ଭଞ୍ଜନଗର,୩।୧୧(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗର ଘୁମୁସର ଉତ୍ତର ବନଖଣ୍ଡ ମୁଜାଗଡ ରେଞ୍ଜ ବାଣିଆପଲ୍ଲୀରେ ଗତ ଶନିବାର ଏକ ଦନ୍ତା ହାତୀର ମୃତୁ ଘଟିଥିଲା। ସୋମବାର ଉକ୍ତ ଘଟଣାର ରହସ୍ୟ ବନ ବିଭାଗ ଉନ୍ମୋଚିତ କରିଛି। ଜଣେ ଶିକାରୀ ନିଜ ଫସଲକୁ ସୁରକ୍ଷା କରିବାକୁ ଯାଇ ହାତୀକୁ ଗୁଳିକରି ମାରିଥିବା ଜଣାପଡିଛି । ବନ ବିଭାଗ ଅଭିଯୁକ୍ତ ଉମାକାନ୍ତ ପ୍ରଧାନ (୫୦)ଙ୍କୁ ଗିରଫ କରିବା ପରେ ରହସ୍ୟ ଉନ୍ମୋଚିତ ହୋଇଛି। ଏହି ମାମଲାରେ ବନ ବିଭାଗ ଅଭିଯୁକ୍ତଙ୍କଠାରୁ ୨ଟି ବନ୍ଧୁକ, ଗୋଟିଏ ଭଙ୍ଗା ବନ୍ଧୁକ, ଗୁଳି, ବିସ୍ଫୋରକ ଦ୍ରବ୍ୟ, ପାଲ ପ୍ରମୁଖ ଜିନିଷ ଜବତ କରିଛି ବୋଲି ଡିଏଫ ଓ ହିମାଂଶୁ ଶେଖର ମହାନ୍ତି ସନ୍ଧ୍ୟାରେ ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ଏଥିସହ ଅଭିଯୁକ୍ତଙ୍କୁ କୋର୍ଟ ଚାଲାଣ କରାଯାଇଛି। ବନ ବିଭାଗ ଅଭିଯୁକ୍ତଙ୍କୁ ରିମାଣ୍ଡରରେ ୩ ଦିନ ଆଣି ଘଟଣାର ଅଧିକ ତଦନ୍ତ ଚଳାଇବା ଯୋଜନା ରଖିଛି। ତେଣୁ ଏନେଇ କୋର୍ଟରେ ଆବେଦନ କରାଯାଇଛି । ଏ ନେଇ ଓଆର ୪୩୨ /୨୫ ରେ ଏକ ମାମଲା ରୁଜୁ ହୋଇଛି। ଖବରଦାତା ସମ୍ମିଳନୀରେ ଏସିଏଫ ବିବେକ ଦାସ, ବିମଳ ପ୍ରଧାନ, ରେଞ୍ଜର ବିମ୍ବାଧର ସାହୁ, ବନପାଳ ବବୁଲ ସେଠୀ, ଟୁନା ମଲ୍ଲିକ, ଅନୁପ ବିଷୋୟୀ, ରାଜେନ୍ଦ୍ର ଦଳେଇ, ବନରକ୍ଷୀ ବିଶ୍ୱଜିତ୍ ହୋତା, ପ୍ରଦ୍ୟୁମ୍ନ ବିଷୋୟୀ, ସୁଶାନ୍ତ ମିଶ୍ର ପ୍ରମୁଖ ଉପସ୍ଥିତ ଥିଲେ।
ଘଟଣାରୁ ପ୍ରକାଶ ଯେ, ଗତ ଗୁରୁବାର ରାତିରେ ୨୪ ଟିକିଆ ହାତୀପଲ ବାଣିଆପଲ୍ଲୀ ଜଙ୍ଗଲରେ ଥିଲେ। ସେଥିମଧ୍ୟରୁ ୨ ଟି ହାତୀ ଫସଲ ଖାଇବାକୁ ଜମି ଆଡ଼େ ଯାଇଥିଲେ। ଏ ନେଇ ଉମାକାନ୍ତ ଜାଣି ଜମିକୁ ବନ୍ଧୁକ ଓ ବୋମା ଧରି ଯାଇଥିଲେ। ରାତି ପ୍ରାୟ ୯ ଟା ସମୟରେ ଦୁଇଟି ହାତୀ ଉମାକାନ୍ତଙ୍କ ଧାନ ଫସଲ ଖାଇବାକୁ ଆସିଥିଲେ। ଜମିରେ ପୁର୍ବରୁ ଜଗି ରହିଥିବା ଉମାକାନ୍ତ ପ୍ରଥମେ ହାତୀକୁ ଘଉଡ଼ାଇବା ପାଇଁ ୨ ଟି ବୋମା ମାଡ କରିଥିଲେ। କିନ୍ତୁ ହାତୀଦ୍ବୟ ଜଙ୍ଗଲକୁ ଫେରିଯିବା ବଦଳରେ ହିଂସ୍ର ହୋଇ ଓଲୋଟା ଆତଙ୍କ ରଚିଥିଲା। ଏହି ସମୟରେ ଉମାକାନ୍ତ ବନ୍ଧୁକରୁ ଗୁଳି ଚଳାଇଥିଲା। ଫଳରେ ଦନ୍ତା ହାତୀର ସମ୍ମୁଖ ଭାଗ ବାମ ଗୋଡ ଉପରକୁ ଗୁଳି ଲାଗିଥିଲା। ହାତୀଟି ପ୍ରାଣ ବିକଳରେ ଜଙ୍ଗଲକୁ ପ୍ରାୟ ୫୦୦ ମିଟର ଦୌଡ଼ି ଯାଇ ସେଠୀ ଟଳି ପଡ଼ିଥିଲା। ପରେ ଉମାକାନ୍ତ ଘରକୁ ଫେରି ବନ୍ଧୁକକୁ ଘର ସମ୍ମୁଖ ଜମିରେ ଲୁଚାଇ ରଖିଥିଲେ। ଶନିବାର ସକାଳେ ବନ ବିଭାଗ ହାତୀ ମରିଥିବା ସୂଚନା ପାଇଥିଲା। ପରେ ଭୁବନେଶରରୁ ଜେ ଟି ଏଫ ଟିମ ଆସି ଘଟଣାର ତଦନ୍ତ କରିଥିଲା। ଏଥିସହ ୪ ଜଣିଆ ପ୍ରାଣୀ ବିଶେଷଜ୍ଞ ହାତୀର ବ୍ୟବଚ୍ଛେଦ କରିଥିଲେ। ଏହି ସମୟରେ ହାତୀକୁ ଗୁଳି ହୋଇଥିବା ଜଣାପଡିଥିଲା। ଏଚ୍ପରେ ବନ ବିଭାଗ ଏକାଧିକ ସତନ୍ତ୍ର ଟିମ ଗଠନ କରି ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇଥିଲା।