ନୂଆଦିଲ୍ଲୀ,୧୪।୯: ରାଜଧାନୀ ଦିଲ୍ଲୀର ଏକ ବିପିଓରେ ଜଣେ ଯୁବତୀଙ୍କୁ ମାଡ ମାରିବାର ଏକ ଭିଡିଓ ଏବେ ଭାଇରାଲ ହେବାରେ ଲାଗିଛି। ଯେଉଁଥିରେ ଜଣେ ଯୁବକ ଜଣେ ଯୁବତୀଙ୍କୁ ଅମାନବୀୟ ଢଙ୍ଗରେ ପିଟୁଥିବା ଦେଖିବାକୁ ମଳିଛି। ସୂଚନାଯୋଗ୍ୟ, ଉକ୍ତ ଭିଡିଓଟି ୨ ସେପ୍ଟେମ୍ବର ଅପରାହ୍ନ ୩ଟାରେ ଉତ୍ତମ ନଗରରେ ଥିବା ଏକ ବିପିଓରେ ପ୍ରସ୍ତୁତ କରାଯାଇଛି। ଏଥିରେ ଅଭିଯୁକ୍ତ ରୋହିତ ତୋମର ହେଉଛନ୍ତି ଜଣେ ପୋଲିସ ସବ୍‌ଇନ୍ସପେକ୍ଟରଙ୍କ ପୁଅ। ସେ ଜଣେ ଯୁବତୀଙ୍କୁ ଦେଢ ବର୍ଷ ତଳେ ଭଲପାଇ ବସିଥିଲେ। ଉଭୟଙ୍କ ମଧ୍ୟରେ ଥିବା ପ୍ରେମସମ୍ପର୍କ କିନ୍ତୁ କୌଣସି କାରଣରୁ ଭାଙ୍ଗି ଯାଇଥିଲା। ହେଲେ ରୋହିତ ଏକଥା ଭୁଲି ନ ପାରି ଉକ୍ତ ଯୁବତୀଙ୍କୁ ବିବାହ କରିବାକୁ ଜିଦ୍‌ ଧରିଛନ୍ତି ଓ ଶେଷରେ ତାଙ୍କୁ ମାଡ ମଧ୍ୟ ମାରିଛନ୍ତି। କେବଳ ସେତିକି ନୁହେଁ ଯୁବତୀଙ୍କ ସମେତ ତାଙ୍କ ପରିବାର ଲୋକଙ୍କୁ ଧମକାଉଥିବା ପୀଡିତାଙ୍କର ଜଣେ ସାଙ୍ଗ ପୋଲିସରେ ଅଭିଯୋଗ କରିଛନ୍ତି। ତେବେ ଅଭିଯୋଗ ପାଇବା ପରେ ପୋଲିସ ଉଭୟ ରୋହିତ ଓ ତାଙ୍କ ପିତାଙ୍କୁ ଗିରଫ କରି ଘଟଣାର ଯାଞ୍ଚ ଆରମ୍ଭ କରିଛି। ଅନ୍ୟପଟେ ଏହି ଭିଡିଓ ଭାଇରାଲ ହେବା ପରେ ସ୍ବରାଷ୍ଟ୍ର ମନ୍ତ୍ରୀ ରାଜନାଥ ସିଂ ଘଟଣାର ତଦନ୍ତ ନିର୍ଦ୍ଦେଶ ଦେଇଛନ୍ତି।