ପରମ୍ପରା ଭାଙ୍ଗିପାରନ୍ତି ମତଦାତା

ଭୁବନେଶ୍ୱର, ୨୦ା୪:  ଆସନ୍ତା ୨୩ ତାରିଖରେ ଭୁବନେଶ୍ୱର ଲୋକ ସଭା ଆସନରେ ନିର୍ବାଚନ ହେବ। ଏହାକୁ ନେଇ ସାରା ରାଜ୍ୟରେ ଉତ୍କଣ୍ଠା ରହିଛି। ୧୯୯୮ରୁ ବିଜେଡି ଏଠାରୁ ଜିତି ଆସୁଥିଲେ ମଧ୍ୟ ଚଳିତ ନିର୍ବାଚନରେ ବିଜେଡି ସଫଳତାକୁ ନେଇ ଅନେକେ ଦ୍ୱନ୍ଦ୍ୱ ପ୍ରକାଶ କରୁଛନ୍ତି। ଭୁବନେଶ୍ୱର ମହାନଗର ନିଗମ(ବିଏମ୍‌ସି)ର  ପୂର୍ବତନ କମିଶନର ତଥା ଗଣଶିକ୍ଷା ସଚିବ ଅପରାଜିତା ଷଡଙ୍ଗୀ(ଆଇଏଏସ) ଚାକିରି ଛାଡି ଏହି ଲୋକ ସଭାକ୍ଷେତ୍ରରେ ସାଂଗଠନିକ କାର୍ଯ୍ୟ ଆରମ୍ଭ କରିଥିଲେ। ନିର୍ବାଚନ ନେଇ ବିଜ୍ଞପ୍ତି ପ୍ରକାଶ ପାଇବା ପରେ ଭାଜପା ତାଙ୍କୁ ଏହି ଆସନରୁ ପ୍ରାର୍ଥୀ କରିଛି। ଏହି ଆନୁଷ୍ଠାନିକ ଘୋଷଣା ପୂର୍ବରୁ ଅପରାଜିତା ଭୁବନେଶ୍ୱର ଲୋକ ସଭା ଅନ୍ତର୍ଗତ ୭ଟି ବିଧାନସଭା ନିର୍ବାଚନମଣ୍ଡଳୀରେ ବ୍ୟକ୍ତିଗତ ଭାବେ ସଂଗଠନ ପ୍ରସ୍ତୁତ କରିସାରିଥିଲେ। ସବୁ ନିର୍ବାଚନମଣ୍ଡଳୀରେ ସ୍ଥାନୀୟ କାର୍ଯ୍ୟାଳୟ କରି ବିଭିନ୍ନ ବର୍ଗର ଲୋକଙ୍କୁ ଭେଟିଥିଲେ। ବିଜେଡି ପକ୍ଷରୁ ଏମ୍‌ପି ପ୍ରସନ୍ନ ପାଟଶାଣୀଙ୍କୁ ବଦଳା ଗଲା। ତାଙ୍କ ସ୍ଥାନରେ ପୂର୍ବତନ ମୁମ୍ବାଇ ପୋଲିସ କମିଶନର ତଥା ଅରୂପ ପଟ୍ଟନାୟକଙ୍କୁ ପ୍ରାର୍ଥୀ କରାଗଲା। ଏହି ଘୋଷଣା ଅନେକଙ୍କୁ ଆଶ୍ଚର୍ଯ୍ୟ କରିଥିଲା। ପ୍ରାର୍ଥୀ ଘୋଷଣା ହେବା ପୂର୍ବରୁ ଅରୂପ ବିଜୁ ଯୁବ ବାହିନୀ ଦାୟିତ୍ୱ ସମ୍ଭାଳି ଆସୁଥିଲେ। ଏହି ସଂଗଠନକୁ ନେଇ ସାରା ରାଜ୍ୟରେ ଏକ ନକାରାତ୍ମକ ଛବି ସୃଷ୍ଟି ହୋଇଛି। ତେଣୁ ଅରୂପଙ୍କ ଗ୍ରହଣୀୟତା ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଅପରପକ୍ଷରେ ପୂର୍ବରୁ ପ୍ରଶାସିକା ଥିବା ଅପରାଜିତା ନିଜ କାର୍ଯ୍ୟଦକ୍ଷତା ପାଇଁ ଓଡ଼ିଆ ଲୋକଙ୍କ ମନରେ ଏକ ସ୍ବତନ୍ତ୍ର ପରିଚୟ ସୃଷ୍ଟି କରିଥିବା ଅଲୋଚନା ହେଉଛି। ହେଲେ ପୂର୍ବତନ ମୁମ୍ବାଇ ପୋଲିସ କମିଶନର ଅରୂପଙ୍କ କ୍ଷେତ୍ରରେ ତାହା ସମ୍ଭବ ହୋଇ ପାରୁନାହିଁ ବୋଲି କୁହାଯାଉଛି। ରାଜନୈତିକ ସମୀକ୍ଷକଙ୍କ କହିବାନୁଯାୟୀ, ଅରୂପଙ୍କ ସଫଳତା ସମ୍ପୂର୍ଣ୍ଣ ଭାବେ ବିଜେଡି ସଂଗଠନ ଏବଂ ପାରମ୍ପରିକ ଭୋଟ ବ୍ୟାଙ୍କ ଉପରେ ନିର୍ଭର କରୁଛି।

ରାଜ୍ୟରେ ବିଧାୟକ ପ୍ରାର୍ଥୀଙ୍କ ଭରସାରେ ଏମ୍‌ପି ପ୍ରାର୍ଥୀ ଜିତୁଥିବା ଗତ ନିର୍ବାଚନଗୁଡ଼ିକରେ ଲକ୍ଷ୍ୟ କରାଯାଇଛି। ହେଲେ ଭୁବନେଶ୍ୱର ଲୋକ ସଭା ଆସନରୁ ଅପରାଜିତା ପ୍ରାର୍ଥୀ ହେବା ପରେ ପରୋକ୍ଷରେ ଏହା ଦଳୀୟ ବିଧାୟକଙ୍କ ପାଇଁ ସହାୟକ ହୋଇଛି। ହେଲେ ବିଜେଡିରେ ସ୍ଥିତି ପୂରା ଓଲଟା। ନିଜ ଭୋଟ ପୁଞ୍ଜିକୁ କୌଣସିମତେ ବଞ୍ଚାଇବା ପାଇଁ ଏମ୍‌ପି ପ୍ରାର୍ଥୀଙ୍କ ସମ୍ପର୍କରେ ବିଜେଡି ବିଧାୟକ ପ୍ରାର୍ଥୀମାନେ ଗୁରୁତ୍ୱ ଦେଇ ପ୍ରଚାର କରୁନାହାନ୍ତି, କେବଳ ଦଳୀୟ ସୌଜନ୍ୟ ରକ୍ଷା କରୁଥିବା କୁହାଯାଉଛି। ତୃଣମୂଳରେ ଦୁଇ ପ୍ରାର୍ଥୀଙ୍କ ପ୍ରଚାରଶୈଳୀକୁ ନେଇ ଧରିତ୍ରୀ ପକ୍ଷରୁ ବିଭିନ୍ନ ଲୋକଙ୍କ ମତାମତ ନିଆଯାଇଥିଲା। ଜଟଣୀର ରଜନୀ ପାଇକରାୟଙ୍କ କହିବାନୁଯାୟୀ ଅପରାଜିତା ସହଜରେ ଲୋକଙ୍କ ସହ ମିଶି ପାରୁଥିବା ଲକ୍ଷ୍ୟ କରିଛୁ। ହେଲେ ଅରୂପ ଲୋକଙ୍କ ସହ ଭାବଗତ ଭାବେ ଯୋଡି ହେଉ ନ ଥିବା କୁହାଯାଉଛି। ତେଣୁ ଏମ୍‌ପି ଭୋଟ ପାଇଁ ଅପରାଜିତା ପ୍ରଥମ ପସନ୍ଦ ହୋଇଛନ୍ତି। ଭୋଟଦାନ ପୂର୍ବରୁ ଚୂଡାନ୍ତ ନିଷ୍ପତ୍ତି ନେବେ ବୋଲି ରଜନୀ କହିଛନ୍ତି। ପୂର୍ବ ନିର୍ବାଚନଗୁଡିକରେ କଂଗ୍ରେସ ମଧ୍ୟ ଭୁବନେଶ୍ୱର ଲୋକ ସଭା ଆସନରେ ପ୍ରାର୍ଥୀ ଦେଇ ଆସୁଥିଲା। ହେଲେ ଚଳିତଥର ଏହି ଆସନ ସହଯୋଗୀ ସିପିଏମ୍‌କୁ ପ୍ରଦାନ କରିଛି। ସିପିଏମ୍‌ ପକ୍ଷରୁ ଜନାର୍ଦ୍ଦନ ପତିଙ୍କୁ ପ୍ରାର୍ଥୀ କରାଯାଇଛି। ହେଲେ ଭୁବନେଶ୍ୱର, ଖୋର୍ଦ୍ଧା, ଜଟଣୀ ଏବଂ ବେଗୁନିଆ ଅଞ୍ଚଳରେ ଦଳର ପୂର୍ବ ସଂଗଠନ ନାହଁି। ତେଣୁ କଂଗ୍ରେସର ପାରମ୍ପରିକ ଭୋଟ ସିପିଏମ୍‌କୁ ଯିବା ସାମ୍ପ୍ରତିକ ସ୍ଥିତିରେ କଷ୍ଟକର ମନେ ହୁଏ। ଗତ ଥର କଂଗ୍ରେସ ପାଇଥିବା ୧,୪୫,୭୮୩ ଭୋଟ ବିଭାଜନ ହେବା ସୁନିଶ୍ଚିତ ବୋଲି ଜନୈକ କଂଗ୍ରେସ ନେତା କହିଛନ୍ତି। ଏହା ଶାସକ ବିରୋଧୀ ଭୋଟ ହୋଇଥିବାରୁ ଏହାର ଏକ ବୃହତ୍‌ ଅଂଶ ଭାଜପାକୁ ଯିବାର ସମ୍ଭାବନା ରହିଛି। କଂଗ୍ରେସ ବିଧାୟକ ପ୍ରାର୍ଥୀମାନେ ମଧ୍ୟ ସହଯୋଗୀ ଲୋକ ସଭା ପ୍ରାର୍ଥୀଙ୍କ ପାଇଁ ଗୁରୁତ୍ୱ ସହ ପ୍ରଚାର କରୁଥିବା ଲକ୍ଷ୍ୟ କରାଯାଉନାହିଁ। ଗତ ଦୁଇଟି ନିର୍ବାଚନରେ କଂଗ୍ରେସ ବିଧାୟକ ପ୍ରାର୍ଥୀମାନେ ଭୁବନେଶ୍ୱରର ୩ଟି ବିଧାନସଭା ଆସନରେ ତୃତୀୟ ସ୍ଥାନରେ ରହିଥିଲେ। ଚଳିତଥର ଭୁବନେଶ୍ୱର(ଜୟଦେବ) ଆସନରେ କଂଗ୍ରେସ ପ୍ରାର୍ଥୀଙ୍କ ନାମାଙ୍କନ ପତ୍ର ନାକଚ ହୋଇଯାଇଛି। ଉକ୍ତ ନିର୍ବାଚନମଣ୍ଡଳୀରେ ଏମ୍‌ପି କିମ୍ବା ବିଧାୟକ ଭୋଟରେ କଂଗ୍ରେସର ହାତ ଚିହ୍ନ ଏକପ୍ରକାର ନିଶ୍ଚିହ୍ନ ହୋଇଯାଇଛି। ତେଣୁ ସେଠାରେ ଭାଜପା ପୂର୍ବାପେକ୍ଷା ବହୁତ ଭଲ କରିବା ନେଇ ଆଶାବାଦୀ।

ଭୁବନେଶ୍ୱର(ମଧ୍ୟ)ଆସନରେ ବିଜେଡି-ଭାଜପା ପ୍ରତିଦ୍ୱନ୍ଦ୍ୱିତା ଜୋର ହେଉଛି। ଏହି ବିଧାନସଭା ଆସନରେ ବିଜେଡିର ପୂର୍ବତନ ମେୟର ଅନନ୍ତ ନାରାୟଣ ଜେନା ଏବଂ ଭାଜପାର ଜଗନ୍ନାଥ ପ୍ରଧାନଙ୍କ ମଧ୍ୟରେ ମୁକାବିଲା ହେଉଛି। ସାଂଗଠନିକ ଦକ୍ଷତା ବିଜେଡି ବିଧାୟକ ପ୍ରାର୍ଥୀଙ୍କୁ ସାମାନ୍ୟ ସୁବିଧା ଦେଇପାରେ, ହେଲେ ଏମ୍‌ପି ପାଇଁ ଅଧିକାଂଶ ଭୋଟର ଅପରାଜିତାଙ୍କୁ ହିଁ ପ୍ରଥମ ପସନ୍ଦ କହିଛନ୍ତି। ଅପରପକ୍ଷରେ ଭାଜପା ଭୁବନେଶ୍ୱର ଏକାମ୍ର ଏବଂ ଉତ୍ତର ନିର୍ବାଚନମଣ୍ଡଳୀରେ ଆଶାୟୀଙ୍କୁ ଟିକେଟ୍‌ ଦେଇ ନ ଥିଲା। ଏହା ଦଳ ପାଇଁ ଅଡୁଆ ସୃଷ୍ଟି କରୁଥିବା ଆଲୋଚନା ହେଉଛି। ସେହିପରି ଜଟଣୀ ବିଧାନସଭା ଆସନ ପାଇଁ ଲଢେଇ କଂଗ୍ରେସ-ବିଜେଡି ମଧ୍ୟରେ ହେଉଥିବା ଚର୍ଚ୍ଚା ହେଉଛି। ଏଠାରେ ୨୦୧୪ ନିର୍ବାଚନରେ ଭାଜପା ବିଧାୟକ ପ୍ରାର୍ଥୀ ଯେତିକି ଭୋଟ୍‌ ପାଇଥିଲେ, ଏମ୍‌ପି ପ୍ରାର୍ଥୀ ତାଙ୍କଠାରୁ ୧୦,୦୦୦ ଅଧିକ ଭୋଟ ପାଇଥିଲେ। ଚଳିତ ଥର ଏହି ବ୍ୟବଧାନରେ ପରିବର୍ତ୍ତନ ହେବ ବୋଲି ସ୍ଥାନୀୟ ରାଜନୈତିକ ସମୀକ୍ଷକମାନେ ମତ ରଖିଛନ୍ତି। ସେହିପରି ଖୋର୍ଦ୍ଧା ବିଧାନସଭା ଆସନରେ ବିଜେଡି ବିଧାୟକ ପ୍ରାର୍ଥୀ ଜ୍ୟୋତିରିନ୍ଦ୍ର ନାଥ ମିତ୍ରଙ୍କ ମୁକାବିଲା ଭାଜପାର କାଳୁ ଖଣ୍ଡେଇତରାୟଙ୍କ ସହ ହେଉଛି। କିଛିଦିନ ତଳେ ମଙ୍ଗୁଳି ଜେନା ନାମକ ଭାଜପା ନେତାଙ୍କୁ ହତ୍ୟା କରାଯାଇଛି। ଏହି ଘଟଣା ଶାସକ ଦଳକୁ ଅଡୁଆରେ ପକାଇପାରେ ବୋଲି ଆଲୋଚନା ହେଉଛି। ଅପରାଜିତା ସ୍ବତନ୍ତ୍ରଭାବେ ସାଂଗଠନିକ କାର୍ଯ୍ୟ ଖୋର୍ଦ୍ଧାରେ କରିଥିବାରୁ ଦଳମତ ନିର୍ବିଶେଷରେ ଏମ୍‌ପି ଭୋଟ ପାଇପାରନ୍ତି ବୋଲି କୁହାଯାଉଛି। ସେହିପରି ବେଗୁନିଆ ବିଧାନସଭା କ୍ଷେତ୍ରରେ ଅପରାଜିତାଙ୍କ ପାଇଁ ସ୍ବତନ୍ତ୍ର କ୍ରେଜ୍‌ ରହିଛି। ଏହି ଆସନ ସମେତ ଗ୍ରାମାଞ୍ଚଳର ପ୍ରତି ଜୋନ୍‌ରେ ଟିମ୍‌ ଅପରାଜିତା କାର୍ଯ୍ୟ କରୁଛି। ତେଣୁ ବେଗୁନିଆରୁ ଅପରାଜିତା ବିଜେଡି ପ୍ରାର୍ଥୀଙ୍କୁ ଚକ୍‌ମା ଦେଇପାରିନ୍ତିି ବୋଲି କୁହାଯାଉଛି।

ମୋଟ ଉପରେ କହିବାକୁ ଗଲେ ବେଗୁନିଆ, ଖୋର୍ଦ୍ଧା, ଜଟଣୀ ଏବଂ ଜୟଦେବରୁ ଭାଜପା ପ୍ରାର୍ଥୀ ଅପରାଜିତା ବିଜେଡିଠାରୁ ଅଗ୍ରଣୀ ହେବାର ସମ୍ଭାବନା ସୃଷ୍ଟି ହୋଇଛି। ଭୁବନେଶ୍ୱର ୩ ବିଧାନସଭା ଆସନରୁ ବିଜେଡି ବିଧାୟକ ପ୍ରାର୍ଥୀଙ୍କ ମୋଟ ଭୋଟଠାରୁ ଗତଥର ପ୍ରସନ୍ନ ପାଟଶାଣୀ କମ୍‌ ଭୋଟ ପାଇଥିଲେ। ଏହାର ସିଧା ଫାଇଦା ଭାଜପାକୁ ଯିବ ବୋଲି ଆଲୋଚନା ହେଉଛି। ତେଣୁ ଲଗାତର ଭାବେ ଗୋଟିଏ ଧାରାରେ ଭୋଟ୍‌ ଦେଇ ଆସୁଥିବା ଭୁବନେଶ୍ୱର ଲୋକ ସଭା ନିର୍ବାଚନମଣ୍ଡଳୀର ମତଦାତା ପରମ୍ପରା ଭାଙ୍ଗିପାରନ୍ତି ବୋଲି ରାଜନୈତିକ ମହଲରେ ଚର୍ଚ୍ଚା ହେଉଛି।

ଚିଦାନନ୍ଦ ଜେନା


All Right Reserved By

ରଥଯାତ୍ରା ପ୍ରସାରଣ ବ୍ୟବସାୟୀକରଣକୁ ନାଗରିକ ଫୋରମ୍‌ର ବିରୋଧ

ଭୁବନେଶ୍ୱର,୧୧।୬(ବ୍ୟୁରୋ)-: ମହାପ୍ରଭୁ ଶ୍ରୀଜଗନ୍ନାଥଙ୍କ ବିଶ୍ୱପ୍ରସିଦ୍ଧ ରଥଯାତ୍ରାର ସିଧା ପ୍ରସାରଣକୁ ବ୍ୟବସାୟୀକରଣ କରିବା ପାଇଁ ମନ୍ଦିର ପ୍ରଶାସନ ପକ୍ଷରୁ ଗତ ୪ ତାରିଖରେ ଏକ ଚିଠି ଜରିଆରେ...

କୁଡାପଡ଼ା-ଖଲିଆପାଲି ରାସ୍‌ତା ସମସିଆ: ପଲ୍‌ହା ରୁଇ ପରତିବାଦ ଜନାଲେ ୨ ଗଁ।ର ମହିଲା

  ବିନିକା,୩୧।୮(ଡି.ଏନ୍‌.ଏ): ସୁବର୍ଣ୍ଣପୁର ଜିଲା ବିନିକା ବ୍ଲକ ବାବୁପାଲି ପଁଚେତ୍‌ ଅଧୀନ କୁଡ଼ାପଡ଼ାରୁ ଖଲିଆପାଲି ତକ୍‌ ୩ କି.ମି. ରାସ୍‌ତା ବହୁତ୍‌ ବଛର ହେଲା ଅବହେଲିତ...

୧୦ ଦଫା ଦାବିରେ ବାଣୀବିହାର ବିଶ୍ୱବିଦ୍ୟାଳୟରେ ଉତ୍ତେଜନା, କୁଳପତିଙ୍କୁ ଘେରିଲେ ଛାତ୍ରୀଛାତ୍ର

ଭୁବନେଶ୍ୱର, ୧୬।୯(ବ୍ୟୁରୋ): ଉତ୍କଳ ବିଶ୍ୱବିଦ୍ୟାଳୟରେ ସୋମବାର ଛାତ୍ର ଉତ୍ତେଜନା ଦେଖାଦେଇଛି। ୧୦ ଦଫା ଦାବି ନେଇ ଛାତ୍ରୀଛାତ୍ର ତାତିଛନ୍ତି। ଏ ନେଇ ସେମାନେ କୁଳପତିଙ୍କୁ ତାଲା...

ବିଧାୟକ ସ୍ନାନବେଦୀକୁ ଚଢ଼ିବା ନେଇ ବିବାଦ

ପୁରୀ ଅଫିସ, ୧୮।୬: ମହାପ୍ରଭୁଙ୍କୁ କୌଣସି ଭକ୍ତ ସ୍ପର୍ଶ କରିପାରିବେ ନାହିଁ କି ସାହାଣମେଲା ଦର୍ଶନ ସମୟ ବ୍ୟତୀତ ଅନ୍ୟ ସମୟରେ କୌଣସି ଦର୍ଶନାର୍ଥୀ ସ୍ନାନମଣ୍ଡପ...

ଓଡ଼ିଆ ପାଇଲଟ୍‌ ମୃତ

କବିସୂର୍ଯ୍ୟନଗର/ଭୁବନେଶ୍ୱର,୧୩।୬(ବ୍ୟୁରୋ): ନିଖୋଜ ଭାରତୀୟ ବାୟୁସେନା (ଆଇଏଏଫ୍‌) ବିମାନ ଏଏନ୍‌-୩୨ର ସମସ୍ତ ଯାତ୍ରୀ ମୃତ। ଗୁରୁବାର ବିଧିବଦ୍ଧ ଭାବେ ଆଇଏଏଫ୍‌ ପକ୍ଷରୁ ଏହି ଘୋଷଣା କରାଯାଇଛି। ବିମାନର...

ସମଲ ବ୍ୟାରେଜରେ ବୁଡ଼ି ୨ ମୃତ

ପବିତ୍ରନଗର,୧୩।୬(ଡି.ଏନ.ଏ.)-ଅନୁଗୋଳ ଜିଲା କଣିହାଁ ବ୍ଲକ ସମଲ ବ୍ୟାରେଜରେ ବୁଡ଼ି ଗୁରୁବାର ୨ ଯୁବକ ପ୍ରାଣ ହରାଇଛନ୍ତି। ସେମାନେ ହେଲେ ସମଲ ବ୍ୟାରେଜ କଲୋନୀ ଅଞ୍ଚଳର ବିଶ୍ବରଞ୍ଜନ...

ରଥଖଳାରୁ… ପ୍ରଥମ ଭୂଇଁ ଖଞ୍ଜା କାମ ଆରମ୍ଭ

ପୁରୀ ଅଫିସ, ୨୩ା୬: ଶ୍ରୀନଅର ସମ୍ମୁଖରେ ଚାଲିଛି ରଥକାମ। ଶନିବାର ସୁଦ୍ଧା ତିନିରଥର ଯୋଖା କାମ ସରିଛି। ଦଣ୍ଡା, ଅଖ ଓ ଗୟଳକୁ ଯୋଖା ଧରି...

ବିଜେଡି ପାଇଁ ପ୍ରଚାର କଲେ ସନାତନ

ଚମ୍ପୁଆ, ୨୦ା୪ (ଡି.ଏନ.ଏ.): ବିଜେଡିକୁ ବିଜୟ କରିବାକୁ ଶନିବାର ଚମ୍ପୁଆ ଶିରପୁରଠାରେ ବିଧାୟକ ସନାତନ ମହାକୁଡ ଲୋକଙ୍କୁ ଭୋଟ ଭିକ୍ଷା କରିଛନ୍ତି। ମୁଁ ବିଜେଡି ନୁହଁ...

selfi corner

Model This Week

Why Dharitri

Leave a comment

Your email address will not be published. Required fields are marked *