ଶ୍ରେଷ୍ଠ ପାଞ୍ଚ: କଟକ ଦହିବରା ଆଳୁଦମ

ବାରବାଟୀ ଷ୍ଟାଡିୟମର ରମେଶ ଗୋଛି

ବାରବାଟୀ ଷ୍ଟାଡିୟମର ରମେଶ ଗୋଛି

ସକାଳ ୭ଟାରୁ ଆରମ୍ଭ କରି ରାତି ୧୦ଟା ଯାଏ ବାରବାଟୀ ଷ୍ଟାଡିୟମ ନିକଟରେ ରମେଶଙ୍କ ଷ୍ଟଲ ଖୋଲିଥାଏ। ପରିବାରର ସବୁ ସଦସ୍ୟ ଦିନର ବିଭିନ୍ନ ସମୟରେ ଆବଶ୍ୟକ ହେଉଥିବା ସାମଗ୍ରୀଗୁଡ଼ିକୁ ପ୍ରସ୍ତୁତ କରି ତାଙ୍କ ନିକଟକୁ ପଠାଇଥାନ୍ତି। ସେ ଚାରମଗଜ, ପୋସ୍ତକ, ଜିରା, ଡାଲଚିନ ଆଦି ବ୍ୟବହାର କରିଥାନ୍ତି। ୧୫ ବର୍ଷ ହେବ ତାଙ୍କ ବେପାର ଚାଲିଛି।

ଦୋଳମୁଣ୍ଡାଇର ହରିହର ପାତ୍ର

ଦୋଳମୁଣ୍ଡାଇର ହରିହର ପାତ୍ର

ହରି ଭାଇଙ୍କ ଦହିବରା ବ୍ୟବସାୟ ଦୋଳମୁଣ୍ଡାଇ ଚନ୍ଦନପଡ଼ିଆରେ। ସନ୍ଧ୍ୟା ୫ଟାରୁ ରାତି ୯ଟା ଯାଏ ଚାଲେ ବେପାର। ବର୍ଷର ସବୁଦିନ ଆଳୁଦମରେ ପିଆଜ, ରସୁଣ ସହ ଜିରା, କାଜୁ, ଡାଲଚିନ, ଗୁଜୁରାତି, ପୋସ୍ତକ, ଧନିଆର ସ୍ବତନ୍ତ୍ର ମସଲା ତାଙ୍କ ପ୍ରସ୍ତୁତିକୁ ଭିନ୍ନ ସ୍ବାଦ ଦେଇଥାଏ। ଘୁଗୁନିରେ କେବଳ ରସୁଣ, ଆମ୍ବକଷି ଅଦା, କଞ୍ଚାଲଙ୍କା ପକାନ୍ତି। ପୁଅ ଦୀପକ ତାଙ୍କ ସହ ୫ ବର୍ଷ ହେବ ସାମିଲ ହୋଇଛନ୍ତି।

ମଙ୍ଗଳାବାଗର ପ୍ରତାପ ବାରିକ

ମଙ୍ଗଳାବାଗର ପ୍ରତାପ ବାରିକ

ପ୍ରତିଦିନ ସନ୍ଧ୍ୟା ୫ଟାରୁ ରାତି ୮ଟା ଯାଏ ପ୍ରତାପଙ୍କ ଷ୍ଟଲ ମଙ୍ଗଳାବାଗ ବାଘମଙ୍ଗଳା ମନ୍ଦିର ପାର୍ଶ୍ୱରେ ଖୋଲିଥାଏ। ଲୋକଙ୍କ ରୁଚିକୁ ଚାହିଁ ପ୍ରତି ସୋମବାର, ସଂକ୍ରାନ୍ତି, ପଞ୍ଚୁକ, ଗଣେଶ ପୂଜା ସମେତ ଅନ୍ୟାନ୍ୟ ପୂଜାରେ ବିନା ପିଆଜ, ରସୁଣରେ ଆଇଟମ ପ୍ରସ୍ତୁତ କରନ୍ତି। ଅଦା, ରସୁଣ, ପିଆଜ, ଧନିଆ, ଅଦା, ଲଙ୍କାଗୁଣ୍ଡ, ଗୋଲମରିଚ, ଡାଲଚିନ, ଗୁଜୁରାତି ଆଦିରେ ନିଜେ ମସଲା ପ୍ରସ୍ତୁତ କରି ପକାଇଥାନ୍ତି। ୨୫ ବର୍ଷ ହେବ ବ୍ୟବସାୟ କରୁଛନ୍ତି। ମିଠା ଓ ଖଟା ୨ ପ୍ରକାର ଦହିବରା ତାଙ୍କ ଷ୍ଟଲରେ ଉପଲବ୍ଧ ରହିଛି।

ଅପର୍ଣ୍ଣାନଗରର ପ୍ରମୋଦ କୁମାର ସାହୁ

ଅପର୍ଣ୍ଣାନଗରର ପ୍ରମୋଦ କୁମାର ସାହୁ

ପିଆଜ, ରସୁଣକୁ ବାଦ୍‌ ଦେଇ ବର୍ଷ ତମାମ ଦହିବରା-ଆଳୁଦମ ଲୋକଙ୍କୁ ଖୁଆଇ ଚାଲିଛନ୍ତି ପ୍ରମୋଦ। ସକାଳ ୬ଟାରୁ ସାଢ଼େ ୮ଟା ଯାଏ ଘରେ ପ୍ରସ୍ତୁତି ଚାଲେ। ସକାଳ ୯ଟାରେ ଚାଉଳିଆଗଞ୍ଜ ଅପର୍ଣ୍ଣାନଗର ସିଦ୍ଧେଶ୍ୱର ମନ୍ଦିର ନିକଟରେ ଷ୍ଟଲ ଖୋଲେ। ସେ ମାତ୍ର ୨ ଘଣ୍ଟାର ବେପାର ମଧ୍ୟରେ ପ୍ରାୟ ୨୫୦ ଲୋକଙ୍କୁ ସ୍ବତନ୍ତ୍ର ସ୍ବାଦରେ ସନ୍ତୁଷ୍ଟ କରନ୍ତି।

ବିଡ଼ାନାସିର ରଘୁନାଥ ସାସମଲ

ବିଡ଼ାନାସିର ରଘୁନାଥ ସାସମଲ

ରଘୁ ଦହିବରା କିଏ ବା ନଜାଣେ। ଜୀବନର ସାୟାହ୍ନରେ ପହଞ୍ଚତ୍ଲେ ବି ଷ୍ଟଲ ଖୋଲିଲେ ଚେୟାର ପକାଇ ବସନ୍ତି। ଲୋକଙ୍କୁ ହସହସ ବଦନରେ ଚାହିଁ ଦୁଇପଦ କଥା କହିଥାନ୍ତି। ତାଙ୍କ ୬୦ ବର୍ଷର ବେପାରକୁ ବଡ଼ପୁଅ କେଦାରନାଥ ଏବେ ସମ୍ଭାଳୁଛନ୍ତି। ଷ୍ଟଲ ଖୋଲିବା ପୂର୍ବରୁ ଲୋକମାନେ ବିଡ଼ାନାସି ରିଂବନ୍ଧ କଡ଼ରେ ଗାଡ଼ିମୋଟର ଥୋଇ ଅପେକ୍ଷା କରିଥାନ୍ତି। ସନ୍ଧ୍ୟା ୫ଟାରେ ଷ୍ଟଲ ଖୋଲିଲେ ଅଧ ଘଣ୍ଟାଏରେ ବେପାର ଶେଷ।