ଖେଳ

ଜାତୀୟ ପାରା ଗେମ୍ସପାଇଁ ଓଡ଼ିଶା ଖେଳାଳି ମନୋନୟନ

ଜାତୀୟ ପାରା ଗେମ୍ସପାଇଁ ଓଡ଼ିଶା ଖେଳାଳି ମନୋନୟନ

ଭୁବନେଶ୍ୱର, ୧୧।୫(କ୍ରୀଡ଼ା ପ୍ରତିନିଧି)-ଖେଲୋ ଇଣ୍ଡିଆ ଅନ୍ତର୍ଗତ ପ୍ରଥମ ଜାତୀୟ ପାରା ଗେମ୍ସ ଜୁନ ୨୭ରୁ ଜୁଲାଇ ୭ ପର୍ଯ୍ୟନ୍ତ ବାଙ୍ଗାଲୋରସ୍ଥିତ କାନ୍ତିରଭା ଷ୍ଟାଡିୟମରେ ଅନୁଷ୍ଠିତ ହେବ। ଭାରତୀୟ କ୍ରୀଡ଼ା ପ୍ରାଧିକରଣ(ସାଇ)ର ଅନୁମୋଦନକ୍ରମେ ପାରାଅଲିମ୍ପିକ୍‌ କମିଟି ଅଫ୍‌ ଇଣ୍ଡିଆ ଆନୁକୂଲ୍ୟରେ ଏହି ପ୍ରତିଯୋଗିତାରେ ଭିନ୍ନକ୍ଷମ, ଦୃଷ୍ଟିହୀନ ଆଦି ବିଭାଗରେ ୧୦ଟି ଇଭେଣ୍ଟ ଆୟୋଜିତ ହେବ। ଏହି ୧୦ଟି ଇଭେଣ୍ଟ ହେଲା ପାରା ଆଥଲେଟିକ୍ସ, ପାରା ପାଓ୍ବାରଲିଫ୍ଟିଂ, ପାରା ସୁଇମିଂ, ପାରା ଶୁଟିଂ, ହୁଇଲଚେୟାର ଫେନ୍‌ସିଂ, ହୁଇଲଚେୟାର ବାସ୍କେଟବଲ, ପାରା ବ୍ୟାଡ୍‌ମିଣ୍ଟନ, ପାରା ଟେବୁଲ ଟେନିସ, ଦୃଷ୍ଟିହୀନ ଜୁଡୋ ଓ ଭିନ୍ନକ୍ଷମ ଚେସ୍‌। ଏଥିରେ ଭାଗ ନେବାପାଇଁ ପ୍ରତିଯୋଗୀଙ୍କ ବୟସ ମାର୍ଚ୍ଚ ୩୧ ତାରିଖସୁଦ୍ଧା ୧୬ରୁ ୪୦ ବର୍ଷ ମଧ୍ୟରେ ହୋଇଥିବା ଆବଶ୍ୟକ। ଉକ୍ତ ପ୍ରତିଯୋଗିତାରେ ଭାଗ ନେବାକୁ ଚାହୁଁଥିବା ରାଜ୍ୟ ପ୍ରତିଯୋଗୀମାନେ ଓଡ଼ିଶା ପାରାଅଲିମ୍ପିକ୍‌ ଆସୋସିଏଶନ ସମ୍ପାଦକ ବିଷ୍ଣୁଚରଣ ସାହୁଙ୍କ ସହିତ ଚଳିତମାସ ୨୦ ତାରିଖସୁଦ୍ଧା ଯୋଗାଯୋଗ କରିବାକୁ କୁହାଯାଇଛି।

ସ୍କୁଲ ଓପନ ଚେସ୍‌ ୧୫ରେ

ସ୍କୁଲ ଓପନ ଚେସ୍‌ ୧୫ରେ

ଭୁବନେଶ୍ୱର, ୧୧।୫(କ୍ରୀଡ଼ା ପ୍ରତିନିଧି)-କଳିଙ୍ଗ ନଗର ଡିଏଭି ପବ୍ଲିକ୍‌ ସ୍କୁଲ ଆନୁକୂଲ୍ୟରେ ୧୩ତମ ରାଜ୍ୟ ସ୍କୁଲ ଓପନ ଚେସ୍‌ ଚଳିତ ମାସ ୧୫ ତାରିଖରେ ଅନୁଷ୍ଠିତ ହେବ। ସ୍କୁଲ ପରିସରରେ ଆୟୋଜିତ ହେବାକୁଥିବା ଏହି ପ୍ରତିଯୋଗିତା ପାଇଁ ୪୦ ପୁରସ୍କାର ରଖା ଯାଇଛି। ପ୍ରଦର୍ଶନ ଭିତ୍ତିରେ ପ୍ରଥମ ୧୫ସ୍ଥାନ ବ୍ୟତୀତ ୮, ୧୦, ୧୨, ୧୪ ବର୍ଷରୁ କମ୍‌ ଏବଂ ବାଳିକା ବିଭାଗରେ ଶ୍ରେଷ୍ଠ ୫ ଜଣ ଲେଖାଏ ପ୍ରତିଯୋଗୀଙ୍କୁ ଟ୍ରଫି ଦିଆଯାଇ ସମ୍ମାନିତ କରାଯିବ। ଗତ ବର୍ଷ ଏହି ଟୁର୍ନାମେଣ୍ଟରେ ଜଗଦୀଶ ଘଡ଼େଇ ଚାମ୍ପିୟନ ଓ ଯଶସ୍ବିନୀ ଷଡ଼ଙ୍ଗୀ ରନର୍ସଅପ୍‌ ହୋଇଥିଲେ। ୭ ରାଉଣ୍ଡ ବିଶିଷ୍ଟ ଟୁର୍ନାମେଣ୍ଟ ପାଇଁ ୨୫୦ ଟଙ୍କାର ଏଣ୍ଟ୍ରି ଫି ରଖା ଯାଇଛି ବୋଲି ମୁଖ୍ୟ ଆର୍ବିଟର ଦେବାଶିଷ ପାଣିଗ୍ରାହୀଙ୍କ ସୂତ୍ରରୁ ପ୍ରକାଶ।

କ୍ରୀଡ଼ା ବିଭାଗକୁ ଭାରୋତ୍ତୋଳନ ସଂଘର କୃତଜ୍ଞତା

କ୍ରୀଡ଼ା ବିଭାଗକୁ ଭାରୋତ୍ତୋଳନ ସଂଘର କୃତଜ୍ଞତା

ନୂଆଦିଲ୍ଲୀ, ୧୧।୫(ପି.ଟି.)- ତିନିଜଣ ଭାରୋତ୍ତୋଳକଙ୍କୁ କ୍ରୀଡ଼ା ବିଭାଗର ଟାର୍ଗେଟ୍‌ ଅଲିମ୍ପିକ ପୋଡିୟମ ସ୍କିମ (ଟପ୍ସ)ରେ ସାମିଲ କରାଯାଇଥିବାରୁ ଭାରତୀୟ ଭାରୋତ୍ତୋଳନ ମହାସଂଘ ଖୁସି ଜାହିର କରିଛି। କ୍ରୀଡ଼ା ବିଭାଗର ଏହି ନିଷ୍ପତ୍ତି ଏସିଆନ ଗେମ୍ସ ଓ ଅନ୍ୟାନ୍ୟ ଅନ୍ତର୍ଜାତୀୟ ଇଭେଣ୍ଟ ପୂର୍ବରୁ ଆଥ୍‌ଲେଟ୍‌ଙ୍କୁ ଉତ୍ସାହିତ କରିବ ବୋଲି ମହାସଂଘ ପକ୍ଷରୁ କୁହାଯାଇଛି। ସରକାର ସଞ୍ଜୀତା ଚାଣୁ ଓ ପ୍ରଦୀପ ସିଂଙ୍କ ଟପ୍‌ ସ୍କିମ ଅବଧିକୁ ବୃଦ୍ଧି କରିଛନ୍ତି। ପୂର୍ବରୁ ଏ ଦୁହେଁ ସ୍କିମରେ ସାମିଲ ରହିଥିଲେ ହେଁ ସେମାନଙ୍କ ଅବଧି ୨୦୧୮ ରାଜ୍ୟଗୋଷ୍ଠୀ କ୍ରୀଡ଼ା ପର୍ଯ୍ୟନ୍ତ ରହିଥିଲା। ଗତ ମାସରେ ଗୋଲ୍ଡକୋଷ୍ଟରେ ଶେଷ ହୋଇଥିବା ରାଜ୍ୟଗୋଷ୍ଠୀ କ୍ରୀଡ଼ାରେ ସଞ୍ଜୀତା ୫୩ କିଗ୍ରା ବର୍ଗରେ ତାଙ୍କର ସ୍ବର୍ଣ୍ଣ ପଦକକୁ ବଜାୟ ରଖିଥିଲେ। ସେହିଭଳି ୧୦୫ କିଗ୍ରା ଓଜନବର୍ଗରେ ପ୍ରଦୀପ ରୌପ୍ୟ ପଦକରେ ସନ୍ତୁଷ୍ଟ ରହିଥିଲେ। ଅନ୍ୟତମ ଯୁବ ଭାରୋତ୍ତୋଳିକା ରାକ୍ଷୀ ହାଲଦା ମଧ୍ୟ ଟପ୍‌ ସ୍କିମରେ ସାମିଲ ହେବାର ସୌଭାଗ୍ୟ ଲାଭ କରିଛନ୍ତି। ନିକଟରେ ମାଙ୍ଗାଲୋରଠାରେ ଶେଷ ହୋଇଥିବା ସିନିୟର ନ୍ୟାଶନାଲ ଚାମ୍ପିୟନଶିପ୍‌ରେ ସେ ୬୩ କିଗ୍ରା ବର୍ଗରେ ୧୨୮ କିଗ୍ରା ଭାର ଉଠାଇ ନୂତନ ଜାତୀୟ ରେକର୍ଡ ପ୍ରତିଷ୍ଠା କରିଥିଲେ। ୧୯ ବର୍ଷ ତଳେ ୨୦୦୦ ଅଲିମ୍ପିକ୍ସରେ କର୍ନମ ମାଲେଶ୍ୱେରୀ ବ୍ରୋଞ୍ଜ ପଦକ ଜିତି ରେକର୍ଡକୁ ନିଜ ନାମରେ କରିଥିଲେ।

ବିସିସିଆଇର ଆସୋସିଏଟ୍‌ ମେମ୍ବରଶିପ୍‌ ପାଇଁ ଟିସିଏର ଆବେଦନ

ବିସିସିଆଇର ଆସୋସିଏଟ୍‌ ମେମ୍ବରଶିପ୍‌ ପାଇଁ ଟିସିଏର ଆବେଦନ

ବମ୍ବେ, ୧୧।୫(ପି.ଟି.)- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ)ର ପୂର୍ଣ୍ଣ ଅନୁଦାନ ପାଉଥିବା ହାଇଦ୍ରାବାଦ କ୍ରିକେଟ ଆସୋସିଏଶନ (ଏଚ୍‌ସିଏ)ରେ ଯଥେଷ୍ଟ ଖେଳାଳି ଖେଳିବାର ସୁଯୋଗ ପାଉ ନ ଥିବା ଦର୍ଶାଇ ନୂତନ ଭାବେ ପ୍ରତିଷ୍ଠା ହୋଇଥିବା ତେଲେଙ୍ଗାନା କ୍ରିକେଟ ଆସୋସିଏଶନ (ଟିସିଏ) ବିସିସିଆଇର ଆସୋସିଏଟ୍‌ ମେମ୍ବରଶିପ୍‌ ହାସଲ ପାଇଁ ଆବେଦନ କରିଛି। ବିସିସିଆଇ ପରିଚଳନା ପାଇଁ ନିଯୁକ୍ତ ପ୍ରଶାସକ ସମିତି (ସିଓଏ) ଟିସିଏର ଆବେଦନକୁ ଗ୍ରହଣ କରିବା ସହିତ ମୁମ୍ବାଇ ହାଇକୋର୍ଟରେ ଶୁଣାଣି କରିବା ପାଇଁ ଅନୁମତି ମାଗିଛନ୍ତି। ଆସନ୍ତା ୬ ସପ୍ତାହ ମଧ୍ୟରେ ଏହାର ଶୁଣାଣି କରିବାକୁ ସିଓଏ ରାଜି ହୋଇଛନ୍ତି’ ବୋଲି ଟିସିଏ ପକ୍ଷରୁ ଏକ ବିଜ୍ଞପ୍ତି ଜରିଆରେ କୁହାଯାଇଛି। ୨୦୧୪ରେ ଆନ୍ଧ୍ରପ୍ରଦେଶଠାରୁ ଅଲଗା ହୋଇ ନୂତନ ରାଜ୍ୟର ମାନ୍ୟତା ପାଇବାର ପରବର୍ଷ ତେଲେଙ୍ଗାନା କ୍ରିକେଟ ଆସୋସିଏଶନ ଗଠିତ ହୋଇଥିଲା।

 ଭାରତ ‘ଏ’-ଲାୟନ୍ସ ମ୍ୟାଚ୍‌ ଖେଳିପାରନ୍ତି କୋହଲି

ଭାରତ ‘ଏ’-ଲାୟନ୍ସ ମ୍ୟାଚ୍‌ ଖେଳିପାରନ୍ତି କୋହଲି

ନୂଆଦିଲ୍ଲୀ, ୧୧।୫(ପି.ଟି.)- ଭାରତ ‘ଏ’ ଦଳ ଆସନ୍ତା ମାସରେ ଇଂଲଣ୍ଡ ଗସ୍ତରେ ଯାଇ ସେଠାରେ ଘରୋଇ ଇଂଲଣ୍ଡ ଲାୟନ୍ସ ବିପକ୍ଷରେ କେତେକ ସୀମିତ ଓଭର ଓ ୪ ଦିବସୀୟ ମ୍ୟାଚ୍‌ ଖେଳିବାର କାର୍ଯ୍ୟକ୍ରମ ରହିଛି। ଏଥିଲାଗି ମଙ୍ଗଳବାର ଭାରତ-ଏ ଦଳ ଘୋଷଣା ମଧ୍ୟ ହୋଇଛି। ପୂର୍ବ ପ୍ରସ୍ତୁତି ଲାଗି ସେହି ସମୟରେ ସରେ ପକ୍ଷରୁ କାଉଣ୍ଟି କ୍ରିକେଟ ଖେଳିବାକୁ ଯାଇଥିବା ଭାରତୀୟ ଅଧିନାୟକ ବିରାଟ କୋହଲି ଆବଶ୍ୟକ ହେଲେ ଭାରତ ‘ଏ’ ଓ ଇଂଲଣ୍ଡ ଲାୟନ୍ସ ମଧ୍ୟରେ ଓ୍ବରସେଷ୍ଟରରେ ହେବାକୁ ଥିବା ଏକ ୪ ଦିବସୀୟ ମ୍ୟାଚ୍‌ ଖେଳିପାରନ୍ତି ବୋଲି ଜଣାପଡ଼ିଛି। ସେହିଭଳି ଆୟର୍ଲାଣ୍ଡ ବିପକ୍ଷରେ ଭାରତୀୟ ଦଳ ଖେଳିବାକୁ ଥିବା ଦୁଇ ମ୍ୟାଚ୍‌ବିଶିଷ୍ଟ ଟି୨୦ ସିରିଜର ୨ୟ ମ୍ୟାଚ୍‌ ଖେଳିବା ନେଇ ମଧ୍ୟ କୋହଲିଙ୍କ ନିକଟରେ ସୁଯୋଗ ରହିଛି। ଏହି ଦୁଇଟି ମ୍ୟାଚ୍‌ ଯଥାକ୍ରମେ ଜୁନ ୨୭ ଓ ୨୯ରେ ଡବ୍‌ଲିନ୍‌ରେ ଖେଳାଯବାର କାର୍ଯ୍ୟକ୍ରମ ରହିଛି। ଅପରପକ୍ଷରେ କୋହଲି ତାଙ୍କ ଶେଷ କାଉଣ୍ଟି ମ୍ୟାଚ୍‌ ୟର୍କଶାୟର ବିପକ୍ଷରେ ଜୁନ୍‌ ୨୫ରୁ ୨୮ ଯାଏ ଖେଳିବେ। ଯଦି କୋହଲି ଏହି ମ୍ୟାଚ୍‌ ଖେଳିସାରି ୫ ଘଣ୍ଟାର ଲମ୍ବା ଯାତ୍ରା ସହ ଡବ୍‌ଲିନରେ ପହଞ୍ଚତ୍ବେ ତେବେ ଜୁନ୍‌ ୨୯ରେ ଆୟର୍ଲାଣ୍ଡ ବିପକ୍ଷରେ ୨ୟ ଟି୨୦ ମ୍ୟାଚ୍‌ ଖେଳିବାର ସମ୍ଭାବନା ମଧ୍ୟ ରହିଛି। ସେହିଭଳି ସେ ଯଦି ୟର୍କଶାୟର ବିପକ୍ଷ ଅନ୍ତିମ କାଉଣ୍ଟି ମ୍ୟାଚ୍‌ ନ ଖେଳି ଓହରିଯାଆନ୍ତି ତେବେ ଆୟର୍ଲାଣ୍ଡ ବିପକ୍ଷରେ ୨ଟି ଯାକ ଟି୨୦ ମ୍ୟାଚ୍‌ ଖେଳିପାରିବେ ବୋଲି ଜଣାପଡ଼ିଛି।

ପ୍ଲେ-ଅଫ୍‌ରେ ସନ୍‌ରାଇଜର୍ସ

ପ୍ଲେ-ଅଫ୍‌ରେ ସନ୍‌ରାଇଜର୍ସ

ନୂଆଦିଲ୍ଲୀ, ୧୧।୫-ରିଷଭ ପନ୍ତଙ୍କ ଅପରାଜିତ ଶତକ ସତ୍ତ୍ୱେ ଦିଲ୍ଲୀ ଡେୟାରଡେଭିଲ୍ସ ଗୁରୁବାର ଅନୁଷ୍ଠିତ ଇଣ୍ଡିଆନ ପ୍ରିମିୟର ଲିଗ୍‌ ମ୍ୟାଚରେ ପରାଜୟର ସ୍ବାଦ ଚାଖିଛି। ଶିଖର ଧାଓ୍ବନ ଓ ଅଧିନାୟକ କେନ୍‌ ଓ୍ବିଲିୟମସନଙ୍କ ଶତକୀୟ ଭାଗୀଦାରି ସହାୟତାରେ ସନ୍‌ରାଇଜର୍ସ ହାଇଦ୍ରାବାଦ ୯ ଉଇକେଟରେ ଡେୟାରଡେଭିଲ୍ସକୁ ପରାସ୍ତ କରିଛି। ଦିଲ୍ଲୀ ପକ୍ଷରୁ ଧାର୍ଯ୍ୟ ୧୮୮ ରନ ବିଜୟ ଲକ୍ଷ୍ୟର ପିଛା କରି ସନ୍‌ରାଇଜର୍ସ ୧୮.୫ ଓଭରରେ ୧ ଉଇକେଟ ହରାଇ ୧୯୧ ରନ ସଂଗ୍ରହ କରି ନେଇଥିଲା।

ବନ୍ଧୁକ ଚାଳନା ଶିବିରର ଦ୍ୱିତୀୟ ପର୍ଯ୍ୟାୟ

ବନ୍ଧୁକ ଚାଳନା ଶିବିରର ଦ୍ୱିତୀୟ ପର୍ଯ୍ୟାୟ

ଭୁବନେଶ୍ୱର, ୧୧।୫(କ୍ରୀଡ଼ା ପ୍ରତିନିଧି)-ଓଡ଼ିଶା ରାଇଫଲ ଆସୋସିଏଶନ ଓ ଉତ୍କଳ କରାଟେ ସ୍କୁଲର ମିଳିତ ଆନୁକୂଲ୍ୟରେ ବନ୍ଧୁକ ଚାଳନା ଶିବିରର ଦ୍ୱିତୀୟ ପର୍ଯ୍ୟାୟ ମେ ୮ରୁ ୧୨ ପର୍ଯ୍ୟନ୍ତ ଅନୁଷ୍ଠିତ ହେଉଛି। ଏହାର ତୃତୀୟ ପର୍ଯ୍ୟାୟ ଆସନ୍ତା ୧୫ରୁ ଆରମ୍ଭ ହେବାକୁ ଯାଉଛି। ୧୨ ବର୍ଷରୁ ଊର୍ଦ୍ଧ୍ୱ ବାଳିକା ବାଳକ ନାମ ପଞ୍ଜୀକରଣ କରି ଏହି ଶିବିରରେ ଅଂଶଗ୍ରହଣ କରିପାରିବେ। ବିଭିନ୍ନ ସିକ୍ୟୁରିଟି ସଂସ୍ଥା, ଏନସିସି ଓ ଲାଇସେନ୍ସପ୍ରାପ୍ତ ଜନସାଧାରଣ ମଧ୍ୟ ପ୍ରଶିକ୍ଷଣ ପାଇଁ ନିଜ ନାମ ପଞ୍ଜୀକୃତ କରିପାରିବେ। ଶିବିରରେ ବନ୍ଧୁକ ଚାଳନା ସମ୍ବଦ୍ଧୀୟ ତଥ୍ୟ, ବୈଷୟିକ ଜ୍ଞାନ କୌଶଳ ଏବଂ ଏୟାର ରାଇଫଲ, ଏୟାର ପିସ୍ତଲ ଓ .୨୨ ରାଇଫଲ ଏବଂ ସମସ୍ତ ପ୍ରକାର ପିସ୍ତଲ/ରିଭଲବର ବନ୍ଧୁକରେ ପ୍ରଶିକ୍ଷଣ ପ୍ରଦାନ କରାଯାଉଛି।

ସ୍ପଟ୍‌ ଫିକ୍ସିଂ ମାମଲା: ୟୁଏଇ କ୍ରିକେଟ କୋଚ୍‌ ସସ୍‌ପେଣ୍ଡ

ସ୍ପଟ୍‌ ଫିକ୍ସିଂ ମାମଲା: ୟୁଏଇ କ୍ରିକେଟ କୋଚ୍‌ ସସ୍‌ପେଣ୍ଡ

କରାଚୀ, ୧୦ା୫ (ଏଏଫ୍‌ପି)-ମ୍ୟାଚ ଫିକ୍ସିଂ ଅଫର ଅଭିଯୋଗରେ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଅବସ୍ଥାନ କରୁଥିବା କୋଚ୍‌ ଇର୍‌ଫାନ ଅନ୍‌ସାରୀଙ୍କୁ ଅନ୍ତର୍ଜାତୀୟ କ୍ରିକେଟ ପରିଷଦ(ଆଇସିସି) ସସ୍‌ପେଣ୍ଡ କରିଛି। ସ୍ପଟ୍‌ ଫିକ୍ସିଂ ସ୍କିମ୍‌ରେ ସାମିଲ ହେବା ଲାଗି ଅନ୍‌ସାରୀ ତାଙ୍କୁ ଆପ୍ରୋଚ କରିଥିବା ପାକିସ୍ତାନ ଅଧିନାୟକ ସର୍ଫରାଜ ଅହମ୍ମଦ ଅଭିଯୋଗ କରିଥିଲେ।

୨୦ ବର୍ଷରୁ କମ୍‌ ଫିଫା ମହିଳା ବିଶ୍ୱକପ୍‌: ଉଭେନାଙ୍କୁ ମ୍ୟାଚ୍‌ ପରିଚାଳନାର ସୁଯୋଗ

୨୦ ବର୍ଷରୁ କମ୍‌ ଫିଫା ମହିଳା ବିଶ୍ୱକପ୍‌: ଉଭେନାଙ୍କୁ ମ୍ୟାଚ୍‌ ପରିଚାଳନାର ସୁଯୋଗ

ନୂଆଦିଲ୍ଲୀ, ୧୦।୫(ପି.ଟି.)- ଫ୍ରାନ୍ସରେ ଅଗଷ୍ଟ ୫ରୁ ୨୪ ତାରିଖ ପର୍ଯ୍ୟନ୍ତ ୨୦ ବର୍ଷରୁ କମ୍‌ ଫିଫା ମହିଳା ବିଶ୍ୱକପ୍‌ ଅନୁଷ୍ଠିତ ହେବ। ଏଥିରେ ଭାରତର ଉଭେନା ଫର୍ନାଣ୍ଡିଜ ଆସିଷ୍ଟାଣ୍ଟ ରେଫରି ଭାବେ ମ୍ୟାଚ୍‌ ପରିଚାଳନା କରିବାର ସୁଯୋଗ ପାଇଛନ୍ତି।

ଅଷ୍ଟ୍ରେଲିଆନ୍‌ ଓପନ୍‌: କ୍ୱାର୍ଟରରେ ପ୍ରଣୀଥ, ସମୀର

ଅଷ୍ଟ୍ରେଲିଆନ୍‌ ଓପନ୍‌: କ୍ୱାର୍ଟରରେ ପ୍ରଣୀଥ, ସମୀର

ସିଡ୍‌ନୀ,୧୦।୫(ପି.ଟି.)- ଭାରତୀୟ ସଟଲର ବି. ସାଇ ପ୍ରଣୀଥ ଓ ସମୀର ବର୍ମା ଚଳିତ ଅଷ୍ଟ୍ରେଲିଆନ୍‌ ଓପନ୍‌ ବ୍ୟାଡ୍‌ମିଣ୍ଟନ ଟୁର୍ନାମେଣ୍ଟର କ୍ୱାର୍ଟର ଫାଇନାଲକୁ ଉନ୍ନୀତ ହୋଇଛନ୍ତି। ଉଭୟ ଖେଳାଳି ନିଜ ନିଜ ମୁକାବିଲାକୁ ସିଧାସଳଖ ଗେମ୍‌ରେ ଜିତି ନେଇଛନ୍ତି।

ଜୟ ଭୈରବ କ୍ରିକେଟ୍‌ ଟୁର୍ନାମେଣ୍ଟ: ରେଙ୍ଗୋପାଲିକୁ ହରାଇ କୁଟ୍ରାଗଡ ବିଜୟୀ

ଜୟ ଭୈରବ କ୍ରିକେଟ୍‌ ଟୁର୍ନାମେଣ୍ଟ: ରେଙ୍ଗୋପାଲିକୁ ହରାଇ କୁଟ୍ରାଗଡ ବିଜୟୀ

ଲାଞ୍ଜିଗଡ଼,୧୦।୫(ଡି.ଏନ.ଏ.)- କଳାହାଣ୍ଡି ଜିଲା ଲାଞ୍ଜିଗଡ଼ଠାରେ ଜୟ ଭୈରବ ନକ୍‌ଆଉଟ୍‌ କ୍ରିକେଟ୍‌ ଟୁର୍ନାମେଣ୍ଟ ଗୁରୁବାର ଉଦ୍‌ଘାାଟିତ ହୋଇଯାଇଛି । ଉଦ୍‌ଘାଟନୀ ମ୍ୟାଚ୍‌ ରାୟଗଡ଼ା ଜିଲା କୁଟ୍ରାଗଡ଼ ଓ ଲାଞ୍ଜିଗଡ଼ ବ୍ଲକ ରେଙ୍ଗୋପାଲି କ୍ରିକେଟ୍‌ ଦଳ ମଧ୍ୟରେ ଅନୁଷ୍ଠିତ ହୋଇଥିଲା । କୁଟ୍ରାଗଡ଼ ଦଳ ପ୍ରଥମେ ଟସ୍‌ ଜିଣି ବ୍ୟାଟିଂ କରିବା ସହିତ ନିର୍ଦ୍ଧାରିତ ୧୨ ଓଭରରେ ୪ ଉଇକେଟ୍‌ ବିନିମୟରେ ୧୩୪ ରନ୍‌ ସଂଗ୍ରହ କରିଥିଲା । ଏହାର ଜବାବରେ ରେଙ୍ଗୋପାଲି ଦଳ ନିର୍ଦ୍ଧାରିତ ଓଭରରେ ୮ ଉଇକେଟ୍‌ ହରାଇ ୧୨୨ ରନ୍‌ରେ ସୀମିତ ରହି ପରାଜିତ ହୋଇଥିଲା । ଆଜିର ମ୍ୟାଚ୍‌କୁ ମାନସ ମହାକୁଡ ଓ କିଶୋର ମୁଣ୍ଡଛିନା ପରିଚାଳନା କରିଥିବାବେଳେ ମନୋଜ, କମଲ, ଶିଳ୍ପ, ଶିବ ଓ ଲିକୁ ପ୍ରମୁଖ ସହଯୋଗ କରିଥିଲେ ।

ଜାତୀୟ ଫୁଟ୍‌ବଲ ଶିବିର ପାଇଁ ୩୦ ଖେଳାଳି ମନୋନୀତ

ଜାତୀୟ ଫୁଟ୍‌ବଲ ଶିବିର ପାଇଁ ୩୦ ଖେଳାଳି ମନୋନୀତ

ନୂଆଦିଲ୍ଲୀ,୧୦।୫(ପି.ଟି.)- ଆସନ୍ତା ୧ ତାରିଖରୁ ବମ୍ବେଠାରେ ହିରୋ ଇଣ୍ଟରକଣ୍ଟିନେଣ୍ଟାଲ କପ୍‌ ଫୁଟ୍‌ବଲ ଟୁର୍ନାମେଣ୍ଟ ଆରମ୍ଭ ହେବାକୁ ଯାଉଛି। ଏହାକୁ ଦୃଷ୍ଟିରେ ରଖି ଭାରତୀୟ ଦଳର ପ୍ରସ୍ତୁତି ଶିବିର ପାଇଁ ଜାତୀୟ ଫୁଟ୍‌ବଲ କୋଚ୍‌ ଷ୍ଟିଫେନ କୋନଷ୍ଟାଣ୍ଟିନ ୩୦ ଜଣ ଖେଳାଳିଙ୍କୁ ଚୟନ କରିଛନ୍ତି।

ଟୋକିଓ ଅଲିମ୍ପିକ୍ସରେ ଡବଲ ପଦକ ଲକ୍ଷ୍ୟରେ ମନୁ

ଟୋକିଓ ଅଲିମ୍ପିକ୍ସରେ ଡବଲ ପଦକ ଲକ୍ଷ୍ୟରେ ମନୁ

ନୂଆଦିଲ୍ଲୀ,୧୦।୫(ପି.ଟି.)- ଯୁବା ଶୁଟର ମନୁ ଭାକର ଆଗାମୀ ଟୋକିଓ ଅଲିମ୍ପିକ୍ସରେ ଡବଲ ପଦକ ଜିତିବା ଲକ୍ଷ୍ୟରେ ରହିଛନ୍ତି। ୧୬ ବର୍ଷୀୟା ଶୁଟର ୧୦ ମିଟର ଏୟାର ପିସ୍ତଲ ଇଭେଣ୍ଟ ବ୍ୟତୀତ ୨୫ ମି. ପିସ୍ତଲ ଇଭେଣ୍ଟକୁ ମଧ୍ୟ ସମାନ ଗୁରୁତ୍ୱ ଦେଉଛନ୍ତି।

ପୁଣି ଜୁଭେଣ୍ଟସ ଜିତିଲା ଇଟାଲିଆନ୍‌ ଟାଇଟଲ

ପୁଣି ଜୁଭେଣ୍ଟସ ଜିତିଲା ଇଟାଲିଆନ୍‌ ଟାଇଟଲ

ରୋମ,୧୦।୫(ଏଏଫ୍‌ପି)- ଜୁଭେଣ୍ଟସ ଦଳ ଚଳିତ ଇଟାଲିଆନ୍‌ କପ୍‌ ଟୁର୍ନାମେଣ୍ଟର ଫାଇନାଲରେ ଏସି ମିଲନକୁ ୪-୦ ଗୋଲ୍‌ରେ ପରାସ୍ତ କରିଛି। ଏଥିଯୋଗୁ ଦଳ କ୍ରମାଗତ ୪ଥର ପାଇଁ ଇଟାଲିଆନ୍‌ ଟାଇଟଲ ହାସଲ କରିଛି।

ଆଇପିଏଲ-୧୧: ତ୍ରୁଟିପୂର୍ଣ୍ଣ ଅମ୍ପାୟରିଂ ଅଭିଯୋଗ

ଆଇପିଏଲ-୧୧: ତ୍ରୁଟିପୂର୍ଣ୍ଣ ଅମ୍ପାୟରିଂ ଅଭିଯୋଗ

କଲିକତା,୧୦।୫(ପି.ଟି.)- ଚଳିତ ଆଇପିଏଲ୍‌ରେ ପୁଣି ତ୍ରୁଟିପୂର୍ଣ୍ଣ ଅମ୍ପାୟରିଂର ଦୃଷ୍ଟାନ୍ତ ଦେଖିବାକୁ ମିଳିଛି। ବୁଧବାର ଏଠାରେ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଖେଳାଯାଇଥିବା ମ୍ୟାଚ୍‌ରେ କୋଲକାତା ନାଇଟ୍‌ ରାଇଡର୍ସ ଦଳର ପେସର ଟମ୍‌ କୁରାନଙ୍କ ଏକ ବଲ୍‌କୁ ନୋ ବଲ ବୋଲି ଫିଲ୍ଡ ଅମ୍ପାୟର କେ.ଏନ୍‌. ଅନନ୍ତପଦ୍ମନାଭମ ଦର୍ଶାଇଥିଲେ।

ମାଡ୍ରିଡ୍‌ ଓପନ୍‌: କ୍ୱାର୍ଟରରେ ଶାରାପୋଭା

ମାଡ୍ରିଡ୍‌ ଓପନ୍‌: କ୍ୱାର୍ଟରରେ ଶାରାପୋଭା

ମାଡ୍ରିଡ୍‌,୧୦।୫- ମାରିଆ ଶାରାପୋଭା ଚଳିତ ମାଡ୍ରିଡ୍‌ ଓପନ ଟେନିସ୍‌ ଟୁର୍ନାମେଣ୍ଟର କ୍ୱାର୍ଟର ଫାଇନାଲରେ ପ୍ରବେଶ କରିଛନ୍ତି। ତାଙ୍କର ଦୃଢ଼ ସମାଲୋଚକ ଫ୍ରାନ୍ସର କ୍ରିଷ୍ଟିନା ମ୍ଲାଡେନୋଭିକ୍‌ଙ୍କୁ ସେ ସିଧାସଳଖ ସେଟ୍‌ରେ ହରାଇ ଦେଇଛନ୍ତି।

ସେର୍ଗି ରବର୍ଟୋଙ୍କୁ ବାସନ୍ଦାଦେଶ

ସେର୍ଗି ରବର୍ଟୋଙ୍କୁ ବାସନ୍ଦାଦେଶ

ବାର୍ସିଲୋନା,୧୦।୫(ଏଏଫ୍‌ପି)- ବାର୍ସିଲୋନା ଷ୍ଟାର ସେର୍ଗି ରବର୍ଟୋଙ୍କୁ ୪ଟି ମ୍ୟାଚ୍‌ରୁ ବାସନ୍ଦ କରାଯାଇଛି। ଗତ ରବିବାର ଖେଳାଯାଇଥିବା କ୍ଲାସିକୋ ମ୍ୟାଚ୍‌ରେ ସେ ରିୟଲ ମାଡ୍ରିଡ୍‌ ଦଳର ଡିଫେଣ୍ଡର ମାର୍ସିଲୋଙ୍କୁ ଆକ୍ରମଣ କରିଥିଲେ।

ପ୍ରଥମ ଶ୍ରେଣୀ କ୍ରିକେଟରୁ ଅବସର ନେବେ ବଦ୍ରିନାଥ

ପ୍ରଥମ ଶ୍ରେଣୀ କ୍ରିକେଟରୁ ଅବସର ନେବେ ବଦ୍ରିନାଥ

ମାଡ୍ରାସ,୧୦।୫- ତାମିଲନାଡୁ ରଣଜୀ ଦଳର ବରିଷ୍ଠ ବ୍ୟାଟ୍ସମ୍ୟାନ ସୁବ୍ରମନିଅମ ବଦ୍ରିନାଥ ପ୍ରଥମ ଶ୍ରେଣୀ କ୍ରିକେଟରୁ ଅବସର ନେବାକୁ ଯାଉଛନ୍ତି। ଏବେ ଭାଷ୍ୟକର ରୂପେ କାର୍ଯ୍ୟରତ ଥିବା ବଦ୍ରିନାଥ ଚଳିତ ଆଇପିଏଲ୍‌ ଶେଷ ହେବା ପରେ ଅବସର ଘୋଷଣା କରିବେ।

ପୂର୍ବତନ ଟେଷ୍ଟ କ୍ରିକେଟର ରାଜିନ୍ଦର ପାଲଙ୍କ ପରଲୋକ

ପୂର୍ବତନ ଟେଷ୍ଟ କ୍ରିକେଟର ରାଜିନ୍ଦର ପାଲଙ୍କ ପରଲୋକ

ନୂଆଦିଲ୍ଲୀ,୧୦।୫(ପି.ଟି.)- ଭାରତ ପାଇଁ ଗୋଟିଏ ଟେଷ୍ଟରେ ଖେଳିଥିବା ଦିଲ୍ଲୀ କ୍ରିକେଟର ରାଜିନ୍ଦର ପାଲଙ୍କ ପରଲୋକ ଘଟିଛି। ଡେରାଡୁନସ୍ଥିତ ବାସଭବନରେ ସେ ଅନ୍ତିମ ନିଶ୍ୱାସ ନେଇଥିବା ତାଙ୍କ ପରିବାର ପକ୍ଷରୁ ସୂଚନା ଦିଆଯାଇଛି।

ଚେନ୍ନାଇ ବିପକ୍ଷ ମ୍ୟାଚ୍‌ରେ ରାଜସ୍ଥାନ ଦଳ ପିନ୍ଧିବ ପିଙ୍କ୍‌ ଜର୍ସି

ଚେନ୍ନାଇ ବିପକ୍ଷ ମ୍ୟାଚ୍‌ରେ ରାଜସ୍ଥାନ ଦଳ ପିନ୍ଧିବ ପିଙ୍କ୍‌ ଜର୍ସି

ଜୟପୁର,୧୦।୫- ନିକଟରେ କର ବା ମର ମ୍ୟାଚ୍‌ରେ କିଙ୍ଗ୍ସ ଏକାଦଶ ପଞ୍ଜାବକୁ ପରାଜିତ କରିଥିବା ରାଜସ୍ଥାନ ରୟାଲ୍ସ ଦଳ ଆସନ୍ତା ଚେନ୍ନାଇ ସୁପର କିଙ୍ଗ୍ସ ବିପକ୍ଷ ମ୍ୟାଚ୍‌ରେ ସ୍ବତନ୍ତ୍ର ପିଙ୍କ୍‌ ଜର୍ସି ପିନ୍ଧିବ। ସାଓ୍ବାଇ ମାନସିଂ ଷ୍ଟାଡିୟମ୍‌ରେ ଖେଳାଯିବାକୁ ଥିବା ମ୍ୟାଚ୍‌ରେ କର୍କଟ ରୋଗର ପ୍ରାରମ୍ଭିକ ପର୍ଯ୍ୟାୟରେ ଯାଞ୍ଚ କରିବା ସମ୍ପର୍କରେ ସଚେତନତା ବୃଦ୍ଧି କରିବା ପାଇଁ ରାଜସ୍ଥାନ ଫ୍ରାଞ୍ଚାଇଜ୍‌ ପକ୍ଷରୁ ଏହି ପଦକ୍ଷେପ ନିଆଯାଇଛି। ”ଜଣେ ଖେଳାଳି ଭାବେ ମୁଁ ଭାବୁଛି, ଏହା ଏକ ଛୋଟିଆ କାର୍ଯ୍ୟକ୍ରମ।

ବାର୍ଷିକ ୨ଟି ଲିଗ୍‌ ଖେଳିପାରିବେ ପାକିସ୍ତାନ ଖେଳାଳି

ବାର୍ଷିକ ୨ଟି ଲିଗ୍‌ ଖେଳିପାରିବେ ପାକିସ୍ତାନ ଖେଳାଳି

କରାଚୀ,୧୦।୫- ପାକିସ୍ତାନ ଖେଳାଳିଙ୍କୁ ଏକ ଶକ୍ତ ଆର୍ଥିକ ଝଟ୍‌କା ଲାଗିଛି। ପାକିସ୍ତାନ କ୍ରିକେଟ୍‌ ବୋର୍ଡ (ପିସିବି) ଜାତୀୟ ଦଳର ଖେଳାଳିଙ୍କ ପାଇଁ ଏନ୍‌ଓସି (ଅନାପତ୍ତି ପ୍ରମାଣପତ୍ର) ନିୟମରେ ପରିବର୍ତ୍ତନ ଆଣିଛି। ନୂତନ ନିୟମ ଅନୁଯାୟୀ କେନ୍ଦ୍ରୀୟ ଚୁକ୍ତିରେ ସାମିଲ ଥିବା ଖେଳାଳିମାନଙ୍କୁ ବର୍ଷକୁ କେବଳ ୨ଟି ଲିଗ୍‌ରେ ଖେଳିବାକୁ ଅନୁମତି ମିଳିବ। ଏଥିରେ ପାକିସ୍ତାନ ସୁପର ଲିଗ୍‌ (ପିଏସ୍‌ଏଲ୍‌) ମଧ୍ୟ ସାମିଲ ରହିପାରେ, କିନ୍ତୁ ଏହା ଖେଳାଳିଙ୍କ ଉପରେ ନିର୍ଭର କରେ। ଫଳରେ ଏବେ ବିଭିନ୍ନ ଲିଗ୍‌ରେ ଖେଳୁଥିବା ଲେଗ ସ୍ପିନର ଶାହାବ ଖାନ ପିଏସ୍‌ଏଲ ବ୍ୟତୀତ ବର୍ଷକୁ କେବଳ ଗୋଟିଏ ଲିଗ୍‌ରେ ଖେଳିପାରିବେ।

ଆଇପିଏଲ୍‌: ପ୍ଲେ- ଅଫ୍‌, ଫାଇନାଲ ସନ୍ଧ୍ୟା ୭ରୁ ଆରମ୍ଭ ହେବ

ଆଇପିଏଲ୍‌: ପ୍ଲେ- ଅଫ୍‌, ଫାଇନାଲ ସନ୍ଧ୍ୟା ୭ରୁ ଆରମ୍ଭ ହେବ

ନୂଆଦିଲ୍ଲୀ,୧୦।୫ (ପି.ଟି.)- କ୍ରିକେଟ ପ୍ରଶଂସକଙ୍କ ଇଚ୍ଛା ଓ ହିତକୁ ଦୃଷ୍ଟିରେ ରଖି ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ୍‌) ମ୍ୟାନେଜମେଣ୍ଟ ଏକ ନୂଆ ନିଷ୍ପତ୍ତି ନେଇଛି। ଚଳିତ ଆଇପିଏଲ୍‌ର ଅନ୍ତିମ ୪ଟି ମ୍ୟାଚ୍‌ ରାତି ୮ ବଦଳରେ ୭ଟାରେ ଆରମ୍ଭ ହେବ ବୋଲି ଘୋଷଣା କରାଯାଇଛି। ୩ଟି ଫ୍ଲେ- ଅଫ୍‌ ସମେତ ଫାଇନାଲ ମ୍ୟାଚକୁ ସନ୍ଧ୍ୟ ୭ଟାରେ ଆରମ୍ଭ କରାଯିବ ବୋଲି ଆଇପିଏଲ୍‌ ଚେୟାରମ୍ୟାନ ରାଜୀବ ଶୁକ୍ଳା କହିଛନ୍ତି।

ବର୍ଣ୍ଣବୈଶମ୍ୟ ଆକ୍ଷେପ: ରୁଷିଆ ଉପରେ ଫିଫାର ଜରିମାନା

ବର୍ଣ୍ଣବୈଶମ୍ୟ ଆକ୍ଷେପ: ରୁଷିଆ ଉପରେ ଫିଫାର ଜରିମାନା

ଜେନିଭା, ୧୦।୫(ଏ.ପି.)- ଫୁଟବଲ ବିଶ୍ୱକପ୍‌ ଆୟୋଜନ ହେବାକୁ ଆଉ ୫ ସପ୍ତାହ ବାକିଥିବା ବେଳେ ଆୟୋଜକ ରୁଷିଆ ଉପରେ ଫିଫା ଜରିମାନା ଦାଏର କରିଛି। ବିଶ୍ୱ ଫୁଟବଲର ଏହି ସର୍ବୋଚ୍ଚ ପ୍ରଶାସନିକ ସଂସ୍ଥା ଫିଫା ବର୍ଣ୍ଣବୈଶମ୍ୟ ଆକ୍ଷେପ କାରଣରୁ ରୁଷିଆ ଉପରେ ୩୦ ହଜାର ସୁଇସ୍‌ ଫ୍ରାଙ୍କ ଜରିମାନା ଆକାରରେ ଦେବାକୁ ନିର୍ଦ୍ଦେଶ ଦେଇଛି। ସେଣ୍ଟ ପିଟର୍ସବର୍ଗରେ ଏକ ମ୍ୟାଚ ଅବସରରେ ଫ୍ରାନ୍ସ ଖେଳାଳିମାନଙ୍କୁ କେତେକ ପ୍ରଶଂସକ ବର୍ଣ୍ଣବୈଶମ୍ୟ ଆକ୍ଷେପ କରିଥିଲେ।

ବୃହତ ବିଜୟ ସହ ଚତୁର୍ଥ ସ୍ଥାନରେ ମୁମ୍ବାଇ

ବୃହତ ବିଜୟ ସହ ଚତୁର୍ଥ ସ୍ଥାନରେ ମୁମ୍ବାଇ

କଲିକତା, ୧୦।୫(ପି.ଟି)- ଯୁବ ଉଇକେଟ କିପର ବ୍ୟାଟ୍ସମ୍ୟାନ ଇଶାନ କିଶନଙ୍କ ଧୂଆଁଧାର ବ୍ୟାଟିଂ ବଳରେ ମୁମ୍ବାଇ ଇଣ୍ଡିଆନ୍ସ ଘରୋଇ କୋଲକାତା ନାଇଟ୍‌ ରାଇଡର୍ସକୁ ୧୦୨ ରନର ବୃହତ ବ୍ୟବଧାନରେ ପରାସ୍ତ କରି ହ୍ୟାଟ୍ରିକ ବିଜୟ ହାସଲ କରିବା ସହ ତା’ର ପ୍ଲେ-ଅଫ୍‌ ଆଶା ଉଜ୍ଜୀବିତ ରଖିଛି। ସ୍ଥାନୀୟ ଇଡେନ ଗାର୍ଡେନରେ ଅନୁଷ୍ଠିତ ଇଣ୍ଡିଆନ ପ୍ରିମିୟର ଲିଗ୍‌ (ଆଇପିଏଲ୍‌)ର ୪୧ତମ ମ୍ୟାଚରେ କୋଲକାତା ଟସ୍‌ ଜିତି ଫିଲ୍ଡିଂ କରିବାକୁ ନିଷ୍ପତ୍ତି ନେଇଥିଲା।