ନୂଆଦିଲ୍ଲୀ,୧୨-୧୧: ଅକ୍ଟୋବରରେ ପାସେଞ୍ଜର ଯାନ ବିକ୍ରିରେ ୦.୨୮% ବୃଦ୍ଧି ଘଟିଥିବା ସୋସାଇଟି ଅଫ୍ ଇଣ୍ଡିଆନ୍ ଅଟୋମୋବାଇଲ ମାନୁଫାକ୍ଚରର୍ସ ସୋସାଇଟି(ସିଆମ୍) ପକ୍ଷରୁ ସୂଚନା ଦିଆଯାଇଛି। ପାର୍ବଣ ସମୟ ବିକ୍ରି, ନୂଆ ମଡେଲ ଲଞ୍ଚ ଯୋଗୁ ବିକ୍ରି ସାମାନ୍ୟ ବଢିଥିବା ସିଆମ୍ ପକ୍ଷରୁ ପ୍ରକାଶ ପାଇଛି। ଅକ୍ଟୋବରରେ ଯାତ୍ରିବାହୀ ଯାନ ବିକ୍ରି ୨.୮୫ ଲକ୍ଷ ୟୁନିଟକୁ ବଢିଛି। ଏହା ଗତ ବର୍ଷ ସମାନ ସମୟରେ ୨.୮୪ ଲକ୍ଷ ୟୁନିଟ ରହିଥିଲା। ସବୁ ବର୍ଗରେ ଯାନ ବିକ୍ରି କଥା ବିଚାର କରିଲେ ଏହା ୧୨.୭୬% ହ୍ରାସ ଘଟିଛି। ଚଳିତ ବର୍ଷ ଅକ୍ଟୋବରରେ ୨୧.୭୬ ଲକ୍ଷ ୟୁନିଟ ଯାନ ବିକ୍ରି ହୋଇଛି। ଏହା ଗତ ବର୍ଷ ସମାନ ସମୟରେ ୨୪.୯୪ ଲକ୍ଷ ୟୁନିଟ ଥିବା ସିଆମ ରିପୋର୍ଟରେ ଉଲ୍ଲେଖ ରହିଛି। ଗତ ମାସରେ ମୋଟର ସାଇକେଲ ବିକ୍ରି ୧୫.୮୮% ହ୍ରାସ ଘଟି ୧୧.୧୬ ଲକ୍ଷ ୟୁନିଟ ରହିଛି। ଏହା ଗତବର୍ଷ ସମାନ ସମୟରେ ୧୩.୨୭ ଲକ୍ଷ ୟୁନିଟ ରହିଥିଲା। ନଭେମ୍ବର ଏବଂ ଡିସେମ୍ବରରେ ଯାନ ବିକ୍ରି ଉନ୍ନତ ରହିବା ନେଇ ସିଆମ୍ ଆଶାବାଦୀ ରହିଛି। ସେହିଭଳି ଆଗାମୀ ଦିନରେ ଅଟୋମୋବାଇଲ ଶିଳ୍ପ ମାନ୍ଦାବସ୍ଥାରୁ ବାହାରକୁ ଆସିବାକୁ ସକ୍ଷମ ହେବ ବୋଲି ଏହା ଆଶା ପ୍ରକଟ କରିଛି। ସୂଚନା ମୁତାବକ ଏପ୍ରିଲ-ଅକ୍ଟୋବର ସମୟରେ ଦେଶ ମଧ୍ୟରେ ପାସେଞ୍ଜର ଯାନ ବିକ୍ରି ଗତ ବର୍ଷ ଏହି ସମୟ ତୁଳନାରେ ୨୦% କମିଛି। ଚଳିତ ବର୍ଷ ଅକ୍ଟୋବରରେ କାର୍ ବିକ୍ରି ୬.୩୪% ହ୍ରାସ ଘଟି ୧.୭୩ ଲକ୍ଷ ୟୁନିଟ ରହିଛି। ଏହା ଗତ ବର୍ଷ ସମାନ ମାସରେ ୧.୮୫ ଲକ୍ଷ ୟୁନିଟ ରହିଥିଲା। ଏହାବାଦ ୟୁଟିଲିଟି ଯାନ ବିକ୍ରି କ୍ଷେତ୍ରରେ ୨୨.୨୨% ବୃଦ୍ଧି ଘଟିଛି। ସରକାର ଘୋଷଣା କରିଥିବା ବିଭିନ୍ନ ପଦକ୍ଷେପ ଅର୍ଥନୀତି ଉପରେ ଉନ୍ନତ ପ୍ରଭାବ ପକାଇବା ନେଇ ଆଶାବାଦୀ ରହିଥିବା ସିଆମ ସଭାପତି ରାଜନ ଓ୍ବାଧେରା କହିଛନ୍ତି।
