ନୂଆଦିଲ୍ଲୀ,୧୦।୮: ସାମଗ୍ରୀ ଓ ସେବା ଟିକସ (ଜିଏସ୍ଟି) ଲାଗୁ ହେବା ଯୋଗୁ ବଜାର ଉପରେ ଏହାର ପ୍ରଭାବ ରହିଛି। ଜିଏସ୍ଟିରେ ରହିଥିବା ବିଭିନ୍ନ ଅସୁବିଧା ଫଳରେ ବିଶେଷ କରି କ୍ଷୁଦ୍ର ବାଣିଜ୍ୟଗୁଡିକ ପ୍ରଭାବିତ ହୋଇଛନ୍ତି। ଏପରି ସ୍ଥିତିରେ ଟିକସ ଅନୁପାଳନ ବ୍ୟବସ୍ଥାକୁ ସରଳୀକରଣ କରିବା ଉପରେ ବିଜୁ ଜନତା ଦଳ (ବିଜେଡି) ଏମ୍ପି କଳିକେଶ ନାରାୟଣ ସିଂହଦେଓ ଜିଏସ୍ଟି ସଂଶୋଧନ ବିଲ୍ ଉପରେ ହୋଇଥିବା ଆଲୋଚନାରେ ଏହା କହିଛନ୍ତି। ଜିଏସ୍ଟି କାର୍ଯ୍ୟକାରୀ ହେଲେ ଏକକ ଦେଶ ଏକକ ଟିକସ ବ୍ୟବସ୍ଥା ଲାଗୁ ହେବ ବୋଲି କୁହାଯାଇଥିଲା। ମାତ୍ର ବର୍ତ୍ତମାନର ସ୍ଥିତି ବାସ୍ତବ ପକ୍ଷେ ପ୍ରକୃତ ଉଦେଶ୍ୟଠାରୁ ବହୁ ଭିନ୍ନ ବୋଲି କଳିକେଶ କହିଛନ୍ତି।
ବାଣିଜି୍ୟକ ସଂସ୍ଥାଗୁଡିକ ବର୍ତ୍ତମାନ ଅସୁବିଧା ସାମ୍ନା କରୁଥିବାରୁ ଜିଏସ୍ଟି ଆଇନରେ ନିତାନ୍ତ ସଂଶୋଧନ ଆବଶ୍ୟକତା ରହିଛି ବୋଲି ସେ ଗୁରୁତ୍ୱାରୋପ କରିଛନ୍ତି। ଅଣୁ କ୍ଷୁଦ୍ର ମଧ୍ୟମ ଉଦ୍ୟୋଗ(ଏମ୍ଏସ୍ଏମ୍ଇ) ଦେଶରେ ୮୦% ନିଯୁକ୍ତି ସୃଷ୍ଟିରେ ଦିଗରେ କାର୍ଯ୍ୟ କରୁଛନ୍ତି। ମାତ୍ର ଜିଏସ୍ଟି ଭଳି ଜଟିଳ ଟିକସ ବ୍ୟବସ୍ଥା ଯୋଗୁ ସଂସ୍ଥାଗୁଡିକ ବର୍ତ୍ତମାନ ଚାର୍ଟାର୍ଡ ଆକାଉଣ୍ଟାଣ୍ଟଙ୍କ ଉପରେ ଅତିଶୟ ନିର୍ଭର କରୁଥିବା ଦେଖାଯାଉଛି। ଟିକସ ବ୍ୟବସ୍ଥାକୁ ସରଳ ଏବଂ ସହଜ କରାଗଲେ ଦେଶବାସୀ ଏହା ଦ୍ୱାରା ଲାଭବାନ ହେବା ସହ ଅନୁପାଳନ ଉନ୍ନତ ହେବ ବୋଲି ସେ ସ୍ପଷ୍ଟ କରିଛନ୍ତି।
