ଭୁବନେଶ୍ୱର, ୧୧।୭(ବ୍ୟୁରୋ)- ଜାତୀୟ ଖାଦ୍ୟ ସୁରକ୍ଷା ଯୋଜନା(ଏନ୍ଏଫ୍ଏସ୍ଏ)ରେ ମୃତ ବ୍ୟକ୍ତିମାନେ ଚାଉଳ, ଗହମ ଖାଉଛନ୍ତି। ମୃତ୍ୟୁ ପରେ ମଧ୍ୟ ସେମାନେ ମୁଣ୍ଡ ପିଛା ୫ କିଲୋଗ୍ରାମ ଚାଉଳ କିମ୍ବା ଗହମ ନେଉଛନ୍ତି। ସେମାନଙ୍କ ନାମରେ ଖାଦ୍ୟ ସାମଗ୍ରୀ ହରିଲୁଟ ହେଉଛି। ରାଜ୍ୟର ବିଭିନ୍ନ ଜିଲାରୁ ୩ ଲକ୍ଷ ୧୮ ହଜାର ୮୪୨ ମୃତ ବ୍ୟକ୍ତିଙ୍କ ନାମରେ ଚାଉଳ ଉଠାଯାଉଥିବା ଜଣାପଡିଛି। ଏନ୍ଏଫ୍ଏସ୍ଏ ଡାଟାବେସ ଦ୍ୱାରା ଏହି ଜାଲିଆତି ପଦାକୁ ଆସିଛି।
ମିଳିଥିବା ସୂଚନା ଅନୁଯାୟୀ, ଅନୁଗୋଳ ଜିଲାରେ ୧୨୭୨୬ ଜଣ ମୃତ ବ୍ୟକ୍ତିଙ୍କ ତଥ୍ୟ ମିଳିଥିବା ବେଳେ ବାଲେଶ୍ୱର ୧୮୧୩୩, ବରଗଡ ୧୧୪୮୫, ଭଦ୍ରକ ୧୧୧୯୨, ବଲାଙ୍ଗୀର ୮୧୩୦, କଟକ ୨୨୩୦୮, ଦେବଗଡ ୨୮୨୨, ଢେଙ୍କାନାଳ ୭୬୨୩, ଗଜପତି ୫୫୨୦, ଗଞ୍ଜାମ ୩୦୩୯୩, ଜଗତ୍ସିଂହପୁର ୮୨୮୨, ଯାଜପୁର ୭୭୬୨, ଝାରସୁଗୁଡା ୪୧୫୭, କଳାହାଣ୍ଡି ୧୪୪୦୧, କନ୍ଧମାଳ ୪୮୭୫, କେନ୍ଦ୍ରାପଡା ୧୦୧୨୧, କେନ୍ଦୁଝର ୬୯୯୭, ଖୋର୍ଦ୍ଧା ୧୧୧୬୯, କୋରାପୁଟ ୧୯୨୨୨, ମାଲକାନଗିରି ୫୨୭୯, ମୟୂରଭଞ୍ଜ ୨୭୫୪୭, ନବରଙ୍ଗପୁର ୧୦୬୭୫, ନୟାଗଡ ୪୧୯୮, ନୂଆପଡା ୫୦୦୨, ପୁରୀ ୭୮୪୧, ରାୟଗଡା ୮୫୭୪, ସମ୍ବଲପୁର ୧୧୫୦୪, ସୋନପୁର ୪୮୮୭ ଏବଂ ସୁନ୍ଦରଗଡ ଜିଲାରେ ସେହି ସଂଖ୍ୟା ୧୧୦୮୯। ଏମାନଙ୍କୁ ହଟାଇ ଦିଆଯାଇଥିବା ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି। ଏହାଛଡା ରାଶନକାର୍ଡଧାରୀ ପରିବାରର କୌଣସି ସଦସ୍ୟଙ୍କ ଦେହାନ୍ତ ହେଲେ ତାହା ଧରା ପଡୁ ନ ଥିଲା। ହିତାଧିକାରୀ ମଧ୍ୟ ଏ ନେଇ ସୂଚନା ଦେଉ ନ ଥିଲେ। ଏହାକୁ ମଧ୍ୟ ଠାବ କରାଯାଇପାରୁ ନ ଥିଲା। ଏଭଳି ଜାଲିଆତିକୁ ରୋକିବା ପାଇଁ ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର, ହରିଶ୍ଚନ୍ଦ୍ର ଯୋଜନା ତଥ୍ୟ, ପଞ୍ଚାୟତ ସମ୍ପ୍ରସାରଣ ଅଧିକାରୀ ଏବଂ ଯୋଗାଣ ଅଧିକାରୀଙ୍କ ତଥ୍ୟକୁ ଭିତ୍ତିକରି ଏକ ଡାଟାବେସ ପ୍ରସ୍ତୁତ କରାଯାଇଛି। ଏହି ତଥ୍ୟ ଆଧାରରେ ୩ ଲକ୍ଷ ମୃତ ହୀତାଧିକାରୀ ଧରା ପଡିଛନ୍ତି। ଏହାଛଡା ଆହୁରି ଅନେକ ମୃତ ବ୍ୟକ୍ତି ଅଛନ୍ତି, ଯେଉଁମାନଙ୍କର ନାମ ମୃତ୍ୟୁ ପଞ୍ଜୀକରଣ ତାଲିକାରେ ରହିନାହିଁ। ଫଳରେ ସେମାନଙ୍କ ନାମ ମଧ୍ୟ ତାଲିକାରୁ ବାଦ ଦିଆଯାଇପାରି ନାହିଁ। ମୃତ ବ୍ୟକ୍ତି ଖାଦ୍ୟ ସାମଗ୍ରୀ ନେଉଥିବା ବେଳେ ଗରିବ ହିତାଧିକାରୀ କାର୍ଡ ପାଉ ନ ଥିବା ଅଭିଯୋଗ ହେଉଛି। ଅନ୍ୟପକ୍ଷରେ ସାଧାରଣ ବଣ୍ଟନ ବ୍ୟବସ୍ଥା ଜରିଆରେ ଯୋଗାଇ ଦିଆଯାଉଥିବା ରାଶନ ସାମଗ୍ରୀ ବିକ୍ରିରେ ହେରଫେର ହେଉଥିବା ଅଭିଯୋଗ ହେଉଛି। ଖାଦ୍ୟ ସାମଗ୍ରୀ ହଡପ ରୋକିବାକୁ ଏନ୍ଏଫ୍ଏସ୍ଏ ବ୍ୟବସ୍ଥାରେ ପଏଣ୍ଟ ଅଫ ସେଲ(ପିଓଏସ) ମେଶିନ ବ୍ୟବହାର କରାଯାଉଛି। ଏଥିଯୋଗୁ ଖାଦ୍ୟ ସାମଗ୍ରୀ ହଡପ ରୋକାଯାଇ ପାରିଥିବା ବେଳେ ଓଜନରେ ଗ୍ରାହକଙ୍କୁ ଲୁଟ କରାଯାଉଥିବା ବିଭିନ୍ନ ଜିଲାରୁ ତଥ୍ୟ ହସ୍ତଗତ ହେଉଛି। ଏହାକୁ ରୋକିବା ପାଇଁ ବିଭାଗ ପକ୍ଷରୁ ପଦକ୍ଷେପ ନିଆଯାଉ ନ ଥିବାରୁ ଏନ୍ଏଫ୍ଏସ୍ଏ ହିତାଧିକାରୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।
