ଭୁବନେଶ୍ୱର,୧୧।୨(ଅନୁରାଧା ମହାରଣା): କଟକର ବାରବାଟୀ ଷ୍ଟାଡିୟମରେ ରବିବାର ଭାରତ ଓ ଇଂଲଣ୍ଡ ମଧ୍ୟରେ ଅନୁଷ୍ଠିତ କ୍ରିକେଟ ମ୍ୟାଚ ବେଳେ ଫ୍ଲଡ୍ ଲାଇଟରେ ବିଭ୍ରାଟ ପାଇଁ ପ୍ରାୟ ୩୦ ମିନିଟ କାଳ ଖେଳ ବନ୍ଦ ରହିଥିଲା। ତାହା ବିଶ୍ୱର କ୍ରୀଡ଼ାପ୍ରେମୀଙ୍କ ସମ୍ମୁଖରେ ଓଡ଼ିଶାକୁ ଲଜ୍ଜିତ କରିଛି ବୋଲି ବିଜେଡି ମିଡିଆ ସଂଯୋଜକ ଲେନିନ୍ ମହାନ୍ତି କହିଛନ୍ତ। ଏଥିସହିତ ସେ ରାଜ୍ୟର କ୍ରୀଡ଼ାମନ୍ତ୍ରୀଙ୍କ ଇସ୍ତଫା ଦାବି କରିଛନ୍ତି।
ବିଜେଡି ପକ୍ଷରୁ ଜାରି କରାଯାଇଥିବା ଏକ ପ୍ରେସ୍ ବିବୃତିରେ ଲେନିନ କହିଛନ୍ତି, ଗତ ୮ ମାସରେ କ୍ରୀଡ଼ାର ବିକାଶ କ୍ଷେତ୍ରରେ ରାଜ୍ୟ ସରକାରଙ୍କ ଅବଦାନ ଶୂନ ରହିଛି। ବହିଯାଉଥିବା ଝରଣା ପାଣିରେ ହାତ ଧୋଇବା ପରି ଆୟୋଜିତ ହେଉଥିବା କ୍ରୀଡ଼ା କାର୍ଯ୍ୟକ୍ରମରେ ଭାଜପା ସରକାର ଉପସ୍ଥିତି ଜାହିର କରି ବାହାଦୁରି ନେବାକୁ ଚେଷ୍ଟା କରୁଛନ୍ତି ବୋଲି ସେ କହିଛନ୍ତି। ଏଭଳି ସ୍ଥଳେ ଫ୍ଲଡ୍ ଲାଇଟ୍ ବିଭ୍ରାଟର ବିଫଳତାକୁ ରାଜ୍ୟ ସରକାର ମୁଣ୍ଡକୁ ନେଇ କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀ ସୂରଜ ନୈତିକତା ଦୃଷ୍ଟିରୁ ଇସ୍ତଫା ଦିଅନ୍ତୁ ବୋଲି ବିଜେଡି ଦାବି କରୁଥିବା ଲେନିନ୍ କହିଛନ୍ତି। ପ୍ରାୟ ୬ ବର୍ଷର ବ୍ୟବଧାନ ପରେ ଅନ୍ତର୍ଜାତୀୟ ଦିନିକିଆ କ୍ରିକେଟ ମ୍ୟାଚ୍ ଓଡ଼ିଶାକୁ ମିଳିଥିଲା। ମ୍ୟାଚକୁ ସଫଳତାର ସହ ଆୟୋଜନ କରିବା ପାଇଁ ଓଡ଼ିଶା କ୍ରିକେଟ ଆସୋସିଏଶନ(ଓସିଏ) ଓ ରାଜ୍ୟ ସରକାରଙ୍କ ଗୁରୁଦାୟିତ୍ୱ ରହିଥିଲା। ଏଥିପାଇଁ ପ୍ରଶାସନିକସ୍ତରରେ ବାରମ୍ବାର ସମୀକ୍ଷା ବୈଠକ ହୋଇଥିଲା। ସେଥିରେ ସୂର୍ଯ୍ୟବଂଶୀ ଭାଗ ନେବା ସହିତ ଷ୍ଟାଡିୟମର ସ୍ଥିତି ଓ ପ୍ରସ୍ତୁତିର ତଦାରଖ କରିଥିଲେ। ନିଜେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ବାରବାଟୀ ଷ୍ଟାଡିୟମରେ ଏକ ସମୀକ୍ଷା କରିଥିଲେ। ଏତେ ସବୁ ପ୍ରସ୍ତୁତି ଓ ପ୍ରତିଶ୍ରୁତି ପରେ ଫ୍ଲଡ୍ ଲାଇଟ ବିଭ୍ରାଟ ଘଟିଛି। ବିଦ୍ୟୁତ୍ ବିଭାଗର ଇଞ୍ଜିନିୟର କାହିଁକି ଉପସ୍ଥିତ ନ ଥିଲେ ଏବଂ ଫ୍ଲଡ୍ ଲାଇଟ୍ ଓ ଜେନେରେଟର ବିଦ୍ୟୁତ୍ ଯୋଗାଣ ବାବଦରେ ବିଦ୍ୟୁତ୍ ବିଭାଗର କୌଣସି ଯନ୍ତ୍ରୀ ଏହି ବିଦ୍ୟୁତ୍ ଯୋଗାଣକୁ ସ୍ବୀକୃତି ପ୍ରଦାନ କରିଥିଲେ କି ବୋଲି ଲେନିନ୍ ପ୍ରଶ୍ନ କରିଛନ୍ତି। ଦେଶର ଜଣାଶୁଣା କ୍ରୀଡ଼ା ସାମ୍ବାଦିକ ବୋରିଆ ମଜୁମଦାର ‘ଏକ୍ସ’ରେ ଏକ ପୋଷ୍ଟରେ ଅତୀତରେ ପାକିସ୍ତାନରେ ଫ୍ଲଡ୍ ଲାଇଟ ବିଭ୍ରାଟ କଥା ସାମ୍ନାକୁ ଆସିଥିବା ଉଲ୍ଲେଖ କରିଛନ୍ତି। କଟକର ନାଁ ତା’ ସହିତ ଯୋଡ଼ା ହୋଇଗଲା ବୋଲି ମଜୁମଦାର ଲେଖିଥିବା କଥା ଲେନିନ୍ କହିଛନ୍ତି।
ଉପରଲିଖିତ ଘଟଣା ଓଡ଼ିଶାକୁ ନିନ୍ଦିତ କରିଥିବାବେଳେ ଓସିଏକୁ ଏନେଇ କାରଣ ଦର୍ଶାଅ ନୋଟିସ ଜାରି କରାଯାଇଛି ବୋଲି ସୂର୍ଯ୍ୟବଂଶୀ ଦେଇଥିବା ମନ୍ତବ୍ୟ ହାସ୍ୟାସ୍ପଦ ବୋଲି ଲେନିନ୍ କହିଛନ୍ତି। ରାଉରକେଲାରେ ହକି ଲିଗ୍ର ଫାଇନାଲ ବେଳେ ଅବ୍ୟବସ୍ଥା କାରଣରୁ ଦଳାଚକଟା ସ୍ଥିତି ହୋଇଥିଲା। କ୍ରୀଡ଼ାମନ୍ତ୍ରୀ ସୂର୍ଯ୍ୟବଂଶୀଙ୍କ ଗାଡ଼ି କଳିଙ୍ଗ ଷ୍ଟାଡିୟମ ଟ୍ରାକ୍ରେ ଚଢ଼ାଇବା ଘଟଣା କ୍ରୀଡ଼ାପ୍ରେମୀଙ୍କୁ ଆଘାତ ଦେଇଥିଲା ବୋଲି ସେ କହିଛନ୍ତି।
