ମୁମ୍ବାଇ,୧୧।୧୦(ପି.ଟି.)- ଭାରତ ଓ ଓ୍ବେଷ୍ଟଇଣ୍ଡିଜ୍ ମଧ୍ୟରେ ଖେଳାଯିବାକୁ ଥିବା ଦିନିକିଆ ଓ ଟି୨୦ ସିରିଜ୍ର ପ୍ରତ୍ୟେକ ମ୍ୟାଚ୍ କାର୍ଯ୍ୟସୂଚୀ ଅନୁଯାୟୀ ଅନୁଷ୍ଠିତ ହେବ। ଦିନିକିଆ ସିରିଜ୍ର ୪ର୍ଥ ମ୍ୟାଚ୍ ଚଳିତ ମାସ ୨୯ ତାରିଖରେ ଓ୍ବଙ୍ଖଡେ ଷ୍ଟାଡିୟମ୍ରେ ଓ ପ୍ରଥମ ଟି୨୦ ମ୍ୟାଚ୍ ନଭେମ୍ବର ୪ ତାରିଖରେ କୋଲକାତାର ଐତିହାସିକ ଗ୍ରାଉଣ୍ଡ ଇଡେନ ଗାର୍ଡେନଠାରେ ଖେଳାଯିବ। ”କ୍ରିକେଟ ଆସୋସିଏଶନ ଅଫ୍ ବେଙ୍ଗଲ (ସିଏବି) ମ୍ୟାଚ୍ ଆୟୋଜନ କରିବାକୁ ସ୍ବୀକାର କରିଛି। କିନ୍ତୁ ତାମିଲନାଡୁ କ୍ରିକେଟ ଆସୋସିଏଶନ (ଟିଏନ୍ସିଏ) ଏପର୍ଯ୍ୟନ୍ତ ଅନ୍ତିମ ଟି୨୦ ମ୍ୟାଚ୍ ଆୟୋଜନ କରିବା ସମ୍ପର୍କରେ ସ୍ପଷ୍ଟ କରିନାହିଁ। ମାତ୍ର ଶୀଘ୍ର ଏ ନେଇ ସୂଚନା ଦେଇପାରେ“ ବୋଲି ବିସିସିଆଇ ସୂତ୍ରରୁ ଜଣାପଡ଼ିଛି। ଅନ୍ୟପକ୍ଷରେ ସଭାପତି ଓ ସାଧାରଣ ସମ୍ପାଦକଙ୍କ ଅନୁପସ୍ଥିତିରେ ଦୈନଦିନ କାର୍ଯ୍ୟ ତୁଲାଇବା ଲାଗି ଆର୍ଥିକ ଅସୁବିଧା ସମ୍ମୁଖୀନ ହେଉଥିବା ମୁମ୍ବାଇ କ୍ରିକେଟ ଆସୋସିଏଶନ (ଏମ୍ସିଏ)କୁ ବିସିସିଆଇ ସାହାଯ୍ୟ କରିବାକୁ ରାଜି ହୋଇଯାଇଛି। ଗତ ମଙ୍ଗଳବାର ଏମ୍ସିଏ ଲାଗି ମ୍ୟାଚ୍ ଆୟୋଜନ କରିବାକୁ ବିସିସିଆଇ ପରିଚାଳନା କମିଟି ସିଓଏ ନିକଟରେ ଆବେଦନ କରାଯାଇଥିଲା। ବୁଧବାର ଏହି ଆବେଦନକୁ ବୋର୍ଡ ସିଇଓ ରାହୁଲ ଜୋହରି ଗ୍ରହଣ କରିଛନ୍ତି। ”ଏମ୍ସିଏ ପ୍ରଶାସନିକ ସ୍ଥରୀୟ ଅସୁବିଧା ଭୋଗ କରୁଥିବାରୁ ଏହାର ଭେଣ୍ଡରଙ୍କୁ ବିସିସିଆଇ ମ୍ୟାଚ୍ ଆୟୋଜନ ଲାଗି ଅର୍ଥ ଯୋଗାଇବ। ପରେ ଆସୋସିଏଶନ ଏହାକୁ ସମୟୋଜିତ କରିବ। ଏ ନେଇ ବିସିସିଆଇ ଓ ଏମ୍ସିଏ ପକ୍ଷରୁ ଚୁକ୍ତି କରାଯିବ“ ବୋଲି କୁହାଯାଇଛି। କାର୍ଯ୍ୟସୂଚୀ ଅନୁଯାୟୀ ମୁମ୍ବାଇରେ ଆୟାଜିତ ହେବାକୁ ଥିବା ମ୍ୟାଚ୍ ସ୍ଥାନାନ୍ତର ହେଲେ ବୋର୍ଡର ସମ୍ମାନରେ ଆଞ୍ଚ ଆସିବାର ସମ୍ଭାବନା ରହିଥିବାରୁ ଏମ୍ସିଏର ଅନୁରୋଧ ଗ୍ରହଣ କରାଯାଇଛି।
