ଲଣ୍ଡନ,୧୧।୭(ପି.ଟି.)- ଭାରତୀୟ ଟେନିସ୍ ଖେଳାଳି ଦିଭିଜ ଶରନ ଓ ଆର୍ତେମ ସିତାକ ଚଳିତ ଓ୍ବିମ୍ବେଲଡନ ଓପନ ପୁରୁଷ ଡବଲ୍ସ ବର୍ଗରେ ଚାଲିଥିବା ଉଲ୍ଲେଖନୀୟ ଅଭିଯାନର ବୁଧବାର ଅନ୍ତ ଘଟିଛି। ଇଣ୍ଡୋ-କିଓ୍ବି ଖେଳାଳିଙ୍କୁ ଏକ ସଂଘର୍ଷପୂର୍ଣ୍ଣ କ୍ୱାର୍ଟର ଫାଇନାଲରେ ଅଭିଜ୍ଞ ଆମେରିକୀୟ ମାଇକ ବ୍ରାୟାନ ଓ ଜ୍ୟାକ ସକ୍ଙ୍କ ଯୋଡ଼ି ହରାଇ ଦେଇଛନ୍ତି। ଶରନ ଓ ଆର୍ତେମଙ୍କ ଯୋଡ଼ି ୬-୭ (୪/୭), ୬-୭(୫/୭), ୭-୬(୭/୩), ୪-୬ ସେଟ୍ରେ ପରାସ୍ତ ହୋଇଛନ୍ତି। ଦୀର୍ଘ ୩ ଘଣ୍ଟା ୧୪ ମିନିଟ୍ ଧରି କଡ଼ା ସଂଘର୍ଷ ପରେ ଶରନ ଓ ସିତାକ ଯୋଡ଼ି ଅଭିଯାନର ଅନ୍ତ ଘଟିଛି। ”ଟୁର୍ନାମେଣ୍ଟର ଆଗାମୀ ରାଉଣ୍ଡକୁ ଉନ୍ନୀତ ହେବା ଲାଗି ଏହି ମ୍ୟାଚ୍ ଆମ ପାଇଁ ଏକ ବଡ଼ ସୁଯୋଗ ଥିଲା। ମାଇକ ଓ ସକ୍ଙ୍କ ସହ ଏହା ଏକ ସଂଘର୍ଷପୂର୍ଣ୍ଣ ମୁକାବିଲା ଥିଲା। ବିଶ୍ୱର ଶୀର୍ଷ ର଼୍ୟାଙ୍କଧାରୀ ଖେଳାଳିଙ୍କ ବିପକ୍ଷରେ ଯଦିଓ ଆମେ ପରାଜିତ ହୋଇଛୁ, କିନ୍ତୁ ଆମେ ଭଲ ପ୍ରଦର୍ଶନ କରିଛୁ“ ବୋଲି ଶରନ କହିଛନ୍ତି।
