୋର୍ଡ
ନିବେଶ ବୃଦ୍ଧିକୁ ଗୁରୁତ୍ୱ ଦିଆଯାଉ
ଜିଡିପି ଅଭିବୃଦ୍ଧି ହାର ଏବେ କମିଯାଇଛି। ଗତ ୫ ବଷ ମଧ୍ୟରେ ଏହା ସର୍ବନିମ୍ନ। ଅଟୋମୋବାଇଲ୍ କ୍ଷେତ୍ରରେ ସାଢେ ୩ ଲକ୍ଷ ଲୋକ ନିଯୁକ୍ତି ହରାଇଛନ୍ତି। ମାନ୍ଦାବସ୍ଥା ପ୍ରଭାବ ରିୟଲ ଇଷ୍ଟେଟ ଉପରେ ମଧ୍ୟ ପଡିଛି। ଫଳରେ ଉକ୍ତ କ୍ଷେତ୍ର ସହ ୨୫୦ ସଂଲଗ୍ନ କ୍ଷେତ୍ରରେ ନିଯୁକ୍ତି ହ୍ରାସ ହୋଇଛି। ସେହିଭଳି ଏଫ୍ଏମ୍ସିଜି କ୍ଷେତ୍ର ମଧ୍ୟ ମାନ୍ଦାବସ୍ଥାର ଶିକାର ହୋଇଛି। ସରକାରଙ୍କ ଟିକସ ଅଭିବୃଦ୍ଧି କମିବା ଯୋଗୁ ଏହା ଦ୍ୱାରା ସରକାରୀ ଖର୍ଚ୍ଚ କମୁଛି। ଟିକସ ସଂଗ୍ରହ ବଢିବାର ଆବଶ୍ୟକତା ରହିଛି। ଏହା ଦ୍ୱାରା ସରକାରୀ କ୍ଷେତ୍ର ନିବେଶ ବୃଦ୍ଧି ହେବ। ଏହାବାଦ ଘରୋଇ କ୍ଷେତ୍ର ନିବେଶ ବଢାଇବା ଲାଗି ସୁଧ ହାର କମାଇବା ଉଚିତ। ସୁଲଭ ସୁଧ ହାରରେ ଶିଳ୍ପ କ୍ଷେତ୍ର ଋଣ ପାଇଲେ ନିବେଶ ବଢିବ। ଏହା ଦ୍ୱାରା ଅର୍ଥନୀତି ଉପରେ ସକରାତ୍ମକ ପ୍ରଭାବ ପଡିବ।
– ରଶ୍ମି ରଞ୍ଜନ ବେହେରା, ଅର୍ଥନୀତି ଅଧ୍ୟାପକ, ବିଜ୍ଞାନ ସ୍ବଂୟଶାସିତ ମହାବିଦ୍ୟାଳୟ,ହିଞ୍ଜିଳିକାଟୁ
ଦୂରଦୃଷ୍ଟି ସହ କାର୍ଯ୍ୟ କରିବାର ଆବଶ୍ୟକତା ରହିଛି
ମାନ୍ଦାବସ୍ଥାର ପ୍ରଭାବ ଅର୍ଥନୀତି ଉପରେ ପରିଲକ୍ଷିତ ହେଉଛି। ଏହାର ପ୍ରଭାବ ଯୋଗୁ ସରକାରଙ୍କ ପକ୍ଷରୁ ମିଳୁଥିବା ପେମେଣ୍ଟ ଅଂଶୀଦାର ଠିକ୍ ଭାବେ ପାଉ ନାହାନ୍ତି। କ୍ୟାଶ ଫ୍ଲୋ କମ୍ ରହିଛି। ଭିତ୍ତିଭୂମି ନିର୍ମାଣ କାର୍ଯ୍ୟ କମି ଥିବାରୁ ଏହାର ପ୍ରଭାବ ମଧ୍ୟ ନିଯୁକ୍ତି ଉପରେ ରହିଛି। ବ୍ୟାଙ୍କଗୁଡିକର ସ୍ଥିତି ଖରାପ ଥିବାରୁ ସେମାନେ ଋଣ ପ୍ରଦାନ କରୁ ନାହାନ୍ତି। ସରକାର ପ୍ୟାକେଜ ପ୍ରଦାନ କରିଥିଲେ ମଧ୍ୟ ବ୍ୟାଙ୍କଗୁଡିକ ଏହାକୁ କିଭଳି ଅର୍ଥ ପରିଚାଳନା କରିବେ ତାହା ଦେଖିବାକୁ ବାକି ରହିଲା। ମାନ୍ଦାବସ୍ଥା ଯୋଗୁ ନିଯୁକ୍ତି ସୃଷ୍ଟି ବାଧାପ୍ରାପ୍ତ ହୋଇଛି। ଲୋକଙ୍କର ଖର୍ଚ୍ଚ କରିବା କ୍ଷମତା ମଧ୍ୟ କମିଛି। ସେହିଭଳି ରାଜ୍ୟ ସରକାରଙ୍କ ପକ୍ଷରୁ ସେଭଳି କିଛି ଆଖି ଦୃଶିଆ ପ୍ରକଳ୍ପ କାର୍ଯ୍ୟ ଗ୍ରହଣ କରାଯାଇ ନାହିଁ। ରାଜ୍ୟରେ ବ୍ୟାଙ୍କଗୁଡିକ ଋଣ ପ୍ରଦାନ କରିବାକୁ ସଙ୍କୋଚ କରୁଛନ୍ତି। ଏହାର ମୁଖ୍ୟ କାରଣ ନଗଦ ସଙ୍କଟ। ଜିଏସ୍ଟି ରିଫଣ୍ଡ ଠିକ୍ ଭାବେ ମିଳୁ ନ ଥିବାରୁ ଶିଳ୍ପଗୁଡିକ ଏହା ଦ୍ୱାରା ପ୍ରଭାବିତ ହୋଇଛନ୍ତି। ସେହିଭଳି ସରକାର ଠିକ୍ ନୀତି ଆଣିିବାର ଉଚିତ। ଠିକ୍ ଲକ୍ଷ୍ୟ ରଖି କାମ କଲେ ଅର୍ଥନୀତି ଏହାର ଭଲ ପ୍ରଭାବ ପଡ଼ିବ।
– ସାତ୍ତ୍ୱିକ ସ୍ବାଇଁ, ମହାସଚିବ, ଓସ୍ମେ
