ସୁନ୍ଦର ଆଖି, ନାକ, ଓଠ, କାନ ଥିବା ମଣିଷର ଚେହେରା ଲାଗେ ଭାରି ଆକର୍ଷକ। ହେଲେ ମୃତ୍ୟୁ ପରେ ଏଇ ଚେହେରା ପଛର ଖପୁରି କିନ୍ତୁ ଲାଗେ ଭାରି ଭୟାନକ। ତାକୁ ଦେଖିଦେଲେ ଲୋମଟାଙ୍କୁରି ଉଠେ। ହେଲେ କଲମ୍ବିଆର କାଲାକା ସ୍କଲ ନାମକ ଜଣେ ୨୨ ବର୍ଷୀୟ ଟାଟୁ ଆର୍ଟିଷ୍ଟ ନିଜ ଚେହେରାକୁ ଖପୁରିରେ ରୂପାନ୍ତରିତ କରିଦେଇଛନ୍ତି। ଭାବି ଆଶ୍ଚର୍ଯ୍ୟ ହେଉଥିବେ ଚେହେରାକୁ ଖପୁରି ପରି କିଭଳି କରିହେବ? ତେବେ କାଲାକା ବିଭିନ୍ନ ସର୍ଜରି ଓ ଟାଟୁ କରି ନିଜ ମୁହଁକୁ ଖପୁରିର ରୂପ ଦେଇଛନ୍ତି। ତେବେ ତାଙ୍କର ପ୍ରକୃତ ନାମ ହେଉଛି ଏରିକ୍ ୟେଇନର ହିନ୍କ୍ୟାପି ରମିରେଜ୍। ପିଲାଦିନୁ ତାଙ୍କ ଭିତରେ ଖପୁରିକୁ ନେଇ ଭଲ ପାଇବା ଓ ଆକର୍ଷଣ ଥିଲା। ଆଉ ନିଜ ଚେହେରାକୁ ବି ସେ ଖପୁରିରେ ରୂପାନ୍ତରିତ କରିବାକୁ ଚାହୁଁଥିଲେ। ହେଲେ ତାଙ୍କ ମା’ ଏହାକୁ ବିରୋଧ କରୁଥିଲେ। ଦୁଇ ବର୍ଷ ତଳେ କାଲାକାଙ୍କ ମା’ ମୃତ୍ୟୁବରଣ କଲେ। ଏହାପରେ ହିଁ ସେ ଚେହେରାକୁ ଖପୁରିରେ ରୂପାନ୍ତରିତ କରିବା ଆରମ୍ଭ କଲେ। ପ୍ରଥମେ ସେ ନାକର ତଳ ଭାଗରୁ ଅଧା କାଟିଲେ। କାରଣ ଖପୁରିର ନାକ ନ ଥାଏ। ଏହାସହିତ ଦୁଇ କାନର ବାହ୍ୟ ଅଂଶକୁ ବି କାଟିଦେଲେ। ଜିଭକୁ ଦୁଇ ଫାଳ କରି କାଟି ତାକୁ ଟାଟୁ ଦ୍ୱାରା ନୀଳ ଓ ଧୂସର ମିଶ୍ରିତ ରଙ୍ଗରେ ଟାଟୁ କରାଇଲେ। ଆଖିର ଧଳା ଅଂଶକୁ ବି କଳା କରାଇଲେ। କାନମୂଳଠାରୁ ଦୁଇ ଓଠ ଚାରିପଟେ ବିରାଟକାୟ ଦନ୍ତମାଳାର ଟାଟୁ କରିଛନ୍ତି। ଆଖି ଚାରିପଟେ ମୋଟା କଳା ରଙ୍ଗର ଟାଟୁ କରାଇଛନ୍ତି ଯେମିତିକି ତାହା ଆଖିର କୋରଡ ପରି ଲାଗିବ। କାଲାକା ହେଉଛନ୍ତି କଲମ୍ବିଆର ପ୍ରଥମ ବ୍ୟକ୍ତି, ଯିଏକି ନିଜର ନାକ ଓ ଦୁଇ କାନ କାଟିଛନ୍ତି। ଲୋକେ ତାଙ୍କୁ ଦେଖି ଭୟ କରନ୍ତି, ଅନେକେ ତାଚ୍ଛଲ୍ୟ ବି କରନ୍ତି। କେହି କେହି ପାଗଳ ବି କହନ୍ତି। ହେଲେ କାଲାକାଙ୍କ ଉପରେ ଏହାର ପ୍ରଭାବ ପଡି ନ ଥାଏ। ସେ ନିଜର ଏହି ଲୁକ୍କୁ ନେଇ ବେଶ୍ ସନ୍ତୁଷ୍ଟ। ସେ କୁହନ୍ତି, ମୁଁ ବି ଅନ୍ୟମାନଙ୍କ ଭଳି ସାଧାରଣ ମଣିଷ। ହେଲେ ଚେହେରା ଅସାଧାରଣ।
