Posted inUncategorized

ବିଦେଶୀ ଗଣମାଧ୍ୟମରେ ‘କଶ୍ମୀର’:ଉପତ୍ୟକାରେ ସ୍ବାସ୍ଥ୍ୟସେବା ସଙ୍କଟ,ଭାରତର କଶ୍ମୀର ଦମନ ହସ୍ପିଟାଲଗୁଡ଼ିକୁ ଶ୍ମଶାନରେ ପରିଣତ କରିଦେଇଛି

ରୋଗୀଙ୍କ ପାଇଁ ହସ୍ପିଟାଲଗୁଡ଼ିକରେ ଔଷଧ ନାହିଁ। କର୍ଫ୍ୟୁ ବଳବତ୍ତର ରହିଥିବାରୁ ଚିକିତ୍ସା ଲାଗି ସେମାନଙ୍କୁ ସ୍ବାସ୍ଥ୍ୟକେନ୍ଦ୍ରକୁ ନେବା ଲାଗି ଆମ୍ବୁଲାନ୍ସ ନାହିଁ। ଏଟିଏମ୍‌ଗୁଡ଼ିକ ବନ୍ଦ ଥିବାରୁ ଲୋକେ ଔଷଧ କିଣିବା ପାଇଁ ଟଙ୍କା ଉଠାଇପାରୁ ନାହାନ୍ତି। ଅନୁଚ୍ଛେଦ ୩୭୦ ଉଚ୍ଛେଦ ଓ ଜମ୍ମୁ-କଶ୍ମୀରକୁ ଦୁଇଟି କେନ୍ଦ୍ରଶାସିତ ଅଞ୍ଚଳରେ ପରିଣତ କରିବା ପାଇଁ କେନ୍ଦ୍ର ସରକାରଙ୍କ ନିଷ୍ପତ୍ତି ପରିପ୍ରେକ୍ଷୀରେ ଉପତ୍ୟକାରେ ସ୍ବାସ୍ଥ୍ୟସେବା କ୍ଷେତ୍ରରେ ଏଭଳି ସଙ୍କଟ ସୃଷ୍ଟି ହୋଇଛି। ନିକଟରେ ଉପତ୍ୟକାର ସ୍ବାସ୍ଥ୍ୟସେବା ସଙ୍କଟକୁ ନେଇ ଗଣମାଧ୍ୟମରେ କହୁଥିବାବେଳେ ଓମାର ସଲିମ୍‌ ଅଖ୍‌ତାର ନାମକ ଜଣେ ଯୁବ ଡାକ୍ତରଙ୍କୁ ପୋଲିସ ଉଠାଇ ନେଇଥିଲା। ଏହାକୁ ନେଇ ସୃଷ୍ଟି ହୋଇଥିବା ବିବାଦ ଥମିନାହିଁ। ଅନ୍ୟପକ୍ଷରେ ଅନ୍ତର୍ଜାତୀୟ ଗଣମାଧ୍ୟମରେ ପ୍ରକାଶିତ ଏଭଳି ଅଭିଯୋଗକୁ ଜମ୍ମୁ-କଶ୍ମୀର ପୋଲିସ ଓ ପ୍ରଶାସନ ପକ୍ଷରୁ ଗୁରୁବାର ଖଣ୍ଡନ କରାଯାଇଛି।
ରିପୋର୍ଟ ଅନୁସାରେ ଦୁଇଦିନ ତଳେ ଶ୍ରୀନଗରରେ ପ୍ଲାକାର୍ଡ ଧରି ଗୋଲ୍ଡ ମେଡାଲିଷ୍ଟ ୟୁରୋଲୋଜିଷ୍ଟ ଓମାର ସଲିମ୍‌ ଅଖ୍‌ତାର ବିବିସିକୁ କହୁଥିଲେ, ଏହା ବିକ୍ଷୋଭ ନୁହେଁ, ବରଂ ଏକ ଅନୁରୋଧ। ଅଗଷ୍ଟ ୬ରେ ଜଣେ ରୋଗୀଙ୍କୁ କେମୋଥେରାପି ଚିକିତ୍ସା ଆବଶ୍ୟକ ଥିଲା। ସେ ଗତ ୨୪ ତାରିଖରେ ଆମ ପାଖକୁ ଆସିଥିଲେ। କିନ୍ତୁ ଔଷଧ ପାଇପାରି ନ ଥିଲେ। ଆଉ ଜଣେ ରୋଗୀଙ୍କ କେମୋଥେରାପି ଔଷଧ ଦିଲ୍ଲୀରୁ ଅଣାଯିବାର ଥିଲା। କିନ୍ତୁ ତାହା ଆଣିବା ପାଇଁ ଆମେ ଅର୍ଡର କରିପାରିଲୁ ନାହିଁ। ଫଳରେ ତାଙ୍କର ଚିକିତ୍ସା ଅନିର୍ଦ୍ଦିଷ୍ଟ କାଳ ପାଇଁ ସ୍ଥଗିତ ରଖାଯାଇଛି। ସେ କୌଣସି ସମୟରେ ଆଖିବୁଜି ଦେଇପାରନ୍ତି। କଶ୍ମୀରରେ ଏଟିଏମ୍‌ଗୁଡ଼ିକ ବନ୍ଦ ଥିବାରୁ ଲୋକେ ଔଷଧ କିଣିବା ପାଇଁ ଟଙ୍କା ଉଠାଇ ପାରୁନାହାନ୍ତି। ଇଣ୍ଟରନେଟ କାମ କରୁ ନ ଥିବାରୁ ଗରିବ ରୋଗୀଙ୍କୁ ପ୍ରଧାନମନ୍ତ୍ରୀ ଜନ ଆରୋଗ୍ୟ ଯୋଜନାରେ ମାଗଣାରେ ଚିକିତ୍ସା କରାଯାଇ ପାରୁନାହିଁ। କାରଣ ଏଥିଲାଗି ଅନ୍‌ଲାଇନ୍‌ରେ ତଥ୍ୟ ଆବଶ୍ୟକ ହୋଇଥାଏ ବୋଲି ଅଖ୍‌ତାର କହିବାବେଳେ ପୋଲିସ ତାଙ୍କୁ ଟାଣିନେଇ ଏକ ଭ୍ୟାନ୍‌ରେ ବସାଇ ନେଇଯାଇଥିଲା। ଉପତ୍ୟକାରେ ସ୍ଥିତି ସ୍ବାଭାବିକ ରହିଛି ବୋଲି କେନ୍ଦ୍ର ସରକାର ଦାବି କରୁଥିବାବେଳେ ଔଷଧ, ଶିଶୁ ଖାଦ୍ୟ ଓ ଅନ୍ୟ ଚିକିତ୍ସା ଉପଲବ୍ଧ ନ ଥିବାରୁ କଶ୍ମୀରୀଙ୍କ ପାଇଁ ବଞ୍ଚତ୍ବା କଠିନ ହୋଇପଡ଼ିଲାଣି ବୋଲି କେତେକ ଅନ୍ତର୍ଜାତୀୟ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଛି। ଲଣ୍ଡନରେ ରହୁଥିବା କଶ୍ମୀରୀ ଡାକ୍ତର ମୁଦାସିର ଫିର୍ଦ୍ଦୌସି କହିଛନ୍ତି, କର୍ଫ୍ୟୁ ବଳବତ୍ତର ରହିଥିବାରୁ ଆମ୍ବୁଲାନ୍ସରେ ରୋଗୀଙ୍କୁ ଚିକିତ୍ସା ପାଇଁ ବଣ୍ଡିପୋରା, ଅନନ୍ତନାଗ ଓ ବାରାମୁଲା ଭଳି ସ୍ଥାନରେ ହସ୍ପିଟାଲକୁ ନିଆଯାଇ ପାରୁନାହିଁ। ଅଖ୍‌ତାର ଗିରଫ ହୋଇପାରନ୍ତି ବୋଲି ଜାଣି ସୁଦ୍ଧା ସ୍ବାସ୍ଥ୍ୟସେବା ନେଇ ସେ ଗଣମାଧ୍ୟମ ଆଗକୁ ଆସିଥିଲେ। ସେଠାକାର ସ୍ଥିତି ତାଙ୍କ ଗିରଫଦାରିରୁ ସ୍ପଷ୍ଟ ହେଉଛି। ଅଖ୍‌ତାରଙ୍କୁ ପରେ ଛାଡ଼ି ଦିଆଯାଇଥିଲେ ହେଁ ତାଙ୍କ ଗିରଫଦାରିକୁ ନେଇ ବିଭିନ୍ନ ମହଲରେ ନିନ୍ଦା କରାଯାଇଛି। ସ୍ବାଭାବିକ ସ୍ଥିତି ଫେରିଆସିଛି ବୋଲି କେନ୍ଦ୍ର ସରକାରଙ୍କ ଦାବି କେତେ ସତ ତାହା ଏଥିରୁ ଧରାପଡ଼ିଯାଇଛି ବୋଲି ଇଣ୍ଡିଆନ୍‌ ଡକ୍ଟର୍ସ ଫର୍‌ ପିସ୍‌ ଆଣ୍ଡ ଡେଭେଲପ୍‌ମେଣ୍ଟ ପକ୍ଷରୁ କୁହାଯାଇଛି। ୨୪ ଦିନ ଧରି ରୋଗୀମାନଙ୍କୁ ଚିକିତ୍ସାରୁ ବଞ୍ଚତ୍ତ କରି ସ୍ବାସ୍ଥ୍ୟସେବା ସମ୍ପର୍କିତ ଅନ୍ତର୍ଜାତୀୟ ରାଜିନାମା ଉଲ୍ଲଂଘନ କରିବା ସରକାରଙ୍କ ଏକ ଆପରାଧିକ କାର୍ଯ୍ୟ ବୋଲି ଏହି ସଙ୍ଗଠନ ସମାଲୋଚନା କରିବା ସହ ସମସ୍ତ କଟକଣା ହଟାଇବା ପାଇଁ ଦାବି କରିଛି। ଏନେଇ ଓ୍ବାଲ୍‌ଷ୍ଟ୍ରିଟ୍‌ ଜର୍ନାଲରେ ‘ଭାରତର କଶ୍ମୀର ଦମନ ହସ୍ପିଟାଲଗୁଡ଼ିକୁ ଶ୍ମଶାନରେ ପରିଣତ କରିଦେଇଛି’ ଶୀର୍ଷକରେ ପ୍ରକାଶିତ ବିସ୍ତୃତ ରିପୋର୍ଟକୁ ଜମ୍ମୁ-କଶ୍ମୀର ପୋଲିସ ଅଧିକାରୀ ଇମ୍‌ତିଆଜ୍‌ ହୁସେନ ଖଣ୍ଡନ କରିଛନ୍ତି। ସେ କହିଛନ୍ତି, କଶ୍ମୀରରେ ବିଶ୍ୱସ୍ତରୀୟ ଡାକ୍ତର ଓ ଡାକ୍ତରୀ ଉପକରଣ ଉପଲବ୍ଧ। କୌଣସି ସ୍ଥାନରେ ମାତ୍ରାଧିକ କଟକଣା ଜାରି କରାଯାଇନାହିଁ। ଔଷଧ ମଧ୍ୟ ନିଅଣ୍ଟ ନାହିଁ। ଉପତ୍ୟକାର ସମସ୍ତ ହସ୍ପିଟାଲ ଖୋଲାରହିଛି ଓ ସ୍ବାଭାବିକ ଭାବେ ଚାଲୁଛି। ପ୍ରକାଶିତ ଖବର ସମ୍ପୂର୍ଣ୍ଣ ଭାବେ ଏକ ମିଥ୍ୟା ପ୍ରଚାର ଅଭିଯାନ ବୋଲି ସେ ଟୁଇଟ୍‌ କରିଛନ୍ତି। ସେହିପରି ପ୍ରଶାସନିକ ଅଧିକାରୀ ଶାହିଦ ଚୌଧ୍‌ରୀ ଏହାକୁ ଖଣ୍ଡନ କରିବା ସହ ହସ୍ପିଟାଲଗୁଡ଼ିକରେ ପର୍ଯ୍ୟାପ୍ତ ପରିମାଣର ଔଷଧ ମହଜୁଦ ଥିବା କହିଛନ୍ତି। ଲଣ୍ଡନ ଓ ଓ୍ବାଶିଂଟନରୁ ପ୍ରକାଶିତ ରିପୋର୍ଟଗୁଡ଼ିକୁ ସେ ମିଛ ବୋଲି ଦର୍ଶାଇଛନ୍ତି।

କଟକଣାକୁ ନେଇ ଚିନ୍ତା ବ୍ୟକ୍ତକଲା ଆମେରିକା

ଓ୍ବାଶିଂଟନ,୩୦-୮: ଜମ୍ମୁ-କଶ୍ମୀର ସ୍ଥିତି ଉପରେ ନଜର ରଖିଥିବା ଆମେରିକା ସ୍ଥାନୀୟ ନେତାମାନଙ୍କ ଅଟକ ଏବଂ ସାଧାରଣ ଲୋକଙ୍କ ଉପରେ କଟକଣା ଜାରି ରହିଥିବାରୁ ଚିନ୍ତାବ୍ୟକ୍ତ କରିଛି। କଶ୍ମୀର ଦ୍ୱିପାକ୍ଷିକ ପ୍ରସଙ୍ଗ ବୋଲି ନୂଆଦିଲ୍ଲୀ ଦୋହରାଉଥିବାବେଳେ ମାନବାଧିକାରକୁ ସମ୍ମାନ ଦେବା, ଆଇନଗତ ପ୍ରକ୍ରିୟା ଅନୁପାଳନ କରିବା ଏବଂ ପ୍ରଭାବିତମାନଙ୍କ ସହ ଆଲୋଚନା କରିବା ପାଇଁ ଆମେରିକା ପରରାଷ୍ଟ୍ର ବିଭାଗ ମୁଖପାତ୍ର ଆହ୍ବାନ ଦେଇଛନ୍ତି। ଏଥିସହିତ ନିୟନ୍ତ୍ରଣ ରେଖାରେ ଶାନ୍ତି ଓ ସ୍ଥିରତା ବଜାୟ ରଖିବା ସହ ସୀମାପାର ଆତଙ୍କବାଦ ରୋକିବା ପାଇଁ ମୁଖପାତ୍ର କହିବା ସହ ପରୋକ୍ଷରେ ପାକିସ୍ତାନକୁ ସତର୍କ କରାଇଦେଇଛନ୍ତି। ତେବେ କଶ୍ମୀର ପ୍ରସଙ୍ଗରେ ଦୁଇଦେଶ ମଧ୍ୟରେ ସିଧାସଳଖ ଆଲୋଚନାକୁ ଆମେରିକା ସମର୍ଥନ କରେ ବୋଲି ସେ କହିଛନ୍ତି। ତିନିଦିନ ପୂର୍ବେ ଜି-୭ ସମ୍ମିଳନୀ ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସହ କଶ୍ମୀର ପ୍ରସଙ୍ଗ ଉପରେ ଆଲୋଚନା କରିଥିଲେ।


All Right Reserved By Dharitri.Com

ଧୋନୀଙ୍କୁ ଆଇସିସିର ଭୂୟସୀ ପ୍ରଶଂସା

ଲିଡ୍ସ,୭।୭(ପି.ଟି.)- ଭାରତୀୟ ପୂର୍ବତନ ଅଧିନାୟକ ତଥା ଅଭିଜ୍ଞ ଉଇକେଟକିପର ବ୍ୟାଟ୍ସମ୍ୟାନ ମହେନ୍ଦ୍ର ସିଂ ଧୋନଙ୍କ ପ୍ରଶଂସାରେ ଶତମୁଖ ହୋଇଛି ଆନ୍ତର୍ଜାତିକ କ୍ରିକେଟ କାଉନସିଲ (ଆଇସିସି)। ଧୋନୀ...

ରାହୁଲଙ୍କ ବିରୋଧରେ ମାନହାନି ମାମଲା

ପାଟନା, ୧୮।୪: କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀଙ୍କ ନାଁରେ ଗୁରୁବାର ମାନହାନି ମାମଲା ଦାଏର କରିଛନ୍ତି ବିହାର ଉପମୁଖ୍ୟମନ୍ତ୍ରୀ ସୁଶୀଲ କୁମାର ମୋଦି। ଏକ ନିର୍ବାଚନୀ...

ବର୍ଷାଦିନରେ କେଶର ଯତ୍ନ

ବର୍ଷାଦିନରେ ବଢ଼ୁଥିବା କେଶ ସମସ୍ୟା ଚିନ୍ତାର କାରଣ ହୋଇପାରେ। ଏଥିଲାଗି ଆପଣଙ୍କୁ କେତୋଟି ଉପାୟ ଦିଆଯାଉଛି ଯାହାକୁ ଆପଣାଇ ହେବେ ଟେନସନ୍‌ ଫ୍ରି । ଜାଣନ୍ତୁ...

ମନକଥା ଲେଖିଲେ ଦୂର ହେବ ଅବସାଦ

ମନ କଥା ଲେଖିବା ଅଭ୍ୟାସ ଅବସାଦ ଦୂର କରିବାରେ ସାହାଯ୍ୟ କରିଥାଏ। ଏହାଦ୍ୱାରା ଚ୍ୟାଲେଞ୍ଜପୂର୍ଣ୍ଣ କାମକୁ ଉନ୍ନତ ଢ଼ଙ୍ଗରେ କରିବାକୁ ଶକ୍ତି ମିଳିଥାଏ। ଆମେରିକା ମିଶିଗାନ୍‌...

୫ କାର୍ଯ୍ୟନିର୍ବାହୀ ଅଧିକାରୀ, ବିଆର୍‌ସିସି ଓ ଏବିଇଓଙ୍କ ବଦଳି

ହାଟଡିହୀ,୨୨ା୬ (ଡି.ଏନ୍‌.ଏ.): କେନ୍ଦୁଝର ଜିଲା ହାଟଡିହୀ ବ୍ଲକରୁ ୫ ଜଣ କାର୍ଯ୍ୟନିର୍ବାହୀ ଅଧିକାରୀ ବଦଳି ହୋଇଛନ୍ତି ା କାର୍ଯ୍ୟନିର୍ବାହୀ ଅଧିକାରୀ ଚିନ୍ତାମଣି ଦାସ ଓ ବିଶ୍ୱନାଥ...

ଅଦ୍ୱିତୀୟ ସ୍ରଷ୍ଟା ଫକୀରମୋହନ ଥିଲେ ପ୍ରଚଣ୍ଡ ସ୍ବାଭିମାନୀ

ବାଲେଶ୍ୱର ଅଫିସ, ୧୪।୧-ବାଲେଶ୍ୱର ଜିଲା ନୂଆପାଢ଼ୀସ୍ଥିତ ଫକୀରମୋହନ ବିଶ୍ୱବିଦ୍ୟାଳୟ ଆନୁକୂଲ୍ୟରେ ବ୍ୟାସକବି ଫକୀରମୋହନଙ୍କର ୧୭୭ତମ ଜୟନ୍ତୀ ସମାରୋହ ସୋମବାର ଅନୁଷ୍ଠିତ ହୋଇଛି। ବିଶ୍ୱବିଦ୍ୟାଳୟର କୁଳପତି ପ୍ରଫେସର...

ତିତ୍‌ଲି ଦୁଃଖ ଯାଇନି, ମାଡ଼ିଆସୁଛି ‘ଫନୀ’ ଲୋକେ ଆତଙ୍କିତ

ଭଞ୍ଜନଗର,୧ା୫(ଡି.ଏନ୍‌.ଏ.) : ସାମୁଦ୍ରିକ  ଝଡ଼  ତିତ୍‌ଲି ପ୍ରଭାବରେ ଗଞ୍ଜାମ ଜିଲା ଭଞ୍ଜନଗର ଉପଖଣ୍ଡରେ ବ୍ୟାପକ ଧନଜୀବନ କ୍ଷୟକ୍ଷତି ହୋଇଥିଲା। ଇତିମଧ୍ୟରେ ତିତ୍‌ଲିକୁ ୬ ମାସ ପୂରିବାକୁ...

‘ବୈଶାଖୀ ମହୋତ୍ସବ’ର ଦ୍ୱିତୀୟ ସନ୍ଧ୍ୟା: ମନମୋହିଲା ନୃତ୍ୟାଭିନୟ ‘ମୁଁ’

ଭୁବନେଶ୍ୱର,୧୭।୪(ବ୍ୟୁରୋ)- ଚିନ୍ତା ଓ ଚେତନା ପକ୍ଷରୁ ରବୀନ୍ଦ୍ର ମଣ୍ଡପଠାରେ ଆୟୋଜିତ ୪୦ତମ ବୈଶାଖୀ ମହୋତ୍ସବର ମଙ୍ଗଳବାର ଥିଲା ଦ୍ୱିତୀୟ ସନ୍ଧ୍ୟା। ଏହି ଅବସରରେ ରାଜ୍ୟର ବହୁ...

Leave a comment

Your email address will not be published. Required fields are marked *