ସାମଗ୍ରୀ ବିକ୍ରି ଚିନ୍ତାରେ ଏମ୍‌ଏସ୍‌ଏମ୍‌ଇ

ନୂଆଦିଲ୍ଲୀ,୨୦।୫: ଗତ କିଛି ତ୍ରୈମାସ ଧରି ଘରୋଇ ବଜାରର ଅଭିବୃଦ୍ଧି ନିମ୍ନଗାମୀ ହୋଇଥିବା ବେଳେ କରୋନା ଜନିତ ଲକ୍‌ଡାଉନ ସ୍ଥିତିକୁ ଆହୁରି ସଙ୍ଗିନ କରିଛି। ଦେଶର ଅର୍ଥନୈତିକ କାର୍ଯ୍ୟକଳାପ ବର୍ତ୍ତମାନ ଠପ୍‌ ହୋଇ ରହିଛି। ଲକ୍‌ଡାଉନ ଧୀରେ ଧୀରେ କୋହଳ ହେଉଥିବାରୁ ସରକାର କିଛି କିଛି କ୍ଷେତ୍ରରେ କାରବାରକୁ ଅନୁମତି ଦେଇଛନ୍ତି। ହେଲେ ଦୀର୍ଘଦିନ ଧରି ବନ୍ଦ ପଡିଥିବା ଶିଳ୍ପକୁ ପୁଣି ଥରେ ଛିଡା କରାଇବା ବର୍ତ୍ତମାନ କଷ୍ଟକର ହେଉଛି। ୟୁନିଟଗୁଡିକରେ ସାମାଜିକ ଦୂରତ୍ୱ ନିୟମ ରକ୍ଷା କରି କମ୍‌ ଶ୍ରମ ଶକ୍ତି ସହ କାର୍ଯ୍ୟ ହେଉଛି। କମ୍‌ ସଂଖ୍ୟକ ଲୋକଙ୍କୁ ନେଇ କାମ କରିବା ଅସୁବିଧା ସୃଷ୍ଟି ହେଉଥିବା ଶିଳ୍ପ ସୂତ୍ରରୁ ସୂଚନା ରହିଛି। ଦେଶର ମୋଟ ରପ୍ତାନି କ୍ଷେତ୍ରରେ ଏକ ପ୍ରମୁଖ ଯୋଗଦାନ ରଖୁଥିବା ଅଣୁ କ୍ଷୁଦ୍ର ମଧ୍ୟମ ଉଦ୍ୟୋଗ (ଏମ୍‌ଏସ୍‌ଏମ୍‌ଏ)ଗୁଡିକ କଥା ବିଚାର କଲେ ସ୍ଥିତି ପୂରା ବିଗିଡି ଯାଇଛି। ଲକ୍‌ଡାଉନ ଯୋଗୁ ଶିଳ୍ପଗୁଡିକ ଉପରେ ସମସ୍ୟା ମାଡି ପଡିଛି। ଶିଳ୍ପଗୁଡିକ ଉତ୍ପାଦନରେ ସମସ୍ୟା ସାମ୍ନା କରୁଛନ୍ତି। ବଜାର ନ ଥିବାରୁ ଉତ୍ପାଦିତ ସାମଗ୍ରୀ ବିକ୍ରି ବଟା କରିବା ବର୍ତ୍ତମାନ ସେମାନଙ୍କ ପାଇଁ ବଡ ସମସ୍ୟା ଭାବେ ଉଭା ହୋଇଛି। କାରଣ ବଜାର କେବେ ସୁଧୁରିବ ସେ ନେଇ କିଛି ଠିକ୍‌ ଭାବେ କହି ହେବନି। କିନ୍ତୁ ବଜାରକୁ ନେଇ ଶିଳ୍ପଗୁଡିକ ଆଶାବାଦୀ ଅଛନ୍ତି। ସ୍ଥିତି ସୁଧୁରିବା ନେଇ ସରକାର ଏମ୍‌ଏସ୍‌ଏମ୍‌ଇଗୁଡିକ ଲାଗି ପ୍ୟାକେଜରେ କିଛି ବିଶେଷ ଘୋଷଣା କରିବେ ବୋଲି ଅଂଶୀଦାରମାନେ ଆଶା ରଖିଥିଲେ। ହେଲେ ସରକାର ନିକଟରେ ଗ୍ରହଣ କରିଥିବା ପଦକ୍ଷେପ ସବୁ ବର୍ଗର ଏମ୍‌ଏସ୍‌ଏମ୍‌ଇ ଗୁଡିକ ଲାଗି ଫଳପ୍ରଦ ହେବ ବୋଲି ସେ ନେଇ ଶିଳ୍ପ ଜଗତ ସନ୍ଦିହାନ ରହିଛି।
ବର୍ତ୍ତମାନର ସଙ୍କଟ ସମୟରେ ସରକାରଙ୍କ ପକ୍ଷରୁ କିଛି ବିଶେଷ ବିଶେଷ ସୁବିଧା ସୁଯୋଗ ମିଳିବ ବୋଲି କ୍ଷୁଦ୍ରଶିଳ୍ପଗୁଡିକ ଆଶାବାନ୍ଧି ରହିଥିଲେ। ହେଲେ ସରକାର ତାଙ୍କ ପ୍ୟାକେଜରେ ଋଣ ନେଇ ଋଣ ଶୁଝିବା ପଦକ୍ଷେପ ଆଣିଲେ। କ୍ଷତିଗ୍ରସ୍ତ ସ୍ଥିତିରେ ରହିଥିବାରୁ ସରକାର ଆଶ୍ୱସ୍ତି ପ୍ୟାକେଜ ଦେବେ ବୋଲି ଆଶା କରାଯାଉଥିଲା। ଏହି ପ୍ୟାକେଜରେ ସରକାରୀ ସବ୍‌ସିଡି, ଋଣ ଉପରେ ସୁଧ ହାର ରିହାତି ଭଳି ଅନ୍ୟ ପଦକ୍ଷେପ ଆସିବ ବୋଲି ଶିଳ୍ପ ଆଶାବାନ ଥିଲା। ହେଲେ ବର୍ତ୍ତମାନ ଶିଳ୍ପଗୁଡିକ ପୂର୍ବଭଳି ସମାନ ସୁଧହାରରେ ଋଣ ନେବେ। ଯଦି ବର୍ତ୍ତମାନ କମ୍‌ ସୁଧହାରରେ କ୍ଷୁଦ୍ର ଶିଳ୍ପଙ୍କୁ ଋଣ ମିଳିଥାନ୍ତା ଏହା ସୁବିଧା ପ୍ରଦାନ କରିଥାନ୍ତା। ବିନା ଗ୍ୟାରେଣ୍ଟିରେ ଯେଉଁ ଋଣ ସରକାର ଘୋଷଣା କରିଛନ୍ତି ତାହା କିଛି ନୂଆ କଥା ନୁହେଁ। ବର୍ତ୍ତମାନ ମଧ୍ୟ ବ୍ୟାଙ୍କଗୁଡିକ ବିନା ଗ୍ୟାରେଣ୍ଟିରେ ଋଣ ଦେଉଛନ୍ତି। ଏହି ନିୟମ ରହିଥିଲେ ମଧ୍ୟ ଯୋଜନା କାର୍ଯ୍ୟକାରୀ ବେଳକୁ ଏହାକୁ ଅଣ ଦେଖା କରାଯାଉଥିବା ଶିଳ୍ପ ସୂତ୍ରରୁ ଜଣାପଡିଛି। ଏଠାରେ କେବଳ ଗୋଟିଏ କଥା ଭଲ ବୋଲି କୁହାଯାଇ ପାରେ। ପ୍ୟାକେଜରେ ଆସିଥିବା ‘ଫଣ୍ଡସ ଅଫ୍‌ ଫଣ୍ଡସ’ କିଛି ଲାଭ ଦେବ ବୋଲି କୁହାଯାଉଛି। କାରଣ ଭଲ ସ୍ଥିତିରେ ଥିବା କ୍ଷୁଦ୍ରଶିଳ୍ପଗୁଡିକର ସମ୍ପ୍ରସାରଣ ଏବଂ ଆଧୁନିକିକରଣ ଦିଗରେ ଏହା ସହାୟକ ହେବ। ଏହା ମଧ୍ୟ ଋଣ ଆକାରରେ ମିଳିବ। ଏଥିରେ ମଧ୍ୟ ପ୍ରୋତ୍ସାହନ କ’ଣ ରହିଛି ବୋଲି ଶିଳ୍ପପକ୍ଷରୁ ପ୍ରଶ୍ନବାଚୀ ସୃଷ୍ଟି ହୋଇଛି। ଉଦ୍ୟୋଗୀଙ୍କୁ ବ୍ୟାଙ୍କ ସୁଧ ଖାଇ ଯାଉଥିବା ବେଳେ ବର୍ତ୍ତମାନର ଚ୍ୟାଲେଞ୍ଜିଂ ସମୟରେ ମଧ୍ୟ ରିହାତି ହାରରେ ସୁଧ ପାଇବା ଆଶା ମଧ୍ୟ ମଉଳିଗଲା। ଭାୟାବିଲିଟି ପାଣ୍ଠି ବ୍ୟବସ୍ଥା ନେଇ ମଧ୍ୟ ସରକାର ପଦକ୍ଷେପ ନେବେ ବୋଲି କୁହାଯାଉଥିଲା। ହେଲେ ସେଭଳି କିଛି ହେଲା ନାହିଁ। ସରକାର କର୍ପୋରେଟ ସୁଧ ବେପାରୀ ଭଳି କାମ କରୁଥିବାରୁ ଶିଳ୍ପ ଅଂଶୀଦାରଙ୍କ ପକ୍ଷରୁ ଅସନ୍ତୋଷ ପ୍ରକାଶ ପାଇଛି।
ବର୍ତ୍ତମାନର ପଦକ୍ଷେପ କେବଳ ପ୍ରତିଷ୍ଠିତ ଏମ୍‌ଏସ୍‌ଏମ୍‌ଇଗୁଡିକ ଲାଗି ସହାୟକ ହେବ ବୋଲି କୁହାଯାଉଛି। ବଜାରରେ ଏବେ ଖାଦ୍ୟ ସାମଗ୍ରୀ ଏବଂ ମେଡିସିନ ବାଦ ଅନ୍ୟ ବର୍ଗରେ ଏମ୍‌ଏସ୍‌ଏମ୍‌ଇଗୁଡିକର କାରବାର ପ୍ରାୟତଃ ନାହିଁ। ସାମଗ୍ରୀ ଉତ୍ପାଦନ କରିଲେ ମଧ୍ୟ ଏହାକୁ ବିକ୍ରି କରିବା ଚିନ୍ତାରେ ଏମ୍‌ଏସ୍‌ଏମ୍‌ଇ ରହିଛି। ଏଭଳି ସ୍ଥିତିରେ ଋଣ ଘୋଷଣା କଲେ ମଧ୍ୟ କ୍ଷୁଦ୍ର ଶିଳ୍ପ କିଭଳି ଋଣ ଆଣିବ। କାରଣ ବାଣିଜ୍ୟ କାରବାର ବଢାଇବା ଏବେ ଯୋଜନା ନାହିଁ। ନିବେଶ ଯୋଜନା ନେଇ ଚିନ୍ତା କରିବା ଆଗରୁ ଅନେକ ପ୍ରସଙ୍ଗକୁ କ୍ଷୁଦ୍ର ଶିଳ୍ପ ବିଚାର କରୁଛନ୍ତି। କାରଣ ସାମଗ୍ରୀ ଉତ୍ପାଦନ ହେଲେ ଅଧିକ ଖର୍ଚ୍ଚ କରିବାକୁ ପଡିବ। ଏହବାଦ ସାମଗ୍ରୀ ବିକ୍ରିରେ ଅସୁବିଧା, କାରବାର ନ ହେଲେ ଋଣ ପଇଠ ଭଳି ସମସ୍ୟା କମ୍ପାନୀଙ୍କୁ ମାଡି ପଡୁଛି। ଦେବାଳିଆ ହେଲେ ମଧ୍ୟ କମ୍ପାନୀଗୁଡିକ ଉଠାଇବା ଲାଗି ସେମିତି କିଛି ଠୋସ ପଦକ୍ଷେପ ନାହିଁ। ଏଣୁ ଏଭଳି ସମୟରେ ଋଣ ଆଣି କାରବାର କରିବାକୁ କ୍ଷୁଦ୍ର ବ୍ୟବସାୟୀମାନେ ଡରୁଛନ୍ତି।
ଏହି ପରିପ୍ରେକ୍ଷୀରେ କ୍ଷୁଦ୍ର ଶିଳ୍ପ ସଂଘ ଓସମେର ମହାସଚିବ ସାତ୍ୱିକ ସ୍ବାଇଁ କହିଛନ୍ତି, କ୍ଷୁଦ୍ର ଶିଳ୍ପ ଲାଗି ପ୍ୟାକେଜରେ ସରକାର ବିଶେଷ କିଛି ପଦକ୍ଷେପ ଆଣିଲେ ନାହିଁ। ଯାହା ବି ଆସିଲା ସବୁ ବର୍ଗର ଏମ୍‌ଏସ୍‌ଏମ୍‌ଇ ଏହା ଦ୍ୱାରା ଲାଭବାନ ହେବେ ନାହିଁ। ସରକାରଙ୍କ ପ୍ୟାକେଜରେ ସମସ୍ତେ ଋଣ ପାଇଯିବେ ବୋଲି ଲୋକେ ବିଚାର କରୁଛନ୍ତି। ମାତ୍ର ଏହା ପ୍ରକୃତ ପକ୍ଷେ ଠିକ୍‌ ନୁହେଁ। ଭଲ ଭାବେ ଚାଲୁଥିବା କ୍ଷୁଦ୍ର ଶିଳ୍ପଗୁଡିକୁ ହିଁ ଋଣ ମିଳିବ। ନୂଆ ମାନଙ୍କ ପାଇଁ କିଛି ଲାଭ ଏଥିରେ ନାହିଁ। ସରକାରଙ୍କ ଘୋଷଣାକୁ ୮ ଦିନ ବିତି ଯାଇଥିଲେ ମଧ୍ୟ ଏଯାଏ କିଛି ଗାଇଡଲାଇନ ଆସିନାହିଁ। କ୍ଷୁଦ୍ର ଶିଳ୍ପଗୁଡିକ ସମସ୍ୟାରେ ଅଛନ୍ତି। ଅନେକ କ୍ଷୁଦ୍ରଶିଳ୍ପ ଉତ୍ପାଦନ ଆରମ୍ଭ କରି ନାହାନ୍ତି। ଲୋକମାନେ ଏବେ ନଗଦ ଅର୍ଥ ଖର୍ଚ୍ଚ କରିବାକୁ ଚାହୁଁ ନାହାନ୍ତି। ଯାହାର ପ୍ରଭାବ ବଜାର ଉପରେ ରହିଛି। ମାନ୍ଦାବସ୍ଥା, ଦେଶର କର୍ପୋରେଟ କ୍ଷେତ୍ର ସମସ୍ୟା, ଆଇଟି, ଟେଲିକମ ସହ ଅନ୍ୟ ସବୁ କ୍ଷେତ୍ର ପ୍ରଭାବିତ ହୋଇ ରହିଛି। ଏହାର ଚାପ ସମଗ୍ର ବଜାର ଉପରେ ପଡିଛି। ବଜାର ସ୍ଥିତି ଭଲ ନ ଥିବାରୁ ଏମ୍‌ଏସ୍‌ଏମ୍‌ଇ ମଧ୍ୟ ସମସ୍ୟା ସାମ୍ନା କରୁଛନ୍ତି। ସରକାର ବଜାରରେ ଚାହିଦା ଫେରାଇ ଆଣିବା ଲାଗି ଲୋକଙ୍କ ନିକଟରୁ କିଭଳି ଅଧିକ ଅର୍ଥ ଆସି ପାରିବ ସେ ଦିଗରେ ପଦକ୍ଷେପ ନେବା ଆବଶ୍ୟକ।
ସେ କହିଛନ୍ତି ପୁଣି ଯେ, ସରକାର କ୍ଷୁଦ୍ର ଶିଳ୍ପକୁ କମ୍‌ ସୁଧ ହାରରେ ଋଣ ପ୍ରଦାନ କରିବା ଉଚିଚ। କେନ୍ଦ୍ର ସରକାରଙ୍କ ଘୋଷଣାକୁ ନେଇ ବେଶି କିଛି ଆଶା ନାହିଁ। ରାଜ୍ୟ ସରକାରଙ୍କ ଉପରେ ବହୁତ ବଡ ଆଶା ରହିଛି। ଏମ୍‌ଏସ୍‌ଏମ୍‌ଇକୁ ପୁନରୁଦ୍ଧାର କରିବା ଲାଗି ରାଜ୍ୟ ସରକାର ଏକ ଆନ୍ତଃ ମନ୍ତ୍ରୀ ସ୍ତରୀୟ ଗୋଷ୍ଠୀ ଗଠନ କରିଛନ୍ତି। ରାଜ୍ୟ ଅର୍ଥମନ୍ତ୍ରୀ ଏହାର ଅଧ୍ୟକ୍ଷ ଭାବେ କାମ କରୁଛନ୍ତି। ରାଜ୍ୟରେ ବର୍ତ୍ତମାନ ୨ ଲକ୍ଷରୁ ଅଧିକ ଏମ୍‌ଏସ୍‌ଏମ୍‌ଇ ପ୍ରଭାବିତ ହୋଇଛନ୍ତି। ୮୦% ୟୁନିଟ ବେଶି କ୍ଷତିଗ୍ରସ୍ତ ହୋଇଛନ୍ତି। ବିଦ୍ୟୁତ ଦେୟ କ୍ଷେତ୍ରରେ କମ୍ପାନୀଗୁଡିକ ଲାଗି ସମସ୍ୟା ରହିଛି ତାହାକୁ ସରକାର ବିଚାର କରନ୍ତୁ।
ଆସୋସିଏଏଶନ ଅଫ୍‌ ଇଣ୍ଡଷ୍ଟ୍ର୍ରିଆଲ ଏଣ୍ଟରପ୍ରିନ୍ୟୋର ଅଫ୍‌ ଭୁବନେଶ୍ୱର (ଏଆଇବିଏ)ର ସଭାପତି ବିଦ୍ୟୁତ ମହାନ୍ତି କହିଛନ୍ତି ଯେ, କେନ୍ଦ୍ର ସରକାର ଶିଳ୍ପଗୁଡିକୁ ସହାୟତା ଦେବା ପରିବର୍ତ୍ତେ ଲୋନ ମେଳା କରିଲେ। ମୋରାଟୋରିୟମ ଦିଆଗଲେ ମଧ୍ୟ ସୁଧ ରିହାତି ମିଳିଲା ନାହିଁ। ଯେତିକି ଆଶା ଥିଲା ସରକାର ପ୍ରଦାନ କରିଲେ ନାହିଁ। ସରକାରଙ୍କ ଉପରେ ଲୋକମାନଙ୍କର ବୃହତ୍ତ ପରିମାଣର ରିଫଣ୍ଡ ରହିଛି। ହେଲେ ସରକାର ବର୍ତ୍ତମାନ ପ୍ରଦାନ କରିଥିବା ପ୍ୟାକେଜରେ ଦେଇଥିବା ରିଫଣ୍ଡକୁ ଷ୍ଟିମୁଲସ ବୋଲି ବିଚାର କରିଛନ୍ତି। ବର୍ତ୍ତମାନ କ୍ଷୁଦ୍ର ଶିଳ୍ପ ଏକ ଅସୁବିଧା ସମୟ ଦେଇ ଗତି କରୁଥିବା ବେଳେ ସରକାର କିଛି କରିବେ ବୋଲି ଭାବୁ ଥିଲୁ, ହେଲେ ଯାହା ଘୋଷଣା ହେଲା ତାହା ଆମ ପାଇଁ ବିଶେଷ ଲାଭ ଦାୟକ ହେବ ବୋଲି ଆଶା ନାହିଁ।ବଜାରରେ ଏବେ ଡିମାଣ୍ଡ ନାହିଁ। ଏ ଦିଗରେ ପଦକ୍ଷେପ ନିଆଗଲେ କ୍ଷୁଦ୍ର ଶିଳ୍ପଗୁଡିକ ଏହା ଦ୍ୱାରା ସୁବିଧା ପାଇବେ। ସେହିଭଳି ଏମ୍‌ଏସ୍‌ଏମ୍‌ଇଗୁଡିକ କଥା ବୁଝିବାରେ ରାଜ୍ୟଗୁଡିକ ଭଲ ଭାବେ କାମ କରିପାରିବେ। ଏଣୁ କେନ୍ଦ୍ର ସରକାର ରାଜ୍ୟ ସରକାରଙ୍କ ମାଧ୍ୟମରେ ଏମ୍‌ଏସ୍‌ଏମ୍‌ଇଗୁଡିକୁ ସହାୟତା ଯୋଗାଣ ଦିଗରେ କାମ କରନ୍ତୁ।
ୟୁନିଭର୍ସାଲ ସ୍ପାଇସେସ ଆଣ୍ଡ ପଲସେସ୍‌ ଲିମିଟେଡର ସ୍ବତ୍ୱାଧିକାରୀ ଜ୍ୟୋତିର୍ମୟୀ ମହାନ୍ତି କହିଛନ୍ତି ଯେ, ଶ୍ରମିକ କ୍ଷମତା କମିବା ଯୋଗୁ ଏବେ ଉତ୍ପାଦନ ପ୍ରଭାବିତ ରହିଛି। ଚାହିଦା ପୂରଣ କରିବା ଲାଗି କଞ୍ଚାମାଲ ମିଳିବା ସମସ୍ୟା ଉପୁଜୁଛି। କାରଣ ସାରା ଦେଶରେ ଲକ୍‌ଡାଉନ ସମ୍ପୂର୍ଣ୍ଣ ଭାବେ ଶେଷ ହୋଇ ନ ଥିବାରୁ କଞ୍ଚାମାଲ ଆସିବା ଅସୁବିଧା ରହିଛି। କଞ୍ଚାମାଲ ମୂଲ୍ୟ ମଧ୍ୟ ବଢିଛି। ଲଜିଷ୍ଟିକ ଖର୍ଚ୍ଚ ବଢିବା, ଶ୍ରମିକ ନ ଥିବାରୁ ଲୋଡିଂ ଅନଲୋଡିଂ ଚାର୍ଜ ପ୍ରାୟ ୨ରୁ ୩ ଗୁଣ ବଢିଛି। ପରିବହନ ବି ଖର୍ଚ୍ଚ ବଢିଛି। ସାମଗ୍ରୀ ଉତ୍ପାଦନ କରିଲେ ମଧ୍ୟ ଯୋଗାଣ କ୍ଷେତ୍ରରେ ସମସ୍ୟା ଉପୁଜୁଛି। ୧୨ ଘଣ୍ଟା କାମ କରିବା ଲାଗି ଲୋକ ରାଜି ହେଉ ନାହାନ୍ତି। ୩୦ରୁ ୪୦% କର୍ମଚାରୀଙ୍କୁ ନେଇ କାମ କରିବା ସମସ୍ୟା ଉପୁଜୁଛି।


All Right Reserved By Dharitri.Com

ପଦବୀ ଛାଡ଼ିଲେ ଅର୍ବାନ ଲ୍ୟାଡର ସହ ପ୍ରତିଷ୍ଠାତା

ନୂଆଦିଲ୍ଲୀ,୨୩-୧୦: ଷ୍ଟାର୍ଟଅପ୍‌ ଅର୍ବାନ ଲ୍ୟାଡରର ସହ ପ୍ରତିଷ୍ଠାତା ତଥା ପ୍ରଡକ୍ଟ ଏବଂ ଟେକ୍ନୋଲୋଜି ଅଫିସର ଭାବେ କାର୍ଯ୍ୟ କରୁଥିବା ରାଜିବ ଶ୍ରୀବାସ୍ତବ ପଦବୀରୁ ଇସ୍ତଫା ଦେଇଛନ୍ତି।...

୧୨ ହଜାର କର୍ମଚାରୀ ଛଟେଇ କରିବ କଗ୍‌ନିଜାଣ୍ଟ

ନୂଆଦିଲ୍ଲୀ,୧-୧୧: ପ୍ରମୁଖ ଆଇଟି କମ୍ପାନୀ କଗ୍‌ନିଜାଣ୍ଟ ଆଗାମୀ ତ୍ରୈମାସଗୁଡିକରେ ଏହାର ୧୨ ହଜାର କର୍ମଚାରୀଙ୍କୁ ଛଟେଇ କରିବ। ଖର୍ଚ୍ଚ କାଟ ଯୋଜନାରେ କମ୍ପାନୀ ଏଭଳି ପଦକ୍ଷେପ...

ରାଷ୍ଟ୍ରାୟତ୍ତ ଉଦ୍ୟୋଗ ମହଙ୍ଗା ଭତ୍ତା ୧୪୬.୭%

ଭୁବନେଶ୍ୱର,୨୯-୬(ବ୍ୟୁରୋ) : ଦେଶର ଶିଳ୍ପ ଶ୍ରମିକଙ୍କ ଲାଗି ଉଦ୍ଧିଷ୍ଟ ହାରାହାରି ଖାଉଟି ମୂଲ୍ୟ ସୂଚୀ ଏପ୍ରିଲରେ ୧୧୨ ପଏଣ୍ଟ ଥିଲା। ଏହା ମେ ମାସରେ ୨...

ବ୍ୟାଙ୍କ ଜମା ଆଡ଼କୁ ମୁହାଁଉଛନ୍ତି ନିବେଶକ

ମୁମ୍ବାଇ,୩୦।୪: ଡେଟ୍‌ ବର୍ଗରେ ମିଳୁଥିବା ଲାଭକୁ ଦେଖିଲେ ଗୋଟିଏ ସମୟରେ ପୁଞ୍ଜି ବଜାରର ନିବେଶକଙ୍କ ଏହା ଏକ ଅନ୍ୟତମ ପ୍ରମୁଖ ନିବେଶ ବିକଳ୍ପ ରହି ଆସିଥିଲା।...

ମୋଦି ୨.୦ର ପ୍ରଥମ ବଜେଟ; ନିର୍ମଳାଙ୍କ ସମ୍ମୁଖରେ ବିକାଶ ବୃଦ୍ଧିର ଆହ୍ବାନ

ନୂଆଦିଲ୍ଲୀ,୪-୭: ଅର୍ଥମନ୍ତ୍ରୀ ନିର୍ମଳା ସୀତାରାମନ୍‌ ଶୁକ୍ରବାର ମୋଦି ସରକାରଙ୍କ ଦ୍ୱିତୀୟ କାର୍ଯ୍ୟକାଳର ପ୍ରଥମ ବଜେଟ ଉପସ୍ଥାପନ କରିବେ। ସେ ଏଭଳି ସମୟରେ ଦେଶର ଅର୍ଥମନ୍ତ୍ରୀ ପଦଭାର...

ରେକର୍ଡ ନିମ୍ନ ସ୍ତରକୁ ଖସିଲା ମାନୁଫାକ୍ଚରିଂ

ନୂଆଦିଲ୍ଲୀ,୫।୫:ବର୍ତ୍ତମାନ କରୋନାକୁ ପ୍ରତିରୋଧ କରିବା ଲାଗି ସାରା ବିଶ୍ୱରେ ଆର୍ଥତ୍କ କାର୍ଯ୍ୟକଳାପ ବନ୍ଦ ରହିଛି। ଏଭଳି ସ୍ଥିତିରେ ଏପ୍ରିଲରେ ଦେଶର ମାନୁଫାକ୍ଚରିଂ କାର୍ଯ୍ୟକଳାପ ରେକର୍ଡ ନିମ୍ନ...

ହ୍ୟୁଣ୍ଡାଇ,ମାରୁତି କର୍ମଚାରୀ କରୋନା ଆକ୍ରାନ୍ତ

ନୂଆଦିଲ୍ଲୀ,୨୫।୫: କରୋନା ମହାମାରୀରୁ ଦେଶବାସୀଙ୍କୁ ସୁରକ୍ଷା ପ୍ରଦାନ କରିବା ଲକ୍ଷ୍ୟରେ ସାରା ଦେଶରେ ଲକ୍‌ଡାଉନ-୪ ଲାଗୁ କରାଯାଇଛି। ଏହି ଲକ୍‌ଡାଉନ ଅବଧି ମଧ୍ୟରେ ସରକାର ବହୁ...

୬ବର୍ଷରେ ପ୍ରଥମଥର ଏପ୍ରିଲରେ ଏୟାର ଟ୍ରାଫିକ ହ୍ରାସ

ନୂଆଦିଲ୍ଲୀ,୩୦-୫: ଏପ୍ରିଲରେ ଘରୋଇ ଏୟାର ଟ୍ରାଫିକ ହ୍ରାସ ପାଇଛି। ଗତ ୬ ବର୍ଷ ମଧ୍ୟରେ ଏହା ପ୍ରଥମଥର ଦେଖିବାକୁ ମିଳିଛି। ଜେଟ୍‌ ଏୟାରଓ୍ବେଜ୍‌ ବନ୍ଦ ହୋଇଯିବା...

Leave a comment

Your email address will not be published. Required fields are marked *