ଥୁଆମୁଳ ରାମପୁର ବ୍ଲକରେ ସ୍ବାସ୍ଥ୍ୟ ସେବା ଅପହଁଚ୍‌: ଭଗବାନ ଭରସାରେ ଅଂଚଲର ରୁଗୀ

ଭବାନୀପାଟଣା,୨୯।୫(ଡି.ଏନ.ଏ.): ପାହାଡ଼ ଜଂଗଲ ଘେରା କଳାହାଣ୍ଡି ଜିଲାର ଥୁଆମୁଳ ରାମପୁର ବ୍ଲକରେ ପାଖାପାଖି ୭୫ ଭାଗ ଆଦିବାସୀ ଲୋକ୍‌ ବାସ କରୁଛନ୍‌। ବ୍ଲକର ଅନେକ ଗାଁବାସୀ ଆଏଜ୍‌ ବି ମଉଲିକ ସୁବିଧା ସୁଯୋଗରୁ ବଁଚିତ ହେଇ ରହିଛନ୍‌। ଇ ଅଂଚଲ ଭୁଖମରି, ପିଲା ବିକ୍‌ରି, ରୋଗ୍‌ବାଗ୍‌ ଜନିତ ମୁରତୁରେ ଆଗରୁ ନାଁ କମେଇଛେ।
ସୂଚନା ହିସାବେ ଥୁ.ରାମପୁର ବ୍ଲକର ୧୭ରୁ ଅଧ୍‌କା ଗଁା ଇନ୍ଦ୍ରାବତୀ ଜଲ ଭଣ୍ଡାର ଭିତରେ ରହିଛେ। ଇ ଗଁାବାସୀମାନେ ସବୁପରକାର ମଉଲିକ ସୁବିଧା ସୁଯୋଗରୁ ବଁଚିତ ହେଇ ରହିଛନ୍‌। ଖାଏଦ୍‌ ଅଭାବୁ ଇମାନେ ଜଂଗଲି କଁଦା, ଫଲମୁଲ, ଆମ୍‌ ଟଁାକୁଆ, ଜଂଗଲି ଶାଗ୍‌ ଖାଉଛନ୍‌। ସେନ୍‌ତା ଜଂଗଲର ନାଲ ନଲିଆ, ଝରନ୍‌ର ପାଏନ୍‌କେ ପିଇବା ଖାଏବାରେ ବେଭାର କରୁଛନ୍‌। ଗୁଟେ ଜାଗାର ପାଏନ୍‌କେ ଗାଈଗୋରୁ, ଛେଲମେଢ଼ି, ଜଂଗଲି ଜଁତୁ, ମୁନୁଷ ବେଭାର କରୁଛନ୍‌। ଯେନ୍‌ଥିରଲାଗି ଅଂଚଲବାସୀ ଅନେକ୍‌ ପରକାର ରୋଗ୍‌ବାଗ୍‌ରେ ପଡ଼ୁଛନ୍‌। ଇଠାନେ ଝାଡ଼ାବଁାତି ଲେଖେଁ ରୋଗ୍‌ ଦେଖାଦେଲେ ଅଲପ୍‌ ଦିନ୍‌ ଭିତରେ ଉନିଅଁା ଗଁାମାନକେ ବହପି ଯାଉଛେ। ସେନ୍‌ତା ରାସ୍‌ତାଘାଟ ଅଭାବ ସଂଗେ ଚିକିସତ୍ା ସୁବିଧା ଅଭାବୁ ଅନେକ ସମିଆରେ ଲୋକ୍‌ ରୋଗ୍‌ରେ ପଡ଼ି ମରୁଛନ୍‌। ଇତାକେ ଧିଆନ୍‌ରେ ରଖି ରାଏଜ୍‌ ସରକାର ଅଡ୍ରିଠାନେ ‘ଓଭା’, କେରପାଇ ଆର କାଣିଗୁମା ଠାନେ ‘ସ୍ବରାଜ’, ନାକରୁଣ୍ଡିରେ ‘ସେବା’ ଲେଖେଁ ବେସରକାରୀ ଅନୁଷ୍ଠାନର ସାହାଯ୍‌ରେ ସ୍ବାସ୍ଥ୍ୟ ସେବା ଯୁଗେଇ ଦେଉଛନ୍‌। ହେଲେ ଇ ସ୍ବାସ୍ଥ୍ୟ କେନ୍ଦ୍ରମାନକେ ଦରକାର ହିସାବେ କରମଚାରୀ ନଁାଇଁନ, ଯେନ୍‌ଥିରଲାଗି ରୁଗୀ ନାନା ପରକାର ସମସିଆର ସାମନା କରୁଛନ୍‌। ବ୍ଲକର ଥୁ.ରାମପୁର, ଗୋପାଳପୁର, ବଡ଼ଛତ୍ରଙ୍ଗ, ଅଡ୍ରି, ନାକରୁଣ୍ଡି, ମହୁଲପାଟଣା ଆର ଗୋପିନାଥପୁର ସ୍ବାସ୍ଥ୍ୟ ଉପକେନ୍ଦ୍ରମାନକେ ମହିଲା ଆର ପୁରୁଷ ସ୍ବାସ୍ଥ୍ୟ କରମୀକଁର ଘୋର ଅଭାବ ରହିଛେ। ସେନ୍‌ତା ଖୋଦ୍‌ ଥୁ.ରାମପୁର ବ୍ଲକ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର ବେବସ୍‌ତା ଅତି ଦୁରବଲ। ଇଠାନେ ଆଏଜ୍‌ତକ ଝନେ ବି ବିଶେଷଜ୍ଞ ଡାକ୍‌ତର ନିଯୁକ୍ତ ନାଇଁ ହେଇପାରି। ଡାକ୍‌ତରଖାନାରେ ୬ ଝନ୍‌ ଡାକ୍‌ତର ନିୟୋଜିତ ହେବାର ବେବସ୍‌ତା ଥିଲେ ବି ୨ ଝନ୍‌ ଡାକ୍‌ତରରେ ରୁଗୀସେବା ଚାଲିଛେ। ସେନ୍‌ତା ୮ ଝନ୍‌ ଏ.ଏନ୍‌.ଏମ୍‌ ଜାଗାରେ ୩ ଝନ୍‌ ରହିଛନ୍‌। ଡାକ୍‌ତରଖାନାରେ ଏହେଦେ ବି ଗୁଟେ ଶବ ବୁହା ଗାଡ଼ିର ଅଭାବ ରହିଛେ। ସେନ୍‌ତା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରର କରମଚାରୀକର ରହିବାର ଲାଗି ଘର ନଁାଇଁନ। ଯେନ୍‌କେତେ ଘର ଅଛେ ସେଟା ବି ବିପଦ ଅବସ୍‌ତାରେ ରହିଛେ। ଏନ୍‌ତାଥି ଡାକ୍‌ତର, କରମଚାରୀମାନେ ନିଜର ଜୀବନ୍‌କେ ପାଏନ୍‌ଛଡ଼େଇ ଇ ଘରମାନକେ ରହୁଛନ୍‌। ଆଗ୍‌କେ ବରଷା ଦିନ୍‌ ଆସୁଛେ, ଇ ସମିଆରେ ଅଂଚଲରେ ଝାଡ଼ାବଁାତି, ମ୍ୟାଲେରିଆ ହେବାର ବହୁତ୍‌ ସମ୍‌ଭାବନା ରହିଛେ। ଇ ଦିଗେ ଜିଲା ପରଶାସନ ଆର ସ୍ବାସ୍ଥ୍ୟ ବିଭାଗ ଆଗତୁରା ସଜାଗ ରହି ପଦକ୍ଷେପ ନେବାକେ ଅଂଚଲବାସୀ ଦାବି କରିଛନ୍‌। ନାଇଁହେଲେ ଇ ସମିଆରେ ଚିକିସତ୍ା ଅଭାବୁ କେତେ ଲୁକ୍‌କର ଜୀବନ୍‌ ଯିବା କିଛି କହି ନାଇଁହୁଏ। ଇ ବାବ୍‌ଦେ ସିଡିଏମ୍‌ଓ ଡା.ବନଲତା ଦେବୀକୁଁ ପଚରାଲାରୁ ସ୍ବାସ୍ଥ୍ୟ କେନ୍ଦ୍ର ଆର କରମଚାରୀକର ଘର ସମସିଆ ବାବ୍‌ଦେ ବିଭାଗୀୟ ଉଚ କତୁରପକ୍ଷକୁଁ କହିଛେଁ। ନିରବାଚନ ଆଚରନବିଧି ଲାଗି ସମସିଆର ସମାଧାନରେ ବିଲମ୍‌ ହେଇଛେ। ଯେତେ ଜଲ୍‌ଦି ହେବା ସମସିଆର ସମାଧାନ ଦିଗେ ପଦକ୍ଷେପ ନିଆଯିବା ବଲି ସେ କହିଥିଲେ।


All Right Reserved By Dharitri.Com

କେସିଙ୍ଗା ବ୍ଲକରେ ଶାନ୍ତିଶୃଙ୍ଖଳା ଭାବେ ରଥଯାତ୍ରା ପାଳିତ

କେସିଙ୍ଗା,୪।୭(ଡି.ଏନ.ଏ.): କଳାହାଣ୍ଡି ଜିଲା କେସିଙ୍ଗା ବ୍ଲକର ବିଭିନ୍ନ ଗ୍ରାମରେ ରଥଯାତ୍ରା ଗୁରୁବାର ଶାନ୍ତିଶୃଙ୍ଖଳାର ସହିତ ପାଳିତ ହୋଇଯାଇଛି। ସହରରେ ଥିବା ଶ୍ରୀଜଗନ୍ନାଥ ମନ୍ଦିରରେ ବଳଭଦ୍ର, ଶୁଭଦ୍ରା...

ସୁନ୍ଦରଗଡ଼ ଜିଲା ଅବକାରୀ ବିଭାଗର ଚଢ଼ାଉ: ୨୫ କିଗ୍ରା ଗଞ୍ଜେଇ ଜବତ, ଜଣେ ଗିରଫ

ରାଉରକେଲା ଅଫିସ,୩।୭: ସୁନ୍ଦରଗଡ଼ ଜିଲା ଅବକାରୀ ପୋଲିସ ବୁଧବାର ଲକ୍ଷାଧିକ ଟଙ୍କା ମୂଲ୍ୟର ଗଞ୍ଜେଇ ଜବତ କରିଛି। ଘଟଣାରେ ସମ୍ପୃକ୍ତ ଥିବା ଜଣଙ୍କୁ ଗିରଫ କରାଯାଇଛି।...

ମନ୍‌ବଲ ଆଗ୍‌କେ ବଢ଼ବାର ବାଟ କଢ଼ାସି

ଲାଠୋର, ୧୫ା୪ (ଡି.ଏନ୍‌.ଏ): ସମାଜରେ ସଭେ ଜିଁବାର ଖାଏବାର ଲାଗି କିଛି ନାଇଁ କିଛି କରୁଛନ୍‌। କିଏ ବୁଧି ବିବେକ ଖଟେ ତ ଆର କିଏ...

ବର୍ଜ୍ୟବସ୍ତୁ ପରିଚାଳନା ସମ୍ପର୍କିତ ପ୍ରଶିକ୍ଷଣ ଶିବିର

ଭବାନୀପାଟଣା,୮।୬(ଡି.ଏନ.ଏ.): ଭବାନୀପାଟଣା ପୌର ସଂସ୍ଥା ପକ୍ଷରୁ ବର୍ଜ୍ୟବସ୍ତୁ ପରିଚାଳନା ସମ୍ପର୍କିତ ଏକ ପ୍ରଶିକ୍ଷଣ ଶିବିର ଶନିବାର ଅପରାହ୍ନ ୪ଟାରେ ସ୍ଥାନୀୟ ବିଜୁ କଲ୍ୟାଣ ମଣ୍ଡପଠାରେ ଅନୁଷ୍ଠିତ...

କାରରୁ ଓହ୍ଲାଇ କୋଷ୍ଠରୋଗୀଙ୍କୁ ରାସ୍ତା ପାର କରାଇଲେ ଡାକ୍ତର: ଛୁଇଁଲେ କୁଷ୍ଠରୋଗ ବ୍ୟାପେ ନାହିଁ

ଚିପିଲିମା, ୪।୬ (ସ୍ବ.ପ୍ର.)କୁଷ୍ଠରୋଗୀମାନଙ୍କ ପ୍ରତି ଆମମାନଙ୍କ ଭିତରେ ଏବେ ବି ଘୃଣାଭାବ ରହିଛି। ସେମାନଙ୍କୁ ଛୁଇଁଲେ କୁଷ୍ଠରୋଗ ବ୍ୟାପେ ବୋଲି ଆମମାନଙ୍କ ଭୁଲ୍‌ ଧାରଣା ମଧ୍ୟ...

ଆବାସ ଯୋଜନାରୁ ବଁଚିତ୍‌ ବୁରୁଧ୍‌ ରତନ

ବିନିକା, ୨୮ା୪(ଡି.ଏନ୍‌.ଏ): ସୁବର୍ଣ୍ଣପୁର ଜିଲା ବିନିକା ବ୍ଲକ ବାଙ୍କିଘିର୍ଡ଼ି ପଁଚେତ୍‌ର ସାରଙ୍ଗପାଲି ମାହାରଗୋଠର ରତନ ମାହାର(୬୫)। ପରିବାର କହିଲେ ମାଏକିନା ଯାମା(୬୦)। ଦୁଇ ବୁଢ଼ାବୁଢ଼ିକର ପିଲାଛୁଆ...

କଳାହାଣ୍ଡି ଲୋକ ସଭା: ଭାଜପା ଆଗରେ

ଭବାନୀପାଟଣା,୨୩।୫: କଳାହାଣ୍ଡି ଲୋକ ସଭା ଆସନରେ ଭାଜପାର ବସନ୍ତ ପଣ୍ଡା ଆଗରେ ରହିଛନ୍ତି। ବସନ୍ତ ୧୦୮୪୧୩ ଭୋଟ ପାଇଥିବାବେଳେ ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ବିଜେଡିର ପୁଷ୍ପେନ୍ଦ୍ର...

ଯୁବକଙ୍କ ଗଳିତ ମୃତଦେହ ଉଦ୍ଧାର, ହତ୍ୟା ଅଭିଯୋଗ

ଭବାନୀପାଟଣା,୨୭ା୫(ଡି.ଏନ୍‌.ଏ.): କଳାହାଣ୍ଡି ଜିଲା ଭବାନୀପାଟଣା ସଦର ଥାନା ଅନ୍ତର୍ଗତ କର୍ଲାପାଟ ଅଭୟାରଣ୍ୟର ନେହେଲା ଗ୍ରାମରେ ଭବାନୀପାଟଣା ସହର ପୁରୁଣାପଡ଼ାର ଜଣେ ଯୁବକଙ୍କ ଗଳିତ ମୃତଦେହ ତିନି...

Leave a comment

Your email address will not be published. Required fields are marked *