ଉପକୂଳ ଓଡିଶା

ପାଇକା ନଦୀରେ ବୁଡ଼ି ଯୁବକ ନିଖୋଜ

ପାଇକା ନଦୀରେ ବୁଡ଼ି ଯୁବକ ନିଖୋଜ

ମହାକାଳପଡ଼ା, ୧୪।୩(ଡି.ଏନ୍‌.ଏ.): ମହାକାଳପଡ଼ା ବ୍ଲକ ତିଖିରୀ ପଞ୍ଚାୟତ ତିଖିରୀ ଗ୍ରାମର ଜଣେ ଯୁବକ ପାଇକା ନଦୀରେ ବୁଡ଼ି ବୁଧବାର ନିଖୋଜ ହୋଇଥିବା ଜଣାପଡ଼ିଛି। ସେ ହେଲେ ରବୀନ୍ଦ୍ର ଖଟୁଆଙ୍କ ପୁଅ ଚଗଲା(୨୫)। ଖବର ପାଇ ମହାକଳାପଡ଼ା ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ଖୋଜାଖୋଜି ଚଳାଇଛି।

ତହସିଲରେ ଅନଲାଇନ୍‌ ମ୍ୟୁଟେଶନ୍‌ର ଶୁଭାରମ୍ଭ

ତହସିଲରେ ଅନଲାଇନ୍‌ ମ୍ୟୁଟେଶନ୍‌ର ଶୁଭାରମ୍ଭ

ନିଶ୍ଚିନ୍ତକୋଇଲି,୧୪।୩(ସ୍ବ.ପ୍ର.): କଟକ ଜିଲା ନିଶ୍ଚିନ୍ତକୋଇଲି ତହସିଲରେ ବୁଧବାର ଅନଲାଇନ୍‌ ମ୍ୟୁଟେଶନ କାର୍ଯ୍ୟର ଶୁଭାରମ୍ଭ ହୋଇଛି। ଏହି କାର୍ଯ୍ୟକୁ କଟକ ଜିଲା ଅତିରିକ୍ତ ଜିଲାପାଳ ପ୍ରିୟଙ୍କା ମଲିକ ଓ ଏଡିଆଇ ଇତିଶ୍ରୀ ନନ୍ଦ ଉଦ୍‌ଘାଟନ କରିଥିଲେ।

ଅଗ୍ନିକାଣ୍ଡ: ୨ ପରିବାରଙ୍କ ୫ ବଖରା ଭସ୍ମୀଭୂତ

ଅଗ୍ନିକାଣ୍ଡ: ୨ ପରିବାରଙ୍କ ୫ ବଖରା ଭସ୍ମୀଭୂତ

ରଘୁନାଥପୁର, ୧୪।୩(ଡି.ଏନ୍‌.ଏ.): କିଶୋରନଗର ତହସିଲ ଉତ୍ତରକୂଳ ପଞ୍ଚାୟତ ପିଁପୁର ଗ୍ରାମରେ ବୁଧବାର ସକାଳେ ଅଗ୍ନିକାଣ୍ଡ ଘଟିଛି। ବସନ୍ତ ମହାରଣା ଓ ରବୀନ୍ଦ୍ର ମହାପାତ୍ରଙ୍କ ଗୋଟିଏ ଗୁହାଳ ଘର ସମେତ ୫ ବଖରା ଜଳିଯାଇଛି। ଘରର ସମସ୍ତ ଆସବାବପତ୍ର ପୋଡିଯିବା ସହ ଗୁହାଳରେ ଥିବା ୨ଟି ଗାଈ ଜୀବନ୍ତ ଦଗ୍ଧ ହୋଇଛନ୍ତି। ଖତଗଦାରୁ ନିଆଁ ଲାଗି ଏପରି ଘଟିଥିବା ଅନୁମାନ କରାଯାଉଛି।

ତୈଳ ବିଶୋଧନାଗାର ସମ୍ମୁଖରେ ଭିନ୍ନକ୍ଷମ ପ୍ରଶାନ୍ତଙ୍କ ଧାରଣା

ତୈଳ ବିଶୋଧନାଗାର ସମ୍ମୁଖରେ ଭିନ୍ନକ୍ଷମ ପ୍ରଶାନ୍ତଙ୍କ ଧାରଣା

ପାରାଦୀପ, ୧୪।୩(ସ୍ବ.ପ୍ର.): ଅଭୟଚାନ୍ଦପୁର ଥାନା ଅନ୍ତର୍ଗତ ବଗଦିଆ ନୂଆସାହିର ଭିନ୍ନକ୍ଷମ ପ୍ରଶାନ୍ତ ସାହୁ ନିଯୁକ୍ତି ଦାବିରେ ବୁଧବାର ସକାଳ ୮ଟାରୁ ତୈଳ ବିଶୋଧନାଗାର ପ୍ରଶାସନିକ ଭବନ ଗେଟ୍‌ ସମ୍ମୁଖରେ ଧାରଣାରେ ବସିଛନ୍ତି। ତାଙ୍କ ସହ ସ୍ତ୍ରୀ ଓ ୨ ସନ୍ତାନ ମଧ୍ୟ ଧାରଣାରତ ଅଛନ୍ତି। ପ୍ରକାଶ ଯେ, ଭାରତୀୟ ତୈଳ ନିଗମର ଏହି ବିଶୋଧନାଗାର ପ୍ରକଳ୍ପ ପାଇଁ ପ୍ରଶାନ୍ତ ଜମି ହରାଇଥିଲେ।

ଶୌଚାଳୟରେ ତାଲା, ଲୋକେ ହନ୍ତସନ୍ତ

ଶୌଚାଳୟରେ ତାଲା, ଲୋକେ ହନ୍ତସନ୍ତ

ଜଗତ୍‌ସିଂହପୁର ଅଫିସ,୧୩।୩ ଜଗତ୍‌ସିଂହପୁର ଜିଲା ମୁଖ୍ୟ ଚିକିତ୍ସାଳୟ ଫାଟକକୁ ଲାଗି ରହିଥିବା ଶୌଚାଳୟରେ ତାଲା ଝୁଲୁଛି। ଏଥିଯୋଗୁ ରୋଗୀ, ସେମାନଙ୍କ ସମ୍ପର୍କୀୟ ଓ ସାଧାରଣ ଲୋକେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଛନ୍ତି। ଶୌଚାଳୟ ସାମ୍ନାରେ ଡ୍ରେନ୍‌ କାମ ଯୋଗୁ ପାଖାପାଖି ଦେଢ ମାସ ହେଲା ଏଭଳି ପରିସ୍ଥିତି ସୃଷ୍ଟି ହୋଇଛି।

ବିକ୍ରି ହେଲା କାର୍ଗିଲ ଇଣ୍ଡିଆ

ବିକ୍ରି ହେଲା କାର୍ଗିଲ ଇଣ୍ଡିଆ

ପାରାଦୀପ,୧୩।୩(ସ୍ବ.ପ୍ର.) ୧୯୯୬-୯୭ରୁ ପାରାଦୀପରେ ଥିବା ଖାଇବାତେଲ କାରଖାନା କାର୍ଗିଲ ଇଣ୍ଡିଆ ବର୍ତ୍ତମାନ ବିକ୍ରି ହୋଇଯାଇଥିବା ସୂଚନା ମିଳିଛି। ଏହି କାରଖାନାକୁ ଆଦାନୀ ଗ୍ରୁପ୍‌ ପ୍ରାୟ ୧୦୦ କୋଟି ଟଙ୍କାରେ କିଣିଛି। ଗତ ସପ୍ତାହେ ହେଲା ଏହାର ହସ୍ତାନ୍ତର ପ୍ରକ୍ରିୟା ଚାଲିଥିବା ଜଣାପଡିଛି। ଆଉ ମାତ୍ର ୪ଦିନ ପରେ ପୂର୍ଣ୍ଣମାତ୍ରାରେ କାରକାଖାନା ହସ୍ତାନ୍ତର ହୋଇଯିବ। ଏହି କାରଖାନାର ନୂତନ ନାମ ଆଦାନୀ ଓ୍ବିଲ୍‌ମାର ରହିବ ବୋଲି ମଧ୍ୟ ସୂଚନା ମିଳିଛି। କାରଗିଲ ଯେଭଳି ଖାଇବା ତେଲ ଉତ୍ପାଦନ କରୁଥିଲା, ଆଦାନୀ ମଧ୍ୟ ସେଭଳି ଉତ୍ପାଦନ ଜାରି ରଖିବ। ଏବେ ସେହି କାରଖାନାରେ ଶ୍ରମିକ ଦେବା ପାଇଁ କେତେକ ଶ୍ରମିକ ସଂଘ ଓ ରାଜନୈତିକ ଦଳ ମଧ୍ୟରେ ଅଘୋଷିତ ପ୍ରତିଯୋଗିତା ଆରମ୍ଭ ହୋଇଯାଇଛି। ଏହା ବ୍ୟତିରେକ କାରଗିଲରେ କାମ କରୁଥିବା ୧୫୨ ଜଣ ପୁରୁଣା ଶ୍ରମିକ ପୁଣି କାମ କରିବେ ବୋଲି ଆଗୁଆ ପଦକ୍ଷେପ ନେଲେଣି।

ବାଲିଆରେ ହାଡ଼ଫୁଟି ଆତଙ୍କ

ଡେରାବିଶ, ୧୩।୩ (ସ୍ବ.ପ୍ର.) ଡେରାବିଶ ବ୍ଲକ ବାଲିଆ ପଞ୍ଚାୟତ ବାଲିଆ ଗୁଡିଆସାହି ଗ୍ରାମରେ ଗତ ୧୫ ଦିନ ହେବ ହାଡଫୁଟି ଆତଙ୍କ ଦେଖାଦେଇଛି। ଗ୍ରାମର ପ୍ରାୟ ୨୦ରୁ ଊର୍ଦ୍ଧ୍ୱ ପରିବାରର ଏହି ରୋଗରେ ଆକ୍ରାନ୍ତ ହୋଇଛନ୍ତି। ଗୋଟିଏ ଗୋଟିଏ ପରିବାରର ଏକାଧିକ ସଦସ୍ୟ ହାଡଫୁଟିରେ ଆକ୍ରାନ୍ତ ହୋଇଥିବା ଦେଖଯାଉଛି।

ବିଧାୟକଙ୍କ ଫଳକ ଭାଙ୍ଗିଲେ ଦୁର୍ବୃତ୍ତ

ବିଧାୟକଙ୍କ ଫଳକ ଭାଙ୍ଗିଲେ ଦୁର୍ବୃତ୍ତ

ରାଜନଗର,୧୩।୩(ଡି.ଏନ୍‌.ଏ.) ରାଜନଗରରେ ଗତକିଛି ଦିନ ହେବ ଫଳକ ଉଦ୍‌ଘାଟନକୁ ନେଇ ରାଜନୀତି ସରଗରମ ହୋଇଛି। ରାଜନଗର ବିଧାୟକଙ୍କ ଦ୍ୱାରା ସୋମବାର ଉଦ୍‌ଘାଟନ କରାଯାଇଥିବା ଶିଳାନ୍ୟାସକୁ କେତେଜଣ ଦୁର୍ବୃତ୍ତ ବିଳମ୍ବିତ ରାତିରେ ଭାଙ୍ଗି ଦେଇଛନ୍ତି।

ବାର୍ଷିକ ସୁଧ ଗଣୁଛି ୩୫୦କୋଟି

ବାର୍ଷିକ ସୁଧ ଗଣୁଛି ୩୫୦କୋଟି

ଯାଜପୁର ଅଫିସ/କଳିଙ୍ଗନଗର (ଡି.ଏନ.ଏ.),୧୩।୩ କଳିଙ୍ଗନଗର ଶିଳ୍ପାଞ୍ଚଳରେ ଗଢ଼ି ଉଠିଛି ଅନେକ ଶିଳ୍ପାଞ୍ଚଳ। ଏପରି କି ଟାଟା ଷ୍ଟିଲ ଉପତ୍।ଦନକ୍ଷମ ହୋଇ ସମ୍ପ୍ରସାରଣ ପଥରେ ରହିଛି। ଜିନ୍ଦଲ ଷ୍ଟେନ୍‌ଲେସ ଷ୍ଟିଲ୍‌, ମଇଥାନ, ବିଆର୍‌ପିଏଲ ନିଜର ସ୍ଥିତିକୁ ନେଇ ଜୁଝୁଥିବାବେଳେ ମେସ୍କୋ ପ୍ରାୟ ଦେଢ ବର୍ଷ ହେବ ବନ୍ଦ ପଡ଼ିଛି। ରାଷ୍ଟ୍ରାୟତ୍ତ ଉଦ୍ୟୋଗ ନୀଳାଚଳ ଋଣ ଭାରରୁ ମୁକୁଳି ନ ପାରି ରୁଗ୍‌ଣ ଅବସ୍ଥାରେ ଗତି କରୁଛି । ଓଡିଶା ଖଣି ନିଗମ, ଇପିକଲ ଓ କେନ୍ଦ୍ର ସରକାରଙ୍କ ବାଣିଜି୍ୟକ ଅନୁଷ୍ଠାନ ଏମ୍‌ଏମ୍‌ଟିସି(ମିନେରାଲ୍ସ ଆଣ୍ଡ ମେଟାଲ ଟ୍ରେଡିଂ କର୍ପୋରେଶନ) ଏହି କମ୍ପାନୀର ପରିଚାଳନାରେ ସାମିଲ ହୋଇଛନ୍ତି । ଇତିମଧ୍ୟରେ ନୀଳାଚଳ ନିଜ ଅଂଶୀଦାର କମ୍ପାନୀ ସମେତ ବ୍ୟାଙ୍କ ନିକଟରେ ପ୍ରାୟ ୩,୫୦୦ କୋଟି ଟଙ୍କା ଋଣ ଭାରରେ ପଡି ଦୁର୍ବଳ ଅବସ୍ଥାରେ ରହିଛି। ବାର୍ଷିକ ୩୮୦କୋଟି ଟଙ୍କା କେବଳ ସୁଧ ବାବଦକୁ କମ୍ପାନୀ ଜମା କରୁଛି। ଅନ୍ୟପକ୍ଷେ ଋଣ ପରିଷୋଧ ନିମନ୍ତେ ଆରବିଆଇ ଏଥିପ୍ରତି ଦୃଷ୍ଟି ଦେଉ ନ ଥିବାରୁ ଋଣ ପରିମାଣ ମଧ୍ୟ ବୃଦ୍ଧି ହେବାରେ ଲାଗିଛି। ରାଜ୍ୟ ସରକାର ମଧ୍ୟ ଏହି କମ୍ପାନୀଠାରୁ ମଧ୍ୟ ମୁହଁ ଫେରାଇ ଦେଇଛନ୍ତି। ଫଳରେ ପରୋକ୍ଷ ଓ ପ୍ରତ୍ୟେକ୍ଷ ଭାବେ ଲାଭବାନ ହେଉଥିବା ପ୍ରାୟ ୫ ହଜାର ଲୋକଙ୍କ ଦାନାପାଣି ବୁଡିବାରେ ଲାଗିଛି । ଏପରି କି ନୀଳାଚଳ ଇସ୍ପାତ ନିଗମଠାରେ ବିଭିନ୍ନ ଯୋଗାଣ କମ୍ପାନୀଙ୍କ କୋଟି କୋଟି ଟଙ୍କା ବକୈୟା ପଡିଥିବାରୁ ସେମାନେ ଏନ୍‌ସିଏଲ୍‌ଟି (ନ୍ୟାଶନାଲ କମ୍ପାନୀ ଲ’ ଟ୍ରିବ୍ୟୁନାଲ) ପାଖରେ ଦ୍ୱାରସ୍ଥ ମଧ୍ୟ ହୋଇଛନ୍ତି। ଏଭଳି ସ୍ଥିତିରେ ଆରବିଆଇ ଆଇନକୁ ଊଲ୍ଲଂଘନ କରି ଏସ୍‌ବିଆଇ ବ୍ୟାଙ୍କ କମ୍ପାନୀର ଅଚଳ ପରି ସମ୍ପତ୍ତି(ଏନ୍‌ପିଏ) ଘୋଷଣା କରିବା ପରିବର୍ତ୍ତେ ସୁଧ ଆଦାୟ ନିମନ୍ତେ ନୂଆ ଋଣ ପ୍ରଦାନ କରୁଛି। ଆଉ ମଧ୍ୟ ଏସମ୍ପର୍କରେ ଆର୍‌ବିଆଇ ଜାଣି ସୁଦ୍ଧା ଚୂପ ରହିବା ଘଟଣା ଭୂଷଣ, ଏସାର ଏବଂ ନୀରବ ମୋଦି ଭଳି ଆଉ ଏକ ମହାଠକେଇକୁ ପ୍ରୋତ୍ସାହନ ଦେବା ଭଳି ପରିସ୍ଥିତି ସୃଷ୍ଟି କରୁଥିବା ମନେ ହେଉଛି।

ସୋସିଆଲ୍‌ ମିଡିଆରେ ଚର୍ଚ୍ଚା: ବିଜେଡିକୁ ଯିବେ ରାଜନଗର ବିଧାୟକ

ରାଜନଗର,୧୩।୩(ଡି.ଏନ୍‌.ଏ.)- ରାଜନଗର ବିଧାୟକ ଅଂଶୁମାନ ମହାନ୍ତି ଓ ଜିଲାର ବରିଷ୍ଠ କଂଗ୍ରେସ ନେତା ଗଣେଶ୍ୱର ବେହେରା କଂଗ୍ରେସର ହାତ ଛାଡି ବିଜେଡିରେ ସାମିଲ ହୋଇପାରନ୍ତି ବୋଲି ସୋସିଆଲ ମିଡିଆରେ ଚର୍ଚ୍ଚା ହେଉଛନ୍ତି। ଏନେଇ ରାଜନଗରରେ ରାଜନୈତିକ ଉଷ୍ମତା ବୃଦ୍ଧି ପାଇବାରେ ଲାଗିଛି।

ଜିଲା ବିପର୍ଯ୍ୟୟ ପରିଚାଳନା କମିଟି ବୈଠକ

ଜିଲା ବିପର୍ଯ୍ୟୟ ପରିଚାଳନା କମିଟି ବୈଠକ

ଯାଜପୁର ଅଫିସ,୧୩। ୩ ଜିଲା ପ୍ରଶାସନ ପକ୍ଷରୁ ମଙ୍ଗଳବାର ଜିଲାପାଳଙ୍କ ସମ୍ମିଳନୀ କକ୍ଷରେ ଜିଲା ବିପର୍ଯ୍ୟୟ ପରିଚାଳନା କମିଟି କର୍ତ୍ତୃପକ୍ଷଙ୍କ ରୌଦ୍ରତାପ, ଅଂଶୁଘାତ, ଜଳ ଓ ବିଜୁଳି କଷ୍ଟ ନିବାରଣ ନିମନ୍ତେ ପୂର୍ବ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଛି। ବିଭିନ୍ନ ଜନଗହଳି ସ୍ଥାନଗୁଡ଼ିକରେ ବିଗତ ବର୍ଷଭଳି ଜଳଛତ୍ର ଖୋଲିବା, ଚଳିତ ବର୍ଷ ମହାମତ୍ା ଗାନ୍ଧୀ ଜାତୀୟ ନିଶ୍ଚିତ କର୍ମ ନିଯୁକ୍ତ ଯୋଜନାରେ ଏହି ଜଳଛତ୍ରଗୁଡିକୁ ପରିଚାଳନା ହେବାକୁ ଥିବାରୁ ସେଥିପାଇଁ ଉପଯୁକ୍ତ ପଦକ୍ଷେପ ନେବା, ଜିଲା ଜରୁରୀ ବିଭାଗ ତରଫରୁ ୨୪ଘଣ୍ଟିଆ ନିୟନ୍ତ୍ରଣ କକ୍ଷ କାର୍ଯ୍ୟ କରିବା, ବ୍ଲକ, ତହସିଲ ଓ ଅନ୍ୟାନ୍ୟ ଲାଇନ୍‌ ଡିପାର୍ଟମେଣ୍ଟଗୁଡ଼ିକ ଅନୁରୂପ ଭାବେ ନିୟନ୍ତ୍ରଣ କକ୍ଷ ଖୋଲିବାକୁ ବୈଠକରେ ନିଷ୍ପତ୍ତି ହୋଇଛି ।

ନାବାଳିକାଙ୍କୁ ଉଲଗ୍ନ କରି ଫଟୋ ଉଠା ଅଭିଯୋଗରେ ୭ ଗିରଫ

ମହାକାଳପଡା,୧୩।୩(ଡି.ଏନ୍‌.ଏ.)- ଜଣେ ନାବାଳିକାଙ୍କୁ ଉଲଗ୍ନ କରି ଫଟୋ ଉଠାଇବା ଅଭିଯୋଗରେ ଜମ୍ବୁ ମେରାଇନ୍‌ ଥାନା ପୋଲିସ ମଙ୍ଗଳବାର ୭ ଜଣ ଅଭିଯୁକ୍ତଙ୍କୁ ଗିରଫକରି କୋର୍ଟ ଚାଲାଣ କରିଛି। କେନ୍ଦ୍ରାପଡା ଜିଲା ମହାକାଳପଡା ବ୍ଲକ ଅନ୍ତର୍ଗତ ରାମନଗର ପଞ୍ଚାୟତରେ ଏଭଳି ଅଭାବନୀୟ ଘଟଣା ଘଟିଛି।

ଖଣି ଅଞ୍ଚଳରେ ହେବ ପାନୀୟ ଜଳ ମେଗା ପ୍ରକଳ୍ପ

ଖଣି ଅଞ୍ଚଳରେ ହେବ ପାନୀୟ ଜଳ ମେଗା ପ୍ରକଳ୍ପ

କାଳିଆପଣି ୧୩।୩(ଡିଏନ୍‌ଏ)- ଖଣି ଅଞ୍ଚଳରେ ଜଳ ସଙ୍କଟ ଦୂର ହେବ । ଏଥିପାଇଁ ଖୁବ୍‌ଶୀଘ୍ର ୧୨୫କୋଟି ଟଙ୍କା ବ୍ୟୟ ବରାଦରେ ଏକ ମେଗାଜଳ ପ୍ରକଳ୍ପ ନିର୍ମାଣ କରାଯିବ ବୋଲି ମଙ୍ଗଳବାର ସୁକିନ୍ଦା ବିଧାୟକ ପ୍ରୀତିରଞ୍ଜନ ଘଡ଼େଇ ପ୍ରକାଶ କରିଛନ୍ତି। ଗ୍ରୀଷ୍ମ ପ୍ରବାହ ବଢୁଥିବା ବେଳେ ଖଣି ସଂଲଗ୍ନ ଗ୍ରାମ ଗୁଡ଼ିକରେ ଜଳସ୍ତର ନିମ୍ନଗାମୀ ହେବାରେ ଲାଗିଛି। ଫଳରେ ଜଳ ସଙ୍କଟ ଦେଖାଯିବାର ବହୁ ସମ୍ଭାବନା ସୃଷ୍ଟି କରିଛି। ଆଉ ଏହାକୁ ମୁକାବିଲା କରିବାକୁ ସୁକିନ୍ଦା ବିଧାୟକ ଘଡ଼େଇଙ୍କ ଅଧ୍ୟକ୍ଷତାରେ ଖଣି ନିଗମ ଅତିଥିଶାଳାରେ ଏକ ବୈଠକ ଅନୁଷ୍ଠିତ ହୋଇଥିଲା। କେନ୍ଦ୍ର ସରକାରଙ୍କ ନିର୍ଦ୍ଦେଶକ୍ରମେ ରାଜ୍ୟ ସରକାର ଖଣିଜ ଓ କାରଖାନା ରହିଥିବା ଅଞ୍ଚଳରେ ଡିଏମ୍‌ଏଫ୍‌ ଫଣ୍ଡ ଗଠନ କରିଛନ୍ତି।

ତେଜରାତି ଦୋକାନରୁ ଚୋରି

ତେଜରାତି ଦୋକାନରୁ ଚୋରି

ନିଶ୍ଚିନ୍ତକୋଇଲି,୧୩।୩(ସ୍ବ.ପ୍ର.): କଟକ ଜିଲା ନିଶ୍ଚିନ୍ତକୋଇଲି ବ୍ଲକ ନେମାଳ ଥାନା ଅନ୍ତର୍ଗତ ନଗସପୁର ବଜାରରେ ଥିବା ଏକ ତେଜରାତି ଦୋକାନରୁ ସୋମବାର ବିଳମ୍ବିତ ରାତିରେ ଚୋରି ହୋଇଛି। ଚୋରମାନେ ଆଜବେଷ୍ଟସ୍‌ ଭାଙ୍ଗି ଦୋକାନରେ ଥିବା ଟିଭି, ନଗଦ ୮୦ ହଜାର ଟଙ୍କା ଏବଂ ବହୁ ସାମଗ୍ରୀ ଚୋରେଇ ନେଇଛନ୍ତି।

ସ୍ଥାୟୀ ବିଡିଓ ନିଯୁକ୍ତି ଦାବିରେ ଆମରଣ ଅନଶନ

ସ୍ଥାୟୀ ବିଡିଓ ନିଯୁକ୍ତି ଦାବିରେ ଆମରଣ ଅନଶନ

ଯାଜପୁର ଅଫିସ,୧୩।୩: ଯାଜପୁର ଜିଲା ବରୀ ବ୍ଲକରେ ସ୍ଥାୟୀ ବିଡିଓ ନିଯୁକ୍ତି ଦାବିରେ ମଙ୍ଗଳବାର ଲୋକ ପ୍ରତିନିଧିମାନେ ଆମରଣ ଅନଶନ ଆରମ୍ଭ କରିଛନ୍ତି। ସେମାନେ ପଞ୍ଚାୟତ ସମିତି କାର୍ଯ୍ୟାଳୟ ସମ୍ମୁଖରେ ଅନଶନରେ ବସିଛନ୍ତି।

ତେଲ କଡ଼େଇରୁ ନିଆଁ ଲାଗି ୨ ବଖରା ଭସ୍ମ

ତେଲ କଡ଼େଇରୁ ନିଆଁ ଲାଗି ୨ ବଖରା ଭସ୍ମ

ଓଡ଼ଗାଁ, ୧୩।୩(ସ୍ବ.ପ୍ର.): ରୋଷେଇ କରିବା ବେଳେ ମଙ୍ଗଳବାର ସକାଳ ସାଢେ ୮ ଟାରେ ତେଲ କଡ଼େଇରୁ ନିଆଁ ଲାଗି ଓଡ଼ଗାଁ ତହସିଲ ପାଇକ ବାଙ୍କତରା ଗ୍ରାମର ଦୁଇ ବଖରା ଜଳିଯାଇଛି। ସୁରେନ୍ଦ୍ର ନାୟକଙ୍କ ଘରେ ରୋଷେଇ ଚାଲିଥିବା ବେଳେ ଅଗ୍ନିକାଣ୍ଡ ଘଟିଥିଲା। ଏଥିରେ ଘରର ସମସ୍ତ ଆସବାବପତ୍ର ସହ ଜଳିଯାଇଛି। ସ୍ଥାନୀୟ ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି।

୬ ଲକ୍ଷରୁ ଊର୍ଦ୍ଧ୍ୱ ଅଲିଭ୍‌ ରିଡ୍‌ଲେଙ୍କ ସମୂହ ଅଣ୍ଡାଦାନ ଜାରି

ରାଜନଗର,୧୨।୩(ଡି.ଏନ୍‌.ଏ.) ରାଜନଗର ବ୍ଲକ ଗହୀରମଥା ସାମୁଦ୍ରିକ ଅଭୟାରଣ୍ୟ ଅନ୍ତର୍ଗତ ବାବୁବାଲି ଦ୍ୱୀପରେ ଅଲିଭ୍‌ ରିଡ୍‌ଲେଙ୍କ ସମୂହ ଅଣ୍ଡାଦାନ ପକ୍ରିୟା ଜାରି ରହିଛି । ମାର୍ଚ୍ଚ ୫ରୁ ଆରମ୍ଭ ହୋଇଥିବା ଏହି ସମୂହ ଅଣ୍ଡାଦାନ ପ୍ରକ୍ରିୟାରେ ରବିବାର ରାତି ସୁଦ୍ଧା ୬ଲକ୍ଷ ୬୦ ହଜାର ୩୨୦ ମା’ କଇଁଛ ସାମିଲ ହୋଇଛନ୍ତି। ଫଳରେ ଏହା ୧୮ ବର୍ଷର ରେକର୍ଡ ସହ ସମକ୍ଷକ ହୋଇଛି। ଏହି ପ୍ରକ୍ରିୟା ଆଉ ୨ଦିନ ଚାଲିବ ବୋଲି ବନବିଭାଗ ସୂତ୍ରରୁ ଜଣାପଡିଛି।

ଜଟିଳ ରୂପ ନେଲାଣି ରକ୍ତାଭାବ

ଜଗତ୍‌ସିଂହପୁର ଅଫିସ,୧୨।୩ ଜଗତ୍‌ସିଂହପୁର ଜିଲା ମୁଖ୍ୟ ଚିକିତ୍ସାଳୟ ରକ୍ତ ଭଣ୍ଡାରରେ ରକ୍ତ ଅଭାବ ପରିଲକ୍ଷିତ ହୋଇଛି। ସୋମବାର ସନ୍ଧ୍ୟା ସୁଦ୍ଧା ଏହି ରକ୍ତ ଭଣ୍ଡାରରେ ମାତ୍ର ୧୧ ୟୁନିଟ୍‌ ରକ୍ତ ରହିଛି, ଯାହାକି ଚିନ୍ତାର ବିଷୟ। କାରଣ ଏହି ଭଣ୍ଡାରରେ ବିଭିନ୍ନ ଗ୍ରୁପ୍‌ର ଅନ୍ତତଃ ୨୦ ୟୁନଟ୍‌ (ନେଗେଟିଭ୍‌ ଗ୍ରୁପ୍‌ ଛାଡି) ରକ୍ତ ସଦାସର୍ବଦା ମହଜୁତ ରହିବା କଥା। ଦୁର୍ଘଟଣା କିମ୍ବା ଅନ୍ୟ କୌଣସି ଜରୁରୀ ଚିକିତ୍ସା ଦରକାର ହେଲେ ଯେପରି ରକ୍ତ ଅଭାବ ଅନୁଭୂତ ନ ହୁଏ, ସେଥିପାଇଁ ଆଗୁଆ ପଦକ୍ଷେପ ନିଆଯିବା ଉଚିତ। କିନ୍ତୁ ବ୍ଲଡ ବ୍ୟାଙ୍କ ଅଧିକାରୀଙ୍କ ଦୂରଦୃଷ୍ଟି ଅଭାବ ଓ ଅନ୍ୟାନ୍ୟ କାରଣରୁ ଏବେଠାରୁ ରକ୍ତ ଅଭାବ ଦେଖାଦେଲାଣି। ଆଗକୁ ପରିସ୍ଥିତି ଅଧିକ ଜଟିଳ ହେବା ଆଶଙ୍କା ରହିଛି। ଗ୍ରୀଷ୍ମ ଯୋଗୁ ରକ୍ତଦାନ ପ୍ରଭାବିତ ହୋଇଛି। ପୂର୍ବପରି ଆଉ ରକ୍ତଦାନ କେନ୍ଦ୍ର କରାଯାଉ ନ ଥିବାବେଳେ ସ୍ବେଚ୍ଛାକୃତ ରକ୍ତଦାନ ପାଇଁ କେହି ସେଭଳି ଆଗଭର ହେଉନାହାନ୍ତି। ଏଥିପାଇଁ ରକ୍ତ ସଂଗ୍ରହରେ ଗୁରୁତର ବାଧା ସୃଷ୍ଟି ହୋଇଛି। ସବୁଠାରୁ ବଡ଼ କଥା ହେଲା ଏବେ ପ୍ରତ୍ୟହ ୮ରୁ ୧୦ ଜଣ ରୋଗୀଙ୍କ ପାଇଁ ରକ୍ତ ଆବଶ୍ୟକ ହେଉଛି, ଯାହାକି ମିଳୁନାହିଁ। ବିଶେଷକରି ନିୟମିତ ବ୍ୟବଧାନରେ ଥାଲାସେମିଆ, ଆନେମିଆ ରୋଗୀ ରକ୍ତ ଆବଶ୍ୟକ କରୁଥିବାବେଳେ ନ ମିଳିବା ଚିନ୍ତାର କାରଣ ହୋଇଛି। ସେମାନେ ରକ୍ତ ନ ପାଇ ଅଧିକ ଅସୁସ୍ଥ ହୋଇପଡୁଛନ୍ତି।

ଅଟୋ ଚାଳକଙ୍କ ଗଳା କାଟି ହତ୍ୟା

ପଟ୍ଟାମୁଣ୍ଡାଇ,୧୨।୩(ସ୍ବ.ପ୍ର.) ପଟ୍ଟାମୁଣ୍ଡାଇ ଥାନା ଅନ୍ତର୍ଗତ ଡାମରପୁର ଗ୍ରାମର ଅଟୋ ଚାଳକ ରଶ୍ମିକାନ୍ତ ଦାସ (୨୫)ଙ୍କୁ ରବିବାର ବିଳମ୍ବିତ ରାତିରେ ସେହି ଗ୍ରାମର ୩ ଜଣ ଯୁବକ ଧାରୁଆ ବ୍ଲେଡରେ ଗଳା କାଟି ହତ୍ୟା କରିଛନ୍ତି । ଏହି ଘଟଣାରେ ଉକ୍ତ ଗ୍ରାମର ୨ ଜଣ ଯୁବକଙ୍କୁ ପୋଲିସ ଥାନାରେ ଅଟକ ରଖି ପଚରାଉଚୁରା କରୁଛି ।

ଅଶ୍ଳୀଳ ଭିଡିଓ ଭାଇରାଲ୍‌ ଘଟଣା: ୨ ଅଭିଯୁକ୍ତ ଛାତ୍ର କୋର୍ଟ ଚାଲାଣ

ଡେରାବିଶ, ୧୨।୩ (ସ୍ବ.ପ୍ର.) ଡେରାବିଶସ୍ଥିତ ଏକ ପଲିଟେକ୍‌ନିକ୍‌ କଲେଜର ଜଣେ ନାବାଳିକା ଛାତ୍ରୀଙ୍କ ଅଶ୍ଳିଳ ଭିଡିଓ ଭାଇରାଲ ହେବା ଘଟଣାରେ ପୋଲିସ ୨ ଜଣ ଛାତ୍ରଙ୍କୁ ସୋମବାର କୋର୍ଟ ଚାଲାଣ କରିଛି। ଅଭିଯୁକ୍ତ ଦ୍ୱୟ ହେଲେ କଟକ ଜିଲା ଆଠଗଡ଼ ଥାନା ଅଞ୍ଚଳର ସୌମ୍ୟରଞ୍ଜନ ବେହେରା (୨୦) ଓ ନିକିରେଇ ଥାନା ଅଞ୍ଚଳର ତାପସ କୁମାର ରଣା (୧୯)। ସୌମ୍ୟ ଭୁବନେଶ୍ୱରସ୍ଥିତ ଏକ ଘରୋଇ ଇଂଜିନିୟରିଂ କଲେଜରେ ତୃତୀୟ ବର୍ଷର ଛାତ୍ର ହୋଇଥିବା ବେଳେ ତାପସ ଡେରାବିଶ ଥାନା ଅଞ୍ଚଳର ଏକ ପଲିଟେକ୍‌ନିକ୍‌ କଲେଜରେ ପାଠ ପଢ଼ନ୍ତି। ଅପରପକ୍ଷେ ପୋଲିସ ପକ୍ଷରୁ ସମ୍ପୃକ୍ତା ଛାତ୍ରୀଙ୍କ ଡାକ୍ତରୀ ପରୀକ୍ଷା କରାଯିବା ସହ ତାଙ୍କ ବୟାନ ରେକର୍ଡ କରାଯାଇଛି।

କ୍ଷତିପୂରଣ ମିଳିବାରେ ଅଡ଼ୁଆ

କ୍ଷତିପୂରଣ ମିଳିବାରେ ଅଡ଼ୁଆ

ପାରାଦୀପ,୧୨।୩(ସ୍ବ.ପ୍ର.) ‘ଅପରାଧ ପାଇଁ ଗୋଟିଏ ବାଟ, ସେଥିରୁ ମୁକୁଳିବା ପାଇଁ ଶହେ ବାଟ’ ବୋଲି କଥିତ ଅଛି। ସେହି ନ୍ୟାୟରେ ଏବେ ବ୍ୟବସାୟୀକ ଭାରିଯାନ ବୀମାକ୍ଷେତ୍ରରେ ଥିବା ବର୍ଗୀକରଣ ବ୍ୟବସ୍ଥା ଚାଲିଛି, ଯାହାର ଫାଇଦା ନେଉଛନ୍ତି ଅସାଧୁ ଲୋକମାନେ। ଏହାଦ୍ୱାରା ଗାଡ଼ିମାଲିକମାନେ ବୀମାରାଶି କ୍ଷେତ୍ରରେ ଯଦିଓ କିଛିଟା ଲାଭ ପାଉଛନ୍ତି, କିନ୍ତୁ ସେହି ଗାଡି ଦୁର୍ଘଟଣାରେ ମୃତାହତ ଲୋକ କ୍ଷତିପୂରଣ ଅର୍ଥ ପାଇବାରେ ବଳି ପଡୁଛନ୍ତି। କୋର୍ଟର ବିଚାର ବ୍ୟବସ୍ଥାରେ ବୀମା କମ୍ପାନୀ ଓକିଲମାନେ ଛୋଟମୋଟ କାରଣ ଦର୍ଶାଇ ବୀମା ଅର୍ଥକୁ ସଙ୍କୁଚିତ କରିଦେଉଛନ୍ତି। ଏମିତି ଏକାଧିକ ଘଟଣା ବିଭିନ୍ନ ସ୍ଥାନରେ ଦେଖିବାକୁ ମିଳୁଛି।

କଣ୍ଟିଲୋ ଅଶ୍ଳୀଳ ଭିଡିଓ ଭାଇରାଲ୍‌ ଘଟଣା: ୫ ଅଭିଯୁକ୍ତ ଗିରଫ

ନୟାଗଡ଼ ଅଫିସ,୧୨।୩ ନୟାଗଡ଼ ଜିଲା କଣ୍ଟିଲୋ ଅଞ୍ଚଳର ଛାତ୍ରୀଛାତ୍ରଙ୍କ ଅଶ୍ଳୀଳ ଭିଡିଓ ଭାଇରାଲ୍‌ ଘଟଣାରେ ମୁଖ୍ୟ ଅଭିଯୁକ୍ତଙ୍କ ସମେତ ୫ ଜଣଙ୍କୁ ଗିରଫ କରାଯାଇଛି। ଏ ନେଇ ସୋମବାର ଏକ ଖବରଦାତା ସମ୍ମିଳନୀରେ ଏସ୍‌ପି ଆଶିଷ କୁମାର ସିଂ ସୂଚନା ଦେଇଛନ୍ତି। ଭାଇରାଲ୍‌ ହୋଇଥିବା ଭିଡିଓର ମୁଖ୍ୟ ଅଭିଯୁକ୍ତ ପବିତ୍ର କୁମାର ନାୟକ (୨୨) ଓ ଏହି ଭିଡିଓ ଭାଇରାଲ୍‌ କରିବାରେ ସହଯୋଗ କରିଥିବା ଅନ୍ୟ ୪ ଜଣ ଲିପୁନ ନାୟକ(୧୯), ରବି ରାଉତ(୨୮), ତପନ କୁମାର ଦାସ (୨୨) ଓ କାଳିଆ ବେହେରା (୧୯)ଙ୍କୁ ଗିରଫ କରାଯାଇ କୋର୍ଟ ଚାଲାଣ କରାଯାଇଛି। ସମସ୍ତ ଅଭିଯୁକ୍ତଙ୍କ ଘର ଖଣ୍ଡପଡ଼ା ବ୍ଲକ ସିଧାମୂଳା ଗ୍ରାମରେ ହୋଇଥିବା ବେଳେ ସେମାନଙ୍କ ମଧ୍ୟରୁ ରବି ରାଉତ ଜଣେ ଭିନ୍ନକ୍ଷମ ଯୁବକ। ପୋଲିସ ୫ ଜଣଙ୍କ୍‌ଠାରୁ ୫ଟି ମୋବାଇଲ୍‌ ଜବତ କରିଛି। ସେହିଭଳି ଏହି ଭିଡିଓ ଭାଇରାଲ୍‌ ଘଟଣାରେ ସମୀର ନାମକ ଜଣେ ଯୁବକ ଫେରାର୍‌ ଥିବା ପୋଲିସ ସୂଚନା ଦେଇଛି।

ଧରୁଛି ଉପର ମହଲା, ଖସାଉଛି ଯୋଗାଣ ବିଭାଗ

ଯାଜପୁର ଅଫିସ,୧୨।୩ ଚଳିତ ମାସ ପ୍ରଥମ ସପ୍ତାହରେ ଯାଜପୁର ଜିଲାର ଷଠିପୁର ଅଞ୍ଚଳରୁ କିରୋସିନ ଭର୍ତ୍ତି ଜାର ଜବତ ଘଟଣା ପରେ ଚୋରା କାରବାରରେ ଜିଲା ଯୋଗାଣ ବିଭାଗର ସିଧାସଳଖ ସମ୍ପର୍କର ପର୍ଦ୍ଦାଫାଶ ହୋଇଛି। ଏହାବାଦ ନିକଟ ଅତୀତରେ ଯାଜପୁର ଜିଲା ବଡ଼ଚଣା ବ୍ଲକ ଭୁଷଣ୍ଡପୁରର ଏକ ସରକାରୀ ଖୁଚୁରା ବିକ୍ରୟ କେନ୍ଦ୍ରରେ ନିମ୍ନମାନର ଚାଉଳ ବଣ୍ଟନ ଏବଂ ଭଦ୍ରକ ଜିଲାରୁ ପାଣିକୋଇଲି ଗୋଦାମକୁ ଆସିଥିବା ବ୍ୟବହାର ଅନୁପଯୋଗୀ ବିଆରଏଲ (ବିଲୋ ରିଜେକ୍ସନ ଲିମିଟେଡ) ଚାଉଳ ସଂକ୍ରାନ୍ତରେ ଉପର ମହଲାର ପର୍ଦ୍ଦାଫାସ ପରେ ଯୋଗାଣ ବିଭାଗର ସାଧୁତା ନେଇ ପ୍ରଶ୍ନବାଚୀ ସୃଷ୍ଟି କରିଛି। ଏଭଳି ଅନିୟମିତତାରେ ସମ୍ପୃକ୍ତ ଅଧିକାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇ ରିପୋର୍ଟ ଦେବାକୁ ଉପର ମହଲସ୍ତରରେ ନିର୍ଦ୍ଦେଶ ହେଉଥିଲେ ହେଁ ଜିଲା ଯୋଗାଣ ବିଭାଗ ଅତି ଚାଲାକି ଭାବେ ଖସାଇ ଚାଲିଛି।

ମିଳିଲା ପୋଖରୀରୁ ଉଦ୍ଧାର ମୃତଦେହର ପରିଚୟ

କେନ୍ଦ୍ରାପଡ଼ା ଅଫିସ,୧୨।୩: କେନ୍ଦ୍ରାପଡ଼ା ସଦର ଥାନା ଅନ୍ତର୍ଗତ ଗୋପ ଛକ ନିକଟସ୍ଥ ଏକ ପରିତ୍ୟକ୍ତ ପୋଖରୀରୁ ରବିବାର ସନ୍ଧ୍ୟାରେ ଉଦ୍ଧାର କରାଯାଇଥିବା ମୃତଦେହ ସୋମବାର ଚିହ୍ନଟ ହୋଇଛି। ମୃତକ ହେଲେ କର୍ନାଟକ ରାଜ୍ୟର ବିଜାପୁର ଜିଲା ସିନ୍ଦ୍ରମା ଗ୍ରାମର ଶୁଭପ୍ପା।