କେନ୍ଦୁଝର,୨।୪(ସ୍ବ.ପ୍ର.): କରୋନା ମୁକାବିଲାକୁ ନେଇ ସାରା ରାଜ୍ୟରେ ଲକ୍ଡାଉନ୍ ଜାରି ରହିଛି। ଏହି ସମୟରେ ଖାଉଟି ସାମଗ୍ରୀ, ପନିପରିବା, ମାଛମାଂସ, ଔଷଧ ଆଦି ଦୋକାନ ଖୋଲା ରହିବ ବୋଲି ସରକାରଙ୍କ ପକ୍ଷରୁ ନିର୍ଦ୍ଦେଶ ଦିଆଯାଇଛି। ହେଲେ ଏହି ସମୟରେ ଲୋକମାନଙ୍କ ଗହଳି ଦେଖିବାକୁ ମିଳୁଥିବାରୁ କେନ୍ଦୁଝର ଜିଲା ପ୍ରଶାସନ ପକ୍ଷରୁ ଗୁରୁବାର ଭ୍ରାମ୍ୟମାଣ ପରିବା ଦୋକାନର ଶୁଭାରମ୍ଭ କରାଯାଇଛି। ସୁଲଭ ମୂଲ୍ୟରେ ପନିପରିବା ଘର ପାଖରେ ଯୋଗାଇଦେବାକୁ ଏହି ପ୍ରୟାସ କରାଯାଇଛି। ଫଳରେ ଲୋକ ମାନେ ରାସ୍ତା ବା ବଜାରକୁ ନ ଆସି ନିର୍ଦ୍ଧାରିତ ଦିନ ଓ ସମୟରେ ଘର ପାଖରେ ପନିପରିବା ସଂଗ୍ରହ କରି ପାରିବେ। ଜିଲାପାଳ ଆଶୀଷ ଥାକରେ ଏହାର ଶୁଭାରମ୍ଭ କରିଛନ୍ତି। ଏହା କେନ୍ଦୁଝର ସହରର ବିଭିନ୍ନ ୱାର୍ଡ ବା ସାହିକୁ ଯାଇ ସୁଲଭ ମୂଲ୍ୟରେ ତଟକା ପରିବା ଯୋଗାଇ ଦିଆଯିବ। କୃଷି ଉତ୍ପାଦକ ପ୍ରକଳ୍ପ ଜରିଆରେ ଏହି କାର୍ଯ୍ୟକ୍ରମ ଆରମ୍ଭ ହୋଇଥିବା ବେଳେ ଏହା କେତେଦୂର ଲୋକଙ୍କ ଆଶ୍ୟକତା ପୂରଣ କରିବ ଏବଂ ରାସ୍ତା ଘାଟରେ ଭିଡ଼ କମାଇବା ତାହା ଦେଖିବାକୁ ଅପେକ୍ଷା ବୋଲି ମତ ପ୍ରକାଶ ପାଇଛି।
