ନୂଆଦିଲ୍ଲୀ,୧୨।୧୦: ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ ଫଳରେ ଆସିଥିବା ଘୂର୍ଣ୍ଣିଝଡ ‘ତିତ୍ଲି’ ଭାରତର ଉପକୂଳ ରାଜ୍ୟ ଓଡ଼ିଶା, ଆନ୍ଧ୍ର ପ୍ରଦେଶ ଓ ପଶ୍ଚିମବଙ୍ଗରେ ଏହାର ପ୍ରଭାବ ପକାଇ ଥିଲା। ଏହା କ୍ରମଶଃ ଦୂର୍ବଳ ହେବା ଫଳରେ ଏବେ ପାଣିପାଗ ବିଶେଷଜ୍ଞ ତଥା ସାଧାରଣ ଜନତା ସାମାନ୍ୟ ଆଶ୍ୱସ୍ତି ଅନୁଭବ କରିଛନ୍ତି। ହେଲେ ୟମନ ଉପକୂଳରେ ସକ୍ରିୟ ଥିବା ଆଉ ଏକ ଘୂର୍ଣ୍ଣିଝଡ ‘ଲୁବନ’ ଉପରେ ପାଣିପାଗ ବିଶେଷଜ୍ଞମାନେ ଲଗାତାର ନଜର ରଖିଛନ୍ତି। ଭାରତୀୟ ପାଣିପାଗ ବିଶେଷଜ୍ଞଙ୍କ କହିବା କଥା ହେଲା ହିନ୍ଦ୍ ମହାସାଗରରେ ଏକାଥରେ ସମାନ ଗତିରେ ୨ଟି ଘୂର୍ଣ୍ଣିଝଡ ସକ୍ରିୟ ହେବା ପାଣିପାଗ ଗତିବିଧି ଇତିହାସରେ ଦୁର୍ଲଭ। ତେବେ ଭାରତରେ କେବଳ ‘ତିତଲି’ର ପ୍ରଭାବ ରହିଥିଲା। ଏବେ ଦୁଇ ନମ୍ବର ଘୂର୍ଣ୍ଣିଝଡ ‘ଲୁବନ’ଭାରତୀୟ ଉପକୂଳରୁ ପାଖାପାଖି ୫ଶହ କିଲୋମିଟର ଦୂର ୟମନ ଉପକୂଳରେ ରହିଥିବା ଜଣାପଡିଛି। ଏହା ଭାରତ ବଦଳରେ ଉତ୍ତର ପଶ୍ଚିମ ଆଡକୁ ଗତି କରୁଥିବାରୁ ଏହାର ପ୍ରଭାବ ଭାରତ ଉପରେ ରହିବ ନାହିଁ ବୋଲି ଅନୁମାନ କରାଯାଉଛି। ହେଲେ ମତ୍ସଜୀବୀମାନଙ୍କୁ ସମୁଦ୍ର ମଧ୍ୟକୁ ଯିବାକୁ ବାରଣ କରାଯାଇଛି। ତେବେ ‘ତିତଲି’ର ନାମକରଣ ପାକିସ୍ତାନ କରିଥିବା ବେଳେ ‘ଲୁବନ’ର ନାମକରଣ କରିଛି ଓମାନ।
