Posted inଜାତୀୟ

ବିଶ୍ୱ ଜଳବାୟୁ ଜରୁରୀ ପରିସ୍ଥିତି ଘୋଷଣା କଲେ ୧୧ ହଜାର ବୈଜ୍ଞାନିକ

ନୂଆଦିଲ୍ଲୀ, ୭।୧୧(ପି.ଟି.): ଜଳବାୟୁ ପରିବର୍ତ୍ତନଜନିତ ପ୍ରଭାବକୁ ନେଇ ବୈଜ୍ଞାନିକମାନେ ଉଦ୍‌ବେଗ ପ୍ରକାଶ କରିଛନ୍ତି। ୧୫୩ଟି ରାଷ୍ଟ୍ରର ୧୧ହଜାରରୁ ଊର୍ଦ୍ଧ୍ୱ ବୈଜ୍ଞାନିକ ବିଶ୍ୱ ଜଳବାୟୁ ଜରୁରୀ ପରିସ୍ଥିତି ଘୋଷଣା କରିବା ସହ ଖୁବ୍‌ଶୀଘ୍ର ମାନବ ସମାଜ ଏଥିପାଇଁ ଅକଥନୀୟ ଯନ୍ତ୍ରଣାର ସମ୍ମୁଖୀନ ହେବା ଅନିବାର୍ଯ୍ୟ ବୋଲି ସତର୍କ କରାଇଦେଇଛନ୍ତି। ମାନବକୃତ ସବୁଜ ଗୃହ ଗ୍ୟାସ୍‌ ନିର୍ଗମନ ଓ ଅନ୍ୟାନ୍ୟ କାରଣ ଯୋଗୁ ଜଳବାୟୁରେ ଦ୍ରୁତ ପରିବର୍ତ୍ତନ ହୋଇଚାଲିଛି। ବାୟୋସାଇନ୍ସ ପତ୍ରିକାରେ ମଙ୍ଗଳବାର ପ୍ରକାଶିତ ଏହି ଲେଖାରେ ୧୧,୨୫୮ ଜଣ ବୈଜ୍ଞାନିକ ସ୍ବାକ୍ଷର କରିଛନ୍ତି। ସେଥିରେ ଭାରତରୁ ୬୯ ଜଣ ସାମିଲ ଅଛନ୍ତି। ବର୍ତ୍ତମାନର ଜଳବାୟୁ ପରିବର୍ତ୍ତନର ଧାରା ସମ୍ପର୍କରେ ସେମାନେ ସତର୍କ କରାଇଦେବା ସହ ଏହାକୁ ରୋକିବା ଦିଗରେ କେତେକ ପ୍ରଭାବଶାଳୀ ପ୍ରଶମନ ପଦକ୍ଷେପ ସମ୍ପର୍କରେ ପରାମର୍ଶ ଦେଇଛନ୍ତି।
ସେମାନେ ଦୀର୍ଘ ୪୦ ବର୍ଷର ତଥ୍ୟକୁ ଅନୁଧ୍ୟାନ କରିବା ପରେ ଏଭଳି ଜରୁରୀ ପରିସ୍ଥିତି ଘୋଷଣା କରିଥିବା କହିଛନ୍ତି। ବିପୁଳ ପରିମାଣରେ ଶକ୍ତିର ବ୍ୟବହାର, ଭୂପୃଷ୍ଠ ତାପମାତ୍ରା ବୃଦ୍ଧି, ଜନସଂଖ୍ୟା ବୃଦ୍ଧି, ଗଛ କଟା ଓ ଜଙ୍ଗଲ ହ୍ରାସ, ମେରୁ ଅଞ୍ଚଳରୁ ପର୍ଯ୍ୟାପ୍ତ ବରଫ ତରଳିବା, ଉର୍ବରତା ହାର, ମୋଟ ଘରୋଇ ଉତ୍ପାଦ (ଜିଡିପି) ଏବଂ ଅଙ୍ଗାରକ ନିର୍ଗମନ ଆଦିର ତଥ୍ୟକୁ ଅନୁଧ୍ୟାନ କରିବା ପରେ ବୈଜ୍ଞାନିକମାନେ ଉଦ୍‌ବେଗ ପ୍ରକାଶ କରିଥିଲେ। ଜଳବାୟୁ ପରିବର୍ତ୍ତନ ଓ ଏହାର ପ୍ରଭାବକୁ ନେଇ ୪୦ ବର୍ଷ ହେଲା ବିଶ୍ୱ ସ୍ତରରେ ବିଭିନ୍ନ ଆଲୋଚନା ଜାରି ରହିଥିଲେ ମଧ୍ୟ ପ୍ରକୃତରେ ଏହାକୁ ରୋକିବା ଦିଗରେ ଯେତିକି ତତ୍ପରତା ପ୍ରକାଶ ପାଇବା କଥା ତାହା ହୋଇନାହିଁ। ପୂର୍ବ ଧାରା ଅବ୍ୟାହତ ରହିଥିବାରୁ ସଙ୍କଟ ସମାଧାନ କରିବାରେ ସଫଳତା ମିଳିନାହିଁ ବୋଲି ଆମେରିକାର ଓରେଗନ୍‌ ଷ୍ଟେଟ୍‌ ୟୁନିଭର୍ସିଟି (ଓଏସ୍‌ୟୁ) କଲେଜ ଅଫ୍‌ ଫରେଷ୍ଟ୍ରିର ପ୍ରଫେସର ଓ୍ବିଲିୟମ ଜେ. ରିପ୍ପଲ୍‌ କହିଛନ୍ତି। ଜଳବାୟୁ ପରିବର୍ତ୍ତନ ଯେଉଁ ହାରରେ ହେଉଥିବା ବୈଜ୍ଞାନିକମାନେ ଆଶା କରୁଥିଲେ ତାହାଠାରୁ ଯଥେଷ୍ଟ ଦ୍ରୁତଗତିରେ ଏହା ବଦଳୁଥିବା ରିପ୍ପଲ୍‌ ସୂଚନା ଦେଇଛନ୍ତି। ବିଶ୍ୱ ତାପମାତ୍ରାକୁ ହ୍ରାସ କରିବାକୁ ହେଲେ ତୁରନ୍ତ ଶକ୍ତି, ସ୍ବଳ୍ପମିଆଦୀ ପ୍ରଦୂଷକ, ପ୍ରକୃତି, ଖାଦ୍ୟ, ଅର୍ଥନୀତି ଓ ଜନସଂଖ୍ୟା କ୍ଷେତ୍ରରେ ପଦକ୍ଷେପ ନେବାକୁ ହେବ ବୋଲି ଓଏସ୍‌ୟୁ ପ୍ରଫେସର ରିପ୍ପଲ ଏବଂ କ୍ରିଷ୍ଟୋଫର ଓ୍ବଲ୍ଫଙ୍କ ନେତୃତ୍ୱରେ ବିଶ୍ୱ ବୈଜ୍ଞାନିକମାନଙ୍କ ସଂଘ ମତ ପ୍ରକାଶ କରିଛି।
ଗବେଷଣାରୁ ଜଣାପଡିଛି, ଜନସଂଖ୍ୟା ବୃଦ୍ଧି ସହ ସମସ୍ତଙ୍କୁ ପର୍ଯ୍ୟାପ୍ତ ଖାଦ୍ୟ ଓ ଶକ୍ତ ଯୋଗାଇଦେବା ପାଇଁ ଆମେ ପ୍ରକୃତିର ଶୋଷଣ କରିଚାଲିଛୁ, ଯାହା ପରିବେଶର ଗୁରୁତର କ୍ଷତି କରୁଛି ବୋଲି ଦିଲ୍ଲୀ ବିଶ୍ୱବିଦ୍ୟାଳୟର ସହକାରୀ ପ୍ରାଧ୍ୟାପକ ଜ୍ଞାନପ୍ରକାଶ ଶର୍ମା କହିଛନ୍ତି। ସେ ମଧ୍ୟ ଉକ୍ତ ଘୋଷଣାନାମାର ଅନ୍ୟତମ ସ୍ବାକ୍ଷରକାରୀ। ଜଳବାୟୁ ପରିବର୍ତ୍ତନର ପ୍ରଭାବ ଭାରତରେ ସ୍ପଷ୍ଟ ପରିଲକ୍ଷିତ ହୋଇଛି। ଯାହା ଫଳରେ ମୌସୁମୀ ସମେତ ପରିବେଶ ଢାଞ୍ଚାରେ ମଧ୍ୟ ବ୍ୟାପକ ପରିବର୍ତ୍ତନ ଦେଖାଦେଇଛି। ଏଥିପାଇଁ କୃଷି ପଦ୍ଧତି ବଦଳାଇବାକୁ ପଡିଥିବା ଶର୍ମା କହିଛନ୍ତି। ଜଳବାୟୁ ପରିବର୍ତ୍ତନକୁ ରୋକିବାକୁ ହେଲେ ବିଶ୍ୱ ସମାଜର କାର୍ଯ୍ୟଧାରାରେ ଭିନ୍ନତା ଆଣିବାକୁ ହେବ ବୋଲି ଉକ୍ତ ପ୍ରବନ୍ଧରେ ଉଲ୍ଲେଖ କରାଯାଇଛି। ଏକ ଦୀର୍ଘସ୍ଥାୟୀ ତଥା ନ୍ୟାୟସଙ୍ଗତ ଭବିଷ୍ୟତ ଗଠନ ଲାଗି ନୀତି ନିର୍ଦ୍ଧାରକମାନଙ୍କୁ ସହାୟତା କରିବା ଲାଗି ଆମେ ପ୍ରସ୍ତୁତ ବୋଲି ବୈଜ୍ଞାନିକ ସଂଘ କହିଛନ୍ତି। ମାନବ ସମାଜ ପାଇଁ ବଡ଼ ବିପଦ ଦେଖାଦେଇଥିଲାବେଳେ ଏନେଇ ସତର୍କ କରାଇବା ବୈଜ୍ଞାନିକମାନଙ୍କର ନୈତିକ କର୍ତ୍ତବ୍ୟ ବୋଲି ସିଡ୍‌ନୀ ବିଶ୍ୱବିଦ୍ୟାଳୟର ପ୍ରଫେସର ଥୋମାସ୍‌ ନ୍ୟୁସମ୍‌ କହିଛନ୍ତି। ଉପଲବ୍ଧ ତଥ୍ୟ ଅନୁଯାୟୀ ଆମେ ଜଳବାୟୁ ଜରୁରୀ ପରିସ୍ଥିତିର ସମ୍ମୁଖୀନ ହେବାକୁ ଯାଉଥିବାର ସ୍ପଷ୍ଟ ସୂଚନା ମିଳୁଛି ବୋଲି ସେ ମତ ଦେଇଛନ୍ତି।
ଜଳବାୟୁ ବଦଳୁଥିବାର ସୂଚନା ମିଳିବା ପରେ ୪୦ ବର୍ଷ ତଳେ ପ୍ରଥମ ବିଶ୍ୱ ଜଳବାୟୁ ସମ୍ମିଳନୀ ୧୯୭୯ରେ ଜେନେଭାରେ ଅନୁଷ୍ଠିତ ହୋଇଥିଲା। ଇତିମଧ୍ୟରେ ଅନେକ ବିଶ୍ୱ ସମ୍ମିଳନୀ ହୋଇଛି ଏବଂ ଏଦିଗରେ ତ୍ୱରିତ୍‌ କାର୍ଯ୍ୟାନୁଷ୍ଠାନର ଆବଶ୍ୟକତା ନେଇ ସମସ୍ତେ ସହମତ ହୋଇଛନ୍ତି। ବିଶ୍ୱ ସ୍ତରରେ ଶିଶୁ ଜନ୍ମହାର ହ୍ରାସ ପାଇଥିବା ଏକ ଭଲ ସୂଚନା। ତେବେ ବ୍ରାଜିଲ୍‌ରେ ଆମାଜନ ଅଞ୍ଚଳରେ ଜଙ୍ଗଲ କ୍ଷୟ ବଢ଼ିଚାଲିବା ଚିନ୍ତାଜନକ ହୋଇଛି। ସେହିପରି ଭୂପୃଷ୍ଠ ଓ ସମୁଦ୍ରର ତାପ ବଢ଼ିବା ସହ ଉପକୂଳ ଅଞ୍ଚଳରେ ପ୍ରାକୃତିକ ବିପର୍ଯ୍ୟୟ, ସମୁଦ୍ର ସ୍ତର ବୃଦ୍ଧି, ସମୁଦ୍ର ଜଳରେ ଅମ୍ଳତା ବଢ଼ିବା ଓ ଜଙ୍ଗଲ ନିଆଁ ବଢ଼ିଚାଲିଛି। ମେରୁ ବରଫ ଦ୍ରୁତବେଗରେ ତରଳିବା ଫଳରେ ସମୁଦ୍ରର ଜଳସ୍ତର ବଢ଼ିଚାଲିଛି। ତେଣୁ ଜଳବାୟୁ ପରିବର୍ତ୍ତନ ବିରୋଧରେ ଜରୁରୀ ପଦକ୍ଷେପ ଆବଶ୍ୟକ ବୋଲି ମତପ୍ରକାଶ ପାଇଛି।


All Right Reserved By Dharitri.Com

ମାଟି କ୍ୟାରମ୍‌ ବୋର୍ଡରେ ଖେଳୁଥିବା ପିଲାଙ୍କ ଭିଡ଼ିଓକୁ ସୋସିଆଲ୍‌ ମିଡ଼ିଆରେ ଭାଇରାଲ କଲେ ଆନନ୍ଦ ମହିନ୍ଦ୍ରା

ନୂଆଦିଲ୍ଲୀ,୧୨।୧୦: ଶିଳ୍ପପତି ଆନନ୍ଦ ମହିନ୍ଦ୍ରା ଟୁଇଟରରେ ଏକ ଫଟୋ ଅପ୍‌ଲୋଡ୍‌ କରିଛନ୍ତି। ଏହା ଏବେ ସୋସିଆଲ୍‌ ମିଡ଼ିଆରେ ଭାଇରାଲ ହେବାରେ ଲାଗିଛି। ଫଟୋରେ ୫ ଜଣ...

ନକଲି ମୁଣ୍ଡ କେଶରେ ଯୁବକ ଲୁଚାଇ ନେଉଥିଲେ ଏକ କିଲୋ ସୁନା: ଧରିଲେ କଷ୍ଟମ୍‌ ଅଧିକାରୀ

କୋଚି,୫।୧୦: କେରଳରେ ଜଣେ ଯୁବକ ନକଲି ମୁଣ୍ଡ କେଶରେ ସୁନା ଲୁଚାଇ ନେଉଥିବା ସମୟରେ କଷ୍ଟମ୍‌ ଅଧିକାରୀଙ୍କ ହାତରେ ଧରାପଡ଼ିଛନ୍ତି। କୋଚି ବିମାନ ବନ୍ଦରରେ ଓହ୍ଲାଇଥିବା...

ଏକ୍‌ଜିଟ୍‌ ପୋଲ୍‌କୁ ଦେଖି ବିଚଳିତ ନ ହୋଇ ଫଳାଫଳକୁ ଅପେକ୍ଷା ରଖନ୍ତୁ: ପ୍ରିୟଙ୍କା

ନୂଆଦିଲ୍ଲୀ,୨୧।୫: ଲୋକ ସଭା ନିର୍ବାଚନ ସରିଥିବା ବେଳେ ଫଳଫଳ ଘୋଷଣା ହେବାକୁ ଆଉ ମାତ୍ର ଗୋଟିଏ ଦିନ ବାକି ରହିଛି। ଏପଟେ ଗଣମାଧ୍ୟମର ଏକ୍‌ଜିଟ୍‌ ପୋଲ୍‌...

ଜୁନ୍‌ ୩୦ ପର୍ଯ୍ୟନ୍ତ ବୁକ୍‌ କରାଯାଇଥିବା ସମସ୍ତ ଟିକେଟକୁ ବାତିଲ କଲା ଭାରତୀୟ ରେଲଓ୍ବେ

ନୂଆଦିଲ୍ଲୀ,୧୪।୫: ଜୁନ୍‌ ୩୦ ଅବା ଏହା ପୂର୍ବରୁ ଯେଉଁ ଯାତ୍ରୀମାନେ ଟ୍ରେନ୍‌ ଟିକେଟ ବୁକ୍‌ କରିଥିଲେ ସେମାନଙ୍କୁ ଲାଗିଛି ଝଟ୍‌କା। କାରଣ ଭାରତୀୟ ରେଲଓ୍ବେ ଜୁନ...

ସ୍ମାର୍ଟ ଫୋନ୍‌ କିଣିଲେ ମାଗଣାରେ ମିଳିବ ପିଆଜ

ପାଟୁକୋଟାଇ,୮।୧୨: ଦେଶରେ ପିଆଜର ଦରବୃଦ୍ଧି ଏବେ ସମସ୍ତଙ୍କୁ ଚିନ୍ତାରେ ପକାଇଛି। ଏତିକିବେଳେ ତାମିଲନାଡୁ ପାଟୁକୋଟାଇର ଥାଲାୟାରି ଷ୍ଟ୍ରିଟ୍‌ରେ ଥିବା ଜଣେ ମୋବାଇଲ ଦୋକାନୀ ଫୋନ୍‌ ବିକ୍ରି...

ବିଧାନସଭା ନିର୍ବାଚନ ପାଇଁ ପ୍ରସ୍ତୁତ ହେଉଛି ଭାଜପା

ନୂଆଦିଲ୍ଲୀ,୧୩।୬: ଲୋକ ସଭା ନିର୍ବାଚନରେ ବିପୁଳ ବିଜୟ ପରେ ଏବେ ଭାଜପା ଆସନ୍ତା ବିଧାନସଭା ପାଇଁ ପ୍ରସ୍ତୁତି ଆରମ୍ଭ କରିଛି। ଏନେଇ ସ୍ବରାଷ୍ଟ୍ର ମନ୍ତ୍ରୀ ଅମିତ...

ଦିଲ୍ଲୀ ହିଂସା: ସ୍କାନରରେ ହ୍ବାଟସ୍‌ ଆପ୍‌ ଗ୍ରୁପ

ନୂଆଦିଲ୍ଲୀ,୨୭।୨: ଉତ୍ତର-ପୂର୍ବ ଦିଲ୍ଲୀରେ ବେଳକୁ ବେଳ ହିଂସା ଉଗ୍ରରୂପ ନେଇଥିବାରୁ ସମସ୍ତଙ୍କ ଚିନ୍ତା ବଢିଯାଇଛି। ବିଶେଷ ଭାବେ ଦିଲ୍ଲୀ ବାହାରର ଲୋକେ ହିଂସା ବଢାଉଥିବା ଅନୁମାନ...

୨୦୨୧ ନିର୍ବାଚନ: ଦିଦିଙ୍କ ରାଗ ଶାନ୍ତ କରିବାକୁ ଚେଷ୍ଟା କରିବେ ପ୍ରଶାନ୍ତ କିଶୋର

କୋଲକାତା,୧।୮: ଆସନ୍ତା ୨୦୨୧ରେ ପଶ୍ଚିମବଙ୍ଗ ସାଧାରଣ ନିର୍ବାଚନ ଅନୁଷ୍ଠିତ ହେବାକୁ ଥିବା ବେଳେ ଏବେଠାରୁ ଏହାକୁ ନେଇ ସଜବାଜ ହେଲାଣି ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଦଳ...

Leave a comment

Your email address will not be published. Required fields are marked *