ଭୁବନେଶ୍ୱର,୧୨।୯(ବ୍ୟୁରୋ): ପୂର୍ବତନ ମନ୍ତ୍ରୀ ତଥା ବିଧାୟକ ଦାମୋଦର ରାଉତଙ୍କ ସରକାର ବିରୋଧୀ ମନ୍ତବ୍ୟକୁ ନେଇ ବିଜେଡିରେ ଝଡ ସୃଷ୍ଟି ହୋଇଛି। କିଛିଦିନ ଧରି ସେ ସରକାରଙ୍କ ବିରୋଧରେ ଚାରା, ଓମ୍ଫେଡ୍ ଏବଂ ସମବାୟ ବିଭାଗରେ ହୋଇଥିବା ଦୁର୍ନୀତି ଅଭିଯୋଗ ଆଣିଥିଲେ। ଏହାକୁ ନେଇ ଜଗତ୍ସିଂହପୁର ବିଜେଡିରେ ତାଙ୍କୁ ବିରୋଧ କରାଯାଇଥିଲା। ଏପରି କି ତାଙ୍କ ବିରୋଧରେ ସୋମବାର ମୁଖ୍ୟମନ୍ତ୍ରୀଙ୍କ ନିକଟରେ ଜଗତ୍ସିଂହପୁର ପୂର୍ବତନ ବିଧାୟକ ତଥା ରାଜ୍ୟ ଯୋଜନା ବୋର୍ଡର ଉପାଧ୍ୟକ୍ଷ ବିଷ୍ଣୁ ଚରଣ ଦାସ ଏବଂ ଏରସମା-ବାଲିକୁଦା ବିଧାୟକ ପ୍ରଶାନ୍ତ ମୁଦୁଲି ଫେରାଦ ହୋଇଥିଲେ। ଦଳ ବିରୋଧୀ କାର୍ଯ୍ୟ ପାଇଁ ଦାମଙ୍କ ବିରୋଧରେ କାର୍ଯ୍ୟାନୁଷ୍ଠାନ ନେବାକୁ ଉଭୟେ ଦାବି କରିଥିଲେ । ଏହାର ଦିନକ ପରେ ଅର୍ଥାତ ମଙ୍ଗଳବାର ଏରସମା ଏବଂ ବାଲିକୁଦା ଅଞ୍ଚଳର ଶତାଧିକ ବିଜେଡି କର୍ମୀ ନବୀନ ନିବାସ ଠାରେ ଦାମଙ୍କ ବହିଷ୍କାର ଦାବି କରିଛନ୍ତି। କେତେକ ଲିଖିତ ଆକାରରେ ମଧ୍ୟ ସେମାନଙ୍କ ଅଭିଯୋଗ ଦେଇଛନ୍ତି ବୋଲି ବିଧାୟକ ମୁଦୁଲି କହିଛନ୍ତି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ନୂଆଦିଲ୍ଲୀ ଗସ୍ତ କରିବା ପୂର୍ବରୁ ନବୀନ ନିବାସ ଠାରେ ଗଣମାଧ୍ୟମକୁ କହିଛନ୍ତି ଯେ ଦାମ ରାଉତଙ୍କ ବିରୋଧରେ ଅନେକ ଅଭିଯୋଗ ଆସିଛି। ଏହାକୁ ଅନୁଧ୍ୟାନ କରାଯାଉଛି ବୋଲି କହିଛନ୍ତି। ମୁଖ୍ୟମନ୍ତ୍ରୀଙ୍କ ଏଭଳି ମନ୍ତବ୍ୟ ପରେ ଦାମଙ୍କୁ ଦଳରୁ ବହିଷ୍କାର କରିବା ନେଇ ଚର୍ଚ୍ଚା ଜୋର୍ ଧରିଛି। ତାଙ୍କ ବିରୋଧରେ ହେଉଥିବା ଅଭିଯୋଗ ସମ୍ପର୍କରେ ଗଣମାଧ୍ୟମ ପ୍ରତିନିଧି ପଚାରିବାରୁ ଦାମ କହିଲେ ଯେ ସେ ବିଚଳିତ ନୁହନ୍ତି । ଦାମ କହିଛନ୍ତି ଯେ, ମୋତେ ମନ୍ତ୍ରିମଣ୍ଡଳରୁ ବହିଷ୍କାର କରାଯାଇଛି। ଦଳର ଉପସଭାପତି ପଦବୀ ଏବଂ ଜିଲା ପର୍ଯ୍ୟବେକ୍ଷକ ପଦରୁ ମଧ୍ୟ ବହିଷ୍କାର କରାଯାଇଛି। ଏବେ ଆଉ କେଉଁ ଥିରେ ଅଛି ଯେ ମୋ ବିରୋଧରେ ଅଧିକ କାର୍ଯ୍ୟାନୁଷ୍ଠାନ ନିଆଯିବ। ଅରୁଣ ସାହୁ , ବବି ଦାସ, ଦେବାଶିଷ ସାମନ୍ତରାୟ ଓ ଜଣେ ଅଫିସର ଚଳାଉଥିବା ବିଜେଡିରେ ମୁଁ ନାହିଁି। ମୁଁ ବିଜୁ ଜନତା ଦଳ ବିଧାୟକ । ଯେଉଁ ଦିନ ବିଜୁ ଶବ୍ଦ ଉଠିଯିବ ସେଦିନ ମୁଁ ଦଳରେ ନ ଥିବି ବୋଲି ଦାମ କହିଛନ୍ତି। ସେ ବିଷ୍ଣୁ ଦାସ ଓ ପ୍ରଶାନ୍ତ ମୁଦୁଲିଙ୍କୁୁ ଟାର୍ଗେଟ କରି କହିଛନ୍ତି ଯେ, ଦଳୀୟ କର୍ମୀମାନଙ୍କୁ ଟଙ୍କା ଦେଇ ମୋ ବିରୋଧ ବିକ୍ଷୋଭ କରିବାକୁ କୁହାଯାଇଛି। ସମସ୍ତେ ଜାଣିଛନ୍ତି ଦଳ ବିରୋଧୀ କାର୍ଯ୍ୟରେ କିଏ ନିୟୋଜିତ ଅଛନ୍ତି ।
ସୋମବାର ଉଭୟ ବିଷ୍ଣୁ ଓ ପ୍ରଶାନ୍ତ ମୁଖ୍ୟମନ୍ତ୍ରୀଙ୍କ ନିକଟରେ ଅଲଗା ଅଲଗା ଲିଖିତ ଅଭିଯୋଗ ପ୍ରଦାନ କରିଛନ୍ତି। ଏରସମା-ବାଲିକୁଦା ଅଞ୍ଚଳର ହଜାର ହଜାର ବିଜେଡି କର୍ମୀ ନବୀନ ନିବାସରେ ପହଞ୍ଚି ଦାମ ରାଉତଙ୍କୁ ଦଳ ବିରୋଧୀ କାର୍ଯ୍ୟ ପାଇଁ ବିହିଷ୍କାର କରିବା ସକାଶେ ମୁଖ୍ୟମନ୍ତ୍ରୀଙ୍କୁ ଦାବିପତ୍ର ପ୍ରଦାନ କରିଛନ୍ତି। ମହିଳା ଓ ଶିଶୁ ବିକାଶ ମନ୍ତ୍ରୀ ପ୍ରଫୁଲ୍ଲ ସାମଲ କହିଛନ୍ତି ଯେ, ଦାମବାବୁ ଯେତେବେଳେ ମନ୍ତ୍ରୀ ପଦରେ ଥିଲେ ସେତେବେଳେ ବିଭିନ୍ନ ଘୋଟାଲା ସମ୍ପର୍କରେ ଅଭିଯୋଗ ଆଣିପାରି ଥାଆନ୍ତେ। ଏବେ ମନ୍ତ୍ରୀ ପଦରୁ ବାହାରିବା ପରେ ଏଭଳି ମନ୍ତବ୍ୟ ଦେବା ଠିକ୍ ନୁହେଁ । ଏହା ଉଭୟ ସରକାରୀ ଓ ଦଳୀୟ ବିରୋଧୀ ମନ୍ତବ୍ୟ ବୋଲି ସେ କହିଛନ୍ତି। ବିଷ୍ଣୁ ଦାସ କହିଛନ୍ତି, ଦାମଙ୍କ ନାମରେ ଯାହା ଅଭିଯୋଗ କରିବା କଥା କରିଛୁ। ମୁଖ୍ୟମନ୍ତ୍ରୀ ଏବେ ଯାହା ନିଷ୍ପତ୍ତି ନେବେ । ପ୍ରଶାନ୍ତ ମୁଦୁଲି କହିଛନ୍ତି, ଆମର ଦଳୀୟ କର୍ମୀ ଦାମବାବୁଙ୍କ ଦଳ ବିରୋଧୀ ବୟାନରେ ପ୍ରଭାବିତ ହୋଇଛନ୍ତି। ଦୀର୍ଘଦିନ ଧରି ସେ ଯେଉଁ ଦଳ ବିରୋଧୀ କାର୍ଯ୍ୟ କରୁଛନ୍ତି ତାଙ୍କ ବିରୋଧରେ ସମସ୍ତେ ମୁଖ୍ୟମନ୍ତ୍ରୀଙ୍କ ନିକଟରେ ଫେରାଦ ହୋଇଛନ୍ତି। ବିରୋଧୀ ଦଳ ନେତା ନରସିଂହ ମିଶ୍ର କହିଛନ୍ତି ଯେ, ଦାମବାବୁ ଜଣେ ବରିଷ୍ଠ ନେତା। ଯେଉଁ ଅଭିଯୋଗ ଆଣୁଛନ୍ତି ଗୃହ ଭିତରେ ତାହା କହିଲେ ଭଲ ହୁଅନ୍ତା।
ଏଠାରେ ସୂଚନା ଯୋଗ୍ୟ ଦାମ ବିଭିନ୍ନ ସମୟରେ ବିବାଦୀୟ ବୟାନ ଦେଇ ଚର୍ଚ୍ଚାକୁ ଆସିଛନ୍ତି। ଏହା ବଦଳରେ ତାଙ୍କୁ ମନ୍ତ୍ରୀ ପଦ ସହ ଦଳୀୟ ପଦବୀ ମଧ୍ୟ ହରାଇବାକୁ ପଡିଛି। ବ୍ରାହ୍ମଣ, ଅଙ୍ଗନଓ୍ବାଡି କର୍ମୀ, ଚାଷୀ ଆତ୍ମହତ୍ୟା, ଜୟୀ ରାଜଗୁରୁଙ୍କ ଉପରେ ମନ୍ତବ୍ୟ ଦେଇ ସେ ବିବାଦୀୟ ହୋଇ ପଡିଥିଲେ। ଦାମଙ୍କ ବିରୋଧରେ ଦଳୀୟ କାର୍ଯ୍ୟାନୁଷ୍ଠାନ ନେଇ ଜଗତ୍ସିଂହପୁର ଜିଲାରୁ ପ୍ରବଳ ଚାପ ସୃଷ୍ଟି କରାଯାଉଥିବା ବେଳେ ଦଳର ସଭାପତି ତଥା ମୁଖ୍ୟମନ୍ତ୍ରୀ କି ପଦକ୍ଷେପ ନେଉଛନ୍ତି ତାହା ଉପରେ ଏବେ ସମସ୍ତଙ୍କ ନଜର।
