ସମ୍ପାଦକୀୟ |

କାମିନୀ କାଞ୍ଚନ

କାମିନୀ କାଞ୍ଚନ

ଶିବରାମ ଶତପଥୀ

ପୃଥିବୀରେ ଆବହମାନ କାଳରୁ ଆଜିଯାଏ ଯେତେ ମହାସମର ସଂଘଟିତ ହୋଇଛି, ସବୁରି ମୂଳରେ ନିହିତ କାମିନୀ ଅଥବା କାଞ୍ଚନ। ଅପ୍‌ସରା ତିଳୋତ୍ତମାଙ୍କୁ ପତ୍ନୀ ରୂପେ ପାଇବା ପାଇଁ ଦୁଇ ଅଜେୟ ଭାଇ ସୁନ୍ଦ, ଉପସୁନ୍ଦ ପରସ୍ପର ମରାମରି ହୋଇ ମଲେ। ଶୁମ୍ଭନିଶୁମ୍ଭ, ମହିଷାସୁର, ଜଳନ୍ଧର ଆଦି ଅପରାଜେୟ ଦୈତ୍ୟ ପାର୍ବତୀଙ୍କ ରୂପଗୁଣରେ ମୁଗ୍ଧହୋଇ ତାଙ୍କୁ ପାଇବା ପାଇଁ ଯୁଦ୍ଧ କରି ପ୍ରାଣ ହରାଇଲେ। ସୀତାଙ୍କ ଯୋଗୁ ସ୍ବର୍ଣ୍ଣମୟୀ ଲଙ୍କାପୁରୀ ଦଗ୍ଧ ଓ ପରେ ପ୍ରବଳ ପରାକ୍ରମୀ ରାବଣର ବଧ ସମ୍ଭବ ହୋଇପାରିଥିଲା। ରୂପସୀ ରାଣୀ ହେଲେନ୍‌ଙ୍କ ହେତୁ ଟ୍ରୟନଗରୀ ଧ୍ୱଂସସ୍ତୂପରେ ପରିଣତ ହୋଇଯାଇଥିଲା। ପୁରାଣ ଓ ଇତିହାସରେ ଏପରି ଅନେକ ଦୃଷ୍ଟାନ୍ତ ପରିଲକ୍ଷିତ ହୁଏ।

ଧର୍ମଶାସ୍ତ୍ରରେ କୁହାଯାଇଛି, ‘ମାତୃବତ୍‌ ପରଦାରେଷୁ, ପରଦ୍ରବ୍ୟେଷୁ ଲୋଷ୍ଟ୍ରବତ୍‌। ଆତ୍ମବତ୍‌ ସର୍ବଭୂତେଷୁ ଯଃ ପଶ୍ୟତି ସ ପଣ୍ଡିତଃ।ା’ ଅର୍ଥାତ୍‌ ଅନ୍ୟର ସ୍ତ୍ରୀକୁ ମାତୃଜ୍ଞାନ କରିବ ଓ ଅପରର ସମ୍ପତ୍ତିକୁ ମାଟିଗୋଡ଼ି ପରି ମୂଲ୍ୟହୀନ ଭାବି ସେଥିପ୍ରତି ଲାଳାୟିତ ହେବନାହିଁ। ମହାଭାରତରେ ମହର୍ଷି ବେଦବ୍ୟାସ କହିଛନ୍ତି, ‘ହ୍ଲାଦନ୍ତେ ସ୍ବେଷୁ ଦାରେଷୁ ଘର୍ମାକ୍ତାଃ ସଲିଳେଷ୍ବିବ।’ ଅର୍ଥାତ୍‌ ନିଜ ପତ୍ନୀଠାରେ ଆନନ୍ଦିତ ହେବ, ଯେପରି ଝାଳ ସରସର ବ୍ୟକ୍ତି ଜଳରେ ସ୍ନାନ କରି ସନ୍ତୁଷ୍ଟ ହୁଏ। ପ୍ରତ୍ୟେକ ଧର୍ମଗ୍ରନ୍ଥ ଅନ୍ୟର ସ୍ତ୍ରୀ ଓ ଧନ ପ୍ରତି ଲାଳାୟିତ ହେବା ଗର୍ହିତ ପାପ ବୋଲି ଘୋଷଣା କରେ, କାରଣ ଏହା ସାମୟିକ ଆନନ୍ଦ ଦେଲେ ମଧ୍ୟ ସୁଦୂରପ୍ରସାରୀ ପରିଣାମ ସ୍ବରୂପ ପାରିବାରିକ ବିଶୃଙ୍ଖଳା ସୃଷ୍ଟିକରି ସମାଜ ଓ ସର୍ବୋପରି ଦେଶକୁ ନଷ୍ଟଭ୍ରଷ୍ଟ କରେ। ଈଶାବାସ୍ୟୋପନିଷଦ୍‌ରେ କୁହାଯାଇଛି-

‘ଈଶା ବାସ୍ୟମିଦଂ ସର୍ବଂ ଯତ୍‌କିଞ୍ଚ ଜଗତ୍ୟାଂ ଜଗତ୍‌,

ତେନ ତ୍ୟକ୍ତେନ ଭୁଞ୍ଜିଥା ମା ଗୃଧଃ କସ୍ୟସ୍ବିଦ୍ଧନମ୍‌।’

ଏହାର ସ୍ଥୂଳ ଅର୍ଥ ହେଲା- ଏ ସଂସାରରେ ସ୍ଥାବରଜଙ୍ଗମ ଯାହାକିଛି ଅଛି ସବୁ ପରମେଶ୍ୱରଙ୍କର। ତୁମେ ଏ ସଂସାରରେ ନିଜ ଜୀବନକୁ ତ୍ୟାଗପୂର୍ବକ ଉପଭୋଗ କର। କାହାର ଧନ (କାମିନୀ ଓ କାଞ୍ଚନ ଉଭୟ)ରେ ଲୋଲୁପ ଦୃଷ୍ଟି ପକାଅ ନାହିଁ।

ପାଣ୍ଡବଙ୍କ ସମ୍ପତ୍ତି ଯଥା ମୟଦାନବ ନିର୍ମିତ ମାୟାସଭା ଆଦିରେ ଈର୍ଷାପରାୟଣ ହୋଇ କୌରବମାନେ କପଟପଶାରେ ପାଣ୍ଡବଙ୍କୁ ପରାସ୍ତ କରି ସେମାନଙ୍କ ସମଗ୍ର ସମ୍ପତ୍ତି, ଏପରି କି ଯାଜ୍ଞସେନୀଙ୍କୁ ମଧ୍ୟ ପଣରେ ଜିତିଥିଲେ। ପରିଣାମ କ’ଣ ହେଲା? ଅନେଶତ ଭାଇ ଯୁଦ୍ଧକ୍ଷେତ୍ରରେ ଟଳିପଡ଼ିଲେ। କେବଳ ସେତିକି ନୁହେଁ, ସେମାନଙ୍କ ପକ୍ଷ ନେଇ ଆର୍ଯ୍ୟାବର୍ତ୍ତର ଶଲ୍ୟ ପରି ବୀର, ଏପରି କି ପିତାମହ ଭୀଷ୍ମ, ଗୁରୁ ଦ୍ରୋଣ ଓ କର୍ଣ୍ଣଙ୍କ ପରି ଅଜେୟ ମହାରଥୀମାନେ ଧରାଶାୟୀ ହେଲେ। ଅତଏବ ଅନ୍ୟର ଧନ ପ୍ରତି ଲୋଲୁପ ଦୃଷ୍ଟି ନିକ୍ଷେପ କରିବା ସର୍ବନାଶର ପଥ ପରିଷ୍କାର କରିଦିଏ। ଅନେକେ ଲୋଭ ପରବଶ ହୋଇ ନିଜ ଗୃହ ସନ୍ନିହିତ ସରକାରୀ ଜମି ଅକ୍ତିଆର କରନ୍ତି। ସରକାରୀ ଜମି, କୋଠ ସମ୍ପତ୍ତି, ସୋସାଇଟି ଜମି, ସରକାରୀ ତହବିଲର ଟଙ୍କା ଆଦିରେ ଜନସାଧାରଣଙ୍କ କେବଳ ସ୍ବେଦ ନୁହେଁ, ବିନ୍ଦୁ ବିନ୍ଦୁ ରକ୍ତ ସଂଶ୍ଳିଷ୍ଟ। ଅତଏବ ସେ ଧନ ଆତ୍ମସାତ୍‌ କରିବା ଦୂରେ ଥାଉ, ଯିଏ ଏଥିପାଇଁ ଉଦ୍ୟତ ହୁଏ ସେ ସମୂଳେ ବିନଷ୍ଟ ହୁଏ, ଏହା ନିଃସନ୍ଦେହ।

ରାକ୍ଷସ ଓ ଦେବତାଙ୍କ ମା’ ଯଥାକ୍ରମେ ଦିତି ଓ ଅଦିତି ଦୁଇଭଉଣୀ। ରାକ୍ଷସ ଓ ଦେବତା ଉଭୟେ ଯଦିଚ କଶ୍ୟପଙ୍କ ପୁତ୍ର (ଜଣେ ପିତା) ରାକ୍ଷସଗଣ ଅଗ୍ରଜ, ଶୂର, ବୀର, ବଳିଷ୍ଠ, କର୍ମଠ, ଜ୍ଞାନୀ, ସୁଶାସକ, ବେଦବିତ୍‌ ଓ ଉତ୍ତମ ବୈଜ୍ଞାନିକ ହେବା ସତ୍ତ୍ୱେ ସେମାନେ ବିଷ୍ଣୁଙ୍କ ଦ୍ୱାରା ସବଂଶ ବିନଷ୍ଟ ହୋଇଥିଲେ, କାରଣ ସେମାନେ ତମୋଗୁଣ ଅବଲମ୍ବନ କରି ପରଧନ ଓ ପରସ୍ତ୍ରୀ ପ୍ରତି ଲାଳାୟିତ ଥିଲେ ଓ କଲ୍ୟାଣକାରୀ ମୁନିଋଷିଙ୍କ ପ୍ରତି ଦ୍ରୋହାଚରଣ କରୁଥିଲେ। ଏହାଦ୍ୱାରା ସାମାଜିକ ଶୃଙ୍ଖଳା, ସହାବସ୍ଥାନ ଓ ସଦାଚାର ନଷ୍ଟଭ୍ରଷ୍ଟ ହୁଏ। ପ୍ରତିରକ୍ଷା ବିଭାଗର ଅଧିକାରୀମାନେ କୋଟି କୋଟି ଟଙ୍କା କାରବାର କରନ୍ତି, ତାହା ସୈନ୍ୟମାନଙ୍କ ଖାଦ୍ୟ, ପୋଷାକ ଓ ଉପକରଣ ବାବଦରେ ହେଉ, ଅସ୍ତ୍ରଶସ୍ତ୍ର, ଗାଡ଼ି, ଯୁଦ୍ଧଜାହାଜ, ବିମାନ ଅଥବା ଯୁଦ୍ଧସାମଗ୍ରୀ କ୍ରୟ କରିବାରେ ବା ବଙ୍କର ନିର୍ମାଣରେ ହେଉ। ଏଥିରେ ଯିଏ ହେରାଫେରି କରେ, ତାକୁ ଏପରି ଦୃଷ୍ଟାନ୍ତମୂଳକ ଶାସ୍ତି ଦିଆଯାଏ ଯେ ଅନ୍ୟ କେହି ଭ୍ରଷ୍ଟାଚାରରେ ଲିପ୍ତ ହେବାକୁ ସାହସ କରିବେ ନାହିଁ। 

ଶ୍ରୀଲଙ୍କାରେ ଭାରତୀୟ ଶାନ୍ତିସେନା ମୁତୟନ ସମୟର କଥା। ଜାଫ୍‌ନାର ତାମିଲମାନେ ଘରେ ତାଲା ବନ୍ଦ କରି ପ୍ରାଣ ବିକଳରେ ନିରାପଦ ସ୍ଥାନରେ ଆଶ୍ରୟ ନେଇଥାନ୍ତି। ଶ୍ରୀଲଙ୍କା ସୈନ୍ୟବାହିନୀ ଓ ଭାରତୀୟ ସେନା ଭିତରେ ସେମାନଙ୍କ ଅବସ୍ଥା ଏଣେ ଗଲେ ବାଘ ଖାଇବ ତ ତେଣେ ଗଲେ ନାଗ ଦଂଶିବ। କିଛି ବ୍ୟକ୍ତି ତାଲା ଭାଙ୍ଗି ଜଣଙ୍କ ଘରେ ପଶିଲେ। କିଏ ଟିଭି ତ କିଏ ସୁନାଗହଣା, କିଏ ଟଙ୍କା ତ କିଏ ବହୁମୂଲ୍ୟ ବସ୍ତ୍ର ଓ କ୍ୟାମେରା ଚୋରିକରି ଦିନ ଦ୍ୱିପ୍ରହରରେ ନେଉଥିଲେ। ଏଲ୍‌ଟିଟିଇ ଲଗାଇଥିବା ବୁବି ଟ୍ରାପ୍‌ରେ ଛନ୍ଦିହୋଇ ଆଖିପିଛୁଳାକେ ସମସ୍ତେ ପ୍ରାଣ ହରାଇଲେ। ଅନ୍ୟର ସମ୍ପତ୍ତି ହଡ଼ପ କରିବାର ପରିଣାମ ଏପରି ଭୟାବହ ହୋଇଥାଏ। କି ମର୍ମନ୍ତୁଦ ସେ ଦୃଶ୍ୟ! ସେ ଦୃଶ୍ୟ ମନେପଡ଼ିଲେ ଏବେ ମଧ୍ୟ ଲୋମ ଟାଙ୍କୁରି ଉଠେ।

ଲୋକମୁଖରେ କଥିତ ଅଛି, ସୁନା ହରାଇବା ଯେତିକି ଦୋଷାବହ, ସୁନା ପାଇଲେ ମଧ୍ୟ ସେତିକି। ସୁନା ମିଳିଲେ ସେଥିରେ ସମପରିମାଣ ସୁନା ମିଶାଇ ଦୁଃସ୍ଥ ବ୍ୟକ୍ତିକୁ ଦାନ କରିବ। ସେପରି ଅନ୍ୟଠାରୁ ଦାନ ଗ୍ରହଣ କଲେ ସେଥିରେ ଆଉ କିଛି ଅର୍ଥ ମିଶାଇ ଅକିଞ୍ଚନ ବ୍ୟକ୍ତିକୁ ଦେବା ଉଚିତ। ଜୀବନକାଳ ଭିତରେ ମୁଁ ଦେଖିଛି, ଯେଉଁମାନେ ଅବୈଧ ଓ ଅନ୍ୟାୟ ଉପାୟରେ ଅନ୍ୟକୁ କଷ୍ଟ ଦେଇ ଧନ ଉପାର୍ଜନ କରିଥାନ୍ତି ସେ ଧନ ସେମାନେ ଉପଭୋଗ କରିପାରନ୍ତି ନାହିଁ। ତାଙ୍କ ଅନ୍ତେ ତାଙ୍କ ଦାୟାଦମାନେ ସେ ଧନର ଅପବ୍ୟୟ କରି ଉଚ୍ଛୃଙ୍ଖଳ ଜୀବନଯାପନ ଦ୍ୱାରା ନିଜର ସ୍ବାସ୍ଥ୍ୟ ନଷ୍ଟ କରିବା ସହିତ ପାରିବାରିକ ସମ୍ମାନ ଧୂଳିରେ ମିଶାଇ ଦିଅନ୍ତି। ତେଣୁ କାମିନୀକାଞ୍ଚନ ମୋହରୁ ଦୂରରେ ରହି ସରଳ ନିରାଡ଼ମ୍ବର ଜୀବନଯାପନ ନିଜ ଓ ପରିବାର ପକ୍ଷେ ହିତକର।

ଇ-୧୮, ପଦ୍ମପାଣି ବିହାର, ନୀଳାଦ୍ରି ବିହାର, ଭୁବନେଶ୍ୱର, ମୋ: ୯୪୩୭୦୧୭୨୦୨


All Right Reserved By

ସମ୍ପାଦକୀୟ |

ସମ୍ପାଦକୀୟ/ ଚୋକ୍‌ସିଙ୍କ ପଥ

ସମ୍ପାଦକୀୟ/ ଚୋକ୍‌ସିଙ୍କ ପଥ

ପଞ୍ଜାବ ନ୍ୟାଶନାଲ ବ୍ୟାଙ୍କ (ପିଏନ୍‌ବି) ସ୍କାମ୍‌ ପ୍ରାୟ ବର୍ଷେ ପୂରଣ କରିବାକୁ ଯାଉଛି। ଇତିମଧ୍ୟରେ ଏହାର ମୁଖ୍ୟ ଅଭିଯୁକ୍ତ ହୀରା ବ୍ୟବସାୟୀ ନୀରବ ମୋଦି ଓ ତାଙ୍କ ମାମୁ ମେହୁଲ ଚୋକ୍‌ସିଙ୍କୁ ଭାରତ ପ୍ରତ୍ୟର୍ପଣ କରାଯାଇପାରିଲା ନାହିଁ। ଚୋକ୍‌ସି ଆଣ୍ଟିଗୁଆ ନାଗରିକତ୍ୱ ଗ୍ରହଣ କରିସାରିଥିବାରୁ ୨୦୧୯ ଜାନୁୟାରୀ ୨୧ରେ ଭାରତୀୟ ପାସ୍‌ପୋର୍ଟ ସମର୍ପଣ କରିଦେଇଛନ୍ତି। ଭାରତୀୟ ବୈଦେଶିକ ନୀତି ଅନୁଯାୟୀ, ଯେତେବେଳେ ଜଣେ ନାଗରିକ ଅନ୍ୟ ଦେଶର ..

ଆଚାରରେ ସକାରାତ୍ମକତା ପ୍ରକାଶର ସୁଯୋଗ

ଆଚାରରେ ସକାରାତ୍ମକତା ପ୍ରକାଶର ସୁଯୋଗ

ତତ୍ତ୍ୱ ଓ ତର୍କ/ ବିମଳ ପ୍ରସାଦ ପାଣ୍ଡିଆ

୨୦୧୯ ବର୍ଷର ଶେଷ ‘ମନ୍‌ କି ବାତ୍‌’ରେ ପ୍ରଧାନମନ୍ତ୍ରୀ ମୋଦି କହିଥିଲେ ଯେ, ନକାରାତ୍ମକତାର ପ୍ରସାର କରିବା ଅତି ସହଜ କିନ୍ତୁ ଲୋକେ ସକାରାତ୍ମକତାର ପ୍ରସାର ପାଇଁ ଆଗେଇ ଆସିବା ଦରକାର। ପ୍ରଧାନମନ୍ତ୍ରୀଙ୍କ ଭଳି ନେତୃସ୍ଥାନୀୟ ବ୍ୟକ୍ତି ଏଭଳି ସକାରାତ୍ମକତାର ବିଚାର ଦେବା ଅନେକ ଆଶା ଉଦ୍ରେକ କରାଏ। ଏହି ନିର୍ବାଚନୀ ଋତୁରେ ପ୍ରଧାନମନ୍ତ୍ରୀ ‘ମନ୍‌ କି ବାତ୍‌’ରେ ରଖିଥିବା ବିଚାରକୁ ନିଜ ଆଚାରରେ ପରିଣତ କରିପାରିଲେ ତାହା ସକାରାତ୍ମକତାର ଉଦାହରଣ ସୃଷ୍ଟିକରିବ। ନିଜ ବିଚାରକୁ ଆଚାରରେ ପରିଣତ କରି ବିରୋଧୀଙ୍କୁ ଟାହିଟାପରା କରିବାର ପ୍ରବୃତ୍ତିରୁ ନିଜକୁ ଦୂରେଇ ବା ବିରୋ..

ସଶସ୍ତ୍ର ମୁକ୍ତି ସଂଗ୍ରାମର ମହାନାୟକ

ସଶସ୍ତ୍ର ମୁକ୍ତି ସଂଗ୍ରାମର ମହାନାୟକ

ଡ. ପ୍ରଫୁଲ୍ଲ କୁମାର ସାହୁ

ଉଚ୍ଚଶିକ୍ଷିତ ଭାରତୀୟଙ୍କ ପକ୍ଷରେ ଯେତେବେଳେ ଆଇସିଏସ୍‌ ଚାକିରି ଥିଲା ଶ୍ରେଷ୍ଠ ସଫଳତା, ସେତେବେଳେ ସୁଭାଷ ବୋଷ ଥିଲେ ପ୍ରଥମ ଭାରତୀୟ, ଯିଏ ଆଇସିଏସ୍‌ ପରୀକ୍ଷାରେ ସଫଳତା ଅର୍ଜନ କରି ମଧ୍ୟ ତାହାକୁ ପାଦରେ ଏଡ଼େଇ ଦେଇ କେମ୍ବ୍ରିଜ୍‌ରୁ ସ୍ବଦେଶ ଫେରି ଆସିଥିଲେ ଦେଶମାତୃକାକୁ ସ୍ବାଧୀନ କରିବାର ଦୃଢ଼ ସଂକଳ୍ପ ନେଇ। ସିଧାସଳଖ ବମ୍ବେରେ ମହାମତ୍ା ଗାନ୍ଧୀଙ୍କୁ ସାକ୍ଷାତ କରି (୨୦ଜୁଲାଇ ୧୯୨୧) ସେ କଂଗ୍ରେସରେ ଯୋଗଦେଲେ ଏବଂ..

ଏଇ ଭାରତରେ

ଏଇ ଭାରତରେ

ଦେଶର ବିଭିନ୍ନ ରାଜ୍ୟରେ ବିବାହକୁ ନେଇ ରହିଛି ଭିନ୍ନ ଭିନ୍ନ ପରମ୍ପରା। ବିବାହ ବେଳେ କନ୍ୟା ଓ ବର ଅଗ୍ନିକୁ ସାକ୍ଷୀ ରଖି ସାରା ଜୀବନ ଲାଗି ସାଥୀ ହୋଇଥାଆନ୍ତି। ତେବେ ରାଜସ୍ଥାନର ଶ୍ରୀମାଲୀ ସମ୍ପ୍ରଦାୟରେ ଏକ ଭିନ୍ନ ପରମ୍ପରା ଦେଖିବାକୁ ମିଳେ। ବିଭାଘର ବେଳେ ବର କନ୍ୟାକୁ କୋଳରେ ଧରି ଅଗ୍ନି ଚାରିପାଖରେ ସାତଥର ପ୍ରଦକ୍ଷିଣ କରିଥାଆନ୍ତି। ପୁରାଣରେ ଉଲ୍ଲେଖ ରହିଛି ପ୍ରଭୁ ଶ୍ରୀକୃଷ୍ଣ ରୁକ୍ମିଣୀଙ୍କୁ ବିବାହ କରିବା ସମୟରେ ବିଘ୍ନ ..

ସମ୍ପାଦକୀୟ/କୃଷି ଆଗ

ସମ୍ପାଦକୀୟ/କୃଷି ଆଗ

ଆଜିର ସ୍ଥିତି ଦେଖିଲେ ୨୦୧୪ରେ କ୍ଷମତାକୁ ଆସିବା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଦେଶବାସୀଙ୍କୁ ଦେଇଥିବା ପ୍ରତିଶ୍ରୁତି ଆଦୌ ପୂରଣ କରିନାହାନ୍ତି। ଉଚ୍ଚାଙ୍ଗ ସ୍ବରରେ ‘ସମସ୍ତଙ୍କୁ ସାଙ୍ଗରେ ନେଇ ବିକାଶ’ କଥା କହୁଥିଲେ ମଧ୍ୟ ତା’ର ଫଳ ଶୂନ ହୋଇଛି। ବିଶେଷକରି ସାମାଜିକ ଓ ଅର୍ଥନୈତିକ ଦିଗରୁ ତାଙ୍କ ଶାସନ ସମୟରେ ଦେଶର ଅଧିକ କ୍ଷତି ଘଟିଛି। ଅସହିଷ୍ଣୁତା, ମିଛିମିଛିକା ଦେଶପ୍ରେମ ଓ ବିଭାଜନ ରାଜନୀତି ସାମାଜିକ ବାତାବରଣକୁ ଘୋର ପ୍ରଭାବିତ କରିଛି। ଏକ ଉତ୍ତମ ଶାସନ ଜରିଆରେ ଭାରତୀୟ ଅର୍ଥନୀତିକୁ ନୂଆ ଦିଗ ଦେଖାଇଦିଆଯିବ ବୋଲି କୁହାଯାଇଥିଲେ ମଧ୍ୟ ତା’ର ସୁଫଳ ଲୋକେ ପାଇପାରିନାହାନ୍ତି। ଏହା ଜଣାଶୁଣା ଯେ, ମୋଦିଙ୍କ ଶାସନ ସମୟରେ କର୍ପୋରେଟ ପ୍ରୀତି ବଢ଼ିଛି..

କ୍ଷୁଧା ଓ କୁପୁଷ୍ଟି: ସୁଶାସନ ହିଁ ସମାଧାନ

କ୍ଷୁଧା ଓ କୁପୁଷ୍ଟି: ସୁଶାସନ ହିଁ ସମାଧାନ

ସହଦେବ ସାହୁ

ଜାତିସଂଘର ଖାଦ୍ୟ ଓ କୃଷି ସଂସ୍ଥା (ଏଫ୍‌ଏଓ) ସହିତ କାର୍ଯ୍ୟ କରୁଥିବା କ୍ଷୁଧା ଓ କୁପୁଷ୍ଟି ବିରୋଧୀ ଅନ୍ତର୍ଜାତୀୟ ସଂଗୋଷ୍ଠୀ (ଇଣ୍ଟରନ୍ୟାଶନାଲ ଆଲାଏନ୍ସ ଏଗେଁଷ୍ଟ ହଙ୍ଗର ଆଣ୍ଡ ମାଲନ୍ୟୁଟ୍ରିଶନ୍‌) କୃଷି କ୍ଷେତ୍ରରେ ଭାରତର ଅଭୂତପୂର୍ବ ବିକାଶକୁ ପ୍ରଶଂସା କରିଛି। ୧୯୫୦-୫୧ରେ ଭାରତରେ ଖାଦ୍ୟଶସ୍ୟ ଉପତ୍ାଦନ ପରିମାଣ ୫ କୋଟି ଟନ୍‌ ଥିବାବେଳେ ୨୦୧୬-୧୭ରେ ୨୭ କୋଟି ୨୦ ଲକ୍ଷ ଟନ୍‌ ହୋଇଛି, ପ୍ରାୟ ୫ଗୁଣ। ଲୋକସଂଖ୍ୟା ବଢ଼ିଛି ୪ ଗୁଣ। ତେଣୁ ଖାଦ୍ୟ-ଅଭାବୀ ପରିସ୍ଥିତିକୁ ପଛରେ ପକାଇ ଭାରତ ଏକ ଖାଦ୍ୟ ରପ୍ତାନିକାରୀ ରାଷ୍ଟ୍ର ହୋଇଗଲାଣି। ତଥାପି ଭାରତରେ କ୍ଷୁଧା ଓ କୁପୁଷ୍ଟି କାରଣରୁ ଏକଚତୁର୍ଥାଂଶ ଲୋକ କାର୍ଯ୍ୟକ୍ଷମ ହୋଇପାରୁ ନାହା..

ଆଜିର ଶିକ୍ଷା ଓ ପ୍ରାଚୀନ ସଂସ୍କୃତି

ଆଜିର ଶିକ୍ଷା ଓ ପ୍ରାଚୀନ ସଂସ୍କୃତି

ବ୍ରହ୍ମାନନ୍ଦ ପଣ୍ଡା

ଆଜିକାଲି ଭାରତୀୟ ଶିକ୍ଷା ବ୍ୟବସ୍ଥାର ଏଭଳି ଅଧୋଗତି ହୋଇଛି ଯେ, ପ୍ରାୟ ୬୦% ମାଧ୍ୟମିକ ଛାତ୍ରୀଛାତ୍ର ଦରଖାସ୍ତଟିଏ ଲେଖିବାକୁ ବା ସାଧାରଣ ହିସାବଟିଏ କରିବାକୁ ଅସମର୍ଥ। ଭାରତର ୭୫% ଯାନ୍ତ୍ରିକ ଓ କାରିଗରି ଶିକ୍ଷାପ୍ରାପ୍ତ ସ୍ନାତକ ଚାକିରି ପାଇବାକୁ ଅଯୋଗ୍ୟ ବୋଲି ନିକଟ ଅତୀତରେ ପ୍ରକାଶ ପାଇଥିବା ତଥ୍ୟ ସାରା ଭାରତରେ ଆଲୋଡ଼ନ ସୃଷ୍ଟି କରିଥିଲା। ଖାଲି ସେତିକି ନୁହେଁ ଛାତ୍ରସମାଜର ଆଜି ନୈତିକ ସ୍ଖଳନ ଘଟିଛି। ଭାରତୀୟ ସଂସ୍କୃତିର ଅବକ୍ଷୟ ହେଉଛି। ମାନବିକ ମୂଲ୍ୟବୋଧ ଲୋପ ପାଉଛି। ଆଜିର ଶିକ୍ଷା ବ୍ୟୟବହୁଳ ଏବଂ ଚାକିରିସର୍ବସ୍ବ ହୋଇଛି। ଜ୍ଞାନ ଓ ଗବେଷଣା ଅର୍ଥସର୍ବସ୍ବ ହୋଇଛି। ସମାଜସେବା ପ୍ରଚାରସର୍ବସ୍ବ ହୋଇଛି। ଯଦି ସ୍ନାତକ ଓ ସ୍ନାତକୋତ୍ତର ଛାତ୍ରୀଛାତ୍ର ପିଅନ ..

ଏଇ ଭାରତରେ

ଏଇ ଭାରତରେ

କାହିଁ କେଉଁ ଆଦିମ କାଳରୁ କୁକୁର ହେଉଛି ମଣିଷର ସାଥୀ। ଏହି ପ୍ରାଣୀ ମଣିଷର ଅତ୍ୟନ୍ତ ବିଶ୍ୱସ୍ତ ଭୃତ୍ୟ ଭାବରେ କାର୍ଯ୍ୟ କରେ। ଏପରି କି ମାଲିକର ଲୁଣ ଖାଇବାରୁ ତା’ର ଗୁଣ ଗାଏ। ମାଲିକର ଜୀବନ ବଞ୍ଚାଇବାକୁ ଯାଇ ଦରକାର ପଡ଼ିଲେ ନିଜ ଜୀବନ ହାରିଦିଏ। ଏପରି ଏକ ଘଟଣା ଘଟିଛି ଜୟପୁରରେ। ରାଜସ୍ଥାନର ଜୟପୁରରେ ବାସ କରୁଥିବା ପୂର୍ବତନ ରଣଜୀ ଖେଳାଳି ସଞ୍ଜୀବ ଓହଲାନ୍‌ଙ୍କ ବାସଭବନରେ ନିଆଁ ଲାଗିଯାଇଥିଲା। ତଳ ମହଲାରେ ତାଙ୍କ ସ୍ତ୍ରୀ, ପୁଅ ଓ ଚାକରକୁ ଉଦ୍ଧାର କରାଯାଇଥିଲେ ମଧ୍ୟ ନିଆଁ ଲାଗିବା ଯୋଗୁ ସଞ୍ଜୀବ..

ମୋଦି: ସବୁଥିରେ ଆଙ୍ଗୁଠି

ମୋଦି: ସବୁଥିରେ ଆଙ୍ଗୁଠି

ସ।ଧାରଣ ନିର୍ବାଚନ ଯେତେ ନିକଟତର ହେଉଛି, ରାଜନୈତିକ ଉଷ୍ମତା ସେତେ ବଢ଼ିବାରେ ଲାଗିଲାଣି। ଜାନୁୟାରୀ ୧୯ରେ କୋଲକାତାରେ  ବିରୋଧୀଙ୍କ ରାଲିର କଳେବର ଦେଖିଲେ ମହାଗଠବନ୍ଧନ ଶକ୍ତିଶାଳୀ ହେଉଥିବା ମନେହେଉଛି। 

ସବୁଜ ପରିବହନ ବ୍ୟବସ୍ଥା

ସବୁଜ ପରିବହନ ବ୍ୟବସ୍ଥା

 ବିଶ୍ୱ ସ୍ବାସ୍ଥ୍ୟ ସଂସ୍ଥାର ଏକ ରିପୋର୍ଟରୁ ଜଣାଯାଏ ଯେ, ଭାରତରେ ଅଧିକାଂଶ ସହର ବାୟୁ ପ୍ରଦୂଷଣ ଦ୍ୱାରା ଆକ୍ରାନ୍ତ। ଏପରି କି ପୃଥିବୀର ସବୁଠାରୁ ଅଧିକ ପନ୍ଦରଟି ସହର ମଧ୍ୟରେ ଭାରତର ଚଉଦଟି ସହର ଅଛି। ସବୁଠାରୁ ପ୍ରଦୂଷିତ ସହର ହେଉଛି କାନପୁର। 

ବାସିପାଣିରେ ପଚରା

ବାସିପାଣିରେ ପଚରା

ହଇରେ ମୋତେ କ’ଣ ଆଉ ବାସିପାଣିରେ ପଚାରୁନୁ? ଚିହ୍ନା ଲୋକଟିଏ, ଆପଣାର ମଣିଷଟିଏ ଆମକୁ ପୂର୍ବାପେକ୍ଷା ହତାଦର କରିବାର ଅନୁଭବ କଲେ ଆମେ ଏ ରୂଢିଟିର ପ୍ରୟୋଗ କରିଥାଉ! ଏଠାରେ ବାସିପାଣିକୁ ନିକୃଷ୍ଟ ଅର୍ଥରେ ବ୍ୟବହାର କରାଯାଇଛି। ନଚେତ୍‌ ଆମେ କହୁଥାନ୍ତେ- ହଇରେ ମୋତେ କ’ଣ ଆଉ ସଜପାଣିରେ ପଚାରୁନୁ? ନଚେତ୍‌ କହିଥାନ୍ତେ- କିରେ ମୋତେ କ’ଣ ଆଉ ମଦପାଣିରେ ପଚାରୁନୁ? ମାନେ ବାସିପାଣିଟି ପଚାରିବା ବା ବନ୍ଧୁ ଚର୍ଚ୍ଚା କରିବା ଯୋଗ୍ୟ ନୁହେଁ।

ଏଇ ଭାରତରେ

ଏଇ ଭାରତରେ

ଭଲ ପାଇବାର ହୃଦୟଟିଏ ଥିଲେ କେତେକ ପୁରୁଷ ଓ ମହିଳା ଅତିକ୍ରାନ୍ତ ବୟସରେ ବି ଭଲପାଇ ବସନ୍ତି। ତେବେ ଭଲ ପାଇବା ପାଇଁ ଜଣେ ବିବାହିତା ମହିଳା ଏକ ଅଭିନବ ପନ୍ଥା ଆପଣାଇଥିଲେ।