ରାଜ୍ୟ

ଅଭିଯୋଗର ୭ ଦିନ ପରେ ବି ନିଆଯାଇନାହିଁ କାର୍ଯ୍ୟାନୁଷ୍ଠାନ

ବିରଜାକ୍ଷେତ୍ର,୧୧।୫(ଡି.ଏନ୍‌.ଏ) :ବିବାହର ପ୍ରଲୋଭନ ଦେଖାଇ ଯାଜପୁର ଥାନା ଅକରପଡ଼ା ପଞ୍ଚାୟତର ଠକୁନ ଜେନା ପ୍ରେମିକାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ଯୁବତୀ ଜଣକ ହେଉଛନ୍ତି ଯାଜପୁର ପୌରାଞ୍ଚଳ ଦେବୀଦ୍ୱାର ଗ୍ରାମର। ପରେ ଠକୁନ ବିବାହକୁ ପ୍ରତ୍ୟାଖ୍ୟାନ କରିବାରୁ ପ୍ରେମିକା ମେ ୨ରେ ଯାଜପୁର ଥାନାରେ ଅଭିଯୋଗ କରିଥିଲେ। ଏ ନେଇ ଯାଜପୁର ଥାନା ପକ୍ଷରୁ ୩ରେ ଏକ ମାମଲା (ନଂ.୧୧୧/୧୮) ରୁଜୁ କରାଯାଇ ପୀଡ଼ିତାଙ୍କ ଡାକ୍ତରୀ । ମଇନା କରାଯାଇଛି। ତେବେ ଅଭିଯୋଗର ୭ ଦିନ ବିତିଯାଇଥିଲେ ସୁଦ୍ଧା ପୋଲିସ ଅଭିଯୁକ୍ତଙ୍କୁ ଗିରଫ କରିବାରେ ସଫଳ ହୋଇନାହିଁ।ପ୍ରକାଶ ଯେ, ଏପ୍ରିଲ ୨୬ରେ ଠକୁନ ପ୍ରେମିକାଙ୍କୁ ବିବାହ କରିବାକୁ କହି ଘରୁ ନେଇ ଜାହାନପୁର ପଞ୍ଚାୟତ ତ୍ରିଲୋଚନପଡ଼ା ମୌଜା ତାଳହୁଡ଼ାରେ ୨ ଦିନ ରଖି ତାଙ୍କ ସହ ଶାରୀରିକ ସମ୍ପର୍କ ରଖିଥିଲେ। ପରେ ୨୮ରେ ପ୍ରେମିକାଙ୍କୁ ତାଙ୍କ ଘରେ ଛାଡ଼ିଦେଇ ବିବାହ କରିବାକୁ ମନା କରିଦେଇଥିଲେ । ପୀଡ଼ିତାଙ୍କ ପରିବାର ଲୋକେ ଯେତେ ବୁଝାଶୁଝା କରିଥିଲେ ମଧ୍ୟ ଠକୁନ ଶୁଣି ନ ଥିଲେ। ଶେଷରେ ବାଧ୍ୟହୋଇ ୩୦ରେ ଠକୁନଙ୍କ ଘର ଆଗରେ ଧାରଣା ଦେଇଥିଲେ। ତେବେ ଯାଜପୁର ପୋଲିସ ସମିତି ସଦସ୍ୟ ଓ ଜନ ପ୍ରତିନିଧିଙ୍କ ଚାପରେ ଅଭିଯୁକ୍ତଙ୍କୁ ଗିରଫ କରିବାରେ ବିଳମ୍ବ କରୁଛି ବୋଲି ପୀଡ଼ିତାଙ୍କ ପରିବାରବର୍ଗ ଅଭିଯୋଗ କରନ୍ତି । ଅପରପକ୍ଷରେ ଅଭିଯୁକ୍ତ ଜଣକ ନାବାଳକ ବୋଲି ଜଣାପଡ଼ିଛି।

ଅଧିକ ଯୌତୁକ ଦାବିରେ ମହିଳାଙ୍କୁ ହତ୍ୟା ଉଦ୍ୟମ ଅଭିଯୋଗ

ଅଧିକ ଯୌତୁକ ଦାବିରେ ମହିଳାଙ୍କୁ ହତ୍ୟା ଉଦ୍ୟମ ଅଭିଯୋଗ

ଧର୍ମଶାଳା,୧୧।୫(ଡିଏନ୍‌ଏ):ଧର୍ମଶାଳା ଥାନା ଅନ୍ତର୍ଗତ ବ୍ରହ୍ମବରଦା ଗ୍ରାମର ଜଣେ ସଂଖ୍ୟାଲଘୁ ମହିଳାଙ୍କୁ ତାଙ୍କ ଶାଶୁଘର ଲୋକେ ଅଧିକ ଯୌତୁକ ଦାବି କରି ବିଷ ପିଆଇ ମାରିଦେବାକୁ ଉଦ୍ୟମ କରିଥିବା ଗୁରୁବାର ଥାନାରେ ଅଭିଯୋଗ ହୋଇଛି। ପୋଲିସ ଏକ ମାମଲା ରୁଜୁ କରିବା ସହିତ ମହିଳାଙ୍କ ଯାଆଙ୍କୁ ଅଟକ ରଖି ତଦନ୍ତ କରୁଛି। ପାଣିକୋଇଲି ଥାନା ଅନ୍ତର୍ଗତ ସଗଡି ଗ୍ରାମର ମିର୍ଜା ଅବଦୁଲ ରକିବ୍‌ ବେଗ୍‌ଙ୍କ ଭଉଣୀ ସରବରୀ ବେଗମ୍‌ ଗତ ୨୦୧୫ ମସିହା ନଭେମ୍ବର ୪ରେ ବ୍ରହ୍ମବରଦା ଗ୍ରାମର ସେକ୍‌ ମୁକ୍ତାର ଅଲ୍ଲୀଙ୍କୁ ମୁସଲିମ ସମ୍ପଦାୟ ରୀତିନୀତି ଅନୁସାରେ ବିବାହ ଦେଇଥିଲେ। ବର ପକ୍ଷରୁ ଦାବି ମୁତାବକ ଯୌତୁକ ଦିଆଯାଇଥିଲା। ମାତ୍ର ଅଧିକ ଆଉ ୫୦ ହଜାର ଟଙ୍କା ସହ ଏକ କଲର ଟିଭି ପାଇଁ ଶାଶୁଘର ଲୋକେ ଦାବି କରି ସରବରୀଙ୍କ ଉପରେ ଅତ୍ୟାଚାର କରୁଥିଲେ।

ଅବ୍ୟବସ୍ଥାରେ ଜେନାପୁର ଉପଡାକଘର

ଯାଜପୁର ଅଫିସ,୧୧।୫:ଯାଜପୁର ଜିଲାର ଧର୍ମଶାଳା ବ୍ଲଟ ଅନ୍ତର୍ଗତ ଜେନାପୁର ଉପଡାକଘରରେ ବର୍ତ୍ତମାନ ନାନା ସମସ୍ୟା ଲାଗି ରହିଛି । ଫଳ ସ୍ବରୂପ ଜନ ଅସନ୍ତୋଷ ଦିନକୁ ଦିନ ବୃଦ୍ଧି ପାଇବାରେ ଲାଗିଛି । ବ୍ରିଟିଶ ଅମଳରୁ ଏହା ଜଳସେଚନ ବିଭାଗ ଗୃହରେ ଭଡା ସୂତ୍ରରେ ଚାଲୁଛି । ଅଦ୍ୟାବଧି ଡାକଘରର କର୍ମଚାରୀ ଓ ଗ୍ରାହକଙ୍କ ପାଇଁ କୌଣସି ବ୍ୟବସ୍ଥା କରାଯାଇ ନାହିଁ । ଏଠାରେ କର୍ମଚାରୀଙ୍କ ପାଇଁ ଏକ ଶୌଚାଳୟର ନିହାତି ଆବଶ୍ୟକ ଥିଲେ ମଧ୍ୟ ତାହା ନ ଥିବାରୁ କର୍ମଚାରୀମାନେ ନାନା ସମସ୍ୟାର ସମ୍ମୁଖୀନ ହେଉଛନ୍ତି । ଏଠାରେ ରହିବାର କୌଣସି ସୁବିଧା ନ ଥିବାରୁ ବିଭିନ୍ନ ସମୟରେ ସେମାନେ ବହୁ ଅସୁବିଧା ମଧ୍ୟ ଭୋଗୁଛନ୍ତି । ସାଧାରଣରେ ଡାକ ବିଭାଗ ଏକ ବିଶ୍ୱସ୍ତ ସଂସ୍ଥା ଭାବେ ପରିଚିତ, ହେଲେ ଗ୍ରାହକଙ୍କ ବସିବା ଓ ଲେଖିବା ପାଇଁ ଏଠାରେ ଗୋଟିଏ ଭଲ ଜାଗା ନାହିଁ ।

ଜଣ୍ଡିସରେ ଛାତ୍ରଙ୍କ ମୃତ୍ୟୁ ଅଭିଯୋଗ:  ୧ ମାସରେ ୩ ମୃତ

ଜଣ୍ଡିସରେ ଛାତ୍ରଙ୍କ ମୃତ୍ୟୁ ଅଭିଯୋଗ: ୧ ମାସରେ ୩ ମୃତ

ସମ୍ବଲପୁର,୧୧।୫ (ବ୍ୟୁରୋ)- ସମ୍ବଲପୁର ଜିଲା ଗଙ୍ଗାଧର ମେହେର ବିଶ୍ୱବିଦ୍ୟାଳୟା (ଜିଏମ୍‌ୟୁ) ଛାତ୍ର ଅଲେଖ ସାହୁ (୨୦)ଙ୍କ ଜଣ୍ଡିସରେ ରୋଗରେ ଆକ୍ରାନ୍ତ ହୋଇ ବୁଧବାର ସନ୍ଧ୍ୟାରେ ମୃତ୍ୟୁ ଘଟିଥିବା ପରିବାର ଲୋକେ ଅଭିଯୋଗ କରିଛନ୍ତି। ସେ କଲେଜ ନିକଟସ୍ଥ ଏକ ଘରୋଇ ହଷ୍ଟେଲରେ ରହି ଯୁକ୍ତ ୩ ପଦାର୍ଥ ବିଜ୍ଞାନ ସମ୍ମାନ ତୃତୀୟ ବର୍ଷର ଛାତ୍ରଥିଲେ। ସୂଚନାଯୋଗ୍ୟ, ଅଲେଖ ୧୫ଦିନ ତଳେ ଜଣ୍ଡିସ ରୋଗରେ ଆକ୍ରାନ୍ତ ହୋଇ ବରଗଡ ଜିଲା ଖୁଣ୍ଟପାଲି(ତୁରାଙ୍ଗ) ଗ୍ରାମକୁ ଚାଲି ଯାଇଥିଲେ। ପରିବାର ଲୋକେ ତାଙ୍କୁ ଏପ୍ରିଲ ୨୫ ତାରିଖରେ ବୁର୍ଲା ଡାକ୍ତରଖାନାରେ ଭର୍ତ୍ତି କରିଥିଲେ।

ଟ୍ରକ୍‌ ଧକ୍କାରେ ବାଇକ୍‌ ଚାଳକ ମୃତ:କ୍ଷତିପୂରଣ ଦାବିରେ ବନ୍ଧବାହାଲ-ବେଲପାହାଡ଼ ରାସ୍ତା ଅବରୋଧ

ଟ୍ରକ୍‌ ଧକ୍କାରେ ବାଇକ୍‌ ଚାଳକ ମୃତ:କ୍ଷତିପୂରଣ ଦାବିରେ ବନ୍ଧବାହାଲ-ବେଲପାହାଡ଼ ରାସ୍ତା ଅବରୋଧ

ଲଖନପୁର,୧୧।୫(ଡି.ଏନ୍‌.ଏ.)- ଝାରସୁଗୁଡ଼ା ଜିଲା ବନହରପାଲି ଥାନା ବେଲପାହାଡ଼-ବନ୍ଧବାହାଲ ରାସ୍ତାର ଲିଲାରି ବ୍ରିଜ୍‌ ନିକଟରେ ଗୁରୁବାର ଅପରାହ୍ନ ସାଢ଼େ ୧ଟା ସମୟରେ ଏକ ଟ୍ରକ୍‌ ବାଇକ୍‌କୁ ଧକ୍କା ଦେବାରୁ ବାଇକ୍‌ ଚାଳକ ଭଅଁରଖୋଲ ଗ୍ରାମର ସୁରେନ ବାଗ (୪୦)ଙ୍କ ମୃତ୍ୟୁ ହୋଇଛି। କ୍ଷତିପୂରଣ ଦାବିରେ ମୃତକଙ୍କ ପରିବାର ଓ ସ୍ଥାନୀୟ ଲୋକେ ରାସ୍ତା ଅବରୋଧ କରିଥିଲେ। ଏହି ରାସ୍ତାରେ ଟ୍ରକ୍‌ ଚଳାଚଳ କରିବା ଦ୍ୱାରା ବାରମ୍ବାର ଦୁର୍ଘଟଣା ଘଟି ବହୁ ଧନଜୀବନ ହାନି ଘଟୁଛି। ଏହାର ପ୍ରତିକାର ପାଇଁ ଏହି ରାସ୍ତାରେ କୋଇଲା ବୋଝେଇ ଭାରିଯାନ ଓ ଖାଲି ଟ୍ରକ୍‌ ଚଳାଚଳ ଉପରେ କଟକଣା ଲଗାଇବାକୁ ଲୋକେ ଦାବି କରିଥିଲେ।

ମହାନଦୀ ପାଲଟିଛି ଶୁଷ୍କଶଯ୍ୟା

ମହାନଦୀ ପାଲଟିଛି ଶୁଷ୍କଶଯ୍ୟା

ଅମ୍ବାଭୋନା, ୧୧।୫ (ଡି.ଏନ.ଏ):ଓଡିଶାର ଜୀବନରେଖା ମହାନଦୀ ଏବେ ଶୁଖିଲା ପଡିଛି । ମହାନଦୀ ଶଯ୍ୟାରେ ପାଣି ବଦଳରେ ଏବେ ଖାଲି ବାଲି । ହୀରାକୁଦ ଜଳଭଣ୍ଡାରକୁ ପ୍ରବେଶ କରୁଥିବା ଜଳସ୍ରୋତ ସମ୍ପୂର୍ଣ୍ଣ ଧିମେଇ ଯାଇଛି । ଉପରମୁଣ୍ଡରେ ଛତିଶଗଡ ସରକାରଙ୍କ ବହୁ ସଂଖ୍ୟାରେ ବ୍ୟାରେଜ ଓ ଆନିକଟ ନିର୍ମାଣ ଯୋଗୁ ମହାନଦୀର ଜଳସ୍ରୋତ ଅଟକି ଯାଇଛି । ଫଳରେ ବରଗଡ ଜିଲା ଅମ୍ବାଭୋନା ବ୍ଲକର ଭୈନାତୋରା ଗ୍ରାମ ପଞ୍ଚାୟତ ଅନ୍ତର୍ଗତ ଚିଖିଲିଠାରେ ମହାନଦୀର ଓଡିଶା ପ୍ରବେଶ ପଥ ଶୁଷ୍କ ପ୍ରାୟ। ଯେଉଁଠି ଗ୍ରୀଷ୍ମ ଋତୁରେ ମଧ୍ୟ ଚିଖିଲି-ମହୁଲପାଲି ନଦୀ ଘାଟରେ ୨୦ଫୁଟରୁ ଊର୍ଦ୍ଧ୍ୱ ପାଣି ରହୁଥିଲା ଏବେ ସେଠି ମାତ୍ର ଦୁଇ ଫୁଟ ପାଣି । ମହାନଦୀ ଉପରେ ନିର୍ଭର କରୁଥିବା ମତ୍ସ୍ୟଜୀବୀ ସାଙ୍ଗକୁ ପାର୍ଶ୍ୱବର୍ତ୍ତୀ ଅଞ୍ଚଳର ପରିବା ଚାଷୀ ଏବେ ସଙ୍କଟରେ। ମହାନଦୀରେ ହଠାତ୍‌ ଜଳସଙ୍କଟ ଚାଷୀ ଓ ମତ୍ସ୍ୟଜୀବୀଙ୍କୁ ଦୁର୍ଦ୍ଦିନକୁ ଟାଣି ଆଣିଛି। ଏହି ପରିପ୍ରେକ୍ଷୀରେ ଆସନ୍ତା ୧୬ ତାରିଖରେ ଅମ୍ବାଭୋନା ବ୍ଲକର ଚିଖିଲି ଓ ମହାନଦୀର ଅପରପାର୍ଶ୍ୱରେ ଥିବା ଲଖନପୁର ବ୍ଲକର ସୁଖାସୋଡାଠାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦ୍ୱିତୀୟ ପର୍ଯ୍ୟାୟ ମହାନଦୀ ସୁରକ୍ଷା ଅଭିଯାନର ଶୁଭାରମ୍ଭ କରିବେ ।

ଦୁଇ ବ୍ୟକ୍ତିଙ୍କ ମୃତ୍ୟୁ

ଦୁଇ ବ୍ୟକ୍ତିଙ୍କ ମୃତ୍ୟୁ

ରାଉରକେଲା ଅଫିସ,୧୧।୫- ଗୁରୁତର ଅବସ୍ଥାରେ ରାଉରକେଲା ବଣିଆ ଗେଟ୍‌ ନିକଟରୁ ଉଦ୍ଧାର ହୋଇଥିବା ଅଜଣା ବ୍ୟକ୍ତିଙ୍କର ରାଉରକେଲା ସରକାରୀ ଡାକ୍ତରଖାନା (ଆର୍‌ଜିଏଚ୍‌)ରେ ମୃତ୍ୟୁ ଘଟିଛି। ବ୍ୟକ୍ତି ଜଣକ ସେଠାରେ ଗୁରୁତର ଅବସ୍ଥାରେ ପଡ଼ିଥିଲେ। ସ୍ଥାନୀୟ ଲୋକେ ତାଙ୍କୁ ଉଦ୍ଧାର କରି ଆମ୍ବୁଲାନ୍ସରେ ଆର୍‌ଜିଏଚ୍‌ ନେଇଥିଲେ। ତେବେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପ୍ଲାଣ୍ଟ ସାଇଟ୍‌ ଥାନା ପୋଲିଶ ମୃତଦେହ ଜବତ କରି ବ୍ୟବଚ୍ଛେଦ କରାଇଛି। ମାଜିଷ୍ଟ୍ରେଟଙ୍କ ଉପସ୍ଥିତିରେ ମୃତଦେହ ଦାହ କରିଛି। ଏକ ଅପମୃତ୍ୟୁ ମାମଲା ରୁଜୁ କରି ପୋଲିସ ତଦନ୍ତ ଚଳାଇଛି। ସେହିପରି ରାଉରକେଲା ରେଳ ଷ୍ଟେଶନର ୪ନଂ ଲାଇନରୁ ଜିଆର୍‌ପି ଜଣେ ଅଜଣା ବ୍ୟକ୍ତିଙ୍କ ମୃତଦେହ ଉଦ୍ଧାର କରିଛି। ଏ ନେଇ ରେଲଓ୍ବେ ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।

ବେଆଇନ ପଥର ବ୍ଲାଷ୍ଟିଂ: ଫାଟୁଛି କାନ୍ଥ, ଛାତ: ଥାନାରେ ଅଭିଯୋଗ କଲେ ଉତ୍କଳନଗରବାସୀ

ବେଆଇନ ପଥର ବ୍ଲାଷ୍ଟିଂ: ଫାଟୁଛି କାନ୍ଥ, ଛାତ: ଥାନାରେ ଅଭିଯୋଗ କଲେ ଉତ୍କଳନଗରବାସୀ

ରାଉରକେଲା ଅଫିସ,୧୧।୫- ଦକ୍ଷିଣ ରାଉରକେଲା ଉତ୍କଳନଗର ପଛ ବସ୍ତିକୁ ଲାଗିରହିଥିବା ଏକ ପଥର ଖାଦାନକୁ ନେଇ ପୁଣି ଅସନ୍ତୋଷ ପ୍ରକାଶ ପାଇଛି। ଖାଦାନ ମାଲିକଙ୍କ ମନମାନି ନେଇ ବସ୍ତିବାସିନ୍ଦା ତୀବ୍ର ଅସନ୍ତୋଷ ବ୍ୟକ୍ତ କରିଛନ୍ତି। ଏନେଇ ବୁଧବାର ସାରେ ପ୍ରଭାବିତ ବସ୍ତିବାସିନ୍ଦା ଖାଦାନ ମାଲିକଙ୍କ ବିରୋଧରେ ଟାଙ୍ଗରପାଲି ଥାନାରେ ଅଭିଯୋଗ କରିଥିଲେ। ତେବେ ଥାନାଧିକାରୀ ତହସିଲଦାର କିମ୍ବା ପାନପୋଷ ଉପଜିଲାପାଳଙ୍କ ସହ ଆଲୋଚନା କରିବାକୁ ପରାମର୍ଶ ଦେଇ ଅଭଯୋଗକାରୀଙ୍କୁ ଫେରାଇ ଦେଇଥିବା ଜଣାପଡ଼ିଛି।

ଜିଲା ହସ୍ପିଟାଲ ସ୍ଥାନାନ୍ତର ପ୍ରସଙ୍ଗ: ମୌଖିକ ପ୍ରତିଶ୍ରୁତି ପରେ ଧାରଣା ପ୍ରତ୍ୟାହୃତ

ଜିଲା ହସ୍ପିଟାଲ ସ୍ଥାନାନ୍ତର ପ୍ରସଙ୍ଗ: ମୌଖିକ ପ୍ରତିଶ୍ରୁତି ପରେ ଧାରଣା ପ୍ରତ୍ୟାହୃତ

ଝାରସୁଗୁଡ଼ା ଅଫିସ,୧୧।୫- ହସ୍ପିଟାଲ ସ୍ଥାନାନ୍ତରକୁ ବିରୋଧ କରି ଏପ୍ରିଲ ୧୩ରୁ ଚାଲିଥିବା ଧାରଣା ଗୁରୁବାର ପ୍ରତ୍ୟାହୃତ ହୋଇଛି। ଜିଲାପାଳଙ୍କ ମୌଖିକ ପ୍ରତିଶ୍ରୁତି ପରେ ଧାରଣାରେ ବସିଥିବା ଜନସେବା ଏକତା ମଞ୍ଚର କର୍ମକର୍ତ୍ତାମାନେ ଧାରଣା ପ୍ରତ୍ୟାହାର କରିଛନ୍ତି। ମଙ୍ଗଳବଜାର ସ୍ଥିତ ପୁରୁଣା ହସ୍ପିଟାଲ ପରିସରରେ ଓପିଡି ଏବଂ ସ୍ତ୍ରୀ ଓ ପ୍ରସୂତି ବିଭାଗ ଚାଲିବ। ଏନେଇ ଜିଲାପାଳ ବିଭୂତି ଭୂଷଣ ପଟ୍ଟନାୟକ ରାଜ୍ୟ ସରକାରଙ୍କୁ ଚିଠିଲେଖି ଅନୁରୋଧ କରିବେ ବୋଲି ପ୍ରତିଶ୍ରୁତି ଦେଇଛନ୍ତି।

ରାହୁଲଙ୍କୁ ସୁସ୍ଥ କରାଇଲା ରାଷ୍ଟ୍ରୀୟ ବାଲ୍‌ ସ୍ବାସ୍ଥ୍ୟ କାର୍ଯ୍ୟକ୍ରମ

ରାହୁଲଙ୍କୁ ସୁସ୍ଥ କରାଇଲା ରାଷ୍ଟ୍ରୀୟ ବାଲ୍‌ ସ୍ବାସ୍ଥ୍ୟ କାର୍ଯ୍ୟକ୍ରମ

ସେମିଳିଗୁଡ଼ା, ୧୧।୫(ସ୍ବ.ପ୍ର.):ସେମିଳିଗୁଡ଼ା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ପକ୍ଷରୁ ରାଷ୍ଟ୍ରୀୟ ବାଲ୍‌ ସ୍ବାସ୍ଥ୍ୟ କାର୍ଯ୍ୟକ୍ରମ (ଆର୍‌ବିଏସ୍‌କେ) ଅଧୀନରେ ସ୍ଥାନୀୟ ସରସ୍ବତୀ ଶିଶୁ ମନ୍ଦିରରେ ଗତ ଡିସେମ୍ବରରେ ଏକ ସ୍ବାସ୍ଥ୍ୟ ଶିବିର ଅନୁଷ୍ଠିତ ହୋଇଥିଲା। ଡାକ୍ତର ସୁଶେନ କୁମାର ପାତ୍ର (ଏମ୍‌ଓଆଇସି)ଙ୍କ ତତ୍ତ୍ୱାବଧାନରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଡାକ୍ତର ଚଣ୍ଡୀ ପ୍ରସାଦ ପାତ୍ର ଓ ଡାକ୍ତର ସସ୍ମିତା ରାଉତ ଉପସ୍ଥିତ ଥିଲେ। ରଞ୍ଜିତ ପାଣିଗ୍ରାହୀଙ୍କ ପୁଅ ରାହୁଲଙ୍କୁ ଜନ୍ମଗତ ହୃଦରୋଗ ହୋଇଥିବା ଶିବିରରେ ପରୀକ୍ଷା ବେଳେ ଜଣା ପଡିଥିଲା। ରାହୁଲଙ୍କୁ ବିଶାଖାପାଟଣାସ୍ଥିତ ଆପୋଲୋ ହସ୍ପିଟାଲକୁ ଚିକିତ୍ସା ପାଇଁ ପଠାଯାଇଥିଲା। ସେ ଗତ ୧୧ ଡିସେମ୍ବରରେ ସେଠାରେ ପହଞ୍ଚତ୍ଥିଲେ। ୧୮ରେ ତାଙ୍କର ଅସ୍ତ୍ରୋପଚାର କରାଯାଇଥିଲା। ସେ ସେଠାରୁ ୨୯ ଡିସେମ୍ବରରେ ସମ୍ପୂଣ୍ଣ ସୁସ୍ଥ ହୋଇ ଫେରିଥିଲେ। ଚିକିତ୍ସା ଅର୍ଥ ବାବଦକୁ ତାଙ୍କୁ ରାଜ୍ୟ ସରକାରଙ୍କ ପକ୍ଷରୁ ୧ଲକ୍ଷ ୫୦ ହଜାର ଟଙ୍କା ଦିଆଯାଇଥିଲା। ରାହୁଲଙ୍କ ମା’ ବାପା ଏହି ଅସ୍ତ୍ରୋପଚାର ପାଇଁ ରାଜ୍ୟ ସରକାର, ଡାକ୍ତର ଓ ବିଦ୍ୟାଳୟ ଶିକ୍ଷୟିତ୍ରୀ ଶିକ୍ଷକଙ୍କ ସମେତ ରାଷ୍ଟ୍ରୀୟ ବାଲ୍‌ ସ୍ବାସ୍ଥ୍ୟ କାର୍ଯ୍ୟକ୍ରମକୁ କୃତଜ୍ଞତା ଜଣାଇଛନ୍ତି।

ପ୍ରଚଣ୍ଡ ତାତିରେ ଜନଜୀବନ ଅସ୍ତବ୍ୟସ୍ତ

ରାୟଗଡା ଅଫିସ୍‌, ୧୧।୫-ରାୟଗଡା ସହର ସମେତ ଏହାର ଆଖପାଖ ଅଞ୍ଚଳରେ ବର୍ତ୍ତମାନ ଗରମର ପ୍ରକୋପ ପ୍ରବଳ ଭାବେ ଅନୁଭୂତ ହେଉଛି। ଗତ ୪ଦିନ ହେବ ଯେଉଁଭଳି ଗରମ ଅନୁଭବ ହେଉଛି ଏହିଭଳି ପୂର୍ବରୁ କେବେ ହୋଇନଥିବା କୁହାଯାଉଛି। ଗରମ ଏହି ଜିଲାରେ ମୁଖ୍ୟତଃ କେବଳ ମେ ମାସ ଶେଷ ସପ୍ତାହରେ ହିଁ ପରିଲିକ୍ଷିତ ହେଉଥିବା ବେଳେ ଚଳିତ ବର୍ଷ କିନ୍ତୁ ପ୍ରଥମରୁ ତାପମାତ୍ରା ବହୁ ଅଧିକ ରହିଛି। ରାୟଗଡା ସହରରେ ୩୯ରୁ ୪୦ଡିଗ୍ରୀ ତାପମାତ୍ରା ରହୁଥିବା ବେଳେ ସହର ନିକଟସ୍ଥ ଗ୍ରାମାଞ୍ଚଳ ଓ ଶିଳ୍ପାଞ୍ଚଳରେ ମଧ୍ୟ ତାପମାତ୍ରା ୩୯ ଛୁଇଁଛି। ଏହିଭଳି ତାପମାତ୍ରା ଯୋଗୁଁ ଦିନ ୧୧ଟାରୁ ସନ୍ଧ୍ୟା ୪ଟା ପର୍ଯ୍ୟନ୍ତ ରାସ୍ତାଘାଟ ଶୂନଶାନ ହୋଇପଡୁଛି।

ବିଦ୍ୟୁତ କାଟ, ଲୋଭୋଲଟେଜରେ ଲୋକେ ଅତିଷ୍ଠ

ନବରଙ୍ଗପୁର,୧୧।୫(ବି.ପ୍ର.)- ଦିନକୁ ଦିନ ବଢୁଛି ତାତି। ଗରମ ଦାଉରେ ଜନଜୀବନ ଅସ୍ତବ୍ୟସ୍ତ ହୋଇପଡିଛି। ଏହାକୁ ଦ୍ୱିଗୁଣିତ କରିଛି ନବରଙ୍ଗପୁର ଜିଲାରେ ଅଘୋଷିତ ବିଦ୍ୟୁତ କାଟ ଓ ଲୋଭୋଲେଟେ। ଏଥିଯୋଗୁ ଜନସାଧାରଣ ଅତିଷ୍ଠ ହୋଇ ପଡିଛନ୍ତି। ସାମାନ୍ୟ ପତ୍ର ହଲିଲେ ଏଠାରେ ବିଦ୍ୟୁତ କାଟ ହେଉଛି । ବିନା କାରଣରେ ଦିନରେ ପ୍ରତି ୧୫ ମିନିଟରେ ବିଦ୍ୟୁତ କାଟ କରାଯାଉଛି । ଏହାର କାରଣ କଣ କେହି ଜାଣନ୍ତି ନାହିଁ । ବିଭାଗୀୟ ଯନ୍ତ୍ରୀଙ୍କୁ ପଚାରିଲେ ମରାମତି କାର୍ଯ୍ୟ ଚାଲିଛି ବୋଲି ଉତ୍ତର ମିଳୁଛି । କିନ୍ତୁ ଏହା ଦିନେ ଦି ଦିନର କଥା ନୁହେଁ ମାସ ମାସ ଧରି ଏଭଳି ଚାଲିଛି । ଜିଲାରେ ଲୋଭୋଲଟେଜ ଅଭିଯୋଗ ପରେ ଡାବୁଗାଁ ଠାରେ ଗ୍ରୀଡ ସ୍ଥାପନ କରାଗଲା ।

ଛତିଶଗଡ଼ର ଆଉ ଏକ ଷଡ଼ଯନ୍ତ୍ର: କେଲୋ ପ୍ରକଳ୍ପରୁ ତଳମୁଣ୍ଡକୁ ଜଳପ୍ରବାହ ବନ୍ଦ: ସ୍ଥିତି ପରଖିଲା ମହାନଦୀ ସୁରକ୍ଷା ଅଭିଯାନ

ଛତିଶଗଡ଼ର ଆଉ ଏକ ଷଡ଼ଯନ୍ତ୍ର: କେଲୋ ପ୍ରକଳ୍ପରୁ ତଳମୁଣ୍ଡକୁ ଜଳପ୍ରବାହ ବନ୍ଦ: ସ୍ଥିତି ପରଖିଲା ମହାନଦୀ ସୁରକ୍ଷା ଅଭିଯାନ

ଝାରସୁଗୁଡ଼ା ଅଫିସ,୧୧।୫- ମହାନଦୀ ଜଳକୁ ନେଇ ଓଡ଼ିଶା ଓ ଛତିଶଗଡ଼ ମଧ୍ୟରେ ବିବାଦ ଥମୁନାହିଁ। ଗୋଟିଏପଟେ ଛତିଶଗଡ଼ ସରକାର ଆଇନଗତ କଟକଣାକୁ ବେଖାତିର କରି ବ୍ୟାରେଜ୍‌ ନିର୍ମାଣ ଓ ଅଣମୌସୁମୀ ସମୟରେ ପାଣି ଅଟକାଇବା ଭଳି ବେଆଇନ କାମ କରିଚାଲିଛି। ଅନ୍ୟପଟେ ଓଡ଼ିଶା ସରକାର ମହାନଦୀ ଟ୍ରିବ୍ୟୁନାଲ ଜରିଆରେ ନ୍ୟାୟିକ ଲଢ଼େଇ ଜାରି ରଖିଛନ୍ତି। ତେବେ ମହାନଦୀ ଜଳ ବିବାଦକୁ ନେଇ କେନ୍ଦ୍ର ସରକାରଙ୍କ ଟାଳଟୁଳ ନୀତି ଅବଲମ୍ବନ ବିରୋଧରେ ମେ ୧୬ରୁ ଆରମ୍ଭ ହେବ ମହାନଦୀ ସୁରକ୍ଷା ଅଭିଯାନ ଆନ୍ଦୋଳନର ଦ୍ୱିତୀୟ ପର୍ଯ୍ୟାୟ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଝାରସୁଗୁଡ଼ା ଜିଲା ଲଖନପୁର ବ୍ଳକ୍‌ ସୁଖାସୋଡ଼ାଠାରେ ଏହି ଆନ୍ଦୋଳନର ବିଗୁଲ ଫୁଙ୍କିବେ।

ବଳାତ୍କାର ଅଭିଯୋଗ: ଜେଲ ଗଲେ ଯୁବକ

ବଳାତ୍କାର ଅଭିଯୋଗ: ଜେଲ ଗଲେ ଯୁବକ

ତୁମୁଡିବନ୍ଧ,୧୧।୫(ଡି.ଏନ୍‌.ଏ.):ହାଟକୁ ଯାଉଥିବାବେଳେ ଜନୈକ ଯୁବତୀଙ୍କୁ ବାହା ହେବାକୁ ଘରୁ ଉଠାଇ ନେଇ ୩ଦିନ ରଖିବା ପରେ ଯୁବତୀଙ୍କ ଜାତି ସମ୍ପର୍କରେ ଜାଣିବା ପରେ ପ୍ରତ୍ୟାଖ୍ୟାନ କରିଛି ଯୁବକ ଜଣକ। ଶେଷରେ ଅନ୍ୟ ଉପାୟ ନ ପାଇ ଥାନାର ଦ୍ୱାରସ୍ଥ ହୋଇଛନ୍ତି ଯୁବତୀ। ତାଙ୍କୁ ବଳାତ୍କାର କରାଯାଇଥିବା ତୁମୁଡିବନ୍ଧ ଥାନାରେ ଅଭିଯୋଗ କରିଛନ୍ତି। ପ୍ରକାଶ ଯେ, ବାଲିଗୁଡା ଥାନା ଅନ୍ତର୍ଗତ କିଲୁପଡା ଗ୍ରାମର ଶିକ୍ଷା ମଳିକଙ୍କର ବାଲିପଡାରେ ଚାଲିଥିବା ଯଜ୍ଞରେ ତୁମୁଡିବନ୍ଧ ଥାନା ଅନ୍ତର୍ଗତ ଜନୈକ ଯୁବତୀଙ୍କ ସହ ଦେଖା ହୋଇଥିଲା। ସେବେଠାରୁ ସେ ଯୁବତୀଙ୍କୁ ଉଠାଇ ନେବାକୁ ଯୋଜନା କରିଥିଲେ। ଚଳିତମାସ ୨ ତାରିଖରେ ଯୁବତୀ ଜଣକ କୁର୍ତ୍ତମଗଡ ହାଟକୁ ଯାଉଥିବାବେଳେ ଡାଙ୍ଗାଡପଦର ଛକଠାରେ ଯୁବତୀଙ୍କୁ ଉଠାଇ ନେଇଥିଲେ। ୩ଦିନ ଘରେ ରଖିବା ପରେ ସେ ଅନ୍ୟ ଜାତିର ଜାଣିବା ପରେ ଘରୁ ବାହାର କରିବା ସହ ଘଟଣା ବାହାରେ ପ୍ରଘଟ କଲେ ମାରିଦେବାକୁ ଧମକ ଦେଇଥିଲେ। ଏନେଇ ପୀଡିତା ଗତ ବୁଧବାର ଅପରାହ୍ନରେ ତୁମୁଡିବନ୍ଧ ଥାନାରେ ଲିଖିତ ଅଭିଯୋଗ କରିବା ପରେ ପୋଲିସ ୩୨/୧୮ରେ ଏକ ମାମଲା ରୁଜୁ କରି ଅଭିଯୁକ୍ତଙ୍କୁ ଗିରଫ କରି ଗୁରୁବାର କୋର୍ଟ ଚାଲାଣ କରିଛି। ଅନ୍ୟପକ୍ଷରେ ତୁମୁଡିବନ୍ଧ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ପୀଡିତାଙ୍କ ଡାକ୍ତରୀମାଇନା ପରେ ବୟାନ ରେକର୍ଡ ପାଇଁ ବାଲିଗୁଡା କୋର୍ଟ ପଠାଯାଇଥିବା ତୁମୁଡିବନ୍ଧ ଥାନା ଅଧିକାରୀ ବାବାଶଙ୍କର ସରାଫ କହିଛନ୍ତି।

ଲାଞ୍ଚ ନେବା ବେଳେ ଆର୍‌ଆଇ ଗିରଫ

ଲାଞ୍ଚ ନେବା ବେଳେ ଆର୍‌ଆଇ ଗିରଫ

ଶଙ୍କରାଖୋଲ,୧୧।୫(ଡି.ଏନ.ଏ.):କନ୍ଧମାଳ ଜିଲା ଚକାପାଦ ବ୍ଲକ ଶଙ୍କରାଖୋଲ ରାଜସ୍ବ ନିରୀକ୍ଷକ ସଞ୍ଜୟ କୁମାର ସାହୁ ଲାଞ୍ଚ ନେବା ବେଳେ ଫୁଲବାଣୀ ଭିଜିଲାନ୍ସ ଦ୍ୱାରା ଗୁରୁବାର ଗିରଫ ହୋଇଛନ୍ତି।ଲ୍ୟାଣ୍ଡ ହୋଲଡିଂ ତଦନ୍ତ କରି ଚକାପାଦ ତହସିଲକୁ ପଠାଇବା ପାଇଁ ସୁବଳ କୁମାର ମଲିକଠାରୁ ଆରଆଇ ସଞ୍ଜୟ ୩ ହଜାର ଟଙ୍କାର ଲାଞ୍ଚ ନେଉଥିବା ବେଳେ ଫୁଲବାଣୀ ଭିଜିଲାନ୍ସ ବିଭାଗ ଦ୍ୱାରା ଧରାପଡିଛନ୍ତି। ଆରାବାକା ପଞ୍ଚାୟତର କାମ୍ବ୍ରିକିଆ ଗ୍ରାମର ସୁବଳଙ୍କ ବଡବାପା ଲିଙ୍ଗରାଜ ମଲିକଙ୍କର ଲ୍ୟାଣ୍ଡ ହୋଲଡିଂ ତଦନ୍ତ କରି ଚକାପାଦ ତହସିଲକୁ ପଠାଇବା ପାଇଁ ଶଙ୍କରାଖୋଲ ରାଜସ୍ବ ନିରୀକ୍ଷକଙ୍କ କାର୍ଯ୍ୟାଳୟକୁ ଯାଇଥିଲେ।ଏହାପରେ ଆରଆଇ ସାହୁ ଉକ୍ତ କାର୍ଯ୍ୟ କରିବା ପାଇଁ ସୁବଳଙ୍କୁ ୩ ହଜାର ଟଙ୍କା ଲାଞ୍ଚ ମାଗିଥିଲେ।

ଅଚିହ୍ନା ମହିଳାଙ୍କ ମୃତଦେହ ଉଦ୍ଧାର,  ହତ୍ୟା ସନ୍ଦେହ

ଅଚିହ୍ନା ମହିଳାଙ୍କ ମୃତଦେହ ଉଦ୍ଧାର, ହତ୍ୟା ସନ୍ଦେହ

ଚିକିଟି,୧୧।୫(ଡି.ଏନ.ଏ.):ବ୍ରହ୍ମପୁର ପୋଲିସ ଜିଲା ଗୋଳନ୍ଥରା ଥାନା ଅଧୀନ ସୋରଳ ଜଙ୍କସନ ନିକଟ ଏକ ପରିତ୍ୟକ୍ତ ସ୍ଥାନରୁ ଗୁରୁବାର ସକାଳେ ଜଣେ ଅଚିହ୍ନା ମହିଳାଙ୍କ ଗଳିତ ମୃତଦେହକୁ ପୋଲିସ ଉଦ୍ଧାର କରିଛି। ମୃତା ମହିଳାଙ୍କ ବୟସ ପ୍ରାୟ ୪୫ ବର୍ଷ ହେବ। ପାରିପାର୍ଶି୍ବକ ସ୍ଥିତିରୁ ଏହା ଏକ ହତ୍ୟାକାଣ୍ଡ ବୋଲି ସନ୍ଦେହ କରାଯାଉଛି। ବ୍ରହ୍ମପୁର ବଡ ମେଡିକାଲରେ ମୃତଦେହ ବ୍ୟବଚ୍ଛେଦ କରାଯାଇଛି। ଏ ନେଇ ଗୋଳନ୍ଥରା ଥାନା ପକ୍ଷରୁ ନଂ.୯/୨୦୧୮ରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ଘଟଣାର ତଦନ୍ତ ଚାଲିଥିବା ଆଡିଶନାଲ୍‌ ଆଇଆଇସି ବସନ୍ତ କୁମାର ସେଠୀ କହିଛନ୍ତି। ପ୍ରକାଶ ଯେ, ସୋରଳ ଜଙ୍କସନ ନିକଟ ରାସ୍ତାରେ ଦୁର୍ଗନ୍ଧ ହେଉଥିବା ଓ ମୃତଦେହ ପଡିଥିବା ଦେଖି ଲୋକେ ଥାନାକୁ ଖବର ଦେଇଥିଲେ। ପୋଲିସ ପହଞ୍ଚତ୍ ମହିଳାଙ୍କ ଗଳିତ ମୃତଦେହକୁ ଜବତ କରିଥିଲା। ପରେ ସାଇଣ୍ଟିଫିକ୍‌ ଟିମ୍‌ ଏବଂ ସନ୍ଧାନୀ କୁକୁର ସହାୟତାରେ ତଦନ୍ତ କରି ଫେରିଛନ୍ତି। ସନ୍ଧ୍ୟାସୁଦ୍ଧା ମୃତଦେହ ଚିହ୍ନଟ ହୋଇପାରିନାହିଁ।

ଶର୍ଟ ସର୍କିଟରୁ ଅଗ୍ନିକାଣ୍ଡ: ୨୦ ବଖରା ଭସ୍ମୀଭୂତ

ଶର୍ଟ ସର୍କିଟରୁ ଅଗ୍ନିକାଣ୍ଡ: ୨୦ ବଖରା ଭସ୍ମୀଭୂତ

ପୋଲସରା,୧୧।୫(ଡି.ଏନ.ଏ.):ପୋଲସରା ବ୍ଲକ ପାଣ୍ଡିରିପଡ଼ା ପଞ୍ଚାୟତ ପାଣ୍ଡିରିପଡ଼ା ବଡ଼ ସାହିରେ ଗୁରୁବାର ପୂର୍ବାହ୍ନରେ ଅଗ୍ନିକାଣ୍ଡ ଘଟି ୯ ପରିବାରର ୨୦ ବଖରା ଜଳିଯାଇଛି। ଏଥିରେ କେଶବ ନାୟକ, ଦୁର୍ଯୋଧନ ନାୟକ, ବିଜୟ ନାୟକ, ଭାଗବତ ନାୟକ, ତ୍ରିନାଥ ନାୟକ, ସନ୍ତୋଷ ନାୟକ, ଉଦୟନାଥ ନାୟକ, ଅଭାଗିନୀ ନାୟକ ଓ ବିନାୟକ ବିଶୋୟୀ କ୍ଷତିଗ୍ରସ୍ତ ହୋଇଛନ୍ତି। ସେମାନଙ୍କର ସମସ୍ତ ଆସବାବପତ୍ର ଧାନ ଚାଉଳ, ମୁଗ ବିରି ଓ ପ୍ରାୟ ଦୁଇ ଲକ୍ଷରୁ ଊର୍ଦ୍ଧ୍ୱ ଟଙ୍କାର ସମ୍ପତ୍ତି ପୋଡ଼ି ପାଉଁଶ ହୋଇଯାଇଛି। ଅଗ୍ନିକାଣ୍ଡ ଖବର ପାଇ ପୋଲସରାରୁ ଅଗ୍ନିଶମ ବିଭାଗ କର୍ମଚାରୀମାନେ ପହଞ୍ଚି ନିଆଁକୁ ଆୟତ୍ତ କରିଥଲେ। ବିଦ୍ୟୁତ ଶର୍ଟ ସର୍କିଟରୁ ଅଗ୍ନିକାଣ୍ଡ ଘଟିଥିବା ଅଗ୍ନିଶମ ବିଭାଗର ରାଜେନ୍ଦ୍ର କୁମାର ସ୍ବାଇଁ ସୂଚନା ଦେଇଛନ୍ତି। ବିଧାୟକ ଶ୍ରୀକାନ୍ତ ସାହୁ ବିପନ୍ନମାନଙ୍କୁ ଭେଟି ୫୦୦ ଟଙ୍କା ଲେଖାଏଁ ସହାୟତା ଦେବା ସହ ସେମାନଙ୍କୁ ବିଜୁ ପକ୍କାଘର ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେଇଛନ୍ତି।

ଚାଷୀଙ୍କୁ ଋଣ ଛାଡ଼, ଫସଲବୀମା ସହାୟତା ପ୍ରଦାନ ଦାବି:ଋଷିକୁଲ୍ୟା ରୟତ ମହାସଭାର ବିକ୍ଷୋଭ

ଚାଷୀଙ୍କୁ ଋଣ ଛାଡ଼, ଫସଲବୀମା ସହାୟତା ପ୍ରଦାନ ଦାବି:ଋଷିକୁଲ୍ୟା ରୟତ ମହାସଭାର ବିକ୍ଷୋଭ

ଛତ୍ରପୁର,୧୧।୫(ଡି.ଏନ.ଏ.):ଚାଷୀଙ୍କୁ ଋଣ ଛାଡ ଓ ଫସଲବୀମା ସହାୟତା ପ୍ରଦାନ ଦାବିରେ ଗୁରୁବାର ଋଷିକୁଲ୍ୟା ରୟତ ମହାସଭା ପକ୍ଷରୁ ଜିଲାପାଳଙ୍କ କାର୍ଯ୍ୟାଳୟ ଆଗରେ ବିକ୍ଷୋଭ ପ୍ରଦର୍ଶନ କରାଯାଇଥିଲା। ପରେ ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ଏକ ସ୍ମାରକପତ୍ର ଅତିିରିକ୍ତ ଜିଲାପାଳ କବୀନ୍ଦ୍ର ସାହୁଙ୍କୁ ପ୍ରଦାନ କରାଯାଇଥିଲା। ପ୍ରାରମ୍ଭରେ ଚାଷୀମାନେ ଶୋଭାଯାତ୍ରାରେ ଆସି ଜିଲାପାଳଙ୍କ କାର୍ଯ୍ୟାଳୟ ନିକଟରେ ପହଞ୍ଚତ୍ଥିଲେ। ରୟତ ମହାସଭା ପକ୍ଷରୁ କୁହାଯାଇଛି ଗଞ୍ଜାମ ଜିଲାରେ ବାରମ୍ବାର ପ୍ରାକୃତିକ ବିପର୍ଯ୍ୟୟ ସହ ଜଳସେଚନ ସମ୍ୟା ଓ ଫସଲର ଅଭାବୀ ବିକ୍ରି ଯୋଗୁ ଚାଷୀଙ୍କ ଆର୍ଥିକ ମେରୁଦଣ୍ଡ ଭାଙ୍ଗିଯାଇଛି। ଗଞ୍ଜାମ ଜିଲା ଏକ କୃଷିଭିତ୍ତିକ ଜିଲା। ଗତ ବର୍ଷ ଚକଡା ରୋଗ ପୋକ ଓ ଅଦିନିଆ ବର୍ଷା ଯୋଗୁ ଧାନ ଫସଲ ନଷ୍ଟ ହୋଇଥିଲା। ଚାଷୀମାନେ ଫସଲ ବୀମା ବାବଦରେ ପ୍ରିମିୟମ ଜମା କରିଥିଲେ। ମାତ୍ର ଫସଲ ବୀମା ସହାୟତା ମିଳୁ ନ ଥିବା ଋଷିକୁଲ୍ୟା ରୟତ ମହାସଭାର ସମ୍ପାଦକ ସୀମାଂଞ୍ଚଳ ନାହାକ ଅଭିଯୋଗ କରିଛନ୍ତି।

କୁଠାରି ମନ୍ଦିରରେ ଦେବୋତ୍ତର କମିଶନର୍‌ଙ୍କ ଚଢ଼ାଉ :ହୁଣ୍ଡି, ୪ ରୁମ୍‌ ସିଲ୍‌

କୁଠାରି ମନ୍ଦିରରେ ଦେବୋତ୍ତର କମିଶନର୍‌ଙ୍କ ଚଢ଼ାଉ :ହୁଣ୍ଡି, ୪ ରୁମ୍‌ ସିଲ୍‌

ବ୍ରହ୍ମପୁର ଅଫିସ୍‌,୧୧।୫:ବ୍ରହ୍ମପୁର ଗେଟ୍‌ ବଜାରସ୍ଥିତ କୁଠାରି ମନ୍ଦିରରେ ଗୁରୁବାର ରାଜ୍ୟ ଦେବୋତ୍ତର କମିଶନର୍‌ ବିରଜା ପ୍ରସାଦ ଦତ୍ତ ଚଢ଼ାଉ କରିଛନ୍ତି। ଏହି ସମୟରେ ସେ ମନ୍ଦିରର ଆୟବ୍ୟୟ ଏବଂ ପରିଚାଳନା ସମ୍ପର୍କରେ ତଦନ୍ତ କରିଥିଲେ। ଦେବୋତ୍ତର କମିଶନ ତରଫରୁ ମନ୍ଦିରରେ ଏକ ଟ୍ରଷ୍ଟ ବୋର୍ଡ଼ ରହିଛି। କିନ୍ତୁ ମନ୍ଦିରର ଜଣେ ପୂଜାରୀ ଏହି ବୋର୍ଡ଼କୁ କାର୍ଯ୍ୟ କରିବାକୁ ଦେଉନାହାନ୍ତି। ଏପରିକି ମନ୍ଦିରର ଆୟ ଉପରେ ଏକପାଖିଆ ଅଧିକାର ଜାହିର କରିଛନ୍ତି। ଫଳରେ ମନ୍ଦିରରେ ବ୍ୟାପକ ଆର୍ଥତ୍କ ଅନିୟମିତତା ହେଉଥିବା କମିଶନର୍‌ ଦତ୍ତ ଜାଣିବାକୁ ପାଇଥିଲେ। ବୋର୍ଡ଼ର ସଦସ୍ୟ ଏବଂ ଅନ୍ୟାନ୍ୟ ବ୍ୟକ୍ତିଙ୍କ ସହ ଆଲୋଚନା କରିଥିଲେ। ଅନିୟମିତତା ଯୋଗୁ ମନ୍ଦିରର ହୁଣ୍ଡିକୁ ସିଲ୍‌ କରିଦେଇଥିଲେ। ଏଥିସହ ୪ଟି ରୁମ୍‌କୁ ଆର୍ଥତ୍କ କାରବାର ପାଇଁ ପୂଜାରୀ ବ୍ୟବହାର କରୁଥିବା ଜଣାପଡ଼ିଥିଲା। ଏଣୁ ଏହି ୪ଟି ରୁମ୍‌କୁ ମଧ୍ୟ ସିଲ୍‌ କରିଦେଇଛନ୍ତି।

ଅଙ୍ଗନୱାଡି କେନ୍ଦ୍ର ନିର୍ମାଣରେ ବିଳମ୍ବ

ଅଙ୍ଗନୱାଡି କେନ୍ଦ୍ର ନିର୍ମାଣରେ ବିଳମ୍ବ

ତେଲକୋଇ, ୧୧।୫(ଡି.ଏନ.ଏ.): ତେଲକୋଇ ବ୍ଲକ ଖୁଣ୍ଠାପଡ଼ା ପଞ୍ଚାୟତ ଅଧୀନ କୁଲାଡେରା ଗ୍ରାମର ମୁଣ୍ଡାସାହି ଅଙ୍ଗନୱାଡି କେନ୍ଦ୍ର ନିର୍ମାଣରେ ବିଳମ୍ବ ହେଉଥିବାରୁ ଛାତ୍ରୀଛାତ୍ର ବାରଣ୍ଡାରେ ବସି ପାଠ ପଢ଼ୁଛନ୍ତି। ଉକ୍ତ କେନ୍ଦ୍ରରେ ୨୬ ଛାତ୍ରୀଛାତ୍ର ଅଧ୍ୟୟନ କରୁଛନ୍ତି। ଗ୍ରାମବାସୀଙ୍କ ଅଭିଯୋଗ କ୍ରମେ ଶିଶୁ ପ୍ରକଳ୍ପ ବିଭାଗ ପକ୍ଷରୁ ୨୦୧୬-୧୭ରେ ନୂତନ ଗୃହ ନିର୍ମାଣ କରିବା ଅନୁମତି ଦିଆଯାଇଥିଲା। ୨ ବର୍ଷ ହେବ ଗୃହ ନିର୍ମାଣ ଆରମ୍ଭ ହୋଇଥିଲେ ହେଁ ଅଦ୍ୟାବଧି ସମ୍ପୂର୍ଣ୍ଣ ହୋଇପାରିନାହିଁ। ଏ ପରିସ୍ଥଳେ ମଣ୍ଡପରେ ଛାତ୍ରୀଛାତ୍ର ପାଠ ପଢ଼ୁଛନ୍ତି। ରୋଷେଇ ମଣ୍ଡପ ତଳେ ହେଉଥିବାରୁ କୁକୁର, ବଳଦ ଚରାବୁଲା ଯୋଗୁଁ ସମସ୍ୟା ସୃଷ୍ଟି ହେଉଛି। ଅଙ୍ଗନୱାଡି କର୍ମୀ ମନିସା ଚାତାର କହିଛନ୍ତି ଯେ, ଗୃହ ନିର୍ମାଣରେ ବିଳମ୍ବ ହେଉଛି। ଛାତ୍ରୀଛାତ୍ରଙ୍କୁ ବହୁ ଅସୁବିଧାରେ ପାଠ ପଢ଼ାଉଛି। ଖାଦ୍ୟ ରାନ୍ଧିବା ବେଳେ ସତର୍କ ଅବଲମ୍ବନ କରୁଛି।

ରାମଙ୍କ ଚିକିତ୍ସାରେ ଅର୍ଥ ବାଧକ

ରାମଙ୍କ ଚିକିତ୍ସାରେ ଅର୍ଥ ବାଧକ

କୋଳିମାଟି, ୧୧।୫-କେନ୍ଦୁଝର ଜିଲା ଆନନ୍ଦପୁର ବ୍ଲକ କୋଳିମାଟି ପଞ୍ଚାୟତ କୁମ୍ଭାର ସାହିର ରାମ ବେହେରା ନାମକ ଜଣେ କୁମ୍ଭାର କ୍ୟାନସରରେ ପୀଡିତ ହୋଇଛନ୍ତି। ତାଙ୍କ ଚିକିତ୍ସାରେ ଅର୍ଥ ବାଧକ ସାଜିଛି। ୨ ମାସ ହେବ (ଲିଭର କ୍ୟନ୍‌ସର)ରେ ପୀଡିତ ହୋଇ ବିଛଣା ପଡି ରହିଛନ୍ତି। ତାଙ୍କର ଏକ ମାତ୍ର ପୁଅ କୋଳମଣୀ ବେହେରା। ସେ ବାପାଙ୍କୁ କଟକ ବଡ ମେଡିକାଲକୁ ନେଇଥିଲେ। ସେଠାରେ ୫ ଦିନ ଚକିତ୍ସା କରିଲା ପରେ ପଇସା ଅଭାବରୁ ବାପାଙ୍କୁ ଘରକୁ ନେଇଆସିଛନ୍ତି। ରାମ ମାଟି ଦ୍ୱାରା ଅନେକ ମାଟି ହାଣ୍ଡି, ମାଟିର ଦୀପ ନାନା ପ୍ରକାର ଜିନିଷ ତିଆରି କରି ପରିବାର ପୋଷୁଥିଲେ। ସେ ଜଣେ ଭଲ ମଣିଷ। ସମସ୍ତଙ୍କ ସାଥୀରେ ସେ ମିଳାମିଶା କରୁଥିଲେ।

ବୃକ୍ଷ ରୋପଣରେ ଦୁର୍ନୀତି

ବୃକ୍ଷ ରୋପଣରେ ଦୁର୍ନୀତି

କେନ୍ଦୁଝର, ୧୧।୫(ସ୍ବ.ପ୍ର.): କେନ୍ଦୁଝର ଜିଲାରେ ବିଭିନ୍ନ ସ୍କିମରେ ବୃକ୍ଷ ରୋପଣ ନାମରେ ଅର୍ଥ ବାଟମାରଣା ହୋଇଛି। ଫଳକ ଲଗାଯାଇଛି। କିନ୍ତୁ ବୃକ୍ଷର ଦେଖା ମିଳୁନି। ମନରେଗା ଯୋଜନାରେ କେନ୍ଦୁଝର ବନଖଣ୍ଡ ପକ୍ଷରୁ ୨୦୧୩-୧୪ରେ ଦେଓବନ୍ଧଠାରୁ ଆଙ୍କଲପଡା (ରୁଟିଶୀଳା) ପର୍ଯ୍ୟନ୍ତ ରାସ୍ତା କଡ଼ରେ ପଥପାର୍ଶ୍ୱ ବନୀକରଣ ସ୍କିମରେ ବିଭିନ୍ନ କିସମର ଗଛ ଲଗାଯାଇଥିବା ନେଇ ରୁଟିଶୀଳା ଗ୍ରାମ ନିକଟରେ ଲାଗିଥିବା ଫଳକରୁ ଜଣାପଡୁଛି। ଉକ୍ତ ରାସ୍ତା କଡରେ ଗୋଟିଏ ହେଲେ ଗଛ ଦେଖିବାକୁ ମିଳୁନାହିଁ। ୭.୫ କିମି ଦୀର୍ଘ ଏହି ୩୭୫୦ଟି କଦମ୍ବ, ନିମ, ଶିଶୁ, ନିଦ୍ରାବତୀ, ବର, ଚମ୍ପା ଆଦି ବଡ ଓ ମୂଲ୍ୟବାନ କିସମର ଗଛ ରାସ୍ତାର ଉଭୟ ପାର୍ଶ୍ୱରେ ରୋପଣ କରାଯାଇଥିବା ନେଇ ଫଳକରେ ଉଲ୍ଲେଖ ଅଛି। ଗଛ କେଉଁଠି ଲଗାଗଲା ଏବଂ ଏବାବଦକୁ ଅର୍ଥ କେତେକ ଖର୍ଚ୍ଚ କରାଯାଇଛି ତାହାର ତଦନ୍ତ କରିବାକୁ ଦାବି ହେଉଛି। ଗଛ ନ ଲଗାଇ ଅର୍ଥ ହଡପ କରାଯାଇଥିବା ଅଭିଯୋଗ ହେଉଥିବା ବେଳେ ଏ ନେଇ ତଦନ୍ତ କରାଗଲେ ସତ୍ୟାସତ୍ୟ ପଦାକୁ ଆସିପାରିବ ବୋଲି ସ୍ଥାନୀୟ ଲୋକେ ମତବ୍ୟକ୍ତ କରୁଛନ୍ତି।

ସଜେଇ ହେଉଛି ସୀତାବିଞ୍ଜ

ସଜେଇ ହେଉଛି ସୀତାବିଞ୍ଜ

କେନ୍ଦୁଝର, ୧୧।୫ (ସ୍ବ.ପ୍ର.): କେନ୍ଦୁଝର ଜିଲା ଘଟଗାଁ ବ୍ଲକ ଥିବା ଐତିହାସିକ ଓ ପୌରାଣିକ ପର୍ଯ୍ୟଟନ କେନ୍ଦ୍ର ସୀତାବିଞ୍ଝର ବିକାଶ ପର୍ଯ୍ୟଟନ ବିଭାଗ ପକ୍ଷରୁ କରାଯାଉଛି। ଆଗକୁ ରଜ ପର୍ବ ଥିବାରୁ ସୀତାବିଞ୍ଝ ସଜେଇ ହେଉଛି। ରଜ ପୂର୍ବରୁ ବିକାଶ କାମ ଶେଷ ହେବ ବୋଲି ଆଶା କରାଯାଇଛି। ଲକ୍ଷାଧିକ ଲୋକ ନବକଳେବର ରୂପ ଦେଖିବାକୁ ସୁଯୋଗ ପାଇବେ ବୋଲି ମତ ପ୍ରକାଶ ପାଉଛି। ଦୀର୍ଘ ବର୍ଷଧରି କେନ୍ଦ୍ରଟି ଅବହେଳିତ ହୋଇରହିଥିଲା। ସେଠାରେ ପୌରାଣିକ ଯୁଗର ସୀତାଙ୍କ ଏନ୍ତୁଳିଶାଳ, ମାତା ସୀତା, ଲବ ଓ କୁଶଙ୍କ ବର୍ତୁଳାକାର ପଥର ମୂର୍ତ୍ତି, ବାଲ୍ମିକୀ ଋଷିଙ୍କ ଆଶ୍ରମ। ତପସ୍ୟା ବଳରେ ବାଲ୍ମିକୀ ଋଷି ପାଲଟିଥିବା ଦସ୍ୟୁ ରତ୍ନାକର ପୂର୍ବରୁ ଲୁଟ କରିଥିବା ଧନସମ୍ପତିକୁ ସାଇତି ରଖିଥିବା ବିଶାଳକାୟ ଅର୍ଦ୍ଧବର୍ତୁଳାକାର ପଥର, ଯାହାକୁ କୁହାଯାଏ ଭଣ୍ଡାରଘର, ବିରଳ ବହୁ ପୁରୁଣା ରାବଣଛାୟା-ତୈଳଚିତ୍ର ଆଦି ଐତିହ ରହିଛି। ଶହଶହ ବର୍ଷର ପୁରୁଣା ପ୍ରସ୍ତରଲିପି ଓ କଳା ମଧ୍ୟ ରହିଛି। ପ୍ରାକୃତିକ ସୌନ୍ଦର୍ଯ୍ୟପୂର୍ଣ୍ଣ, ଆକର୍ଷଣୀୟ ମସୃଣ ପଥର ଯାହାକି ପର୍ଯ୍ୟଟକଙ୍କୁ ଆକୃଷ୍ଟ କରୁଛି।

ଅନ୍ଧାରରେ କରିଆ ଢିପାସାହି

ଅନ୍ଧାରରେ କରିଆ ଢିପାସାହି

ଚମ୍ପୁଆ,୧୧।୫(ଡି.ଏନ.ଏ.): ଉଭୟ କେନ୍ଦ୍ର ଓ ରାଜ୍ୟ ସରକାର ଗରିବ ଲୋକଙ୍କୁ ସ୍ବଳ୍ପ ମୂଲ୍ୟରେ ବିଦ୍ୟୁତ୍‌ ସେବା ଯୋଗାଇ ଦେବାକୁ ଅନେକ ଯୋଜନା କାର୍ଯ୍ୟକାରୀ କରିଛନ୍ତି। ସେହି ଯୋଜନା ଗ୍ରାମାଞ୍ଚଳରେ ଅପହଞ୍ଚ ହୋଇଛି। ଗ୍ରାମାଞ୍ଚଳରେ ବିଜୁଳି ଯୋଜନା ଫେଲ ମାରିଛି। ସରକାରଙ୍କ ପକ୍ଷରୁ ପ୍ରଦାନ କରାଯାଉଥିବା ବିଜୁ ଜ୍ୟୋତି ଓ ଦିନଦୟାଲ ବିଜୁଳି ଯୋଜନାର ସୁଫଳ ଲୋକେ ପାଇପାରୁନାହାନ୍ତି। ୪୦ ବର୍ଷରୁ ଊର୍ଦ୍ଧ୍ୱ ହେବ ବିଜୁଳି ଆଲୁଅ ଲୋକେ ଦେଖି ନ ଥିବା ଅଭିଯୋଗ ହେଉଛି। ସେମାନଙ୍କ ପାଇଁ ବିଜୁଳି ଆଲୋକ ସ୍ବପ୍ନ ହୋଇଛି। ଏପରି ଅବସ୍ଥା ଚମ୍ପୁଆ ବ୍ଲକ କରିଆ ପଞ୍ଚାୟତ ଢିପାସାହିରେ ଦେଖିବାକୁ ମିଳିଛି। ସେଠାରେ ପ୍ରାୟତଃ ଆଦିବାସୀ ସମ୍ପ୍ରଦାୟର ଲୋକେ ବସବାସ କରିଆସୁଛନ୍ତି। ୨୦୦ରୁ ଊର୍ଦ୍ଧ୍ୱ ଜନ ସଂଖ୍ୟା ରହିଛନ୍ତି। ଅଦ୍ୟାବଧି ସେମାନେ ଡିବିରି ଆଲୁଅରେ ଜୀବନ ବିତାଉଛନ୍ତି।